ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (26-18)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

рече Господь к Аарону, глаголя⁴¹³⁶: Ты и сынове твои и дом отца твоего с тобою (л. 872)⁴¹³⁷ да возмете первенства грех святых, ты же и сынове твои да приимете грехи жречества вашего, и братию твою, племя Левиино, сонма отца твоего и приведи к себе, и да предстанут тебе, и да послужат тебе, и тебе и сыном твоим пред храмом свидения, и да блюдут стражбы твоя и стражбы храма. Разве к сосудом святым и ко олтарю да не приступают, да не измрут и сии и вы. И приложится к тебе и да блюдут стражбы храма свидения и вся службы храма, а иноплеменник да не приступает к вам. И да соблюдет стражбы святых и стражбы олтаря и не будет (л. 872 об.)⁴¹³⁸ к тому гнева на сынех Израилевых.

Аз⁴¹³⁹ бо взях братию вашу левиты от среды сынов Израилевых, вам в дар вданый, Господу служити службы храма свидения. Ты же и сынове твои с тобою сохраните жречество ваше по всему делу олтаря и внутрьняя завесы, и да служите службы вдания вам жречествоваше, иноплеменник же приступаяй да умрет. И рече Господь ко Аарону: Се Аз дах вам снабдение принос моих и от всех священных Мне, от сынов Израилевых тебе дах я в старейшинство и сыном твоим по тебе закон вечный. И⁴¹⁴⁰ сие да будет вам от всякаго священнаго святых, от всех (л. 873)⁴¹⁴¹ даров их и от всех треб их и от всякаго преступления их и от всех грех их, елика отдают Мне от всех святых. Всяко участие святых, елико аще отлучат сынове Израильстии Господу, тебе дал есмь и сыном твоим с тобою и дщерем твоим закон вечный, завет соли людстей вечный пред Господем тебе есть и племени твоему по тебе.

И рече Господь ко Аарону⁴¹⁴²: В земли их да не причастиши, части тебе да не будет в них, яко Аз часть твоя есмь и причастие твое среди сынов Израилевых, сыном же Левиином се дал есмь всю десятину во Израили в причастие в службы место их. (л. 873 об.)⁴¹⁴³ Елико служат сии служение в храме свидения и да не преступают по сем сынове Израильстии к храму свидения прияти греха смертнаго, но да служат левити сами службу храма свидения и сии возмут грех их в закон вечный в рожения их и среди сынов Израилевых да не причастят причастия, яко десятину сынов Израилевых, елико аще отлучат Господу, участие дал есмь левитом в причастие. Сего ради рекохом среди сынов Израилевых, да не причастятся причастия. Паки⁴¹⁴⁴ во втором законе писано есть: Во оно время отлучи Господь племя Левиино носити ковчег завета Господня и предстояти (л. 874)⁴¹⁴⁵ пред Господем, служити и молити и благословити имя Его до днешняго дне. Сего ради несть левитом части, ни жребия в братиях. Господь бо Сам причастие их, якоже есть рекл им. И паки рече Господь⁴¹⁴⁶: Да не будет жерцем и левитом и всему племени их части, ни жребия со Израилем, присно бо Господь часть их да ядят я. Жребий же да не будет в братии его, Господь бо сам наследие его, якоже глаголал им. И паки рече Господь к Моисею на запади Моава у Иордана при Иерихоне, глаголя: Заповеждь сынем Израилевым, и дадят левитем от причастия одержания их, грады вселитеся и хлебины, града окрест их (л. 874 об.)⁴¹⁴⁷ дадят левитем, да будут гради их вселятися и участия их да будут скотом их и всему четвероножному их. И обдержание градов их же дасте левитом от стены града вне две тысящи лакот окрест, и да измереши страну вне града, юже на восток, двою тысящу лакот. И страна, иже к северу, двою тысящу лакот, и страна, яже к морю, двою тысящу лакот, и страна, иже к западу, двою тысящу лакот. И грады же посреде сего да будут вам и содержания градов⁴¹⁴⁸ и грады, яже дасте левитом 6 град да будут убежных, иже дасте бегати (л. 875)⁴¹⁴⁹ в ня убившим. И к сим же 40 и 2 грады. Всех градов, их же дасте левитом, 40 и 8 градов и хлебины их. Сия же и грады, их же дасте им, от одержания сынов Израилевых от многих много, от малых мало, койждо по причастию своему, еже причастят, да дадят от град левитом.

