История
Достопримечательности
Окрестности
Церкви округи
Фотогалерея
Сегодняшний день
Библиотека
Полезная информация
Форум
Гостевая книга
Карта сайта

Поиск по сайту

 

Памятные даты:

 

Праздники

Памятные даты

 

Наши сайты:


Подготовьте себя заранее к поездке в

Ферапонтово

http://www.ferapontov-monastyr.ru/
http://ferapontov-monastyr.ru/catalog/
http://www.ferapontovo.info/
http://www.ferapontovo.org/
http://www.ferapontovo-foto.ru/
http://www.ferapontov.ru/
http://www.tsipino.ru/
http://www.patriarch-nikon.ru/

Прогноз погоды:


Ферапонтово >>>


Яндекс.Погода


На главную Карта сайта Написать письмо

На главную Библиотека ПАТРИАРХ НИКОН В ФЕРАПОНТОВОМ МОНАСТЫРЕ Патриарх Никон. Труды. Слово на моровое поветрие

СЛОВО НА МОРОВОЕ ПОВЕТРИЕ


Патриарх Никон.Труды

Научное исследование,

общая редакция В.В. Шмидта



СЛОВО НА МОРОВОЕ ПОВЕТРИЕ


Никон, Божиею милостию Архиепископ Царствующаго великаго града

Москвы, и всея великия и малыя и белыя России Патриарх


Всем повсюду и коемуждо особно пребывающим, священным и честным Архиереом, Архимандритом, Игумном и всему священному причту, и всем благородным боляром и прочим всем всякаго чина и возраста мужеска полу и женска православным Христианом, возлюбленным во Святом Дусе чадом нашим: благодать, мир и милость от Вседержителя Бога и Отца и единароднаго Его Сына Господа нашего Иисуса Христа и Утешителя Святаго Духа, и наше благословение и молитва!

Настоящаго времене нынешняго от создания мира 7164-го году, а от еже по плоти Рождества Господа Бога и Спаса Иисуса Христа 1656-го году августа в 6 день известно буди вам, яко во мнозих градех моровое поветрие есть, а от чего, то един Бог Святый весть и никому о сем знати не належит, разве еже глаголати, яко не бывает злоба, сиречь скорбь, ни во граде, ни в селе, аще не Господь попустит, еже глад, губительства, недуги, и язвы, и иная, о нихже много зде писати не належит.

