История
Достопримечательности
Окрестности
Церкви округи
Фотогалерея
Сегодняшний день
Библиотека
Полезная информация
Форум
Гостевая книга
Карта сайта

Поиск по сайту

 

Памятные даты:

 

Праздники

Памятные даты

 

Наши сайты:


Подготовьте себя заранее к поездке в

Ферапонтово

http://www.ferapontov-monastyr.ru/
http://ferapontov-monastyr.ru/catalog/
http://www.ferapontovo-pilgrim.ru
http://www.ferapontovo-archive.ru
http://www.ferapontovo-foto.ru/
http://www.ferapontov.ru/
http://www.patriarch-nikon.ru/
http://www.tsipino.ru/
http://a-russian-troika.ru
http://a-hippotherapy.ru

Прогноз погоды:


Ферапонтово >>>


Яндекс.Погода


На главную Карта сайта Написать письмо

На главную Библиотека ПАТРИАРХ НИКОН В ФЕРАПОНТОВОМ МОНАСТЫРЕ Патриарх Никон. Труды. Разрешительные грамоты Вселенских Патриархов

РАЗРЕШИТЕЛЬНЫЕ ГРАМОТЫ ВСЕЛЕНСКИХ ПАТРИАРХОВ


РАЗРЕШИТЕЛЬНЫЕ ГРАМОТЫ ВСЕЛЕНСКИХ ПАТРИАРХОВ1


— Грамоты Патриарха Иерусалимского и всея Палестины Досифея >>>;

— грамота Патриарха Константинопольского Иакова >>>;

— грамота Папы и Патриарха Александрийского Парфения >>>;

— грамота Патриарха Антиохийского и всего Востока Неофита >>>;

— грамота Патриарха Антиохийского и всего Востока Кирилла >>>


Досифей, милостию Божиею Патриарх святаго града Иерусалима и всея Палестины


Благочестивейший, христианнейший, Богом венчанный, Богом дарованный, Богом почтенный, Богом сохранимый, Богом прославимый, Богом любезнейший, христолюбивый, державнейший, тишайший, счастливейший, благополучнейший, преславнейший, приснопрепочтенный подобниче, милостью Божией Великий Царь и Великий Князь Государь Федор Алексеевич, всея великия и малыя и белыя России самодержец, и многих государств и земель восточных и западных и северных отчич и дедич и наследник Государь и обладатель, во Святом Дусе сыне возлюбленный и прежелаемый нашего умерения! Ваше державное и Богом венчанное Царствие молитвою осеняем и благословляем и лобызаем святым и апостолским лобызанием, моляще владыку Христа, Им же Царие царствуют, воеже даровати вам здоровье, долгоденствие, мирное состояние и сохранити под кровом крил Его, славнаго Победителя и Победоносца, и покорити вам враги ваши, якоже Давиду и Константину, Феодосию и Иустиниану, и разширити и умножити вас в похвалу кафолической и всехвальной Евангельской веры и всех боящихся Господа душевныя радости и веселия, аминь.