Такожде же и от плена повеле Господь отлучити себе. И рече Господь к Моисею, глаголя: Возмите от корысти пленнаго от человека до скота.

Ты⁴¹⁵⁰ и Иелизар жрец, и князи племен сонма и да разделите корысти между воины, ходившими на сечь, и между всем сонмом, и да отлучите Господу, и дадите и Елизару (л. 875 об.)⁴¹⁵¹ жрецу дань Господу. И сотвори Моисей и Елиазар жрец, якоже повеле Господь Моисею. И бысть множество полону, иже полониша воинстии от овец 675 тысящ, волов же 72 000, ослов же 61 000, душ же человеческих от женска полу, яже не бяше прилеплена мужех, всех душ 32 000.

И приидоша к Моисею вси воставленнии над тысящами силы и сотницы силы, и рекоша к Моисею: Отроцы твои взяша сочтение, от муж воинских, иже суть у нас, и никто же не погибе от них. Се же принесохом дар Господу, еже кто обрел есть сосуд злат, обручи и гривны, перстни, усерязи (л. 876)⁴¹⁵² и чепи златы, очыстити о нас пред Господем. И взя Моисей и Елиазар злато от них весь сосуд соделан, и бысть всего злата участие, еже отлучися Господу, 16 000 и 608 сикл, от тысящник и от сотник мужи воинстии плениша койждо себе. И взя Моисей и Елиазар жрец злато от тысящник и сотник и внесоша и в храм свидения, память сынов Израилевых пред Господем.

Такожде⁴¹⁵³ же Иисус Наввин заповеда сыном Израилевым при Ерихоне, глаголя: Град сей проклят, все же, иже в нем, Господеви сил. Вы же снабдитеся от клятвы и да некогда помыслите вы взяти от клятвы и сотворите полчище от сынов Израилевых клятвы (л. 876 об.)⁴¹⁵⁴ и потребите ны. Злато же все и сребро и медь и железо свято да будет Господеви, в сокровище Господне да ся несет. И бысть егда град запалиша огнем со всем, еже бе в нем, разве злата и сребра и меди и железа, отдаша в дом Господень внести.

Разсмотри, богоборче, князю Никито, како глаголеши, яко слободы патриарши и митропольи и владычни и монастырския не все ли суть Божие и мы Его есмь, развее тебе и подобных тебе? Не Его вы есте. Не все ли изначала бысть по Божию велению и заповеди, священническая часть, Божия часть и достояние? Почто преминув (л. 877)⁴¹⁵⁵ болшаго, еже Бога, к меншим низходиши, то есть к нам, смиренным, и называеши Божию часть и достояние. Наше достояние, не суть ли наше достояние⁴¹⁵⁶, Божие есть достояние, и якоже древле по Божественей заповеди одесятствоваша людие, тако и в Новом законе давали благочестивыя цари, якоже Константин Великий, иже есть писано выше сего в заповеди его.

