ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (7)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

оброли б было, чтоб собор был в том деле патриаршеском, чтоб не прилучилося какова соблажнения или помешки в царстве?

Тридесятседмое святых апостол правило, чтоб дважды в году собор был и на нем бы было прежде обыск о существе веры, а после об иных церковных речах был роспрос; и не одиножды бы убо той надобно собрать собор, но и многажды для того то, что учинилось не меншее дело, есть и чрез толко год овдовенство и духовне той разлучение, которая весь свет во удивление приводит.

Глаголеши, совопросниче, добро ли бы было, чтоб собор был в том деле патриаршеском, чтоб не прилучилося какова соблажнения или помешки во церквах. Слыши, сопросниче⁷⁸⁴ , Господу глаголющу: (л. 48 об.)⁷⁸⁵ Всяко⁷⁸⁶ царство, разделшееся на ся, запустеет и всяк град или дом, разделся на ся, не станет и како не может се быти, Господу свидетелствующу, еже и бысть, мнозем и будет. И ты, ответотворче, глаголеши, предлагая 37-е правило святых апостол, чтоб дважды в году собор был и на нем бы был прежде обыск о существе веры, а после того об иных церковных речах роспрос был и не одиножды, для того, что учинилося не меншее дело, есть и чрез толко год овдовенство и прочая.

Слышите, совопросниче и ответотворче, не едино правило 37-е, но многа обрящеши собору бывати.

Дващи⁷⁸⁸ в лете епископи да собираются церковных ради вещей и божественых повелений, первое убо в четвертую неделю по Пасце, второе же октября во вторыйнадесять день.

Сие убо правило преславных апостол повелевает дващи в лете собору быти, но обаче се оставлено бысть, ибо осмое правило Шестаго собора, иже в Трулле полатнем, и 6-е, иже в Никеи 2-го собора⁷⁸⁹ , единою в лете повелевают в коейждо области от всех епископ собору быти о церковных вещех и о божественых повелений стязании, и о разрешении недоуменных и неразумных в вине. И аще который епископ некия или епитемиами тяжкими, сиречь запрещении, или отлучением (л. 49 об.)⁷⁹⁰ связал, да и о таковых вещех разсудят вси епископи. Время же едино собору уставиша между Пасхою и между месяцем октябрем, перволетии бо по еллински и римски октябрь сказуется.

Своими епископи отлучении инеми да не будут прияти, обаче аще не за малодшиа или за некую распрю или за ино нечто таковое отлучение бысть. Того бо ради повелено бысть дващи в лете в коеждо области собору быти, первое убо прежде четыредесяте дний святаго и Великаго поста, второе же по времени овощнем.

Подобает по приточному словеси уязвившему человека, тому же (л. 50)⁷⁹¹ и изцелити его. Такожде и от своего епископа, отлучения заповедь приемша, от иного прияту быти без испытания и без взыскания вины несть достойно. Но и вины отлучения смотрети подобает, да некогда не по достоянию нанесено бысть нань отлучение, но от малодушия. Се же есть от ярости епископли или от распри некия или иных ради вины се сотворшу, страстныя воли епископли, страстная же воля есть, еже рещи «не сотворил ми еси сего», да будеши отлучен. Но убо да ни отлучаемии кроме подобныя вины отлучаются, ни отлучающии их епископи преобидени будут другим епископом, приемлющим без испытания таковыя. Сего ради дважды в лете в коейждо (л. 50 об.)⁷⁹² области собору быти святый собор повеле, да общею волею всех епископов тоя области всяко совопрошание и истязание церковное и всяко прекословие разрешится, якоже и 37-е правило святых апостол повелевает. Кроме же, якоже тамо написахом, осмое правило, иже в Трулле полатнем, 6-го собора и 6-е правило Седмаго собора, иже в Никеи второе собрася, скудости ради потребных, яже хотят имети напутное шествие собирающиися епсикопи, единою в лете собору быти заповедаста, идеже аще изволит митрополит. Время же собору между праздником святыя Пасхи и месяцем октябрем, той бо есть месяц во времени овощнем.

Церковных⁷⁹⁴ ради потреб дващи в лете да бывает собор в коейждо области, первое убо в 4-ю неделю по Пасце, второе же в 10 день перворетия⁷⁹⁵ .

О сем писано есть в 37-м правиле апостолстем, яко оставлено есть еже дващи в лете в коейждо области собору быти. И осмое правило 6-го Вселенскаго собора, иже в Трулле полатнем, и 6-е правило собора, иже в Никеи второе собрася, повелевает единою в лете епископом коеяждо области собиратися между Пасхою и октябрем месяцем и правилная распрения и допрошания разрешати. На тех же (л. 51 об.)⁷⁹⁶ соборех приходят презвитери и диакони и вси, иже мнятся неправедно пообидени от своих епископ, и судом от всего собора управляеми бывают. Несть же достойно никим же о себе собора творити све не сущаго в митрополии епископа, рекше митрополита.

