История
Достопримечательности
Окрестности
Церкви округи
Фотогалерея
Сегодняшний день
Библиотека
Полезная информация
Форум
Гостевая книга
Карта сайта

Поиск по сайту

 

Памятные даты:

 

Праздники

Памятные даты

 

Наши сайты:


Подготовьте себя заранее к поездке в

Ферапонтово

http://www.ferapontov-monastyr.ru/
http://ferapontov-monastyr.ru/catalog/
http://www.ferapontovo-pilgrim.ru
http://www.ferapontovo-archive.ru
http://www.ferapontovo-foto.ru/
http://www.ferapontov.ru/
http://www.patriarch-nikon.ru/
http://www.tsipino.ru/
http://a-russian-troika.ru
http://a-hippotherapy.ru

Прогноз погоды:


Ферапонтово >>>


Яндекс.Погода


На главную Карта сайта Написать письмо

На главную Библиотека ПАТРИАРХ НИКОН В ФЕРАПОНТОВОМ МОНАСТЫРЕ Патриарх Никон. Труды. Слово о Животворящем Кресте

СЛОВО О ЖИВОТВОРЯЩЕМ КРЕСТЕ


Патриарх Никон.Труды

Научное исследование,

общая редакция В.В. Шмидта


СЛОВО О ЖИВОТВОРЯЩЕМ КРЕСТЕ1


Никон, Божиею милоcтию Архиепископ Царствующаго великаго града Москвы, и всея великия и малыя и белыя России, и всея северныя страны и помория, и многих государств Патриарх


Всем повсюду и коемуждо особно пребывающим, священным и честным Архиереом, Архимандритом, Игуменом и всему священному причтух, к сим благородным бояром, и прочим всем всякаго чина и возраста православным христианом, возлюбленным во Святем Дусе чадом нашим: благодать, мир и милость от Вседержителя Бога Отца, и единороднаго Его Сына, Господа нашего Иисуса Христа, и Утешителя Святаго Духа, и наше благословение и молитва!

Упование и надежду вси имуще мы на Господа нашего Иисуса Христа изволихом во славу Святаго имене Его создати от основания монастырь во имя Честнаго и Животворящаго Его Креста на Кий острове, иже есть на мори пред Онежским устием, и церковь создати, и братию совокупити, и именовати той святый монастырь гречески Ставрос, еже есть словенски Крест, вины ради сицевыя.