Такожде и на Русии великий князь Владимир, крестивый Рускую землю, и подобныя тем, давали во святыя Божия церкви, Пресвятей и Живоначалней Троице и Господу Богу и Спасу нашему Иисусу Христу, и Пресвятей (л. 877 об.)⁴¹⁵⁷ Пречистей Преблагословенней Владычице нашей Богородице и Приснодевей Марии, и святым ангелом и архангелом, и святому Иоанну пророку и Предотечи, и святым всехвалным верховным апостолом, и святым великомучеником, и святым верховным учителем и святителем, и преподобным и богоносным отцем, и всем святым, а не патриарху и митрополитом и владыкам и монастырем, якоже свидетельствуют писаныя их заповеди, великаго царя Константина и великаго князя Владимира и прочих боголюбцев и христолюбцев жаловалныя грамоты и вкладныя. Ов убо дал Пресвятей и Живоначалней Троицы, (л. 878)⁴¹⁵⁸ ин же святому Спасу Христу человеколюбцу, ин же Пресвятей Богородицы и прочее, якоже выше сего писано. И быша таковыя слободы в послужение святым Божиим церквам вместо левит, якоже выше сего писано, якоже и святых апостол правила показуют.

Да⁴¹⁵⁹ управляет епископ властелски церковное имение и ничто же от него сродником своим да не даст, аще токмо не суть убози.

Не подобает епископа разсуждати о правлении церковнаго имения, достойно бо ему есть властию таковое правити, яко пред лицем самаго Бога. Не достоит же ему (л. 878 об.)⁴¹⁶⁰ от таковых что свое особно сотворити, ни ближним своим Божия дому раздавати. Аще же суть убози, да подобает им потребная, яко и прочим нищим, изветом же тех церковнаго имения ничто же да не продаст.

Церковное⁴¹⁶¹ имение и особое епископье да предлежит яве, да епископ завещавает о своем, якоже хощет, и церковное да пребывает без пакости.

Подобает епископу, внегда хотят его поставити епископом, да яве покажет все имение свое и препишет пред всеми, такожде и церковное, да и в животе и по смерти даст (л. 879)⁴¹⁶² и оставит от своего, ему же хощет. Церковь же свое да имать не вредно.

Повелевает же епископом обладати церковным имением, аще бо честныя человеческия душы поручены суть им, больми паче имение поручити им подобает, яко да по сих власти все управляют и убогим требование подают рукама честных презвитер и диакон, со страхом Божиим и благоговением. Подобает же и тому самому, аще требует взимати себе на нужную потребу, еже хощет, и приходящую странную братию гостити и кормити и ничто же (л. 879 об.)⁴¹⁶³ потребнаго не лишити их, ибо закон Божий повелевает⁴¹⁶⁴ служащым олтареви от олтаря кормитися, понеже ни воинник не может о своем имении оружия нанести на противнаго.

Аще и во области даются епископом церковная имения, но не о себе самому сия управляти, но с ведением и по совету презвитер и диакон своих таковая строити повелевают Божественая правила, и яко нуждныя потребы токмо подобно есть себе взимати епископом от церковнаго имения.

И аще бо Древний закон и храм и жертва сень будущих, то есть Новаго закона и церкви и священс(л. 880)тва⁴¹⁶⁵ толикою честию почтена, колми паче подобает Новаго закона церкви и священству быти предпочтеннейше, ея же ныне обезчестисте, и все, елико им прежде на послужение мало слобод на Москве и по градом, все усвоисте на свои потребы. Кто же ныне нужнейшыя церкви и архиерею послужит, то есть стражбу и прочая потребы церкви, якоже Господь Бог заповеда Моисеом, иже выше назнаменано есть? Никто же, разве чюждих. Не слышасте ли реченое Богом, яко всяк прикасаяйся иноплеменник смертию да умрет? Иноплеменник же есть не иже кроме Израиля от язык, но иже (л. 880 об.)⁴¹⁶⁶ кроме племени Левиина, якоже Корей и Дафан и Авирон, их же не избра Бог, сами потекоша, и того ради пожре земля, якоже есть писано⁴¹⁶⁷: И прогневаша Моисея в стану и Аарона, святаго Господня, отверзеся земля и пожре Дафана, и покры на сонмище Авирона, и разжеся огнь в сонме их, пламень попали грешники. И⁴¹⁶⁸ простре Иозия руку на киот Божий придержати, и ят зань, и порази его Господь, и умре пред Господем.

