ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (9)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

икон сказал, что повелел Богом венчанный Государь Царь, что был здесь на Москве, то он в ни во что почел, и называл собор тот сонмищем жидовским.

В Матфея святом в евангелии⁶⁰, живодавец Христос глаголет: где два или три соберутся во имя Мое, тамо и Аз посреде их. И после во евангелии святаго Луки⁶¹, и Аз посреде вас как служащий, тем же образцом как сидел меж учител и слушая и спрашивая. Убо естли меж двома или трема обретается Спаситель Христос седящи, какоже на одном соборе собранным именем не сидит Спаситель Христос невидимо, как помогающи и освещающи их, коли Сам обещался, говоря: се Аз с вами есмь во вся дни до скончания века⁶². З жестости тогда человеческия, что ни есть говорил Никон, выговорил и слово с яростию сказано: не надобно их с плохостию роспрошать: а кто ни есть соборныя святыя собрания называет сонмищем жидовским, надобно как еретика проклинать, для того что диалог Григорий преждния четыре Вселенския соборы почитал, что четыре крепости святых евангелист.

Глаголеши, совопросниче, яко аз, собором что повелел Богом венчанный (л. 61)⁶³ государь царь, что был здесь на Москве, то я ни во что почел и назвал собор тот сонмищем жидовским.

Ответ:⁶⁴ Аще кто чрез правила святыя собирает соборы, не есть тот собор. На Василия Великаго повелением епаршеским и на Григория Богослова повелением Иуалиевым, и на Иоанна Златоустаго повелением царевым и царицыным, и на Филиппа митрополита повелением царя Иоанна, и ни есть тии собори, ниже именуются святии, но сонмища суть, а не собори. Тако⁶⁵ Господу глаголющу: Идеже⁶⁶ о имени Моем собрани два или трие, ту есмь посреде их, и паки овца Моя гласа Моего слушают, и Аз знаю их (л. 61 об.)⁶⁷ и последуют Ми. И паки: Аще⁶⁸ кто любит Мя, слово Мое соблюдет, и Отец Мой возлюбит его и к Нему приидеве и обитель у Него сотвориве, и⁶⁹ аще заповеди Моя соблюдесте, пребудете в любви Моеи, якоже и Аз заповеди Отца Моего соблюдох и пребываю в Того любви. Имеяй⁷⁰ заповеди Моя и творя их, он есть любяй Мя.

Не⁷¹ всяк глаголяй Ми «Господи, Господи» внидет в царство, но творяй волю Отца Моего, иже на небесех. Мнози рекут Ми во онь день «Господи, Господи, не Твоим ли именем пророчествовахом и Твоим именем бесы изгонихом и Твоим именем силы мнози сотворихом», и тогда исповем им (л. 62)⁷², яко николиже знах вас, отыдите от Мене, делателие беззакония. Всяк убо, иже слышит словеса Моя сия и творит их, уподоблю его мужу мудру, иже созда храмину свою на камени; и сниде дождь, и приидоша реки, и возвеяша ветри, и припрешася храмине той, и паде, и бе падение ея велие.

Что⁷³ же зовете Мя «Господи, Господи и не творите, яже Аз глаголю». Бога исповедают ведати делы же (л. 62 об.)⁷⁴ Его отмещаются. Мерзцы суще и непокоривии и на всяко дело благо⁷⁵ неискусни, иже в законе хвалишися, преступлением закона Богу досаждаеши.

Блюдите⁷⁶ убо, како опасно ходите, не яко немудри, но яко премудри, искупующе время яко дние злии суть. Сего ради не бывайте безумни, но разумевающе, что есть воля Божия.

И ты убо, ответотворче, пишешь: Господь глаголет: Се Аз с вами есмь во вся дни до скончания века. И⁷⁷ паки ты глаголеши о нас з жестости тогда человеческия, что ни есть говорил, Никон выговорил и слово с яростию сказано, но не надобно с плохостию роспрошати, а кто ни есть соборныя святыя со(л. 63)брания⁷⁸ называет сонмищем жидовским, надобно как еретика проклять для того диалог Григорий прежние 4 Вселенския соборы почитал, что четыре крепости святых евангелист.

Кто ти, плутотворче, сказал, яко святыя соборныя собрания называю жидовским сонмищем и надобно как еретика проклинать для того, что диалог Григорий прежние 4 Вселенския соборы почитал? Зри, яко и самый совопросник не о Вселенских соборех вопрошал тя, но времене сего, их же царьское величество собра и одари, на отмщение нашему отхождению да глаголют все, еже он, государь, восхоте, якоже (л. 63 об.)⁷⁹ и самое тое их соборное деяние являет, а не о Вселенских святых соборех.

Множицею выше рекохом и ныне глаголем, иже аще кто чрез правила 7-го святаго Вселенскаго собора приложит или отложит да будет проклят, якоже и ты, продерзивый, пишешь и глаголеши и новыя законы вводиши от отверженых и несведомых внешних книг.

Такожде ум имеяй, аще кто назовет сие соборище жидовским сонмищем, не погрешит истины. Аще кто разсмотрит тех деяние написаное на соборище том, все лжи полно и ни единыя истины несть.

Собором же убо бывающим по 37-му (л. 64)⁸⁰ святых апостол⁸¹, якоже выше рекохом и ныне глаголем собравшимся. Такожде во Антиохии Сирстей в 20-м правиле глаголет: Несть⁸² достойно никим же о себе собора творити свене сущаго в митрополии епископа, рекше митрополита. Такожде и в Лаодикии собора в 3-м правиле: Собиратися епископом идеже, аще повелит митрополит. Такожде и святаго Вселенскаго 4-го собора, иже в Халкидоне, в 19-м правиле написано, еже сходитися епископом, идеже повелит митрополит, а не царь. Такожде Карфагенскаго собора в правиле 95-м: Егда ж будет некая общая потреба, ея же ради общему собору быти, должни суть вси епископи к держащему первый престол епископу грамоты послати, (л. 64 об.)⁸³ и той идеже аще изберет место стройно снитися, ту да соберутся.