Позван⁷⁹⁷ быв епископ на собор, аще не приидет, не имый никоеяждо нужди на пакость, несть без вины.

Прилучающихся ради церковных стязаний и правилных взысканий повелено бысть собором бывати по вся лета и собиратися области епископом, идеже аще повелит митрополит. Аще убо собравшимся (л. 52)⁷⁹⁸ епископом, некий епископ позван быв приити не восхощет, сам себе в вину влагает и запрещение да приимет от собора, аще не преслушаниа ради, но телесныя ради немощи или некоея ради житейския печали приити не возможет.

Дващи⁷⁹⁹ в лете собор бывает, идеже повелит епископ, иже есть в митрополии, и да разрешаются разпри и всяко прекословие.

Якоже прежде речено бысть, дващи в лете собору быти, еже сходити всеа области епископом, идеже повелит митрополит, на разрешение и на исправление взыскаемых церковных вещей. Возбранено же бысть, еже (л. 52 об.)⁸⁰⁰ бысть еже дващи собору бывати от 6-го правила седмаго Вселенскаго собора, иже в Никеи второе собрася, и осмаго правила шестаго Вселенскаго собора, иже в Трулле полатнем, труда ради и многих потреб, еже хотят имети на путное шествие собирающеся епископи, и повелено бысть единою в лете собору бывати от святаго праздника Пасхи даже до скончания месяца.

Иже⁸⁰¹ на соборех исправлена святыми отцы поставляемыи да внушит: мертву убо телеси причащение не дается, не яст бо, ни пиет, и в неведании презвитер да не крестит скончавшагося. По заповедем, иже в Никеи, (л. 53)⁸⁰² собор же на всяко лето да собирается и да посылается от митрополит сущих к коейждо области два или трие или елико же их изберет на блюдение места.

Хотяй поставитися епископ или презвитер должен есть святыми отцы повеленная правилы на соборех, рекше веру, и вся церковныя заповеди в слухи своя приимати. Учащу его поставляющему его и да обещается та вся хранити, и умерших телесем да не дают причащения. Господу⁸⁰³ рекшу: приимите и ядите, се есть тело Мое, яко убо кто мертвому божественаго Тела и Крови причащения подаст, ни прияти бо, ни ясти мертвый не может. Ни да крестити (л. 53 об.)⁸⁰⁴ никого же умершаго, презвитерское бо неразумие, не поможет скончавшемуся, по смерти бо крещен быв от него, несть крещен. Сии же отцы, иже в Никеи, святых последующе собору на всяко лето в Калхидоне повелевают собору бывати и посылати от коеяждо области митрополиту два или елико же изберет епископ во всех епископ место сущих во области.

Годе⁸⁰⁵ бысть и се, да в день бывающаго собора по вся лета, еже есть прежде десяти дний сентября, день святыя Пасхи проповедати.

В различных правилех сего собора повелено есть се, еже день святыя Пасхи возвещати на соборе, (л. 54)⁸⁰⁶ , иже бывает по вся лета во Африкии прежде десяти каланд сентября, се же есть в двадесят первый августа.

Не⁸⁰⁷ приходящии по вся лета на собор, аще неволя не возбранит им, своея церкве общение довлеет им.

Елико же убо епископ в коейждо области не приидут на собор, иже бывает по вся лета, ни старостию, ни болезнию, ни иною же никоею тяжкою нуждею возбраняеми, но леностию или небрежением се творяще, таковыя повеле собор братски наказати. Се же правило и образ наказанию полагает: повелевает бо епископом братии их не приобщатися, ни служити с ними, (л. 54 об.)⁸⁰⁸ но токмо в своих церквах таковыи да имут общение и служат в них.

Изволиша⁸⁰⁹ отцы грамоты послати ко властелем, яко да потщившесь дати им помощь изгнати донатианы, во общей потребе бывши, грамоты да посылаются Господьскому престолу и собор да бывает, идеже есть подобно. Аще не общия потребы, в своих областех да творят собор и судятся.

Иже убо в коейждо области собору бывати по вся лета, собиратись епископом и вся прилучившаяся им, особно церковная стязания, по правилом изысковати же и разрешати собор повелевает. А еже от всех (л. 55)⁸¹⁰ областей и сущих во Африкии епископом сходитися в некоем месте и общь творити собор, аще не будет общая вина, ея же ради должни суть снитися, инако таковому собору быти не прощает, труда ради шествия за долготу дний. Егда же будет некая общая потреба, ея же ради общему собору быти, должни суть вси епископи к держащему первый престол епископу грамоты послати, и той, идеже аще изберет место стройно снитися, ту да соберутся.