Тако и вси, елицы на святую Божию Церковь вадяще и ненавидящей и глаголющей, яко патриарши слободы и митропольи и монастырские мало взяша, а болшее свое погубиша. (л. 881)⁴¹⁶⁹ Взяша тысящи, а погубиша тмы многи, ово междоусобием, ово мором, ово воинами и иными многоразличными напастьми и бедами, их же кто может и списати или исчислить порознь.

Но мы о Монастырском приказе и о мирских судьях и подобных сим, совопросниче, написали. Ты же, ответотворче, аще хощеши и с сущими с тобою, тамо обретай. А еже во ответе своем пишешь: Пускай то бы было, что преж сего не бывало Монастырскаго приказу или был, то подлинно наш всещасливый царь Алексий Михайлович учинил, что привел к сущему делу как тот, (л. 881 об.)⁴¹⁷⁰ который любит лутчий порядок и умеет к доброму и достойному речи приводить, паче иных на добрейший суть. Оправдания надобе, чтоб сидел судиа на своем месте и слушал бы челобитья и разсмотрял бы, которыя имеет и чиа правда, и указ бы чинил добрых оправдать, а виноватых смирять тым же обычаем, что Бог благословит и венчает праведнаго и смиряет.

Писано убо есть: Разсыплет Бог кости человекоугодником, таковому, якоже тебе, глаголющему от своих. Богу свидетельствующу: А еже от себе глаголет, лжу глаголет. Где есть писано, еже бы царем (л. 882)⁴¹⁷¹ и князем и бояром и дьяком и судиам патриарха и митрополитов и архиепископов и епископов и архимандритов, игуменов и попов и дьяконов и причетников судити? В которых правилех писано? Но паче судимым тем самем быти, а не судити. И еже убо патриарха судити, никоторыя правила устав в себе имут, аще вся изочтеши, развее не христанских и мучителских закон. А еже митрополита кроме патриарха со инеми по 9-му правилу 4-го Вселенскаго собора, епископа же по 12 правилу святаго Карфагенскаго собора всея области епископом, аще не будут вси, менши 12 да не будет, (л. 882 об.)⁴¹⁷² презвитера 6 епископов, диакона 3, причетника епископ един.

Ты же по которым законом подтвержаеши устав оный беззаконный, в Монастырском приказе судити простым людем митрополитов и епископов, архимандритов и игуменов и попов и дьяконов и причетников. Такожде сего ж собора 20 правило повелевает и 108-е, о сем доволно есть показано ниже сего.

Паки пишешь: Прошу, учинил ли коли нибудь таков суд Никон, седел ли коли нибудь на своем судебнем месте, чтоб слушал жалобы и зависти чьей нибудь? Николи, толко он де(л. 883)ржал⁴¹⁷³ мирских, которые судили в его приказе и челобитныя роздавал людем своего двора, и они некогда прямое кривым чинили, а кривое прямым. Так ли делают судьи? Так ли патриархи к сыном своим, которые суть отцы отцем?

Речешь ми, враждотворче, и потязаеши нас, патриарха, что мы сидели коли нибудь на своем судебнем месте, что слушал жалобы чьей нибудь, николи. Мы убо присно сидели на своем судебнем столе. А тебя кто посадил на Божием месте, еже патриарха посуждати? И откуду еси ты и по которым законом нам судиею ставишися? И глаголеши: (л. 883 об.)⁴¹⁷⁴ Так ли патриархи к сыном своим, которые суть отцы отцем? Како же ты не суть отец отцем, но аще бы еси и православен был и яко сын, како бы мог отцу отцем законополагати? Правила святых отец не оставляют патриарший суд никому посуждати, не точию пришелцу, но ни всем епископом. Пришелцу же Божественыя правила запрещают в чюждей епископии учити или законополагати, и от сана измещут, и ни во исходе жития причастником быти Христовых таин. Святое же священное Евангелие соблазн творящим, камень жерновный повелевает таковым обязати овый и повержену быти в море. (л. 884)⁴¹⁷⁵ О тебе же вси сведущии глаголют, яко у Папы Римскаго был 30 лет дьяконом и свидетельство приносят книжицу глаголемую <...>⁴¹⁷⁶ друкованую в Риме, в ней же написано есть имя твое.