Ныне же грех ради наших и зде во царствующем граде Москве объявилося поветрие не во единем месте; но мы, яко же нам належит, должны есмы сами о себе и о людех молитися и плакатися пред Господем Богом, дабы Господь со всеми нами сотворил святую Свою милость; коегождо вкупе и особно молим: о своих мимошедших и о настоящих прегрешениох каятися и грехи свои святым чистым исповеданием очистити, и молитвою и постом со слезами праведный гнев Божий уставити, что священным правилом повелевающим преданыя Церкви четыре посты опасно хранити молим поститися, на не постящих бо ся глаголет правило Святых Апостол 66 сице: аще который епископ, или пресвитер, или диакон, или поддиакон, или чтец, или певец в 40 дней, сиречь в Великий пост, не постится и в прочии посты и во все лето во всякия среды и пятки, да извержен будет. Аще же мирский человек не постится, да отлучится. Тем же всяк от вас, яко сын Восточныя Церкве, по силе да постится, и елицы по разсуждению отец своих духовных, аще достойнии явятся пречистых и животворящих Тайн Тела и Крове Христовы, да причастятся. Аще ли по сем нашем завещании кто от злоб не отступит и святым исповеданием, и постом, и молитвами не присвоится Господеви, и по разсуждению отец своих духовных святых Тайн не сподобится, и обрящет его Бог, яко все обрящет, по реченному во пророце: в чем тя застану, в том тя и сужду. И паки глаголет Господь Вседержитель пророком к пастырем: Возопий, рече, крепостию и не пощади, и яко трубу вознеси глас свой и возвести людем Моим грехи их1 . И паки: Сыне человеч страждах тя дому израилеву, да слышиши слово от устен Моих, и воспретиши им от Мене внегда глаголю беззаконнику, смертию умреши; и не возвестиши им ни соглаголеши, яко остатися беззаконнику и обратися от пути его, яко же живу быти ему: беззаконник же той в беззаконии своем умрет, крови же его от руки твоея взыщу; и ты же аще возвестиши беззаконнику, и не обратится от беззакония своего, и от пути своего беззаконна, той беззаконник в своем беззаконии умрет, ты же душу свою нзбавиши. И еще: рцы пастухом, се глаголет Адонаи Господь: оле пастуси Израилеви, еда пасутся пастуси сами, не овцы ли убо пасут пастуси? се млеко ядясте и волною одевастеся, и тучное заколасте, а овец Моих не пасосте, изнемогшаго не подъясте, и болящаго не уврачевасте, и сокрушеннаго не обязасте, и язвленнаго не возрастисте, и плавающаго не обратисте, и погибшаго не поискасте2 . Сего ради мы, яко же лепо пастырю, по Господни заповеди возвещаем вам, возлюбленная чада, да по заповедем Господним шествующе, пост и молитву с любовию Господнею имуще, к животворящим Тайнам приступите, в преумножение всех благих, и не мощно Того самаго Иисуса Христа от мороваго поветрия, елико мощно, себе блюдисте. Аще ли кто от вас, нерадения ради о сих обленится, да весть таковый, яко чист сем аз от всякаго поречения, сказав вам волю Господню о вашем здравии в спасении пекийся. Тем же убо вси вы, любезная чада, покаянием и молитвою естественную Божию милость на щедроты пременити потщитеся, и с помощию Его, елико мощно, опасно от мороваго поветрия ходисте, зане еже опаство от сего поветрия с помощию Божиею имети добро есть и благоприятно; яко же и святый Великий Афанасий свидетельствует ко Князю Антиоху в сороковом и во сто третием ответе, глаголя сице:

Вопрос 102: откуду бывают смертная; и чесо ради в некоих странах пустынных языческих многажды не бывают; но яко же на мнозе во вселенных и многонародных градех и многовестных?

Ответ: Глубок воистину вопроса ответ, и малым на земли вмещаем, обаче же яко же глаголет Господь: вмещаяй да вместит. Аще бо рцем, яко многажды и от звезд тлетворных, и прахов, и зловония мертвечин, и дождев летних, и воздымлений, и воспарений земных и морских недуги телесныя и тля, и смерти бывают: абие не научении нецыи сопротивляются нам, а мы без промысленная, яже в нас глаголющим, их же некиих и вопросити хощем. Рцыте нам о сих: како во граде некоем смертно бывает, из града же онаго суть во инех странах две, или три тысящи купльствующих мужей, и никто же от них скончася? Аще бо Божий гнев на град онь прииде, подобаше весьма и далече сущим гнева вкусити: аще же и не всем, но любо неким, от них же обаче да не даемы извета, сия ищущим глаголем: яко многажды ова убо от смертных и по Божию прещению бывают, ова же и по звезд и прочих вин изветом, яже предрехом, яже яко наипаче растлевают младенцы, яко немощнии. Обаче и звезд, и воздымлений творец есть Бог рекий: не две ли птицы продаются на ассарий, и едина от них не падет без Отца моего, иже на небесех; ваши же и власи главнии вси изочтени суть.

Вопрос: Еда же пользуется, или избавляется от смертнаго из града во иную страну бегая?