Пребожественныя святаго вашего Царствия грамоты восприяхом через посла вашего Прокопия Богданова сына Возницына и писанное в них выразумехом, и благодарим Вашему Царскому Величеству, яко имеете и нас, богомольцев ваших, в памяти вашей, Господь Бог да воздаст вам мзду во неустаремом блаженстве; восприяхом и двести пятьдесят тарелей, и еще милостыню и сущим во святом граде пречестным местам и священным монастырям, и сих ради благодарим вашему Державству. Мы, тишайший Самодеожче! родителей и прародителей и праотцев и теток и сестер и братию и благочестивейшую вашу, Богом венчанную, Царицу воспоминаем во всех пречестных монастырях и святых местах, и наипаче у святаго и многоценнаго Спаса нашего гроба, егоже держаше Латини толикое время в руках своих и служаше, и ныне прежде седми лет, мановением Божиим, иже при нас, превысочайший Самодержец! радением прежде умершаго и нынешняго преславнейшаго наместника Царствия Его, даде его нам, якоже отеческую благочестивых похвалу и венец и славу превышшую, и Литургию служат внутри, в Кувуклии, по вся дни православные, и тамо Царствие ваше и всесвятое ваше сродничество имеют по вся дни частицу в предложении и к Богу моление, идеже ниединый иный Государь, иже украшается Христовым именем, сицевой чести и славы не усподобится имети; но и блаженнаго и приснопамятнаго Великаго Царя Алексея Михайловича и приснопамятную усопшую супружницу вашу в вечной памяти совершенно воспоминахом в новом Иерусалиме во святом и пречестном храме Христова нашего Воскресения, и отселе имеем дело изрядное молити Господа Бога, воеже совершити вашего Царствия прошения небесныя и земныя. О прошении же кир Никона мы, по нашей силе, радехом и грамоты все изобразихом, и совершим дело по намерению вашего Державства, или паче рещи, но разсмотрению святаго Бога, иже глаголати в вашем сердце: и радели есте правды ради и познашася у Бога и человеческое правословное и доброе ваше произволение; зане аще, аки человек, и оный в них употребися безчинно и наказася правдою, но понеже крайнейше покаяся, благо и праведно сотвори святое ваше Царствие и пораде о прощении его. Притом радуемся зело, яко ваше Державство церковью действует церковная, и молимся совершенным духовным дерзновением, яко и впредь всякое дело церковное не действовати и кроме мысли Церкви: аще будет малое дело, действовати соборною мыслию тамошния святыя Церкви; аще же великое, мыслию великих Архиереев Восточных действовати, воеже быти всем церковным делам без обновления, без претворения и неколеблемо, и порадей, яко Константин и Феодосий и Иустиниан, и наипаче, якоже сотвори блаженный отец Ваш приснопамятный Царь Алексей Михайлович. Нигде же во всем Царствии вашем да не поволиши быти никакому обновлению против Православной веры и на противоглаголющих отомстися; поборяюще бо Царствие ваше ради Православной веры, поборяет Бог ради святаго вашего Царствия, и наипаче никие руси из Литвы унияты, диавольские органы, преобразившися во ангела света проходят, яко православные, и лицемерием и сладкими своими словесами прельстят сердца простых, о них же глаголаше блаженный Павел: имеют изображение благочестия, а силы его отрицаются. О тех же просим, да укажите великим повелением, да не входят в пределы вашего святаго Царствия; сие дело, о нем же молимся, святый Царю! есте дело древнее и, яко речеся, святым Царем свойственное, еже действуя, Царствие ваше сочтен будеши от Жениха Церковь Владыки Христа во апостолском лике, аминь.