И Божественые правила святых апостол 10 и 11 и 12 глаголют: Моляйся со отлученым, отлучен, и приемляй неприятаго, сам не приятен.

И 45 правило святых апостол глаголет: Моляйся⁴¹⁷⁷ с еретики да отлучится, аще же яко причетники приимет я, да извержется.

Епископ или презвитер или диакон, аще помолится токмо с еретики или в дому или в церкви, да отлучится. Аще же и повелит им (л. 884 об.)⁴¹⁷⁸ служити в церкви, яко презвитером, или ино что от священных соделовати, яко причетником, таковый да извержется.

С⁴¹⁷⁹ еретики и со отвергшимися от соборныя Церкве да не помолится никто.

Аще помолится кто с еретики или со отлучившимися своею волею, от соборныя Церкве сам отлучен да будет. Еретицы же глаголются, иже о вере блазнятся и согрешают. Отлучившии же ся от соборныя церкви сии именуются авдиане, иже убо веру имеют, якоже и соборная Церковь. Множайшии от них в монастырех (л. 885)⁴¹⁸⁰ пребывают и со всеми на месте не молятся, и хулят епископов наших богатства ради. Другия же ради инех вин и со июдеи Пасху особно творят, имеют же некия особныя распри, недоразумная словеса Божественаго писания, неправо сказующе.

Со⁴¹⁸¹ июдеи и с еретики никто же да не празднует и да не приимет, яже глаголется, от них праздничное.

Несть никоего же общения свету ко тме. Сего ради убо християном не праздновати с еретики или со июдеи, ни приимати, яже в праздники их творят якоже (л. 885 об.)⁴¹⁸² се, опресноки или что таковое.

Не⁴¹⁸³ приобщеному приобщаяся, и сам не приобщен.

Аще котораго презвитера или диакона отлучит свой епископ и другий епископ, ведый его отлучение, и приимет и сподобит его с собою служити, и сам отлучен и той, его же служити сподобил есть, недостойна суща. Такоже аще кто еретиком приобщается и молится с ними, то от Церкве да изринется.

И сия тако суть: Аще и Церковь

есть сия законопреступаяй, повинен сим будет. А еже глаголеши, яко аз (л. 886)⁴¹⁸⁴ николи сидел на своем судебнем месте, чтоб слушал жалобы и зависти чьей нибудь, толко он держал мирских, которые судили в его приказех и челобитныя роздавал людем своего двора. И сие не бес правды, еже мирским людям судиям быть под повелением патриаршим. Сие и у всех обретается, у митрополитов и епископов в Росии. Обаче же патриаршеский уряд по закону мирских людей имать, якоже и Карфагенскаго собора показует правило 76: Да⁴¹⁸⁵ не стужают епископу, да будут местницы.

Убозии от силнейших озлобления и обиды (л. 886 об.)⁴¹⁸⁶ подъимаху и того ради приходяще к епископом, стужаху им и молящеся помощи им. Епископи же овогда помогающе, овогда же не возмогающе, сице изволиша отцы собора сего просити у царя, да промышлением епископов изберет и поставит местников. Местницы же казнители суть церковнии, да противятся насилию и мучителству богатых и отмщают убогия от насилия их. И епископи того ради не стужаеми пребывают.

От⁴¹⁸⁷ царя да испросится соглаголник, рекше помощник заступлению о церковных главизнах, иже (л. 887)⁴¹⁸⁸ хитрость имеют, отмщати вещи церковныя и яко святители о приключающихся удобно возвещати могут.