В мимошедшем 147-м (1639) году мы, будуще иеромонахом, творихом шествие по морю из скита Анзерскаго; и во время то от великаго морскаго волнения едва не потопихомся, но уповающе на силу Божественнаго Животворящаго Креста, спасение получихом пред Онежским устием к пристанище к Кию острову; и славу воздахом распеншемуся на Кресте Господу нашему Иисусу Христу о онем избавлении. Будуще же тогда на том острове, на воспоминание того своего спасения водрузихом на том месте святый и животворящий крест. И от того убо времене и до сего дне Божественное мание великаго Бога и Спаса нашего Иисуса Христа спасающаго правыя сердцем, присно сердце наше в любовь Честнаго Животворящаго Его Креста разгревая и помышления наша к созданию онаго монастыря возбуждая, сотвори нас непрестанно во уме имети святыя Божественнаго Креста действия: но время не бе, еже начати сие добре созидание; зане промысл Божий онаго монастыря к созиданию избра время сие от воплощения единороднаго Сына Божия 1656-е лето, в немже сице в любовь Господа нашего Иисуса Христа и к Животворящему Его Кресту верою сердце наше распалися, яко не мощи нам, еже не начати онаго монастыря Креста созидание; все упование наше возвергше на распятаго на кресте Иисуса Христа, яко Той крайним Своим человеколюбием оный четверочастнаго своего Креста монастырь не точию всеми потребными исполнит, но и на всех четырех Вселенныя концех именита его сотворит. И таковою твердою надеждою укрепльшеся, послахом честный животворящий крест на той Кий остров, и повелехом его тамо водрузити в первее того монастыря незыблемое основание, и всем живущим окрест его всякаго чина и возраста православным христианом на вечное благословение и всех благих на приумножение. Есть же той честный животворящий крест, егоже мы ныне на Кий остров послахом, привезен от Палестины, сотворен от честнаго древа кипариса широтою и высотою таков, яков же самый Животворящий Крест, на немже изволи Христос Бог наш волею, нашего ради спасения, распятися. В немже водружена есть часть самаго того Животворящаго Креста, и от святых мощей многих святителей и мучеников и прочих; да будет честный той животворящий крест заступая и спасая коегождо притекающаго к нему по требованию его и умному намерению. И аще кто с верою восхощет к тому животворящему кресту на поклонение приити, да не менее тому силою святаго того честнаго и животворящаго креста благодать дастся, якоже путешествующим во святая Палестинская места, в нихже святое Свое смотрение Христос Бог наш исполни. Темже и вы, православнии всякаго чина и возраста христиане, возлюбленная наша чада, аще кто от вас вседушне Господа нашего Иисуса Христа и той Честный Его и Животворящий Крест любит, и сие наше писание прочитает, да имать ко Святому Животворящему Кресту веру усердну, и во оный монастырь Ставрос, еже есть Крест, на строение его и возграждение любве ради великаго Бога и Спаса нашего Иисуса Христа да дает от дарованных коемуждо Богом стяжаний, елико от благаго своего усердия кто хощет, воспоминая реченное Божественным апостолом: Доброхотна дателя любит Бог2 ; и на уме имеяй реченное Богом ко Израилю: да не явишися, рече, предо Мною тощ3 . Сего ради и в законе повеле Бог сыновом Израилевым, да на коеждо лето одесятствуют вся, елика аще притяжут4 , сиречь, койждо от всех своих стяжаний десятое да дароносит Господеви. И сице творяще благословяхуся во всех делех своих: девять бо частей благословяхуся обильною и изобильством даемыя ради, от них десятыя части Господеви: десятая бо часть, приносимая Господеви, вина бяше девятих онех оставльшихся у дающих обильне же к изобилию. Сего ради [паки глаголю], православнии народи, возлюбленная наша во Святем Дусе чада, во оный честный монастырь Ставрос, еже есть Крест, на возграждение его и разширение дадите от ихже кто требует, ов тое, ов же другое, елико Дух Святый ваше усердие наставит; да и вы всяким благим изобильством, душевным же и телесным, во всех делех своих от Бога благословитеся. Слышасте бо, чада любезная, еже рече пресвятыма своима усты Христос Спаситель: Блажени милостивии, яко тии помиловани будут5 ; дадите, и дастся вам, и меру наткану, потрясну, и преливающуся дадут на лоно ваше6 ; в нюже бо меру мерите, возмерится вам. И аще кто напоит вы чашею студеныя воды, аминь, глаголю вам, не погубит мзды своея7 . Возревнуйте оной похваленей Христом вдовице, яже в церковное сокровищное хранилище вверже худыя своя две лепте8 ; и сего ради проповедается ея благодать до днесь во всем мире, и имать еще ублажатися даже до пришествия Христова. А иже многая дающии, коликия похвалы и благодати будут достойни!

И иже потребы на созидание святых церквей и дары приносящии, не менее и сии мзды от Господа Бога приемлют и похвалу. Якоже и сам Христос Спаситель свидетельствует: внегда убо в дому Симона прокаженнаго жена грешница, пречистыя нозе Его слезами обливаше, и миро на ня возливаше, Симону о сем зазревшу, отвеща: Видиши ли сию жену? внидох в дом твой; воды на нозе Мои не дал еси: сия же слезами облия Мои нозе и власы главы своея отре. Лобзания Ми не дал еси: сия же, отнелиже внидох, не преста облобызающи Мои нозе. Маслом главы Моея не помазал еси: сия же миром помаза Мои нозе. Егоже ради глаголю ти: отпущаются греси ея мнози, яко возлюби много: а ему же оставляется мало, меньше любит9 .