Такожде и 7-го Вселенскаго собора в 6-м правиле глаголет: Митрополита же небрегуща его собору бывати, кроме некия беды и нужди, правилным запрещением повинует.

Такожде новых заповедей Иустиниана царя 8-й грани глава 8-я: Митрополитом собиратися к патриархом, а епископом к митрополитом.

И по седми святых Вселенских соборех нигде обретается царем собраный собор, развее во Флоренце осмый был собор чрез святыя Вселенския соборы собран, тамо бывшу и царю и патриарху вселенскому, но обаче беззаконно дерзнувшим. И последи собору тому прокляту бывшу (л. 65)⁸⁴ по 1-му правилу 7-го Вселенскаго собора и все ни во что их злодейство бысть, аще и царь был благочестив и вселенский патриарх и со прочих патриарх наместники, но беззаконное деяние сотворшее теми отвержено бысть и со беззаконными вменено есть. О нем же последи пространнее скажем.

Како же ты, враже истины и всякия правды отчюжденне, дерзаеши нововводныя вопросы, чрез святыя правила святых апостол и святых отец вопрошены, толковати и утверждати, не стыдяся божественых законов и утверждения.

Послушай бывшаго соборнаго деяния во времена благочестиваго царя (л. 65 об.)⁸⁵ государя и великаго князя Феодора Ивановича всеа Русии, еже по божественней ревности на лучшую красоту святей Божии Церкви устроити патриаршеский престол, еще прежде в Московском государстве не бысть тое власти, но митрополитом Московским и всея Русии именующимся по благословению святейших вселенских патриарх. И уже желаемой царьскаго величества мысли к делу приити начинающейся, и призвав царь преосвященнаго митрополита со всем освященным собором и весь свой царьской сигклит. Таже начат царь мысль свою преосвященному митрополиту и всему освященному собору и всему сигклиту (л. 66)⁸⁶ сказовати: весте, отцы, яко излишшее благочестие бысть во дни благочестивых царей во Елладе и во Африке, во Египте и в Ливии, и в Палестине, и в Сирии, сиречь в Греческой земли, в Константинеграде и во Александрии, и во Антиохии, и во Иерусалиме и в других странах, идеже неизреченная смотрения Божия содеяшася, и многочеловечный народ от тмы неведения ко свету благоразумия обратишася. Ныне же яко слышим, аз же и вы, яко тамо преславная и премногия хвалы достойная, еже в похвалу в Троице славимому Богу и ко спасению человек устроена быша, вся попрана бысть рукама (л. 66 об.)⁸⁷ злочестивых турков. И яко ничто же от сих во благое зрится, но вся безчествуема, Богу тако изволшу в наказание наше до толика, яко тамо сущим патриархом и прочим святителем наречением святительства токмо именоватися, власти же едва не всяко лишением, ныне то зло и зде достиже⁸⁸. Наша же страна, якоже зрите, благодатию Божию во много разширение приходит, наипаче же благочестивая наша вера, яже на основании апостол и пророк утверждена, возрастает и множится.

И сего ради хощю, аще Богу угодно будет и писания Божественая не пререкуют, яко да в царьствующем нашем граде Москве устроится (л. 67)⁸⁹ превысочайший престол патриаршеский. И аще убо угодно вам сия, возвестите ми, аз бо мню, яко ничто же в сих благочестию повреждение, но и паче предспеяние веры Христове.

Сия же слышав, преосвященный митрополит и прочии святителие и благороднии боляре совет благочестиваго царя похваляют и отвсюду утверждают, и церковь Божию, яже в Русцтей митрополии патриаршския власти достойну быти глаголют. Но обаче, рекоша, благочестивый царю, аще возхощет благочестивая твоя держава, да возвестится о сем писанием вселенским четырем патриархом. И сим коемуждо (л. 67 об.)⁹⁰ своими митрополиты и епископы советовавшим писанием между собою согласившемся, Богу помогающу, удобь таковое начинание к совершению приити возможет. Понеже благочестивая ти держава и мы вси имеем сих яко столпы благочестию, аще и во области поганых суть, но святая, якоже рече Писание, николи же осквернена бывают. Но и паче же сего ради, да не возмнится, о благочестивый царю, инем языком, наипаче же пишущим на святую нашу веру латином и прочим еретиком, яко в царьствующем граде Москве патриаршеский престол устроися токмо единою (л. 68)⁹¹ царьскою властию.

Благочестивый же царь, слышав сия, не тяжко внят о сем⁹², аще и властию можаше превысочайший престол патриаршеский устроити, яко царь и самодержец, но обаче изволи повинутися воли Божией по правилом святых апостол и святых отец и святительскому совету, предпочиташе бо святительство боле царства предстояния ради олтарю и приношения непорочнаго Агнца рукама сих, по Божественному писанию чтит иерея, чтит вышняго Бога, понеже иерейская честь на Бога возходит, не существене не буди то, но премногия ради благодати, яже от Христа Бога апостолом и апостолским приемником дадеся. (л. 68 об.)⁹³ Слушаяй, рече, вас, Мене слушает, и отметаяйся вас, Мене отметается, отметаяйся Мене, отметается и пославшаго Мя. И паки. Приемляй вас, Мене приемлет. Наипаче же по всему являяся, яко сын и послушник святыя Церкве.