Ответ: Пророку Богу глаголющу: камо пойду от духа Твоего и от лица Твоего камо побежу? Явлено убо, яко Бога убегнути никтоже может, аще же воздух некий, или ина тварь вина есть губительное творящая, негли избегает тоя во иную страну пришед. До зде убо блаженный Афанасий: но и Христос Спаситель, наказуя нас, не памятати себе самех в напасти, овогда убо Он Ирода не требуя бежати бегаше, овогда же хотящим нань непокоривым жидом камение метнути, прошел сокровенно посреде их прохождаше, глаголя: не и прииде час Мой. Овогда же хотящим Его с горы низринути, такожде утаился от жестокосердых прохождаше. Ему же подобное и ученик Его Павел апостол творяше. Овогда убо от сонмища хотящаго его убити, оконцем по стене свешен, овогда же сотником восхищен бысть, и избеже ловления. Иногда же иными образы, да несопротивен явится учителю Христу, спасение себе устрояше. И отсюду явлено, яко не леть каждому себе самаго в напасти пометати, аще бо в напасти себе самех памятающии оправдятся, убо и тии оправдятся, иже в пучину себе самех подкнувшии. Аще бо на весь град гнева Божия пролияние было бы, еже дано будет, то никако же нигде же укрытися мощно. Было бы якоже бе и на фараона с вои при Моисеи потопление, или в Самарии при Осии Царе Израилеве. Ассириане, занеже не восхотеша прияти закон Божий, львы поядоша, и нигде же от них кому мощно бяше скрытися, но всюду львы я пожираху. От онаго же поветрия, аще бы убо было невозможно нигде же убегнути, или и бежати от того было бы беззаконно, не бы Святый Дух Афанасиева уста на возвещение о сем всякому православному подвиг, якоже и ныне благодатию Божиею видимо есть на сотворших прехождение от Москвы во время мороваго поветрия, иже бо на Бога надеющеся и Евангелскому велению бежати от града во град от напасти повелевающу последующе и пророческое речение на уме имуще: ступайте, людие Мои, внидите в клеть свою, затворите дверь свою, укрыйтеся в мале, елико, донде же мимо идет гнев Господень, и великаго Церковнаго учителя Афанасия Великаго выше зде написанному наказанию не противишася, и во время бывшаго тогда мороваго поветрия, яко же от Москвы, сице и от иных градов в здравыя места прехождение сотвориша. И тамо дондеже мор мимоиде пребыша тии, яко исполнителие Евангелских велений, милосердием Божиим и ныне здравствуют заповеди спасительныя исполняюще и присно поучаются на Богоугодная деяния, и о спасении своем от оныя язы хвалу Творцу своему воздающе; а иже непослушанием своим прехождение сотворити не восхотеша, и не точию самих себе от совести прельщаеми, в вольную и непотребную напасть вринуша, но и прочим ненаученым ложная видения и лукавая сония сказующе, и сими тех прельстивше, лютою того язвою своевольне тех уморити сотвориша, за них же восприимут месть от Вседержителевы руки, мню, не меньше убийц: вместо бо еже от погибели братию восхищати, смерть тем самоизвольну страстным си разскаянием прияти смыслиша; и еще и ныне буии о сем своем злом дерзновении не стыдятся, и сами сопротивны Евангелскому велению и Афанасиеву праведному наказанию, паче же всей Восточней Церкви суще, еже бо Афанасий мудрствует сие. Вся православная Церковь исполнителей Христовых словес и блаженнаго Афанасия наказания совершителей дерзостне укоряет, и неправедне в себе самех от многая буести во исполнении злобы своея похваляют, по реченному пророком: Мужаемся, глаголюще, и протившися, сиречь мужаемся в своем сопротивлении и истине никогда же хощем покоритися. И что много глаголати? Обличает бо сих Сам Вышний промысла Своего исполнением: егда бо умножися пред Ним злобы людей Содомских и Гоморских, тех убо за беззакония во градех их огнем и жупелом на показание непокоривым потопи; а его же восхоте, от погубления спасти, праведнаго глаголю Лота, не во граде, но изведе его оттуду