Такожде и днесь, подаваяй в щедротех, и сей на Христовы нозе миро возливает, и отпущаются греси его мнози. Поревнуйте оному доброму и милостивому Патрикию10 , какову веру к Животворящему Кресту име, иже повеле некоему юноши златый с драгим камением сковати крест: добрый же он юноша, таковое благое усердие Патрикия видев, своих си десять златниц к томужде кресту приложи. Тако и вы, правовернии всякаго возраста же и чина христиане, в Господа нашего Иисуса Христа несумненну веру имуще, и милосердие Его неизреченное яко искупи нас от работы вражия честною Своею кровию, присно воспоминающе, в монастырь оный Ставрос, еже есть честнаго Его и Животворящаго Креста, подаяние творите; ведяще сие известно, яко в том монастыре яко иеромонаси, сице и монаси, распеншиися Христу и вземшии крест свой распеншагося на кресте Иисуса Христа непрестанно день и нощь молити имут о вашем многолетнем здравии и душевнем спасении, к сим и о отшедших отсюду сродницех ваших, якоже лепо усердне Бога просити. Весте бо, чада возлюбленная, яко милостыня вина безчисленных благих есть, и наипаче даемая на созидание и украшение святых церквей, многую дающим приносит благодать; и свидетельствует се священный Златоуст, глаголяй: аще что имаши, рече, на нищих иждити, тамо сиречь на создание церкве иждиви: лучше есть тамо нежели зде11 : напитай учителя, напитай диакона и священнический чин; якоже, аще бы жену приводя, или сноху, или дщерь вдая, сице о церкви прилежи, вено даждь достойно ей. Сице тебе благословения зело исполнено будет. Что бо не будет тамо от благих? Мало ли, рцы ми, еже точилу благословитися? Мало ли, еже от всех плодов твоих Богу первее участие и начатки взимати? Молитвы тамо во церкви всегдашнии за тя, хваления и собирания тебе ради, просфора на куюждо неделю, от неяже вынятыя частицы или за живаго или за мертваго человека бывают, ихже влагают в чашу, да отмыют грехи поминаемых честною кровию Владычнею. И есть толико, елико аще бы взял, яко рещи Иоанн, иже предстояше Кресту, кого любо грешника привести его под язвы Иисусовы искапающия Крове, да отмыет его ею, и бывает очищен и омовен от греха Кровию Христовою. Сего ради мнози от древняго возследования, иже ведают настоящую мысль церковную, глаголют егда влагают частицы во святую чашу словеса сия: отмый, Господи, грехи поминавшихся зде кровию Твоею честною и молитвами святых Твоих. И сие есть слово пророка Захарии, иже глаголет: ты в крови завета твоего испустил еси языки твоя от рова, неимущаго воды12 . Ибо, не токмо тогда, во время распятия Своего изъят от ада плененныя Своею кровию, юже излия на Кресте, но и ныне кровию Новаго Завета, яже изливается тайно в Божественнем священнодействии, избавляются и усопшии от ада, о них же жертва приносится, и живии от всякаго душевнаго вреда диаволя. Зане ни едино разнство имать кровь сия от оныя: но есть таяжде всячески, еюже, якоже глаголет Андрей архиепископ Кессарии Каппадокийския в толковании на Апокалипсис Иоанна Богослова на листе 64: искупляяй нас всех Господь, спасаемым же да причтет Своея ради благости не взираяй на множество грехов наших, но на Своя щедроты, их же ради на землю прибысть и честную Свою кровь о нас излия, да пороки наша и скверны отмыв, чисты приведет Отцу. И аще убо оною излиянною кровию и водою от ребр Христовых разлившеюся в стихия вся верующия Христу освятишася и крестишася раздельшияся в стихия телеса: невернии же не ощутиша сея благодати, подобию сухих и безплодных древес стоящих при источнице, или реце текущия воды. Множае паче души ныне верующих по Христове возстании живых и мертвых омываются и освящаются кровию Его, приносимою в чаши в Божественней литургии, якоже глаголет Иоанн во Откровении: Омы нас от грехов наших кровию Своею, и сотворил есть нас цари и иереи Богу и Отцу Своему13 ; якоже и Сам инде о них глаголет ко Отцу Своему: Отче, святи их во истину Твою; слово Твое истина есть14 . Не хотящих же, ни приемлющих от Крове сея освятитися, елико живии, толико и за умерших приношением, всячески яко древо по подобию прежде реченному нами, безплодни бывают, еже по реченному во Евангелии: секирою посекается, и во огнь вметается15 . И яко сынове погибели погибают и со Иудою часть наследуют, о нем же Спас за недостоинство его ко Отцу Своему вкупе о ученицех Своих проповедуя глаголаше: Егда бех с ними в мире, Аз соблюдах их во имя Твое. Их же дал еси Мне, сохраних, и никтоже от них погибе, токмо сын погибельный16 . Сего ради нам подобает всячески тщатися о добром сем начинании. Аще подаянием в приношении безкровныя жертвы, елико себе ради живых, толико и усопших, яко да будем ею освящени, по реченному самим Христом ко Отцу Своему в прошении о ученицех Своих глаголющем сице: Якоже Мене послал еси в мир, и Аз послах их в мир; и за них Аз свящу Себе, да и тии будут священи воистину17 . Не будем же к тому части сына погибели наследовати. Аще ли и иным благотворением, еже к неимущим благоподаяние, или к священным местом благодарование, сиречь к церквам благоукрашение, сосудами или одеждами священными, или иными яковыми утварьми по силе даемое, яже не нуждою, но совершенным и истинным произволением взыскует и приемлет Господь, якоже и убогия вдовицы две лепты, или якоже возлиявшия миро на главу Его жены, бывшия в Вифании в дому Симона прокаженнаго, за нюже