И абие слово в дело произвести повеле и писанием убо царьским и святительским к четырем патриархом и ко многим митрополитом с таковым вопрошением вскоре посылаемым. Послании же со многим желанием пути емляхуся и благодатию Божиею искомое получиша. Виждь, расколниче святыя Церкви, не тайно послание, якоже ныне⁹⁴. И времени неколико немалу минувшу, абие послании в царьствующий град Москву ко⁹⁵ (л. 69)⁹⁶ благочестивому царю приидоша, носяще с собою от четырех патриарх и от митрополит о патриаршестве совет и изложение на болшее утверждение, и писание патриаршее и митрополичье и прочих епископ принесоша червлеными шарми назнаменовано и с подписанием рук и печатей святительских утвержено, их же ко утвержению благочестия к таковому изложению подписаша и печатьми утвердиша более седмидесять отец.

Возвестиша же и сие, яко поставления ради патриаршескаго яже в велицей России изволит святым отцем приити в царьствующий град Москву единому от патриарх, наипаче же Константино(л. 69 об.)⁹⁷полскому, превысочайшее место имущему.

И сия слышав, благочестивый царь премногия радости исполнися. В третие же лето прииде вселенский патриарх Иеремия со иными митрополиты и архиепископы, архимандриты и игумены, нося на рускую митрополию о патриаршестве совет и утверждение. И тако совершается о патриаршестве совет и избрание и бывает поставлен в царьствующем граде Москве преосвященный Иов митрополит патриархом, в третие рукоположен святейшим Иеремиею патриархом. Первие поставлен бысть в Коломенския епископы, второе на Московское митрополичество, (л. 70)⁹⁸ третие на патриаршество, свидетелствуют тому книги поставления.

Даде же вселенский патриарх Российскому престолу Божия Церкве власть, яко по преставлении коегождо патриарха своими митрополиты и архиепископы и епископы и всем освященным собором возводити инаго на патриаршеский престол, якоже и утверждения грамоты свидетелствуют о сем святейших вселенских патриарх, а не на живаго место инаго возводити. Но ни же без совету вселенских патриарх.

Видел⁹⁹ ли еси, расколниче святыя Церкве и попрателю святых апостолских канонов и святых отец, каковою божественною любовию царь благочестивый (л. 70 об.)¹⁰⁰ возгореся, обаче же чрез святыя правила никакоже смел что любо сотворити, ниже преслуша совета архиерейскаго, но во всем повинуясь божественным велениям и з долготерпением созда дело Божие в совершение о патриаршестве, ниже тайно что любо¹⁰¹, якоже ныне послали ко святейшим вселенским патриархом лазутчиком о нашем отшествии.

Смотри же о сем и собора бывшаго во Цареграде, како не смели ниже вселенстии четыре патриархи чрез правила святыя дерзнути о патриаршестве Московском и о прочих взыскании что любо, но со свидетелством святых правил, а не так как ты, новый (л. 71)¹⁰² расколниче, а реку еретиче, извержеными Климентовыми правилы и прочими езоповыми и воронами и иными ложными шпынскими проклятыми книгами чрез апостолское 60-е и 85-е и первое Вселенскаго 7-го собора приводиши ложная свидетелства, как ворона сам, обходиши сушю и море, творя расколы как в Мутьянской земле, тако и зде.

Слушай, расколниче.

Соборное деяние, еже бысть написано в Константинополи, написано убо тамо еллиногрецким диалектом, в он же облечено, претече во преславный царьствующий град Москву. В нем же стяжа сии, словенская (л. 71 об.)¹⁰³ диалекта одеяние, его же красоту да зрит всяко верных состояние.

Святому и священному великому собору во имя Господа Бога и Спаса нашего Иисуса Христа, собравшуся во храме Пресвятыя Владычицы нашея Богородицы и Всеблаженныя Приснодевы Марии, нареченныя Парамифии, сиречь Утешение, в Константинополи во дни благочестиваго и Богом венчаннаго великаго царя Московскаго и самодержца всеа Русии Феодора Ивановича, председателствующим святейшим православным патриархом.

Всесвятейшему Иеремию, архиепископу Константинополскому, новаго Рима и вселенскому патриарху, (л. 72)¹⁰⁴ и блаженнейшему Мелетию, папе и патриарху великаго града Александрии и судии вселенскому, и наместнику всесвятейшаго Иоакима Божия града великия Антиохии и всего Востока, и всесвятейшему Софронию, патриарху святаго града Иерусалима и всеа Палестины, пришедшу пресветлому Григорию, Афанасиеву посланнику, предреченнаго благочестивейшаго царя соседящим и всесвященнейшим архиереом от всеа области Восточныя Церкви православным.

Мелетий блаженнейший Александрийский рече: Весте, братие, яко знаменательне, еже ко Спасу и Богу нашему любве пастырьское есть тщание. Петре бо (л. 72 об.)¹⁰⁵ рече: Любиши ли Мя, паси овцы Моя. Ея же ради вины и мы многия многажды подвиги же и труды и беды претерпехом и терпим, якоже весте, и ныне убо, понеже присланы к нам грамоты от всесвятейшаго вселенскаго брата и сослужителя нашего и прочих архиереов, просящим приити в Константинград церковных ради нужд. Аз же и грамоты, яже из православнейшия Москвы от православнейшаго Феодора получив, и о обоих вещех пекийся, нужде церковней и царьском достоинстве, молю ваше благоволение, опасно глаголемая от нас разсмотряюще, соизвествоватися нами о возглаголющихся, (л. 73)¹⁰⁶ еже аще праведно быти бы явилося.

Первое, убо понеже Божиею благодатию Церковь Христова совершена сущи и по благочестивым догматом совершеное прият устроение во уставленых и изъявленых от самаго Спаса и апостолы и отцы святыми возсиявшими зде. На святем же соборе тремисты и осмиюнадесяте богоносныма отцы, иже в Никеи, и в последующих Вселенских шестих соборех даже до седмаго, второе в Никеи собравшагося, такожде и иже между сими седми Вселенскими в различная времены собравшихся поместных православных соборех, понеже убо совершение прият православных Церковь, не токмо по (л. 73 об.)¹⁰⁷ богоразумия и по благочестия догматов и по освященному церковных вещей уставу.