И паки изволися отцем собора сего, якоже в 75-м правиле угодно бысть просити от царя, яко да вдаст им власть поставляти местники в церкви, еже суть кознителие и судии. То самое служение и хитрость имущих церковныя вещи отмщати. Яко да противятся святители прилучающимся, коль краты аще нужда будет и удобь зело могут в судищи ходити и церкви о таковых возвещати и оттуду помощь приимати.

(л. 887 об.)⁴¹⁸⁹ И по сим правилом узаконися и в патриаршеском судищи мирским судиям и не без воли церковной, но и от царьска чина суть бояре и околничие, да егда прилучится суд от царьска чина людем с церковным причетником, тогда не имут зазора рещи, яко патриарши судии судили одны и неправедно, но и царьска чина судьи. Якоже той обычай и до днесь святая Церковь держит, обаче волею патриаршескою, прежде нас бысть и при нас такожде. Того ради и местницы и соглаголницы нарекошася, яко да могут в судища ходити и церкви о таковых возвещати и оттуду помощь приимати, (л. 888)⁴¹⁹⁰ понеже по церковным законем не всегда мощно есть епископом ко царю приходити, якоже правила собора Антиохийскаго 11 и 12 и Карфагенскаго собора 106 правило показуют. Зде же в Росии не точию ко царю приходити епископом или архимандритом и монахом, но ни на двор царьский прощено есть. Всем убо еретиком, жидом, махаметом и лютором и калвином невозбранно приходити, единою точию епископом православным и архимандритом и игуменом и монахом приход на царьский двор возбранен есть. А еже прямое кривым делать, а кривое прямым, (л. 888 об.)⁴¹⁹¹ я того не видал. Вижу ныне, что ты прямое кривишь, и кривое прямишь, Божественыя законы ни во что полагаешь, а новые свои несведомые святей Церкви обновляеши.

И глаголеши: Блажени алчющии и жаждущии правды, яко тии насытятся. Правда живет во веки, которая когда одна есть, то все может справедливый Господь, есть бо светлейший паче солнца, все добродетелства имеют цари и патриархи для того, что они суть образцы всем, а наипаче правде, всех добрых дел царицу, для чего старанные люди хотели назвать все добрыя (л. 889)⁴¹⁹² дела. Одным назвать правдою, есть то истина, что «блажени алчющии и жаждущии правды, яко тии насытятся». Почто же ты не взалкал, ни вжадался таковыя правды, но всюду чрез Божественыя уставы враждуеши на правду, везде кривишь, якоже самыя твоя писания и являют? И глаголешь: А что может наставливать государь архимандриты и всякия власти, то есть одно с привилей царьских и извычай общих народов уряды роздавать. Солгал ты зде, якоже везде лжеши, что с привилей царьских извычай. Нигде есть о сем в царьских законех, еже бы царем (л. 889 об.)⁴¹⁹³ обирати епископов или архимандритов и прочих властей, но паче сопротивни во святых апостолских и святых отец правилех, такожде и царьских законех.

О сем чти святых апостол правило 30, Лаодикийскаго собора правило 13 и святаго Вселенскаго 7-го собора правило 3, и собора Антиохийскаго правило 19⁴¹⁹⁴. И елицы аще обрящутся избраны мирскими властели, Божественая правда не оставляет таковым быти, но изверже. И иже избрали таковых, аще и царь будет, повинен есть епитемии. А иже от таковых избраных епископов поставлены, не суть поставлены, (л. 890)⁴¹⁹⁵ крещены, не суть христиане. О сем много есть писано выше сего, коемуждо подобает знати и хранити своя мера. Саул жертву вознес, царьство погуби, Иозия покадив, опроказися. Аще царь есть, пребывай во своих уставех.

Глаголеши ли, яко сердце царево в руце Божии. Тогда сердце царево в руце Божии, егда внутрь Божиих уставов пребывыает. Тако Самоилом рек, яко уничижил еси глагол Господень⁴¹⁹⁶, и уничижит тя Господь, не быти тебе царю во Израили. Како же ты глаголеши, не ищи от Господа власти, ниже от царя достоинства, пишет Сирах так.