негодующим на ню учеником о истощании мира, отвещав рече: Что труждаете жену? Дело бо добро содела о Мне. Всегда бо нищия имате с собою, Мене же не всегда имате. Возлиявши бо сия миро сие, на погребение Мя сотвори. Аминь глаголю вам, идеже аще проповедано будет Евангелие сие во всем мире, речется и еже сотвори сия в память ея18 . Подобне сему и нам бывает творящим благоподаяние к церквам, или к неимущым, якоже тойже блаженный Златоуст глаголет: яко, полезнее есть церкви созидати, нежели гробы украшати, сице рекий: кое есть убо в большем чудеси, ежели гробы убо другим создати светлы, да иже по сих яко услышат: он сице создал есть, или тебе церковь поставити? Помысли, яко даже до пришествия Христова ты мзду имети будеши, поставивый жертвенник Божий. Рцы бо ми, аще бы тебе царь повелел создати дом да тамо витает, не бы ли вся сотворил еси? Ныне же Царствие есть Христово церкве созидание; да не убо на иждивение взираеши, но плод помышляй. Идеже бо почитаем есть Бог, ничтоже есть тамо лукаво. Многое известие будет и от Бога и от человек, но яко да не обленитеся, молюся, не бездельне, но усердне имитеся за вещь сию. Аще бо изводяй честное от недостойнаго, яко уста Божия будет19 ; а иже толикия души яже ту сущия, сиречь во церкви, и яже быти имут до пришествия Христова пользуя и притяживая, колику не восприимет благодать от Бога? Слышите о блаженней Фекле: она бо, да Павла увидит, и златницы своя даде20 ; ты же, да Христа увидиши, не должен ли еси милостыню даяти? Что бо есть милостыни равно? Тая бо, по Златоусту21 , есть дружество Божие, похвала человеческая, слава, яже к Богу, приязнь от всех, грехов потребление, дерзновение многое, имений презрение, милостыня, ею же любве насаждение питаемо бывает. Ничто же бо тако любовь питати обыче, яко еже милостиву быти некоему. Сия ветвям на высоту простиратися творит: сия лучший есть источник онаго иже в раи не в четыре начала разделяющийся, но на самое Небо достизающ22 . Сей источник родит реку ону, истекущую в живот вечный. В сей смерть, аще впадет, якоже искра угаснет от источника: сице, идеже аще уканет, велия соделовает благая. Сия реку огненную угашает аки искру, сия червь тако удавляет, яко ничтоже; имеяй сию не скрежещет зубами. От воды источника сего аще воскропит на узы, разторгнет сия; аще и в пещь впадет, вся угашает. Аще хощеши якоже от источник одождати тебе Божию милосердию, и ты источник имей милостыню: ничтоже бо той равно есть: аще ты сего источника отверзеши устия, и Божия источника сицева будут устия, даже всяку бездну победити. Хощет ли кто очистити грехи своя? да творит милостыню: и свидетель на сие Соломон: Милостынею, рече, очищаются греси23 . Хощет ли кто благ именоватися? да творит милостыню: и свидетель на сие Давид: Благ, рече, муж щедряй и даяй24 . Потреба же убо есть сему разуму внимати, и в разуме милостыню творити, якоже авва Дорофей пишет: Много бо есть разнствие и разум милостыни25 . Есть убо кто, уповая на силу Святаго Животворящаго Креста, творит милостыню, да благословит Бог дело его: и Бог благословляет дело его. Другий творит милостыню, да спасется корабль его: и Бог спасает корабль его. Другий творит своих ради чад: и Бог спасает и хранит чада его. Другий творит милостыню, заеже прославитися: и Бог прославляет его. Есть же другий милостыню творяй, да избавится будущая муки: и Бог избавляет его и будущая муки. И другий творит, да мзду от Владыки восприимет: и Бог дает мзду ему; и не отметает Бог никогоже, но еже кто хощет, подает: и Бог такожде творит, и подает ему по реченному: Приходящаго ко Мне не изжену вон. И не точию таковых благих вина есть милостыня, но тою всяк, кто хотяй, подражает вышняго Владыку, по апостолу: Бывайте, рече, подражателие Богу, облекшеся в милость щедрот и благодать27 . И сам Господь Иисус глаголет: Будите, рече, милосерди, якоже Отец ваш небесный милосерд есть28 . Не рече: поститеся, якоже и Отец ваш небесный постится; не рече: будите нестяжателие, якоже и Отец ваш небесный нестяжателен есть; но что глаголет? Будите милосердни, якоже и Отец ваш небесный милосерд есть. Свойственне бо добродетель сия подражающи Бога воображает Его. Сего ради толикаго обетования, возлюбленная чада, во оный монастырь Ставрос, еже есть Крест, потребная дадите койждо по своей силе: и Бог всемогущий Вседержитель воздаст вам по святому Евангелие зде сторицею, и в будущем веце живот вечный, и сила Божественнаго Животорящаго Креста сохранит вас, и соблюдет на всякоем месте от всякаго вреда и порока. Сам же Господь наш Иисус Христос, изволивый нашего ради спасения на Кресте пригвоздитися и сим, неприязненную силу растерзавый, и смерти силу сокрушивый, и воскресением Своим нас спасый, да проливает на вас всякая благодати Своея радостные и благополучные источники, и да приложит вам, по Соломону29 , со благополучением лет живота, и да приложит, по Пророку30 , на вы, на вы и на сыны ваша Божественное Свое благословение. По многолетнем же сего жития здравии да сподобит вас небесных Своих дивных благих безконечне наслаждатися по Божественному апостолу: Ихже око не виде, ни ухо слыша, и на сердце человеку не взыде, яже уготова Бог любящим Его31 , молитвами Преблагословенныя приснодевы Марии Богородицы, силою Честнаго и Животворящаго Святаго Креста и Боговидных ангел и всех Святых. Аминь.