Великому послу вашего святаго Царствия в чем поспешествовахом, сам да свидетельствует, но и он, великий посол, сиречь Прокопий, постоя, яко никто иный, поборяя и подвизаяся, воеже приимати конец благополучный повеления вашего, разумный и честный человек и поистине почте службу себе врученную, и немоществовавшу ему, яко страна здешняя имеет обычай: и когда договорится кто с ними, треба есть впервых совершити чисто всякое дело с великим разсмотрением, и тогда посла послать; сице немцы, договоряся о мире, первые поставили все запросы свои целы и без скудости и согласися, яко от обоих стран приидти послам, и каковыя чести людям послом быти и где послам сойтися, и ехать одному в одну страну, а другому в другую, и сице по согласию сотворено совершенство. Притом моляще устремихом великаго посла вашего Державства, и ходатайством его созидается единая церковь посреде Цареграда, на улице, именуемой Копдоскалеон, еже почитается по имени Пресвятые Богородицы, глаголемой Елпида, еже есть Надежда, многих ради чудес и предивных, их же сотворит, в ней же есть и придел по имени святаго Феодора Стратилата. На той улице бяше седмь церквей и во время Салтана Ибрагима сгореша, и поволил их обновить, и того ради потом вину на него наложиша и убиша, а паки сгореша и потом новосоздашася, но абие по создании до земли их разорили; и ныне, именем святаго вашего Царствия, видехом сие добро, еже не токмо хвалу приносить вашему Царствию во всем мире, но и мзда ваша будет многая на небеси. Благодарим Господа Бога, яко во дни святаго вашего Царствия благоволи быти в царствующем вашем граде еллинской школе: еллинским языком писано Евангелие и Апостол, еллине бяше святии отцы, еллински написашеся Деяние святых Соборов и святых отцев писание и всесвятыя Церкви книги, и сие есть божественное дело, еже учиши Христом евангельский язык, воспя разумети книги Православныя веры, якоже писани суть, и познавати толкование их удобно, и наипаче, дабы отдалени были от латинских, иже исполнены суть лукавства и прелести, ереси и безбожества. Благодарим убо Бога и о сем и молим блаженную и святую душу вашу, воеже утвердити и умножити, да пребудет вечная и безсмертная память у Бога и у человек. Благочестивых Царевичей и братию державнаго и святаго вашего Царствия и благочестивейших и богопочтенных Царевен, теток и сестер православнаго вашего Царствия, молитвою осеняем и благословляем. По слышаном, новый и блаженный брак вашего Державства, и молим блаженную и содержательную и содеятельную и безконечную и святую и присносущную Троицу, единаго токмо и истиннаго Бога, даровати ти благочестивейшую и святую боговенчанную Царицу Государыню Марфу Матвеевну, юже молитвою осеняем и благословляем, воеже даровати ти даже до старости и седины, и да подаст святому вашему Царствию чада к наследию вашего Державства, яко даже до дни Господня да не оскудеет Царь православный от святаго и боголюбезнаго вашего рода. Паки молим Господа Бога даровати вашему Царствию священнаго синклита, воеже быти во здравии, в любви истинной и во крайнем покорстве к божественным вашим повелениям, и даровати всего покорнаго народа со благочестием и мирным состоянием. Просим вашего Державства, яко сии грамоты наши да не впадут в чужия руки, но да будут во святых ваших руках, нижe писанная да не услышатся вне весьма, яко апостол глаголаше к Солуняном: убо действуете тайно беззаконие; возможно бо случитись. Яко и от христиан некому быти предатели и про нас несть никакого добра. Сие святое Писание научит: яко Божие дела проповедати праведно есть, Царей же тайны сокрыватися нужно есть. Посылаем с великим послом вашего Величества вашему святому Царствию, дар благословения, един убрус, золотом шит здешняго края, и молим, да не посмотриши на малость дара, но якоже Ксеркс, оный Персидский Царь, пригорши воды и пия, посмотря на произволение даровавшему: сице и блаженная и светлая твоя душа да соизволит к нашему произволению, наипаче же дар наш есть молити Господа нашего Иисуса Христа, еже есть Божия мудрость, да умудрит святое ваше Царствие к доброму правлению подлежащим вам христоименитым народом, и яко сила Отчая да укрепит на враги, и яко Сын по естеству да сотворит тя сообразника иконы славы Его, и яко мир даровати ти, мир полезнующий Православныя и кафолическия веры; иногда бо и обнаженный меч мир Царей в Писании нарицается, и да будет сам Христос во входах и исходах вождь, предстатель и помощник вам до преглубокой и тишайшей старости, Его же и благодать и безконечная милость и еже от нашего умерения молитва, благословение и прощение да будет со святым и державным Вашим Царством во окружение многих лет, аминь.