Не всяко тако пишет, есть⁴¹⁹⁷ инде пишет (л. 890 об.)4198 той же Сирах: Царь не наказан, погубляет люди своя.

И Екклисиаст: Горе тебе граде, в нем же царь твой юн и князи твои рано ядят⁴¹⁹⁹. Мерзость цареви творити злая, милость и истина сохранение царю и обыдет престол его в правду.

Что имеет царь владение дати власть и честь?

Имеет убо царь власть в своих, ему даных от Бога, уставох давати власть и честь мирским людем, а не епископом и архимаритом и прочим властем, якоже и сам пишешь ты: Яко которыя суть вышния суд Божий, а которыя суть земныя, суд царьский.

И паки пишешь: Для (л. 891)⁴²⁰¹ чево двоеглавый орел пишется, что он разширяется удостоинством церковным и мирским.

Есть то правда, что царьское величество разширился над Церковию, чрез вся Божественыя законы, своим достоинством, а не законом коим любо Божиим. И не до сего точию ста, но и на самаго Бога возгорде широтою орла, еже ныне издаде друком лист: Лета от воплощения Слова Божия 1663, на нем же есть написан орел двоеглавый. На орле же царь на коне, в гордости велицей зело. А свыше его на таблице написано, еже Соломон о Христе пророчествова, то царь на себя преписа. Писание ж се (л. 891 об.)⁴²⁰² Песни Песней глава 3: Дщери Сиони, изыдите и видите во царе Соломоне в венце, в нем же венча мати в день женитбы его.

И другое писание, еже Исаия о Христе воцарений вечном, глаголя4203: Се Царь правдивый царьствует. И паки другое писание⁴²⁰⁴: Аз поставих царя с правдою и вси путие его прави. Сей возградит град Мой и пленники люди Моих возвратит не по мзде, ни по дару. Рече Господь Саваоф яко: Мне поклонится всяко колено и исповесться всяк язык, Богови глаголя. Правда Израилева к Нему приидет и посрамятся вси, отлучающиеся от Господа.

И се не о царе Алексие Исаия прорече, (л. 892)⁴²⁰⁵ но о Царе царьствующем Господе Бозе и Спасе нашем Иисусе Христе. О Нем же и Давид глаголет: Рече Господь Господеви моему, седи одесную Мене. И паки: Сел еси на престоле, судяй вправду. И паки: Господь судит людем. И паки: Судит во языцех, исполнит падения, сокрушит главы на земли многим. И инде: Господь воцарися, в лепоту облечеся. И паки: Предзрех Господа предо мною выну, яко одесную мене есть, да ся не подвижу. И возрадовася язык мой, еще же и плоть моя вселится на упование.

Пророк убо сый и ведый, яко клятвою клятся ему Бог⁴²⁰⁶: От плода чресл его (л. 892 об.)⁴²⁰⁷ по плоти воздвигнути Христа⁴²⁰⁸ и посадити на престоле Его. И божественный апостол Павел глаголет⁴²⁰⁹: Подобает бо Ему царьствовати, дондеже положит вся враги под ногама Своима. И паки: Многочастне⁴²¹⁰ и многообразне древле Бог глаголав отцем, пророки напоследок дний сих глагола нам в сне. Его же положи наследника всем, им же и веки сотвори⁴²¹¹, иже Сый сияние славы Отча и образ и ипостаси Его⁴²¹². Но ся же вся глаголом силы Своея, Собою очищение сотворив грехов наших, седе одесную престола величествия на высоких. Толико лучши быв ангел, елико преславне паче их (л. 893)⁴²¹³ наследствова има. Кому бе рече когда от ангел: Сын⁴²¹⁴ Мой еси Ты, Аз днесь родих Тя. И паки: Аз буду Ему во Отца, и Той будет Мне в Сына. И по мале: Престол Твой, Боже, в век века. Жезл правлению, жезл царьстия Твоего, возлюбил еси правду и возненавидел беззаконие. Сего ради помаза тя Боже Бог твой елеом радости паче причастник твоих.