Восхотехом же, возлюбленная во Святем Дусе чада, Господа нашего Иисуса Христа любящии и к Честному Его и Животворящему Кресту прилежную веру имущии, любви вашей предъявити зде и древняя Божественнаго и Честнаго и Животворящаго Креста действия. Кто бо та подробну, ради неисчисления изобразити письмены может? Наказующе вас, яко чад наших любезных, присно та Божественнаго Креста действия во уме имети, и сими в любовь распеншагося на нем Иисуса Христа, Господа нашего истиннаго, день и нощь восходити, и к Честному Его и Животворящему Кресту прилежнейшу и неоскудну веру имети. Ибо великий он, Моисей, Божиим манием древле прообразуя и предписуя того Животворящаго Креста жезлом Чермное море пресече, и толикое множество немокренно и нескорбно проведе, и тоегожде Честнаго Креста прознаменованием морския воды услади, и от сухаго камени воду преславно источи, и жаждущий народ напои и насыти. К сим же чудесем той же великий Моисей Египта жезлом мучи, и воду в кровь преложи, и гордаго фараона со всем воинством пучиною покры, и многая и великая чудеса содея. Аще ли же жезл онь, образ токмо и сень Креста начертая, древле таковым и толиким чудесем бысть делатель; что убо есть, еже не имати содеяти и сотворити сей самый Честный Божественный и Животворящий Крест, самовидением видим и нами покланяем и почитаем. Той бо Честный Крест мысленнаго фараона диавола многим ранам предаст, видимых и невидимых врагов наших полчища погубит и потопит, движущихся на нас и борющих и смущающих нас страстей море немокренно и без напасти мимо итти нам устроит, устремляющияся на ны волны и бури утишит, и мир сотворит, и житие наше сие безмятежне нам прейти сподобит. Той Животворящий Крест горесть и болезнь напастей и бед наших, и частыя находы, и скорби, и искушения, случающияся нам от мысленных и чувственных враг на благость преложит и духовное услаждение, и умилит, и утешит души наша, падающая унынием и скорбию. Той Святый и Животворящий Крест воду радости источит нам от камене, Христа истиннаго Бога нашего, и пламень искушения погасит, и паче меда и сота усладит и утешит души наша и телеса, и жажду нашу уставит, яко к тому не жаждати: пияй бо от Него не имать вжаждатися во веки, но и реки потекут от чрева Его воды живы32 , яко же рече самая истина Христос Бог наш. Той Святый Животворящий Крест непобедимое оружие всем христианом, церквам красота, царем победа, упование верным, свет концем, утверждение веры, великое сохранение и похвала христианом. Сего видяще противныя силы, потаяющеся отыдут; Сей бо вселенную всю освяти, и свет наведе, лесть упраздни, языки совокупиль есть, от востока и запада и севера и юга во едину Церковь и во едину веру, и во едино крещение и любовь вся связал есть; непобедимый град Христианом, победное оружие великаго Царя Христа; Сей есть водружен на месте лобнем, и абие прозябе грозд жизни нашея. Сим драгим оружием Христос Бог наш разверзе всенесытую утробу адову, и неприязни затче уста. Сего видевше, смерть абие вострепеташа, и вся, яже от перваго Адама име, испусти. Сим вооружившеся блаженнии апостоли, всю силу вражию попраша; сим облекшеся во броня место воини Христови, мученицы, вся помышления и шатания мучителей попраша. О Сем и блаженный Павел возопи и рече: Мне не буди хвалитися, токмо о Кресте Господа нашего Иисуса Христа33 . Крестный бо образ на четыре страны разделяем, от посредняго знамения показует, яко вся Божественным естеством содержима суть: вышняя убо вышним рогом содержима суть, нижняя же нижним, посредняя же двоими странами, сиречь рукама. Даже убо покажет Господь Иисус, яко Той есть собираяй и содержаяй всяческая: сего ради крестную смерть прияти изволи. Се паки блаженный Павел, знаменуя ко Ефесеом, пишет: Да возможете, рече, разумети со всеми святыми, что есть широта и долгота и глубина и высота34 ; знаменуя убо высотою небесная, глубиною же преисподняя, широтою же и долготою последняя конца, всесильною державою содержима. Сей бо образ и Божественный Давид воспел есть, глаголя: Камо иду от Духа Твоего, и от лица Твоего камо бежу? Аще взыду на небо, се есть высота; аще сниду во ад, се есть глубина; аще возьму криле мои рамо, еже есть солнечное восхождение, се есть широта; аще вселюся в последних моря35 , западные страны тако именует, се есть долгота! Сего ради вся дела наша Божественным Крестом совершаем и покланяющеся вознесшемуся на нем Христу, величаем Его и прославляем. Хваляй бо Крест, Распеншагося на нем почитает и славит и кланяется; Крестом бо мучитель попран бысть, и смерть отбеже, и ад пленен бысть. Той бо Честный и Животворящий Крест Господень вселенныя слава и радование, благочестивых царей непобедимое оружие, безсильных сила, благочестивых людей победа и укрепление, доброчестивых воинов дерзновение, путешественником