Из Константинополя, 1682, в месяце мае.

Подлинная Грамота подписана Патриаршею рукою:


Досифей, милостию Божиею святаго града Иерусалима Патриарх и Вашего святаго Царствия богомолец



Досифей, милостию Божиею Патриарх святаго града Иерусалима и всея Палестины


Суд вкупе и милость Божественная Церковь приняв от Бога, каждое в пользу устрояти по временам не отрекается различных ради вменяемых вещей: тем же убо наказует к целомудрию праведною судя, достойная наказанию сотворшим помилует же, такожде и человеколюбно и благоприятно восприемлет обращающимся и самим о себе покающимся и пекущимся, или о их ради просящих, к прежнему таковых призывает чину и достоянию, аще прощательная согрешиша к исцелению небезприятная. Какож изстари можем видети во многих и различных причинах сущим: святии и богоноснии отцы таким образом управиша вещей в церковном священнаго постоянства; иногда бо судом согрешающие наказуя, а иногда тех же, обратившихся в покаяние, милостию дружелюбною воспримающе, якоже связати, также и разрешити преукрашенной достоинство евангельскаго наследоваше благодати. Понеже убо в прошлых годех бывший Патриарх царствующаго великаго града Москвы и всея России Господин Никон низвержение претерпе соборне и оставление Патриаршескаго престола своего от тамо собравшагося Собора Восточных Святейших Патриархов, Александрийскаго рещи Господина Паисия и Антиохийскаго Господина Макария, согласием и Константиноградскаго Господина Дионисия предвождьствуя вкупе и Иерусалимскаго Господина Нектария, через Соборныя грамоты их, присланныя со иеродиаконом Мелетием, и от тамошнея святые Церкви священнаго собрания, призванием благочестивейшаго и приснопамятнаго Царя Государя Алексея Михайловича, Царствие тогда украшающаго, ни убо согрешений ради душевных, ниже вовсе развратных духовнаго осужден благодати; понеже благочестив бе в божественных делех и хранитель святых канон и ревнитель отеческим преданиям, како подобает, но человеческим некоим малодушием и гневом побежден быв, нелюбим явился, гнушаяся и гнушаем, и тем причинно, а не како подобаша Патриаршескому чину, нача ступати, вместившеся ссоры неисправимыя посреде его и Царственныя державы, причuнен и по правилом повинен церковному наказанию и отставлению Патриаршескаго престола, яже и претерпел доброю совестию, несть словом известно рещи, еликими и коликими терпения и смирения делами и божественнаго благодеяния кончины паче слова очисти малый той прок согрешения своего, и прежде сих не преста прощения просити от священнаго лика и у Царственнаго Высочества и от всего синклита, дондеже ко Господу благочестно отыде. Того ради ныне во Христе царствующий, благочестивейший и боговенчанный Великий Государь Царь и Великий Князь Феодор Алексеевич, всея великия и малыя и белыя России самодержец, и многих государств и земель восточных и западных и северных отчич и дедич и наследник, владыко и обладатель, иже во Святом Дусе сын возлюбленный нашего умерения, благоговение зело положив о муже того благодеяние, терпение и смирение, возлюби призвати его правильно во Архиереев и Патриархов сочисление и со прочими Патриархи имети помяновение, писал к нам, спрося и проша через препочтенную и святую грамоту свою, присланную с своим царственным великим послом с дьяконом с Порфирием Богдановым сыном Возницыным: аще праведно есть, изверженнаго Господина Никона со Архиереи поминати и Патриархом имяновати, яко в покаянии скончавшагося? Сего ради и умирение наше, правильно и по уложениям церковным разсмотревше дело сие, видехом праведно быти и безпричинно помиловатися тому, показавый ради покаяния плодов, яко небезпрощательная согрешившаго, да восприимет от церковнаго милосердия Архиерейский хитон и яко Патриарх поминается. И по сих умерение наше во Святом Дусе изглашает: дабы иже ко Господу Богу отшедший брат наш Господин Никон вместо мздовоздаяния, их же ради показавый, благодеяниях имеет прощение с соборно бывшаго над ним низвержения, и да будет прощен в нынешнем веце и в будущем от Святыя и Единосущныя и Животворящия Троицы, и да поминается со усопшими прочими Патриархи Московскими во священных царских диптихах, да имянуется Патриархом по помянутым церковным образцам правильно имеюще слово. К сим же изглашаем: дабы прочая вся, яже от священнаго того Собора содеянная, останется нерушима и крепко хранима, яко добро и законно учиненное, ибо Собор той непорочен есть и тверд; прощение же Господина Никона человеколюбия ради церковнаго и властию Всесвятаго Духа совершено, а не разрушения ради Собора учинено. Тем же во утверждение дана сия нашего умеренная грамота, укрепленная с заручным подписанием нашим и патриаршескою печатью в лето от Спасительнаго явления 1682, в Константине граде.