Понеже811¹ не мощно дващи единою на всяко лето да бывает собор среде Пасхи и октоврия месяца.

Прилучающихся (л. 55 об.)⁸¹² ради напастей епископом и варварского нашествия, еже дващи в лете бывати собору, от сего правила отложено есть и повелено бысть единою коегождо лета собору бывати между Пасхою и октоврием месяцем.

Понеже⁸¹³ невозможно по древнему повелению дващи в лете собору бывати, да бывает единою по повелению Шестаго собора, и возбранивый властель да отлучится, и небрегий епископ да приимет запрещение. Собору же бывшу, аще митрополит возмет что от епископа, да истязан будет четверицею.

Утвержает собор сей, еже единою в лете бывати (л. 56)⁸¹⁴ собору в коейждо области, аще убо обрящется страны тоя властель, возбраняя епископом сходитися на собор, иже бывает правилных ради и евангелских вещей, таковаго отлучает. Митрополита же, небрегуща его собору бывати, кроме некоея беды и нужди, правилным запрещением повинует, повелевает же не имети власти митрополиту взяти что, от них же епископи принесоша с собою или скотину, рекше конь, или осля, или ин некий вид. Аще же обличен будет взем нечто от них, да возвратит четверицею.

Но сии вси ни едино что любо написаша о патриаршеском суде, от своих (л. 56 об.)⁸¹⁵ епископ судиму быти разве церковных правлений по святым каноном, а не чрез каноны что любо вново вводити на развращение святей Церкви, яко же ты, ответотворче, новыя законы вводиши, ово от отреченых книг, ово от внешних баснотворных сложений чрез уставленыя святыя книги по святому апостолскому правилу 85-му и 59-му правилу, иже в Лаодикии, и 24-му правилу, иже в Карфагене, и великаго Афанасия и Григория Богословца, и богословнейшаго Амфилохия.

Аще⁸¹⁶ кто лживое писание нечестивых еретик книги яко святы в церкви пред всеми почитает на пагубу (л. 57)⁸¹⁷ людем и церковному причту, да извержется.

Многи книги от еретик искажены быша на вред простейшим человеком, сиречь невеждным, якоже и от святаго Климента написаныя епископом апостолския заповеди, яже того ради собором отвержены быша. Некая же и вся отнюдь от еретик сложена быша и ложно надписание имуща, якоже се от святых отцов списаны, еже потаеныя нарицают. Таковым убо книгам отверженым быти повелевает правило и на почитание не предлагати их. Аще же который пред людей сия изнесет и в церкви чести покусится, аще есть епископ или презвитер или диакон, да извержется, (л. 57 об.)⁸¹⁸ книги же да сожгутся.

Ты же все, еже что любо, ни творишь в ответех твоих, все страстно и разслаблено и всякия нечистоты полно, якоже вторый Максим Киник, о нем же есть писано втораго Вселенскаго собора 4-е правило.

Максим⁸¹⁹ , глаголемый Киник, от епископов чюжд и всяко не священ, иже от него в причет прият бысть.

Сей Максим Киник сказовается безстудный, Церковь Божию раздра и многаго мятежа и молвы сию исполни. Волк вместо пастыря явлься и вся грехи прощати готов согрешающим единаго ради еже нечествовати в повелениих, рекше преступати заповеди, якоже глаголет (л. 58)⁸²⁰ великий Богословец Григорий: Чюжд убо сей Максим от епископства да будет, и вси от него поставлении презвитери и диакони и прочии причетницы чюжди священия. Послушай же Карфагенскаго собора 21 правило, иже добре и богоприятне изведеная буестию поколебати покушается, несть епископ. Да како ты вводиши чрез святыя каноны суду быти на мя от своих епископ? Покажи ми, слепче, от истины, да и аз тебе покажу, яко ни митрополита достойно есть судити своим епископом, развее святейшаго вселенскаго Константинополскаго патриарха.

Епископа⁸²¹ в некоей вине суща, аще не весь (л. 58 об.)⁸²² собор области тоя, обаче дванадесять епископ да судят, презвитера же шесть и диакона трие. И се есть о епископех, а не о митрополитех и патриарсех.

Причетницы⁸²³ между собою распрю имуще, аще оставльше своего епископа, к мирским судиям приступят, по правилом вину да приимут. Причетницы же, аще имеют что на епископа, да ожидают собора. Аще же епископи на митрополита, Константиняграда патриарху да возвестят.

Аще причетник имать нечто на причетника, не подобает ему (л. 59)⁸²⁴ судитися пред мирскими судиями, но от своего епископа. Аще же оставльше своего епископа к мирскому судищу приступят, по правилом запрещение да приимут. Такоже и причетник, аще имать нечто на своего епископа, да приходит к митрополиту страны тоя, егда в реченое время соберутся к митрополиту всея области его епископи, тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится. Под ним же суть епископи и митрополиты всех⁸²⁵ областей страны тоя или от патриарха Константиняграда (л. 59 об.)⁸²⁶ судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть.