Праведно есть и нам всякую церковных ограждений новину потребляти или разоряти, видящим новины всегда виновны бывати церковнаго смятения же и разлучения¹⁰⁸, но уставом последовати святых отец и яже наученая невредимо без приложения коего любо и отъятия приемлющим, по первому Вселенскаго 7-го собора правилу сице имущу.

Святыя¹⁰⁹ правила облобызающе приемлем и держим святых апостол и шестих Вселенских собор, к сим же и поместных и еще же и святых отец (л. 74)¹¹⁰ наших, яко единаго Святаго Духа вдохновенных. Их же прокляша, проклинаем, их же извергоша, изметаем, и их же отлучиша, отлучаем, им же запретиша, запрещаем.

Иже священнический¹¹¹ получивше сан ведения и правления канонных повелений, си есть воображения, яже приемлюще радостно, с богоявленным Давыдом поем Владыце и Богу, глаголюще: На пути свидений Твоих насладихся яко в богатстве мнозе, заповедал еси правду, свидения Твоя, Владыко, вразуми мя и жив буду. И вовеки пророческий глас заповедует хранити заповеди Божия и жити в них, яве непоколеблемы (л. 74 об.)¹¹² и недвижимы пребывают, якоже боговидец Моисей рече: В них же несть приложити и от них несть отъяти. И¹¹³ божественный Петр, в них хваляся, вопиет: В ня же, желают ангели приникнути. И¹¹⁴ Павел, аще и ангел, благовестит вам: Паче преданаго проклят будет сим сицем сущим и свидетелствующим нам, радующимся о них, якоже кто обрящет корысть многу. Сладкобожественныя каноны утвержаем и цело пребывание их неподвижимо утвержаем, заповеданных от святых духовных труб, прехвалных апостол и шестих святых всея Вселенныя собор и поместных (л. 75)¹¹⁵ собравшихся поданиом тако в них повелении святых отец наших.

От единаго бо вси Святаго Духа озарени бывше, повелеша яже на ползу. И их же проклятию предаша, и мы проклинаем, и их же извержению, и мы извергаем, и их же запрещению, и мы запрещаем, и их же отлучению, и мы отлучаем.

Не¹¹⁶ сребролюбен имуще нрав, но доволни сущими, иже взошедый на третие небо и слышав неизглаголанныя глаголы, Павел, божественный апостол, яве вопиет.

При Константине царе, внуце треклятаго и богоненавистнаго Лва гноеименитаго¹¹⁷, и при Ирине, матери его, яже бе от Афинеи, сей Седмый собор (л. 75 об.)¹¹⁸ бысть 367 богоносных отец советом и умолением Тарасия священнаго патриарха¹¹⁹ Константиняграда. Собор же сих бысть на иконоборцы, рекше на оклеветающия христианы, и сих прокленше. Церкви же древнюю красоту Ея дароваша, и иконная воображения Той имети, и любезно облобызати сия добре заповедавше. Тако же и образу Честнаго Креста покланятися и облобызати его повелевше. Святых же и прехвалных апостол правила и святых Вселенских шестих собор, к сим и поместных собравшихся, утвердивша. Проклятыя же от них, проклиняют и сии, осужденныя же (л. 76)¹²⁰ от них некоего ради греха или изверженыя, такожде и сии осуждают, отлученыя же от них, отлучают, и запрещением повинных от них запрещают равно, ничтоже приложивше или отъемше от святых апостол и от богоносных отец, изложеных и повеленых.

Сим сице рекшимся от блаженнейшаго Александрийскаго Иеремии, всесвятеиший патриарх рече: Сия убо вси исповедахом, абие же священноначалства, наипаче же и самаго Божественнаго крещения сподобльшеся исповедуем. Святый собор, рече, вси исповедуем и у всех сия хранима быти повелеваем, якоже отцем нашим вси последующе, и яже (л. 76 об.)¹²¹ целуют они, целуем мы, и яже отметают, тако и мы отметаем, якоже и первое правило святаго и Вселенскаго, иже в Халкидоне, собора прознаменова и первое 7-го изъясни.

Мелетий блаженнейший Александрийский рече: Понеже патриаршеских престолов поставление бе убо и древним неким обычаем соборныя Церкве, прежде начертавшися, яснее же изобразися по святому Вселенскому первому собору, яко сего 6-е правило показует имать же сице. Древний обычай да держится, иже во Египте и Ливии и Пендаполии, якоже Александрьскому епископу всех сих имети власть, понеже и в Риме сей обычай есть, (л. 77)¹²² подобне же и во Антиохии и во иных областех началства цела сохраняема от церквей. Соборне же произъявлено оно, яко аще кто был бы епископ без митрополичьи мысли, таковому великий собор устави не быти епископом. И Седмый, на нем же Иерусалимский почтиша престол ради Спасителя нашего, по плоти смотрения во оней стране бывшаго, подавше подобную честь, аще и последний иных патриаршеских престол да не бы мечтание некое подали, паче иных предпочитавше, Христово Царство славити земное.