спутник, обуреваемых победа, бедствуемых избавление, Трижелаемый и Пречестный, плавающих наставление, обуреваемых тишина, монахов сила, мирских хранило, мучеников похвала, постников радование, апостолов проповедание, пророков пророчество, учителей помощь, всех святых святое и честное украшение, хранитель благочестивых христиан, Его же и сень разоряет многоковарственныя сети вражия, Тому мы, благословеннии христиане, да поклонимся, Того да облобызаем, Того вседушне целуем со страхом и радостию: со страхом убо за недостоинство наше, с радостию же за благодать, юже нам дарует. Но не престаю сладости Его наслаждаяся: Честным бо Крестом врата райская затворенная паки отверзаются, смерти держава разрушися, ад сокрушися, умершия живота сподобишася, небесная со земными совокупишася, оставление грехов нам даровася, сынове Божии и наследницы Царствия Небеснаго нарицатися сподобихомся. Крестом бо совершаются все таинства веры нашея. Тем венчаемся, Тем освящаемся. И который убо язык изглаголати может елика и какова Крестом дарова Бог роду человеческому? Сей Крест и мы, аще истинно воображаем и приличною честию восхощем Его почтити вещию или осенением десницы на лице нашем, треми первыма персты соединивше я во образ Святыя Троицы, зане тако вси православнии Восточныя Церкве сынове имут древний обычай по преданию покланятися: имуще три первыя персты совокупленны вкупе во образ Святыя Троицы, Ея же просвещением открыся нам таинство воплощеннаго Смотрения, и научихомся славити единаго Бога в триех ипостасех: Отца и Сына и Святаго Духа, и распинатися вкупе со Крестом Господа нашего Иисуса Христа Сына Божия, с небес сошедшаго, и вочеловечшагося, и плотию пострадавшаго нашего ради спасения. Являет же ся благословно, зане совокуплением триех перстов во уме имеет таинство Святыя Троицы; и внегда изобразуем на себе Крест Господень, воспоминаем страдание и воскресение Его, имиже и их ради призываем от Бога Вседержителя помощь хотящаго всем спастися; Его же Божественная благодать и промысл яви Константину первому христианскому царю, молящуся на мучителя Максентия: образ Честнаго и Животворящаго Креста на небеси воображен звездами сияющь паче солнца, к семуже и глас с небеси глаголяй сице: Константине! сим побеждай враги. Нощию же, спящу ему явися Христос, и паки показа ему явльшееся на небеси знамение Честнаго Креста, и повеле ему сотворити подобие Его, и носити сие пред полки, и не токмо рече: Максентия победиши, но и все враги твоя. Востав же, Царь Константин проповеда всем бояром видение свое, и призва хитрые златари, повеле им сотворити честный крест во образ явльшагося ему знамения златом, и бисером, и камением драгим, и повеле той честный крест носити пред полки вой своих, и силою распеншагося на Кресте Иисуса Христа, истиннаго Бога нашего, три достопамятныя победы постави: первее на мучителя Максентия, второе, егда Византию взя, третие, егда на Дунайстей реце скифы победи. И по образу оных триех славных побед, устроив те чистыя меди честныя три кресты, и нарече святыя их имена сице: ИИСУС ХРИСТОС НИКА. Ника убо есть греческое речение, славенски же толкуется: побеждает, яко рещи вкупе словенски: Иисус Христос побеждает, сиречь победу поставляет на всякое сопротивляющееся Ему деяние. В воспоминание же оныя тричисленныя Честнаго Креста победы великий Царь Константин возгради в своей державе монастырь во имя давшаго ему на враги победу Честнаго и Животворящаго Креста Господня, и именова его Ставрос, еже есть Крест, иже и до ныне во святей Афонстей горе силою Распятаго стоит неврежден. От оных же убо триех честных крестов, их же великий Царь Константин сотвори, един принесен есть в Россию при великом Князе Владимире, иже есть и доныне в царствующем великом граде Москве, егоже Божественною и Пресвятою силою той царствующий преименитый град Москва со всеми прилежащими к нему странами блюдом есть и покрываем. Егоже животворящим и всесильным действом прежде бывшии православнии велицыи Князи и Царие Росийстии светлое одоление и победы над враги своими поставляху, и окрестныя иноверныя страны под Богохранимую Российскаго Царствия державу удобь покаряху. Такожде убо и благочестивый христолюбивый великий Государь наш Царь и великий Князь Алексий Михайлович всея великия и малыя и белыя России самодержец и многих государств Государь и обладатель, исполняя Господа нашего Иисуса Христа бывшее к великому Царю Константину в видении о Честнем Кресте, еже носити его над полки на победу врагов повеление, и во всем оному первому христианскому Царю ревнуяй, оный един от триех честный животворящий крест Господень, благочестиваго своего воинства пред полками носити повеле, и силою распеншагося на Кресте Иисуса Христа истиннаго Бога нашего, врагов Его побеждает якоже и всеми видимо есть.