Внизу подписано Патриаршескою рукою:


Досифей, милостию Божиею Патриарх святаго града Иерусалима и всея Палестины



Иаков, милостию Божиею Архиепископ Константина града Новаго Рима и Вселенский Патриарх


Трудившимся страстьми терпений и венец терпений приявшим от Бога, преподобныя памяти приносити всегда долженствуем, но и свидетельствованным достойно, иже терпением печалей безчественный некой порок, как ни есть прежде свидетельствованное над ними, очистив и плоды достойные покаяний показавше, чистым же чистому соединивше, и благодерзновенно ко Господу отшедшим в сочисление сочитати, в них же преподобно от Церкви помяновение имеюще, не меньше должности есть достойно. Сие бо богодейственное благодеяние, через неже благочестий совершенство начертается; даруйте бо, глаголет Апостол, в терпении благочестия спасати ведает паче инаго богоразумнаго живущим, в нем и к блаженному скончанию водити и приснопамятным совершити; в терпении бо вашем стяжите души ваша, и терпевый до конца, той спасется, Христос глаголет истинно. И ин, иже всех беззлобен Господи, како есть праведен судити согрешившим, тако есть милостив, всеже приимати их же в покаянии и душевном смирении обращающихся; тем же убо суд вкупе и милость, воспевая Пророк, тому каждого толкует деяние. Есть бо где и во многих местех видети избранным, отличившимся славы и достоинства, согрешивши и паки покаянием возвратившимся, не токмо бо оставляемых познахом покающимся ко всемилостивому Господу, восклицая, согрешима, но и к прежнему достоинству приводимых. Кто убо паче Манасия согреши, иже идолослужением себе оскверни и безвинных кровию Иерусалима исполни, но мало мучив и наказав, покаявся; восприя его и оставляя ему прегрешения в юже имел царствия, паки его возврати: которым образом и святыя Церкви Христовы ветви извыше немалым судом обидевше прегрешивших, абие же таковых терпением оправдавшихся, восприяли и прежнею честию сподобиша их, якож связати, такожде и разрешити апостолски Евангельскою благодатию последняго достоинства. Понеже убо и в прошлых годех бывший Патриарх Московский и всея Русии Господин Никон низвержение претерпе соборное и оставление от Патриаршескаго престола своего от тамо собравшагося Собора, иже четвертостию Святейших Патриархов исполнение имел, самосущим рещи, собранию Александрийскаго Господина Паисия и Антиохийскаго Господина Макария, мыслодатойство оттуда Константинопольскаго Господина Дионисия предвождьствуя и Иерусалимскаго Господина Нектария и тамошних местных архиереев и всего церковнаго чина, призванием тогда царствующаго благочестиваго и приснопамятнаго Царя Государя Алексея Михайловича, ни яко осужден вин ради душевных или телесных неких, и елика от архиерейства благодать впредь без воззвания ону чуждати, имея естество и исцеление невосприемное творя, нижe над божественныя догматы благочестий согреши: ибо не иде в совет нечестивых, нижe ста в путь грешником, нижe на седалищи губительней седе, песнословно рещи, столп бо благочестий неколеблемый, знаем, бысть, и божественных и священных канон оберегатель присноискуснейший, отеческих догмат, повелениих и преданий неизреченный ревнитель и заступник достойнейший; но яко человек человечески болезнствуя, от малодушия некоего гневом и унынием побежден бысть, и оставль паство свое и Патриаршеское достоинство презрев, далеко отшедши, живе, не хотя возвратитись. Которых ради вин явился тяжек и безприятен бысть, гнушаяся и возгнушаем, и тем и причинно, а не яко подобает Патриаршескому чину, нача вступати и от мимопутных таких вещей родившеся и умноживше ссоры меж ним и Царския державы, причuнен, обличен и повинен, осужден по закону церковному наказанию и оставления Патриаршескаго достоинства, яже благосовестное приняв, великодужно целова и радуяся всему мирскаго лука суетству рекши, многими и тьмочисленными печальми и нуждами себе усмири и по многаго печальных ради трудов в Небесном Царствии вводящий путь возвратив, Евангельское различных благих дел совершение, в терпение, озлобление, в нуждном пребывании постом и молитвами непрестанными и бденьми всенощными, яко злато в горниле, искушен бысть и яко всеплодие Божие живаго жертвы явился; и тако страдательными трудами прочее жития своего препроводил, не ради сна очима своима, нижe дремания челе своем, нижe покоя составом своим, дондеже блаженным сном уснув, благочестно ко Господу отыде. Сего ради ныне скипетр украшая тамошняго Царствия и во Христе царствуя, приснопочтенный и благочестивейший и Богом венчанный Великий Царь и Великий Государь и Великий Князь Государь Федор Алексеевич всея великия и малыя и белыя России самодержец, и многих государств и земель восточных и западных и северных отчич и дедич и наследник, владыко и обладателю, во Святом Дусе сын возлюбленный нашего умерения, благоговением зело призрев мужа того благодеяния, терпение и смирение, возлюби воззывати его правильно во Архиерейское и Патриаршеское сочисление и со прочими Патриархи Московскими восприяти ему церковное помяновение; и писа в честной и всеславной Царственной грамоте своей, присланной к нам через царственнаго великаго посла дьяка Прокопия Богданова сына Возницына, благоговейно просил: аще возможно есть, его же толико смиренные и делами божественными и страданием довольно творение, наказание исполнив, получити от Церкви милость и на Патриаршеское сочисление воззыватися, воеже принимати Патриаршеское поминовение? Которое дело Собору предложивше и правильно разсмотривши, явилося благословно и беспричинно быти милости сподобитися в терпении великодушному оному страдателю и к Патриаршескому воззывати поминовению, не разрушения ради Собора того, от котораго он низвержен бысть, никако: Собор бо той неразрушаем, быти ж паче нерушимо и крепко хранимое хочем: но по подражанию дающаго божественную милость, ею же Церковь богатствует, яко небезпрощательная прегрешивше, многократными добродетельными кончины мало порока прегрешения своего счистив, праведно и достойно богоприятнаго мужа сего от извержения возменяем, но извыше от святых отец содержимому извычаю и по правильной церковнаго милосердия. Сего ради силою и властию и благодатию всесильнаго и вседетельнаго Духа, пишем и изглашаем Соборне во еже при нас преосвященных архиереов и пречестных, во Святем Дусе возлюбленных наших братий и сослужителей: да преподобныя памяти возлюбленный наш брат Господин Никон, бывший Патриарх Московский и всея Русии, вместо воздаяния и мздодаяния, показа ради долгое преподобничество и терпение, имеет прощение и разрешение от приключившаго ему соборнаго низвержения, и да будет прощен в нынешнем веце и в будущем от Отца, Сына и Святаго Духа, Святыя и Живоначальныя Троицы; восприяв же духовный хитон Архиерейства, да приимет, яко Патриарх, всегда церковное поминовение, поминаем с прочими Патриархи Московскими во священных диптихах, и по всяким именованным временам священных церковных последованиях безсумненно да сочитается въяве в сочислении прочих Патриархов Московских; Патриархом же являемое и имянуемое и поминаемое нигде да не сопротивится, подлинно тако да будет! Тем же во оправдание, издадеся сие прощение его, Соборная грамота почтенная, на паргамине, лета 1682, месяца мая в 6 день.