вонь, спасе. Сим путь спасения показа, яко же от губительства бежати не точию несть грех, но и воли Божия исполнение. И что к сему отвещают они противницы, иже сами себе и иных в лютую язву вметати нудящиися? Воистину ничто же. Аще ли кто лукаво и се помышляет: он якоже хощет, да творит. Нецыи же в мимошедшия лета сами себе не внимающе, ни хранящеся сего и от того размножися грех ради язва, и яко молния во всю Россию простреся, и колико душ православных христиан тою лютою язвою скончашася! Мнози же за умаление иереов, ниже спутника добраго нашего пречистаго Тела и Крови Христовы сподобишася. Ныне же всем вам предповествуем, и не точно нынешнею грех ради язвою к подвигу доброму возставляем: и поститися, и молитися велим, но всегдашним Господним повелением устрашаем, еже речеся во святем Евангелии: бдите и молитеся, яко не весть в кий час Господь ваш приидет. И паки бдите и молитеся, да не внидете в напасть. А еже в таже мимошедшая лета и моровое поветрие мнози купно и особь собирающеся о нас глаголаху неподобная, и грехи наша поминающе, их же мы не точию не содеяхом, но ниже во сне помыслихом, и отхождение наше от царствующаго града Москвы, еже бысть по указу Великаго Государя Царя и Великаго Князя Алексия Михайловича всея великия и малыя и белыя России самодержца, з благоверною Государынею нашею Царицею и Великою Княгинею Мариею Ильиничною, и з сыном его, Царскаго Величества, з Государем нашим Царевичем и Великим Князем Алексием Алексиевичем виновна творят, буди им милость Божия, и не постави им, Господи, греха, аще ли же живыя или отшедшия, понеже требуют отшедшия уже не имуще упования, но инии дерзающе на ся восхищати суд Божий и судят искренних, их же отречеся ныне Сын Божий глаголя: аще кто слышит, рече, слово Мое, и не приимет е, Аз не сужду ему; не приидох бо на сужду мирови, но да спасу мир; отметайся глагол Моих имать судящаго ему слово, еже глаголах, то судит ему в последний день. Тии же, которыи на нас не удовлившася сим, но и ложная от лукаваго сердца видения и сония пред очи простейших предлагаху, простии же и ненаучении, не ведуще полезнаго и внимают баснем их крамольным, и бесовским, и ложным их пророчествам, о них же Божественный апостол предвидев глаголет: внимающе, рече, духовом лестчим и учением бесовским, в лицемерии же словесник сожженных своею совестию. Мнози бо тогда не внимающе правому волению и оных крамольников лживых баснословних напившеся клеветаху, ов на сего, ов же на инаго, яко повинных творяще моровому поветрию; и мнози бесом прельщеннии пророчествоваху ложная, и о них же всем то явно, яко ничто же от глагол их ложных сбыться, точию себе губяще и братию свою, и на Бога хуляще: аки им извещение бысть се и се от Бога, да человецы то сотворят, на таковых бо лживых пророк Божественный глас вопиет сице. Сие рече Господь сил: да не хощете послушати словес пророк, иже3 пророчествуют вам и прельщают вас. Видение сердца своего глаголют: не от уст Господних рекут сим, иже хулят Мя, глагола есть Господь: мир будет вам и всем, иже ходят во строптивстве сердца своего, рекоша, не приидет на нас лукаво. Кто бо бысть в совете Господни, и видев, и слыша словеса Его? Кто помысли слово Того и слыша? В последния дни уразумеете совет Его. Не послах пророки, а они течаху; не глаголах к ним, и тии пророчествоваху: аще бы стали в совете Моем, и возвестили словеса Моя людем Моим, отвратил бы убо я от пути их злаго, и от помышлений их строптивых. Еда мниша, яко точию от близка Бог: Аз есмь, рече Господь, а не Бог отдалеча: аще утаится муж в сокровенных, и Аз не узрю его, рече Господь: еда небо и землю не Аз наполняю, рече Господь; слышах, иже рекоша пророцы пророчествующе во имя Мое лжу, и рекуще: видех сон, видех сон, доколи то есть в сердцы пророков прорицающих лжу и пророчествующих