Веруем же в Господа нашего Иисуса Христа, яко Той силою того Честнаго и Животворящаго Креста его Царскому Величеству подаст на всех врагов его и супостатов совершенную победу и одоление, и возвысит державу царствия его, и миром оградит, и исполнит всякия благодати, яже к житию человеческому потребно, и дарует под державою его сущим вся благая и радостная.

Паки же во Второе пришествие великаго Бога и Спаса нашего Иисуса Христа Божественный Его Животворящий Крест, на нем же нашего ради спасения изволи распятися, пред самым тем праведным судиею Иисусом Христом истинным Богом нашим, грядущим воздати коемуждо по делом, первее явитися имать на небеси со славою небесною и со многими полки ангельскими отвращающихся убо от Него врагов страша и оскорбляя, почитающих же Его верных веселя и просвещая, и пришествие являя великаго Царя Иисуса Христа истиннаго Бога нашего. Ему же подобает всякая слава, честь и поклонение, пение же и благодарение со безначальным Его единосущным Отцем и со Пресвятым Благим и Животворящим Утешителем Духом, ныне, и присно, и в некончаемыя веки веков. Аминь.

Прочитающии же сие наше общее предложенное всем писание: здравствуйте! И благодать Господа нашего Иисуса Христа, и любы Бога и Отца, и причастие Святаго Духа буди со всеми вами присно!