Внизу подписано Патриаршескою рукою:


Иаков, милостию Божиею Архиепископ Константина града Новаго Рима и Вселенский Патриарх


А ниже написаны митрополическия руки:


Халкидонский Иеремия; Андрианопольский Неофит; Метелипский Григорий; Фнапинский Клим; Анкирский Иоаким; Хийский Григорий



Христос воскресе! Воистину воскресе!


Боже отцев и Господи, милостию сотвори все, мудростию Своею и силою утвердил и положил их, иже вся суть и имеет крепость словом Твоим, иже небеса измерил еси и землю и море и все в них Твоею силою поклоняются, иже солнце светлость Твоя всякому живущему показал еси, объявляющи неизреченную мудрость и крепкую область; превышнее, Господи, начальство Твое, иже и человека от земли сотворил и сему тело от четырех стихий и тому положил после разделения души в землю возвратишися и бысть дондеже вострубят страшным повелением Твоим и лице земли обновится! Ты, Владыко, и благости подательный Царь, преславный и безначальный, неприступный, неизследимый, невидимый, Триипостасный Боже, иже ради Нафана пророка простил богоотцу Давиду согрешения его, иже согрешил, иже Манасию покаявшися в Вавилоне простил, иже и в Слане граде царстивие дал еси, иже блуднаго сына согрешивша и возвратившагося возлюбил еси, иже мытарево смирение и покаяние восприяв, услыши нашу молитву и глас моления наша, прости раба Твоего Никона Патриарха, имеешь бо неизреченное человеколюбие, щедроты премногия, милость богатую, милостив буди о гресех наших, яко Ты един свят и праведен. Раб сей, Никон Патриарх, или священному чину досади, или самовластию отлучение себе приял, или словом и делом и помышлением, самовластием или нуждою согрешил, прости его мене ради недостойнаго раба Своего, яко всесилен и преблаг Бог, помилую, прости и остави; Ты бо един имеешь сию власть. Сего ради молим Тя, прости сего почившаго раба Своего, яко человек согрешил, остави вся душевныя и телесные грехи и сподоби его быти прощена от Твоего трисолнечнаго Божества, яко Ты един и имеешь власть отпущати грехи и простити, вязати и решити, и сподоби раба Твоего сего отпущения грехов души и телу, и еже быти бы ему в селех праведников, в недрех Авраама, в соединении избранных Патриархов, идеже неизреченная радость и оставление печали и воздыхания, его же тело разреши, в том же и создан быв, дондеже да возрадуются в Воскресение, молитвами Пречистые Владычицы нашея Богородицы и Приснодевы Марии, и всех Святых от века благотрудившихся, яко благословен еси во веки веков, аминь. Господи Иисусе Христе Боже наш, единородный Сыне, безсмертный Отцу, иже для человеческаго спасения и слез плоть прияв от всечистыя крови Приснодевы Богородицы Марии, и воплотился человек ради спасения, и раздравый рукописания грехов наших копием и крестом, и даде область тридневным Твоим воскресением святым учеником и апостолом Божественым Духом вязати и решити, глаголюще: приимите Дух Свят, елико отпустите грехов, отпущени будут; елико свяжете, связани будут; и ради их сподоби и нас наследников быти сего божественнаго дарования по неизреченному Своему человеколюбию такожде вязати и решити в лице Твоем; Ты бо еси свят и благости податель Царь, ради моего, раба Твоего, умерение прости рабу Твоему почившему Никону Патриарху, елика в животе своем сотворил, и отпусти ему, елика словом и делом и помышлением согрешил, разреши его, или своею волею пленувшаго, или от инаго приявшаго граблением, или завистию сотворенное лукавое, такову вину приявшаго. Тако! Владыко преблагий! Петр отвержеся и слезами плакався, помилован; блудницу со слезами покаявшуся, не изженул; разбойника покаяние восприяв, в раю быти достойно сподобил. Благоволи, яко благ и многомилостив, душу его со всеми теми, от века Тебе благоугодившими, и тело Твоего сотворения священным именовати, молитвами, Господи, Пречистые Матери Твоея и святаго славнаго апостола и евангелиста Марка и всех святых, яко благословен еси вовеки веков, аминь.