мщением сердца своего. Что хотяще творити, да забудут люди Моя имя Мое ради сония их, иже вещают един койждо искреннему своему. Пророк, иже имать сновидение, вещает сновидение, и иже имать слово Мое, глаголет слово Мое истинно; что плеве ко пшенице, рече Господь, еда словеса Моя не суть яко огнь горящий; рече Господь: и яко млать сотрыющий камень. Сего ради се Аз к пророком, рече Господь, иже крадут словеса Моя един койждо от искренняго своего. Се Аз к пророком, рече Господь, иже восприемлют языки своя и глаголют, рече Господь: се Аз на пророки мечтающая лжу, рече Господь, иже провещаша та, и прельстиша люди Моя ово лжу свою и в чудесех своих, яко Аз не послах их, не заповедах им: они же ничтоже успеша; людем сим рече Господь: да не препирают вас лживы пророцы, иже в вас; и не послушайте снов своих, яже вы видисте, яко неправедне тии прорицают вам во имя Мое, аз не послах их. До зде словеса, яже Бог глагола чрез Иеремию на обличение и нынешних лживых пророков, яже лживе вопияху к людем, и неутвержденных сердца своим лукавым помышлением возмущающе и глаголющим: видех сон, видех сон, и извещение сие, и сие приях от Бога, дабы многих в след себе отторгнули, и мнози тому последующее по их разсказанию погибоша, и ни что же бысть на пользу, точию не брегуще и себе смущающеся вся тем огнем объяти, лютую язву умножаху. И не дивитеся, чада моя си реченным, не от себе бо к вам глаголю сия, но Божиим пророком на обличение оных лживых сновидцов словеса и Великаго Афанасия Александрийскаго, его же святая Православная Восточная Церковь столп православия имеет. Аще кто веруя сим да творит, яко же той пишет во 102 и 103 главе: аще ли кто не покоряется, то да творит, что хощет себе и прочим; аще ли не имущий благодати Божия, ниже боящеся Божия прещения начнут вещати в предъидущее время ложная вещания и сония, их же по пророку Бог до конца отрину, заповедая никакоже послушати сих; не приемлет сих, и глаголемых от них никакоже веруйте, зане сопротивна суть Богови: и аще кто хощет присвоитися Господеви, да никакоже верует от оных лживых пророков, сновидцов глаголемых, и не точию да не верует им, но обличает их скоро яко сопротивников Божиих и антихристов, о таковых бо Апостол вещает: яко и ныне мнози антихристы суть, от нас бо изыдоша; но аще бо убо были от нас, пребыли убо быша с нами, но да явятся яко не быша с нами. Да приводит к нам, пастырю: мы же, данною нам от Великаго Архиереа Иисуса Христа истиннаго Бога нашего властию вязати и решити, подобающее обличение на таковых лжесновидцов наложим по преданию святыя Восточныя Церкви: к таковым бо лукавым лжесновным сновидцом сам Бог вещает пророком: грешнику, рече Бог, вскую ты поведаеши оправдания Моя и восприемлеши завет Мой усты твоими? Ты же возненавидел еси наказание и отверг еси словеса Моя вспять. Аще убо Бог на таковыя сице вопиет: кто смеет с ними совещатися, разве Богу сопротивляяйся? И отсюду явлено, яко не точию не внимати леть есть лжесловию оных лживых сновидснцов, но и блюстися их, яко губителей покрадывающих, яко незлобивая подобает. И се сам Христос Спаситель и предвозвещая нам, да не прельщени будем от них, глаголет: блюдите, да никтоже вас прельстит, мнози бо приидут во имя Мое глаголюще, аз есмь Христос, и мнози прельстят; и будете ненавидими всеми, имене Моего ради, и тогда соблазнятся мнози и друг друга предадят и возненавидят друг друга, и мнози лжепророцы возстанут и прельстят многих и за умножение беззакония иссякнет любы многих; претерпевый же до конца, сиречь пребываяй во учении Христове и не послушаяй по Евангелию многих лжесловных сновидцов и богоненавистнаго их пророчества ложнаго, той яко истинный христианин истиннаго нашего учителя Христа послушник и ученик спасется; зане Христос Спаситель до конца ненавидяй