Подобает же и мне благочестивейшим грамотам боговенчаннейшаго царя отвещати. Молю и ваше благоволение, аще праведная (л. 77 об.)¹²³ глаголати явихся бых и отеческих уставов держащаяся, искусити и сопричтати соборне, сужду, убо праведне быти Божиим человеколюбием и благодатию, украшенный царством град православнейший Московский и в церковных величатися вещех по 28-му 4-го собора правилу 630 святых отец, в Халкидоне сошедшихся, глаголющему сице «везде святых уставом последующе», и ныне прочтеное правило 150 боголюбезнейших епископов, собравшихся при благочестивыя памяти великом Феодосии, бывшем царе, в царьствующем в Константинополи, новем Риме ведуще. Таяжде и мы уставляем же и судим о старейшинствах святейшия Церкве (л. 78)¹²⁴ тогожде Константинополя, новаго Рима, занеже царьствовати граду оному отцы в лепоту даша старейшинство. И тою же мыслию движащеся 150 боголюбезнейшии епископи равная старейшинства воздаша новаго Рима святейшему престолу, благословно разсудивша царьством и сигклитом почтенному граду и равное получившему достоинство старейшему царьствующему Риму и во церковных, яко оному, величатися вещех, второму по оному сущу. И яко Понтийския и Асийския и Фракийския страны митрополитом токмо, еще же и иже в варварских епископом предреченных стран, рукополагатися от предреченнаго святейшаго престола (л. 78 об.)¹²⁵ Константинополския святейшия церкве, рекше коемуждо митрополиту предреченных стран со епископы области поставляющу епископы, якоже Божественныма правилы повеленое есть. Рукополагати же ся, якоже речеся, митрополитом предреченных стран от Константинополскаго архиепископа уставом согласным по обычаю бываемым и возносимым к нему. Глаголет же и Константинополское святых отец правило 73: Константинополскому убо епископу имети старейшинство чести по Римстем епископе, заеже быти ему Константинополю новому Риму.

Но ниже святый великии собор 318 богоносных отец является иным неким (л. 79)¹²⁶ словом разделивше чины же и уставы и власти патриаршеским престолом, их же изобрази, токмо по царским достоинством Александрию председателствующу Египта, Ливию и прочих, Антиохию же и Асирию и всего Востока. Якоже во Европе Рим, тако и Асии Константинополь, иже и потом равных сподобись санов стараго Рима, за еже пренесену быти оттуду семо царьству, якоже пределяет¹²⁷ и 36-е, еже в Трулле полатнем, святаго собора правило, имущее сице: Обновляюще от 150 святых отец, в богохранимом сем и во царьствующем граде сошедшихся, и от 630, в Халкидоне собравшихся, законоположеная уставляем, (л. 79 об.)¹²⁸ яко Константинополскому престолу равная восприимати достоинства стараго Рима престола и в церковных якоже оному величатися вещех, второму по оном сущу. Понеже Александрии великаго града и по сем Иерусалима града праведно убо сужду и святый сей и великий собор судити молю, престолу благочестивейшаго и православнаго града Москвы быти же и нарицатися патриархиею, за еже царьства сподобитися от Бога стране сей¹²⁹. Всей же России и северней стране повиноватися патриаршескому престолу Московскому и всеа Русии и северных стран, имети место свое по святейшем Иерусалимском патриарсе во священных помянниках (л. 80)¹³⁰ и в церковных собраниох, да предреченная святых отец правила непоколеблема соблюдаем. Преимуществовати же ся епископом, митрополитом, архиепископом во всей соборней православней Христове Церкви. Епархии же оной Московской и всеа Русии и северных стран главе быти и извествоватися по 34-му правилу святых и всехвалных апостол, сице повелевающему.

Епископом коегождо языка подобает ведати иже в тех перваго и имети яко главу, и ничто же творити излишнее без онаго мысли. Оная же токмо коемуждо творити, елика его епархии должная суть и сущим под нею странам.

Но ниже (л. 80 об.)¹³¹ он без всех мысли что да творит, тако бо единомыслие будет и прославится Бог Господем во Святем Дусе, Отец и Сын и Святый Дух.

По рукоположении же хранити же ся чину церковному, первопрестолному, возглашающу молитву. Аз убо сия тако сужду, святый же собор да изъявит умышление.

Иеремия всесвятейший вселенский рече: (л. 81)¹³² Се и мы первие содеяхом и написанно изъявихом благочестивейшему царю.

Софроний Иерусалимский рече: Святейший патриарх рече: Сам непреложно обновляю.

Святый собор единодушно рече: Сие понеже по святым законом уставися, вси приемлем и сие о царстве оном уставляем, да благочестивейший царь Московский самодержец всеа Русии и северных стран, якоже доднесь во священных службах Восточных церквах имать память свою и во святых предложениах и во священных помянниках, такоже и в начале шестопсалмия, по совершении двою псалму о царе глаголем, возглашается по возгласию оному, (л. 81 об.)¹³³ по имени яко православнейший царь.

Вси реша и сие благословно есть.

Уставляем же и сие, яко подобает послану быти деянию сему, писании нашими утвержденному, ко благочестивейшему царю Московскому и всесвятейшему Иову патриарху всеа Русии и северных стран.

Вси реша угодно.

К сим же подписаша руки своя и печатми запечатлеша в вечное утверждение.

Како же ты, расколниче неполный умом, чрез апостолския правила и чрез святых седми Вселенских соборов дерзаеши ответы творити на погибель христианским душам? Видел ли еси деяние святых отец, яко ничтоже смеюще отложити (л. 82)¹³⁴ или приложити, но и новины реша погубляти, тии глаголют, яко глагола патриарх всем епископом, да будет. А ты глаголеши ничтоже, развее таков же.

Паки глаголеши, яко Римская слава и честь прейде на Москву. Откуду ты то навык, покажи ми. Се видел еси деяние святых отец собора в Костантинополи и ничто же о сем глаголано бысть в них, якоже выше писано есть, но равночестием Московский патриарх Иерусалимскому почтен в помяннике же по Иерусалимстем патриарсе. И радуемся в таком уставе и утверждении пребывати, а не преходити меры и устава святых отец святейших вселенских патриарх.

(л. 82 об.)¹³⁵ Еже ты глаголеши против десятаго вопросу во ответе своем, яко Христос глава есть, а архиерей толко глаза и уста, а мирския люди составы.

Аще¹³⁶ который причетник досадит епископу да извержется. Писано бо есть, князю людей своих да не речеши зла.

Епископи убо по образу суще Господа нашего Иисуса Христа и глава церковнаго телесе именуеми и болшия чести достойни суть. Тем же, аще кто досадит им, да измещется. Презвитери же и диакони по образу суще рук, яко теми церковное правления содевает епископ, чести убо и тии достойни суть, но не тако, (л. 83)¹³⁷ якоже епископи, глава бо рук честнейши есть.