Внизу подписано Патриаршескою рукою:


Парфений, милостию Божиею Папа и Патриарх великаго града Александрии и судия Вселенныя



Неофит, милостию Божиею Патриарх великаго Божия града Антиохии и всего Востока


Попечением Царей благочествующих подлежащих им народам житейское спасение есть и к належащим их делам и добру сручнейшее наставление, укрепление и утвержение, тем же и основание людем вправду назватися; архиереев же попечение праведных догматов заступление есть, наставляя и уча о душевнем спасении и избавлении. Аще убо явитися имела кая Царская душа, обое сие имуще, в различном достоинстве имела быти; Царь, имущи такову душу, и не имел быти в забвении никогда от памяти человеческих родов: но понеже не токмо о живых и предстоящих спасении, по достоинству каждаго чина, попечение имеет, но и о представленных такожде пекущийся, многим словам и похвалам человеческим имея быти приточен обретаем, сего ради приближен живым и мертвым обладаемому Богу. Таковую убо благочестивую душу, божественным произволением сияющу, имея благочестивейший, Богом венчанный, Великий Царь и Великий Князь Государь Феодор Алексеевич, всея великия и малыя и белыя России самодержец, и многих государств и земель восточных и западных и северных отчич и дедич, наследник, Государь и обладатель, отеческаго же благочестия ревнитель краснейший и владыко милостивый и кротчайший, иже во Святем Дусе сыне возлюбленный и прежелаемый нашего умерения, яко правдивых догматов хранитель, отеческих же преданий и подлежащих Царствию его народов вкупе спаситель, не токмо о достоинстве и чести живых попечение имея, но и со благоговением и надеждою жизни вечныя ко Господу отшедших, воспомянув, яко благоутробен, блаженнаго о покое, иногда патриаршествовавшего в царствующем велицем граде Господина Никона, вымышляя, дабы Патриаршеское имя не осталось в забвении и отдаленному суще от памяти имян, их же в царствующем оном великом граде Москве бывших Архиереев и Патриархов и от священнаго воспоминания их, опасаяся же, яко любочестив, да не священным правилом прегрешений, изволил божественною царственною грамотою своею объявити нам богоугодныя свои мысли, вопрошая: да не мимо правил есть желаемое, зане оный Никон Собором извержен бысть, и аще достойно есть и возможно в памяновениях отшедших Патриархов и ему поминатися безгрешно? Тем же умерение наше, и произволение его Царской души похвалив, и со благоговением вопрошения его испытали, и онаго Господина Никона после местнаго Собора извержения тамо сущих блаженнейших оных Патриархов, Александрийскаго рещи и Антиохийскаго единомнением, и Константинопольскаго Господина Дионисия и святаго града Иерусалима Господина Нектария, испытно уведав душевное и сердечное покаяние его и паче силы пост, страдания и бдения и нужетерпения паче человека, и безпрестанно от Спаса Христа о оставлении грехов своих прося, от тамошняго же Собора и от Царственнаго Величества и от славнаго синклита прощение получити прося, и суще в сих ко Господу отъиде; согрешенное же от него, яко человеческих страстей прощательная и не в смерти ведущая, видехом, ни бо в ереси некой или в раскольство попаде, которых ради случилося быти немалое церковное показание; сие убо и после извержения Богоугодное его покаяние разсуждая, наипаче и прошения божественнаго и святаго Царя видя, выразумехом от деяний священных Соборов и святых правил, яко много от архиерей и Патриархов разных вин ради изверженным бывше, потом покаяния прежния чести и святаго имянования сподобльшимся. Сего ради умерение наше пишешь и Святым Духом объявляешь: по священным правилом и сложения святых отцев и по извыше преданиом везде сущей Церкви, вышереченный Господин Никон, от святаго на Москве Собора изверженный от Архиерейства неких ради вин прощанных, после же покаявшеся волею, прощен да будет и по смерти от Святыя Единосущныя и Животворящия, Неразделимыя Троицы, единаго существом единственнаго Бога, и поминатися ему в общесвященных дверех со прочими Патриархи Московскими, блаженное упокоение приявшими, с ними же сочтет его Господь в сенех избранных; обаче собравшагося тогда там святаго Собора вся прочая, еликая поставиша и повелеша, желаем пребывати вовеки нерушимая и крепко хранимая. Тем же во извержение вышеписанных и объявление дана сия умерения нашего грамота, укрепленная нашим подписанием и Патриаршескою печатию во граде Финике, лета от Спасительной страсти 1682, месяца мая.