лжепророчеств и лукавых сновидений, яко Бог, сим истинно широчайше нам от тех блюстися заповедает: да не словесы льстивыми, якоже и нынешния лживыя сновидцы прельстят нас, сего ради самыми Своима пресвятыма усты вещает: аще кто речет вам, се зде Христос, или инде, не имате веры; возстанут бо лжехристи и лжепророцы и дадят знамения великия чудеса, якоже прельстити, аще возможно, и избранныя. Нынешнии же лживии пророцы и сновидцы ничтоже чудес сотвориша ниже творят, разве последующих им сотвориша безвременно и самоволно в беды себе пометати, и мнозих прежде времени льстивыми своима словесы сотвориша умрети, такожде и сами вси умроша; и чюдо! како и сим таковым лживым сновидцом мнози ненаказаннии последуют. По реченному Апостолом: мнози, рече, последуют; ими же истинный путь, сиречь учение Христово, похулится. О них же Христос, самая истина единородный Сын Божий запрещает нам, глаголяй сице: се прежде рех вам, аще убо рекут вам, се в пустыни есть, не взыдите; се в сокровищах, не имате веры. Тако и вы, чада любезныя, яко истинные христиане истиннаго сего Владыки нашего Христа, повеления никакоже прослушайте оных лукавых лжепророков и ложных их сновидений и ложных словес отнюдь не послушайте, и даже яко заповедей Христовых исполнителие самаго того Христа, заповедавшаго лжепророчеств и лживых сновидений не послушати, мзду многосугубну восприимите, яко же и древнии христиане не послушавши лживых учителей. Бяху бо и тогда лживии апостолы, хотящий уподобитися Христовым истинным апостолом: но не послушаху их христиане, постоянно во Христове учении пребывшии, к ним же коемуждо от них Христос Спаситель вещает: вем твоя дела и труд твой, и терпение твое, и яко не можеши носити злых, искусил еси глаголющая быти апостолы, и не суть, и обрете я лжа, и понесл еси, и терпение имаши, и за имя Мое трудишися и не изнеможе. Судите сами, чада возлюбленная, кого вам треба послушати? Они бо, лжепророчествующии, повелевают вам послушати лукавых своих сновидений; мы же молим вас слушати Христа и Его святых и непорочных велений, и вем, яко всяк от вас восхощет послушати Христа и Его истинных и известных учений; еже и сотворивше, здраствуйте, чающе восприяти за доброе свое, еже ко Христу послушание, мзду многосугубну; но и о сих зде назнаменуем, яко мнози не ведуще Божия о них промысла и не воспоминающе своих согрешений, грехи ко грехом прилагают, глаголюще, яко сего ради человека или онаго таковая язва бысть в мире, и сие глаголют туне, забывше реченное Богом ко пророку: иже аще кто ясть терпкое, тому имут быти и оскомины; тако еже кто согрешает, за сие сам и суд восприимет, а не инии за него. А еже искренняго прегрешения воспоминати, никому же сие не належит; глаголет бо Христос: не судисте, да не судими будете: имже бо судом судисте, осудитеся; и в ню же меру меристе, возмерится вам. Сие слышаще, чада, разумейте, кая польза еже искренних судити, а не своя грехи смотряти, точию пагуба души и Богу сопротивление, и что сего ужаснее? Сам бо Христос Иоанна Саваитскаго, внегда он осуди некоего, повеле от себе отринути, глаголя: изрините его, рече, вон, яко антихрист Ми есть, прежде Моего суда той осуди брата своего. Сего ради молю, чада возлюбленная, престаните суд Божий на ся восхищающе, искренних судити. Творяй бо се самому Богу противник есть, по вышереченному Христову слову; послушайте Апостола вещающа: бе ответен еси, о человече! всяк судяй; имже бо судом судиши другу, себе осуждаеши, таже бо твориши судяй: вемы же, яко суд Божий есть на творящих таковая. Помышляеши ли сие, о человече, судяй таковая творящему, и творяй сам тожде, яко ты избежиши ли суда Божия? Ты кто еси, судяй чуждему рабу? Своему Господеви стоит, или падает. Тем же еже иных судити, но еже своя грехи зрети, и себе самех осуждати навыкните.