Селстии¹³⁸ епископи суть убо по образу 70 апостол. Градстии же по образу 12 святых апостол. Всем же глава патриарх, якоже выше есть писано, а не якоже ты, расколниче, глаголеши.

34-е правило святых апостол, такожде собора во Антиохии Сирстей 9-е правило и митрополита старейшим почитати велят. Ты же, не имея или не ведая Божественнаго писания, словес крепости в ответех своих не имея, ко внешним лжам и баснословиям приходиши на прелесть простейшим человеком.

Господу свидетелствующу, горе человеку тому, (л. 83 об.)¹³⁹ им же соблазн приходит. И паки. Иже аще соблазнит единаго от малых сих, мнии наречется во Царствии Небеснем.

Глаголи, лжечеловече, где есть писано, еже бы своего архиепископа или митрополита свои епископи, собрався, судили, но митрополит епископа судит со епископы, а митрополита патриарх, под ним же есть епархия митрополия, или Цареградский патриарх, якоже святаго 4-го собора 9-е правило глаголет. Но ни епископа лепо есть судити прежде даже неувестыя о нем или не сушу ему призвану, якоже Василий Великий пишет в первой книге глава 54.

Яко¹⁴⁰ не подобает осуждати кого прежде даже не (л. 84)¹⁴¹ увесть опасно яже о нем, аще и мнози суть оглаголующии.

Глагола¹⁴² Никодим пришедый к нему нощию един сый от них: Еда закон наш судит человеку, аще не слышит прежде от него и разумеет, что творит.

Фист¹⁴³ же цареви сказал, яже о Павле, глаголя: Муж некий есть, оставлен от Филикса, узник, о нем же, бывшу ми во Иерусалиме, явиша архиерее и старцы июдеистии, просяща нань пря. К ним же отвещах, яко несть обычай римляном даяти кого человека, прежде даже оклеветанный видит клеветники, место же приимет ответа о согрешениих своих.

Оклеветаем¹⁴⁴ епископ и позываем на суд, (л. 84 об.)¹⁴⁵ и не послушая дващи и трищи, двема епископома да позван будет. Аще же не приидет, якоже же хощет собор да судит таковаго.

Оклеветаема епископа о некоем прегрешении от достоверных мужей и позываема собором на судище, и не послушающу, не тако вскоре подобает собору осудити таковаго, но и дващи и трищи позвати того, и да посылается по нань коемждо позвании по два епископа. Аще же пребудет небрегий и не приидет на судище, да испытает вину по единей части собор и по подобию вины достойно да осудят его, да не мнится избыв суда беганием.

Такожде и Карфагенскаго собора 19-е (л. 85)¹⁴⁶ правило глаголет:

Без позвания и епископа не судит, но подобает и на епископа клеветы послушати от достоверных мужей и по подобию достойно да судят его.

Видел ли еси, яко ни епископа, без позвания дважды и трижды, не судити, а о митрополитех и ни есть такова правила, еже бы своим епископом судити, но патриарху со всеми митрополиты, якоже выше есть писано 9-е правило святаго Вселенскаго 4-го собора.

А яже о патриарсех нигде не обретается, яже бы от своих епископ судиму быти, да како то их соборище нарещи кто может, чрез вся святыя правила творящих и епископским правилом винна мя творити, (л. 85 об.)¹⁴⁷ ниже вопросившем что любо о нашем отшествии, ниже яко епископа позвавшем по вышеписанному святых апостол 74-му правилу.

Яко не подобает инако учащим внимати, аще и воображаются во еже прелстити на обличение неизвещенных.

Господу глаголющу: блюдитеся¹⁴⁸, да никто вас прелстит. Мнози бо приидут во имя Мое глаголюще: Аз есмь Христос и многи прелстят. Внемлите¹⁴⁹ от книжник хотящих ходити во одеждах и любящих целования на торжищих и председания на торжищих и предвозлежания (л. 86)¹⁵⁰ на вечерях, иже снедают домы вдовиц, виною далече молящеся, сии приимут множайший суд.

На¹⁵¹ Моисеове седалищи седоша книжницы и фарисеи, вся убо елика, аще рекут вам блюсти, соблюдайте и творите, по делом же их не творите: глаголют и не творят, связуют бремена тяжка и бедне носима и возлагают на плеща человеческа. Перстом же своим не хотят двигнути их, вся же дела своя творят да видими будут человеки. Разширяют же хранилища своя и величают воскрилия риз своих, любят же прежде возлегания на вечерях и прежде седания на сонмищах и целования (л. 86 об.)¹⁵² на торжищах и зватися от человек учителя. И по мале.

Горе¹⁵³ вам, книжницы и фарисеи, лицемери, яко преходит море и сушу, сотворити единаго пришелца, и егда будет, творите его, сына геены, сугубейша вас.

Горе¹⁵⁴ вам, книжницы и фарисеи, лицемери, яко одесятствуете мятву и копр и кимин и остависте вящшая закона, суд и милость и веру. Сия же подобаше творити и онех не оставляти. Вожди слепии, оцеждающе комари, велбуда же пожирающе.

Горе вам, книжницы и фарисеи, лицемери, яко очищаете внешнее сткляницы и блюды, внутрь яду же (л. 87)¹⁵⁵ суть полни хищения и неправды.

Фарисею слепый, очисти прежде внутренее сткляницы и блюду да будет и внешняя има чиста.

Горе¹⁵⁶ вам, книжницы и фарисеи, лицемери, яко подобитеся гробом повапленым, иже внеюду убо являются красни, внутрь яду же полни суть, костии мертвых и всякое нечистоты. Тако и вы, внеюду убо является человеком праведни, внутрь яду же есте полни лицемерия и беззакония.