Дан в богоспасаемем царствующем великом граде Москве в дому Пресвятые Царицы Богородицы и Приснодевы Марии и в нашей Патриархии в лето от воплощения единосущнаго безначальному Отцу Слова 1656, месяца иуния в 24 день.



Ссылки:


1 Краткое известие о Крестном Онежском Архангельской Епархии монастыре, онаго же монастыря архимандритом Лаврентием изданное. М., 1805. С. 14–22. назад

2 2 Кор. гл. 9. назад

3 5 Моис. гл. 16 назад

4 Левит. гл. 27 назад

5 Мф. 5. назад

6 Лк. 6. назад

7 Мф. 10. назад

8 Мр. 12; Лк. 22. назад

9 Лк. 7. назад

10 Пролог, сент. 5. назад

11 Бесед. на Деян. 18. назад

12 Захария 9. назад

13 Апок. гл. 1. назад

14 Ин. гл. 17. назад

15 Лк. 3. назад

16 Ин. 56. назад

17 Ин. 57. назад

18 Мф. 26. назад

19 Иерем. 15, 19. назад

20 Бесед. на Деян. 25. назад

21 Бесед. на Деян. 22. назад

22 Быт. 2. назад

23 Притч. 13. назад

24 Псал. назад

25 Дороф. Слово 14. назад

26 Ин. 6. назад

27 Ефес. 5, Колос. 3. назад

28 Лк. 6. назад

29 Притч. 9. назад

30 Псал. 113. назад

31 1 Кор. гл. 2. назад

32 Ин. 7. назад

33 Гал. 6. назад

34 Гал. 3. назад

35 Пс. 138. назад

Домашняя страница
священника Владимира Кобец

Создание сайта Веб-студия Vinchi

®©Vinchi Group