Ведяще сие: яко мы непрестанне о вас молим Бога, и молитися вас самих, молим; но приидите убо вси, яко же тогда и мы, ныне с Богословцем Григорием возопием и восплачем вси православнии народы, мужи, и жены, и отрочата, всякаго чина и возраста, поклонимся и припадем, и плачем пред Господем сотворшим нас; возставим обще плач на возраст и родовы разделившися; возвысим глас моления, вместо ненавидимаго ему кричания, той во уши Господа Саваофа вознесет; предварим гнев Его во исповедании, восхощем Его видети, яко же прогневана, тако и прелагаема. Кто весть, рече: аще обратится и раскается, и оставит по себе благословение?

Вем, се яве из Божия человеколюбия испоручник. И еже чрез естество Ему гнева оставль, на еже по естеству обратится на милость; на Онаго от нас нудится, на се же стремление имать, и аще поражаем и нудим, како не оставит естеством примешаем, точию сами ся помилуем праведным Отца милосердием путь отверзше. Сеем со слезами, да в радости пожнем; будем Ниневитяне, а не Содомитяне. Уврачуем злобу, да не злобою скончаемся; услышим Иону проповедающа, да не огнем и жупелом потопимся. И еще изыдем от Содома, взыдем к горе, прибегнем в Сион, возсиявающу совнидем солнцу; не станем во всем обсельствии, не озримся; не огустим тело в соли, тело воистину безсмертно, и укоризну души в злобу обращающийся. Сия убо мой страх и слово и сице аз болю к язве, и сице молюся молитвою, юже и приложу реченным: согрешихом, беззаконновахом, нечествовахом, яко забыхом заповеди Твоя и в след мысли нашея лукавыя идохом, яко недостойне званию и благовестию Христа Твоего пожихом, и святых Его страстей, и еже нас ради истощания, яко быхом поношение возлюбленному Твоему. Священник и людей отпустихом вкупе вси, уклонихомся вкупе и нетребе быхом, есть творяй суд и правду, несть до единаго, затворихом щедроты Твоя, и человеколюбие Твое, и милосердие милости Бога нашего, злобы ради вашея и лукавства начинаний ваших, с ними же Ты благ, но мы беззаконновахом; Ты долготерпелив, но мы ран достойни. Вемы Твою благость и мы убо, аки бы неразумеюще нимало, о их иже согрешихом, биеми есмы; Ты страшен и кто противустанет Ти? Трепет приемлют от Тебе горы, и величию мышцы Твоею кто противится? Аще затвориши небо, кто отворит? и аще разрешиши двери его, кто содержит? Легко пред очима Твоима, ово убо жити и богатити, оживити и уморити, поразити и исцелити, и еже восхотети, деяние есть совершено; Ты прогневася, и мы согрешихом, глаголет некто от древних исповедуяся. Мне же в сопротивное время рещи: мы согрешихом, и Ты прогневася, сего ради быхом поношение соседом нашим; отвратил еси лице Твое, и безчестия исполнихомся. Но утоли, Господи, не предаждь нас до конца за баззакония наша, ниже за наших покажеши иных ран: мощно нам иных делами муки уцеломудрятися кийх? Сих язык незнающих Тя, и царств, яже Твоей державе не покоришася; мы же людие Твои, Господи, и жезл достояния Твоего, остави, Господи; сего ради накажи нас, обаче благостынею и неяростию Твоею, да не малех нас сотвориши и паче всех живущих на земли, униженныя сими аз словесы привлачаю милость. Аще ли же всесожженьми или жертвами умолити о гневе, ниже и тех убо пощадил бы.

Вы же и сами подражайте Учителю; ей, чада любезная, ей Божественнаго наказания общницы и человеколюбия, стяжите душ ваших покаянием, слезами, милостынею, любовию, правдою, смирением. Остависте грех, лучше сотвористе начинания ваша, преклоните добродетелями священных Евангелских заповедей исполненныма всещедрую утробу Божию на милость, даже неисповедимою Его благостию зде многолетне, безбедне же и благополучие настоящаго жития время препроводим, и в будущем вечныя радости сподобитися не лишимся, молитвами преблагословенныя Девы Марии, силою Честнаго и Животворящаго Креста, и Боговидных Апостол, и Великих Вселенских учителей: Василия Великаго, Григория Богослова и Иоанна Златоустаго и Великих чудотворцев, учателей Московских и всея Русии: Петра, Алексия, Ионы и Филиппа, и всех Святых. Аминь.



Ссылки:


1 Исаия, гл. 58; Иезек., гл. 3. назад

2 Иезек., гл. 34. назад

3 Иерем. 23. назад

Домашняя страница
священника Владимира Кобец

ЧИСТЫЙ ИНТЕРНЕТ - logoSlovo.RU

Создание сайта Веб-студия Vinchi

®©Vinchi Group