Внизу подписано Патриаршескою рукою:


Неофит, милостию Божиею Патриарх великаго Божия града Антиохии и всего Востока



Кирилл, милостию Божиею Патриарх великаго Божия града Антиохии и всего Востока


Суд вкупе и милость Божественная Церковь приняв от Бога, каждое в пользу устрояти по временам не отрекается различных ради вменяемых вещей: тем же убо наказует к целомудрию правдою суда, достойная наказанию сотворшим помилует же, такожде и человеколюбно и благоприятно восприемлет обращающимся и самим о себе покающимся и пекущимся, или о оных ради просящих, и к прежнему таковых призывает чину и достоянию, аще прощательная согрешиша и исцелению небезприятна. Какож изстари можем видети во многих и различных причинах сущим: святии и богоносныя отцы образом управшим вещей в церковном священнаго постоянства, иногда бо судом согрешающие наказуя, а иногда тех же, обращающихся в покаяние, милостию братолюбною воспринимающе и к священному лику сочетающе, якоже связаши, якоже и разрешиши преукрашенней достоинство Евангельской наследоваше благодати. Понеже убо в прошлых годех бывший Патриарх царствующаго великаго града Москвы и всея России Господин Никон извержение улучи соборне и отставление Патриаршескаго престола своего от тамо собравшагося Собора Восточных Святейших Патриархов Александрийскаго рещи Господина Паисия и Антиохийскаго Господина Макария, общемыслием начальствующих, и Константиноградскаго Господина Дионися, вкупе и Иерусалимскаго Господина Нектария, через соборныя их грамоты, присланныя с иеродиаконом Мелетием, и от тамошней святыя Церкви священнаго собрания, призванием приснопамятнаго блаженнейшаго Царя Алексея Михайловича, Царствие тогда украшающаго, ни убо согрешений ради душевных, ниже во всем развратных духовнаго осуждения благодатию, понеже благочестив бе в божественных делех и хранитель святых канон и ревнитель отеческим преданиом, како подобает, но человеческим некоим малодушием и гневом побежден быв, и оставя паству свою, и презрев Патриаршеское достоинство, сопротивляем бысть, гнушаяся и гнушаем, и в том причинно, а не камо подобаше Патриаршескому чину, нача ступати, и тем вместившеся ссоры неисправимыя посреди его и Царственныя державы, виновно осужден и по правилом повинен церковному наказанию и изгнанию Патриаршескаго престола, которое изгнание доброю совестию претерпев, несть словесно рещи явно, елицех и коликих терпений и смирений дел соверши, и божественнаго благодеяния паче слова кончинами очисти малую вину согрешения своего, и по сих всех не преста просити прощения у священнаго лика и у Царственнаго Высочества и у всего синклита, дондеже ко Господу благочестно отыде. Того ради ныне во Христе царствующий, благочестивейший и боговенчанный Великий Государь Царь и Великий Князь Феодор Алексеевич всея великия и малыя и белыя России самодержец, и многих государств и земель восточных и западных и северных отчич и дедич и наследник и Государь и обладатель, иже во Святем Дусе сын возлюбленный нашей мерности, имея благоговение зело и благопочитание ко благим делам мужа того, к терпению же и смирению его, и желая привести его правильно в соединение и сочисление Архиереев и Патриархов и помяновение с прочими Патриархи Московскими, писа и нам препочтенную и святую грамоту свою с своим, Царскаго Величества, великим послом, с дьяконом с Порфирием Богдановым сыном Возницыным, прося и проведая: аще праведно есть, изверженнаго Господина Никона со Архиереи поминати и Патриархом имяновати, яко в покаянии скончавшагося? Сего ради и умерение наше, правильно и по уложениям церковным разсмотривше вины сия, разумехом праведне быти и безпричинно поминоватися тому, показавый покаяния плодов ради, и яко небезпрощательная согрешившаго, да восприимет от церковнаго милосердия Архиерейский хитон и, яко Патриарх, да поминается. И по сих умерение наше во Святем Дусе изглашаем: дабы иже ко Господу Богу отшедший брат наш Господин Никон вместо мздовоздаяния наказавый ради благодеяние имеет прощение с соборнаго бывшаго извержения своего и да будет прощен в нынешнем веце и в будущем и разрешен от Святыя и Единосущныя и Животворящия Троицы, и да поминается со усопшими прочими Патриархи Московскими во священных царских дверех, да имянуется Патриарх по явным церковным образцам правильно имеющих слово. К сим же изглашаем: дабы прочая вся, яже от священнаго Собора того содеянная останутся нерушима и крепко хранима, яко добро и законно учиненное, ибо Собор той безпричинен и праведен и тверд есть; прощение же Господина Никона человеколюбия ради церковнаго и властию Всесвятаго Духа совершено, а не разрушения ради Собора учинено. Тем же во утверждение того дана сия наша умерения грамота, укрепленная с заручным подписанием нашим и Патриаршескою печатию, во граде Финике, лета от Спасительной страсти 1682, месяца мая.


Внизу подписано Патриаршескою рукою:


Кирилл милостию Божиею Патриарх великаго Божия града Антиохии и всего Востока



Ссылки:


1 Грамоты печатаются по: Собрание Государственных грамот и договоров. Т. 4. М., 1812. № 135–140. назад

Домашняя страница
священника Владимира Кобец

Создание сайта Веб-студия Vinchi

®©Vinchi Group