Аще⁸²⁷ же причетник или ин некто вину имать на епископа, первое преподобный митрополит области тоя по священным правилом и по нашим законом таковую вещь да разсудит. И аще кто поречет сужденая, к преблаженному епископу и патриарху вещь возвестит и той подобный тому подаст конец. (л. 60)⁸²⁸ Аще же на митрополита имать что епископ или причетник или ин кто, патриарх того правления подобным образом да судит. Зри, ответотворче, где есть, иже бы патриарха свои епископи судили, ниже митрополита прощено есть епископом судити, развее патриарха.

1 2 3 4 5 6 ... 8 9 10 11 12 13 14 15 16 17 18 19 20 21 22 23 24 25 26 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

⁷⁸⁴ Так в ркп. назад

⁷⁸⁵ На верхнем поле листа киноварная помета: 7-е возражение. назад

⁷⁸⁶ На левом поле листа помета: Матф. 46. назад

⁷⁸⁷ На верхнем поле листа киноварная помета: на 7-й вопрос и ответ. назад

⁷⁸⁸ На правом поле листа помета: лист 10. назад

⁷⁸⁹ Слова «иже в Трулле полатнем, и 6-е, иже в Никеи 2-го собора» надписаны сверху. назад

⁷⁹⁰ На верхнем поле листа киноварная помета: 7-е возражение. назад

⁷⁹¹ На верхнем поле листа киноварная помета: на 7-й вопрос и ответ. назад

⁷⁹² На верхнем поле листа киноварная помета: 7-е возражение. назад

⁷⁹³ На верхнем поле листа киноварная помета: на 7-й вопрос и ответ. назад

⁷⁹⁴ На правом поле листа помета: лист 70. назад

⁷⁹⁵ Так в ркп. назад

⁷⁹⁶ На верхнем поле листа киноварная помета: 7-е возражение. назад

⁷⁹⁷ На левом поле листа помета: лист 80. назад

⁷⁹⁸ На верхнем поле листа киноварная помета: на 7-й вопрос и ответ. назад

⁷⁹⁹ На правом поле листа помета: лист 101. назад

⁸⁰⁰ На верхнем поле листа киноварная помета: 7-е возражение. назад

⁸⁰¹ На левом поле листа помета: лист 126. назад

⁸⁰² На верхнем поле листа киноварная помета: на 7-й вопрос и ответ. назад

⁸⁰³ На правом поле листа помета: Матф. 108; 1 Кор. 149. назад

⁸⁰⁴ На верхнем поле листа киноварная помета: 7-е возражение. назад

⁸⁰⁵ На левом поле листа помета: лист 149. назад

⁸⁰⁶ На верхнем поле листа киноварная помета: на 7-й вопрос и ответ. назад

⁸⁰⁷ На левом поле листа помета: лист 150. назад

⁸⁰⁸ На верхнем поле листа киноварная помета: 7-е возражение. назад

⁸⁰⁹ На левом поле листа помета: лист 155. назад

⁸¹⁰ На верхнем поле листа киноварная помета: на 7-й вопрос и ответ. назад

⁸¹¹ На правом поле листа помета: лист 180. назад

⁸¹² На верхнем поле листа киноварная помета: 7-е возражение. назад

⁸¹³ На левом поле листа помета: лист 212. назад

⁸¹⁴ На верхнем поле листа киноварная помета: на 7-й вопрос и ответ. назад

⁸¹⁵ На верхнем поле листа киноварная помета: 7-е возражение. назад

⁸¹⁶ На левом поле листа помета: лист 17. назад

⁸¹⁷ На верхнем поле листа киноварная помета: на 7-й вопрос и ответ. назад

⁸¹⁸ На верхнем поле листа киноварная помета: 7-е возражение. назад

⁸¹⁹ На левом поле листа помета: лист 86. назад

⁸²⁰ На верхнем поле листа киноварная помета: на 7-й вопрос и ответ. назад

⁸²¹ На правом поле листа помета: лист 122. назад

⁸²² На верхнем поле листа киноварная помета: 7-е возражение. назад

⁸²³ На левом поле листа помета: лист 96. назад

⁸²⁴ На верхнем поле листа киноварная помета: на 7-й вопрос и ответ. назад

⁸²⁵ В ркп. дважды. назад

⁸²⁶ На верхнем поле листа киноварная помета: 7-е возражение. назад

⁸²⁷ На левом поле листа помета: лист 326. назад

⁸²⁸ На верхнем поле листа киноварная помета: 8-й вопрос и ответ. назад

Домашняя страница
священника Владимира Кобец