Сего¹⁵⁷ ради Аз послю к вам пророки и премудры и книжники, и от них биете на сонмищах ваших и ижденете от града во град. И прочая.

Аминь, аминь, глаголю вам, яко приидут вся сия народ сей. (л. 87 об.)¹⁵⁸ Противляше¹⁵⁹ же ся Еллима волхв, тако бо сказовается имя его, иский¹⁶⁰ развратити Анфипата от веры. Савл же, иже и Павел, исполнися Духа Свята и воззрев нань, рече: О исполнен всякия льсти и всякия злобы сыне диаволов, враже всякия правды, не престаеши ли, развращая пути Господни правыя. И прочая.

Но¹⁶¹ аще мы или ангел с небесе благовестит вам, паче еже благовестихом, анафема да будет. Якоже прежде рех вам и ныне глаголю, аще кто вам благовестит, паче еже приясте, проклят да будет.

Ты убо лжеши, ответотворче, на мя, яко 4-х Вселенских соборов то надобно прокляти. Где убо наше (л. 88)¹⁶² слово, яко тако глаголах? И самый совопросник не глаголет о сем, латины убо точию приемлют четыре Вселенския соборы, о прочих триех не брегут. Явно, яко еси онаго сонмища исчадие, ибо беседа твоя явна тя творит. Мы убо не четыре Вселенских соборов, но седмь приемлем и облобызаем, якоже заповедано есть в первом правиле 7-го Вселенскаго собора, еже выше писахом тожде.

Святая правила облобызающе приемлем и держим святых апостол и 6-и Вселенских соборов, к сим же и поместных, и еще же и святых отец наших, яко единаго Святаго Духа вдохновенна. Их же прокляша, проклинаем, их же извергоша, изметаем, их же отлучиша, отлучаем, им же запретиша, (л. 88 об.)¹⁶³ запрещаем.

Да почто, лицемере, нас приговариваешь проклинать, сам солгав, а яже о себе самом не смотриши. Лицемере, изми первие бревно из очесе твоего, и тогда прозриши изъяти сучец из очесе брата твоего. Усмотри сам о себе, како есть писано о всех твоих неправдах, еже прежде писахом и ныне паки пишем.

Аще¹⁶⁴ никим же позван, ни умолен быв епископ, во иную область отшед, и поставит презвитера или диакона или правление некое церковное творит, таковая нетверда и разрушена да пребудут, а он да извержется.

Преходящии¹⁶⁵ из града во град, (л. 89)¹⁶⁶ иже от них правилом повинни суть.

Речено есть в 13 правиле, иже во Антиохии собора, яко не дерзнути епископу прейти от своея области во иную и поставити презвитера или диакона без воли сущаго во области той епископа или ино что епископское творити правление. Аще бо и сотворит что таково, праздно и нетвердо да пребудет, и той месть да приимет своего безчиния и извержен да будет от своего сана Святою Троицею. Тако бо и зде написаное правило повелевает.

К сим же Сардикийскаго собора правило 3-е и 12-е того же собора, и 18-е правило того же собора, и Карфагенскаго собора 23-е, и шестаго Вселенскаго собора правило 20-е.

Епископ¹⁶⁷ во инем граде в народе да не учит. (л. 89 об.) Аще же обрящется да престанет от епископства и презвитерская да действует.

1 2 3 4 5 6 7 8 ... 10 11 12 13 14 15 16 17 18 19 20 21 22 23 24 25 26 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

⁶⁰ Помета: глава 10, глава 22.

⁶¹ Помета: Лук. 2.

⁶² Помета: Матф. 28.

⁶³ На верхнем поле листа киноварная помета: на 9-й вопрос и ответ.

⁶⁴ Ниписано на правом поле листа более тонким пером тем же почерком.

⁶⁵ На правом поле листа помета: Иоан. 38 и 35.

⁶⁶ На правом поле листа помета: Иоан. 38 и 35.

⁶⁷ На верхнем поле листа киноварная помета: 9-е возражение.

⁶⁸ На левом поле листа помета: Иоан. 48.

⁶⁹ На левом поле листа помета: Иоан. 51.

⁷⁰ На левом поле листа помета: 48.

⁷¹ На левом поле листа помета: Матф. 23.

⁷² На верхнем поле листа киноварная помета: на 9-й вопрос и ответ.

⁷³ На правом поле листа помета: Лук. 28; Тит. 301.

⁷⁴ На верхнем поле листа киноварная помета: 9-е возражение.

⁷⁵ Написано со знаком вставки на левом поле листа.

⁷⁶ На левом поле листа помета: Ефес. 229.

⁷⁷ На левом поле листа помета: Матф. глава 25.

⁷⁸ На верхнем поле листа киноварная помета: на 9-й вопрос и ответ.

⁷⁹ На верхнем поле листа киноварная помета: 9-е возражение.

⁸⁰ На верхнем поле листа киноварная помета: на 9-й вопрос и ответ.

⁸¹ Так в ркп. Вероятно, пропущено слово «правилу».

⁸² На правом поле листа помета: лист 70.

⁸³ На верхнем поле листа киноварная помета: 9-е возражение.

⁸⁴ На верхнем поле листа киноварная помета: на 9-й вопрос и ответ.

⁸⁵ На верхнем поле листа киноварная помета: 9-е возражение.

⁸⁶ На верхнем поле листа киноварная помета: на 9-й вопрос и ответ.

⁸⁷ На верхнем поле листа киноварная помета: 9-е возражение.

⁸⁸ Слова «ныне то зло и зде достиже» написаны со знаком вставки на левом поле листа.

⁸⁹ На верхнем поле листа киноварная помета: на 9-й вопрос и ответ.

⁹⁰ На верхнем поле листа киноварная помета: 9-е возражение.

⁹¹ На верхнем поле листа киноварная помета: на 9-й вопрос и ответ.

⁹² Исправлено из «о нем».

⁹³ На верхнем поле листа киноварная помета: 9-е возражение.

⁹⁴ Слова «Виждь, расколниче, святыя Церкви не тайно послание, якоже ныне» написаны на левом поле листа.

⁹⁵ В ркп. дважды, второй раз на л. 69.

⁹⁶ На верхнем поле листа киноварная помета: на 9-й вопрос и ответ.

⁹⁷ На верхнем поле листа киноварная помета: 9-е возражение.

⁹⁸ На верхнем поле листа киноварная помета: на 9-й вопрос и ответ.

⁹⁹ На правом поле листа помета: зри.

¹⁰⁰ На верхнем поле листа киноварная помета: 9-е возражение.

¹⁰¹ Написано со знаком вставки на левом поле листа.

¹⁰² На верхнем поле листа киноварная помета: на 9-й вопрос и ответ.

¹⁰³ На верхнем поле листа киноварная помета: 9-е возражение.

¹⁰⁴ На верхнем поле листа киноварная помета: на 9-й вопрос и ответ.

¹⁰⁵ На верхнем поле листа киноварная помета: 9-е возражение.

¹⁰⁶ На верхнем поле листа киноварная помета: на 9-й вопрос и ответ.

¹⁰⁷ На верхнем поле листа киноварная помета: 9-е возражение.

¹⁰⁸ Исправлено из: разрушения.

¹⁰⁹ На левом поле листа помета: лист 208.

¹¹⁰ На верхнем поле листа киноварная помета: на 9-й вопрос и ответ.

¹¹¹ Написано «священниче» со знаком вставки на правом поле листа вместо «чистител».

¹¹² На верхнем поле листа киноварная помета: 9-е возражение.

¹¹³ На левом поле листа помета: 1 Петр 58.

¹¹⁴ На левом поле листа помета: Галат. 199.

¹¹⁵ На верхнем поле листа киноварная помета: на 9-й вопрос и ответ.

¹¹⁶ На правом поле листа помета: 1 Тим. 287.

¹¹⁷ Написано со знаком вставки на правом поле листа вместо «гноетезнаго».

¹¹⁸ На верхнем поле листа киноварная помета: 9-е возражение.

¹¹⁹ Исправлено из: архиепископа.

¹²⁰ На верхнем поле листа киноварная помета: на 9-й вопрос и ответ.

¹²¹ На верхнем поле листа киноварная помета: 9-е возражение.

¹²² На верхнем поле листа киноварная помета: на 9-й вопрос и ответ.

¹²³ На верхнем поле листа киноварная помета: 9-е возражение.

¹²⁴ На верхнем поле листа киноварная помета: на 9-й вопрос и ответ.

¹²⁵ На верхнем поле листа киноварная помета: 9-е возражение.

¹²⁶ На верхнем поле листа киноварная помета: на 9-й вопрос и ответ.

¹²⁷ Так в ркп.

¹²⁸ На верхнем поле листа киноварная помета: 9-е возражение.

¹²⁹ Исправлено из: той.

¹³⁰ На верхнем поле листа киноварная помета: на 9-й вопрос и ответ.

¹³¹ На верхнем поле листа киноварная помета: 9-е возражение.

¹³² На верхнем поле листа киноварная помета: на 9-й вопрос и ответ.

¹³³ На верхнем поле листа киноварная помета: 9-е возражение.

¹³⁴ На верхнем поле листа киноварная помета: на 9-й вопрос и ответ.

¹³⁵ На верхнем поле листа киноварная помета: 9-е возражение.

¹³⁶ На левом поле листа помета: лист 15.

¹³⁷ На верхнем поле листа киноварная помета: на 9-й вопрос и ответ.

¹³⁸ На правом поле листа помета: лист 56.

¹³⁹ На верхнем поле листа киноварная помета: 9-е возражение.

¹⁴⁰ На левом поле листа помета: Васил. 54.

¹⁴¹ На верхнем поле листа киноварная помета: на 9-й вопрос и ответ.

¹⁴² На правом поле листа помета: Иоан. 27.

¹⁴³ На правом поле листа помета: Деян. 48.

¹⁴⁴ На правом поле листа помета: лист 20.

¹⁴⁵ На верхнем поле листа киноварная помета: 9-е возражение.

¹⁴⁶ На верхнем поле листа киноварная помета: на 9-й вопрос и ответ.

¹⁴⁷ На верхнем поле листа киноварная помета: 9-е возражение.

¹⁴⁸ На левом поле листа помета: Матф. 98.

¹⁴⁹ На левом поле листа помета: Лук. 103.

¹⁵⁰ На верхнем поле листа киноварная помета: на 9-й вопрос и ответ.

¹⁵¹ На правом поле листа киноварная помета: Матф. 93.

¹⁵² На верхнем поле листа киноварная помета: 9-е возражение.

¹⁵³ На левом поле листа помета: Матф. 94.

¹⁵⁴ На левом поле листа помета: 95.

¹⁵⁵ На верхнем поле листа киноварная помета: на 9-й вопрос и ответ.

¹⁵⁶ На правом поле листа помета: Лук. 11.

¹⁵⁷ На правом поле листа помета: Матф. 96.

¹⁵⁸ На верхнем поле листа киноварная помета: 9-е возражение.

¹⁵⁹ На левом поле листа помета: Деян. 31.

¹⁶⁰ Чтение неуверенное.

¹⁶¹ На левом поле листа помета: Гал. 199.

¹⁶² На верхнем поле листа киноварная помета: на 9-й вопрос и ответ.

¹⁶³ На верхнем поле листа киноварная помета: 9-е возражение.

¹⁶⁴ На левом поле листа помета: лист 67.

¹⁶⁵ На левом поле листа помета: лист 95.

¹⁶⁶ На верхнем поле листа киноварная помета: на 9-й вопрос и ответ.

¹⁶⁷ На правом поле листа помета: лист 184.

Домашняя страница
священника Владимира Кобец