Ныне же вкратце речем, что есть Царь правды: Добре⁴²¹⁵, седек бо правда глаголется, а мелхи царь, убо Мелхиседек царь правды есть.

Зриши ли во именах описание, кто де есть царь правдивый, но разве Господь наш Иисус Христос, Царь (л. 893 об.)⁴²¹⁶ Салимский, царь мира сказуется, еже Салим, еже паки есть Христово. Сей бо нас праведных сотвори и умиротворил есть, яже на небесех, яже на земли. Кий же человек, царь есть правды и мира, но разве Господь наш Иисус Христос. А иже от пророчества поемля прореченое о Христе Бозе, приписуют себе, что чюдно сотворил любо.

И во Откровении Иоанна Богослова пишет⁴²¹⁷: И слышах глас народа многаго, яко глас вод многих и яко глас громов крепких, глаголющих «Аллилуиа», яко воцарися Господь Бог наш Вседержитель. Радуимся и веселимся и дадим славу Ему, яко прииде брак Агньчи.

Глас народа и многих вод и громов являет проразителное и прослывущее в песнословии всех ангельских небесных безчисленных сил, яже нецыи воды разумеша сущия превыше небес. С ними же и всяческое праведное исполнение славословит Создавшаго. Воцари же ся Господь Иисус Христос, ими же естественне, яко Содетель владычествова над сими, чрез человеколюбие воцарися или по умному присвоению, или по области царьствует и судии подобающей. Брак же Агньчий церковное ко Христу совокупление и смешение, а не времени мира сего царю или князю обручена есть Церковь. Его же строители божественнии быша апостоли, чрез них же ей обручение дадеся духовное, (л. 894 об.)⁴²¹⁹ яко восприемлющии тогда лицем к лицу чистое и святое смешение сущее.

И⁴²²⁰ видех небо отверстое, небо отверстое и се конь белый, и седяй на нем нарицаемый Верный и Истиный и в правде судит и брань творит. Очи же Его пламень огненный и на главе Его многия диадимы⁴²²¹.

Еже отверзну быти небеси являет, яко с небесе приидет пришествие Судиино, якоже зде завесе сопрятание и согбение, судийское на земли на повинных осуждение и изречение. Белый же конь знаменует святых светлость и веселие будущее, на них же ездяй, судит языки очима Своима пламенныма и огненныма, сиречь Своею на(л. 895)зирателною⁴²²² и разсмотрителною силою, разделяяй пламень огненный, праведным убо просветителный, но не опалителный, грешным же опалителный, но не просветителный. Многия же венцы⁴²²³ или над всеми Его царьство сущими на небеси и на земли знаменуют, толикия бо, елики и во ангелех чины и на земли скипетра и во святых человецех соборы и множества, или победу во всех строениих окрест нас на грешники чрез долготерпение, якоже глаголет Давид⁴²²⁴: И победиша внегда судити сущее. И⁴²²⁵ имать на ризе и на бедре Своей имя написано Царь царей и Господь господей⁴²²⁶.

Имя же Царь царей являет Божественаго вочеловечения неразсекомое, (л. 895 об.)⁴²²⁷ понеже Бог сый плотию пострада⁴²²⁸ и Человек сый Царь царей есть, воцарившихся над страстьми. И Господь господей стяжавший поспешением Христовым на грех достоинство и державу, и сих, иже с Ним воцарятся в будущем веце.

Сущее. И⁴²²⁹ видех единаго ангела, стояща в солнцы, и воззва гласом велиим, глаголя: Всем птицам парящим в средонебесии, приидитеся и соберитеся на вечерю великую Божию, да снесте плоти царей и плоти тысящо⁴²³⁰ началников, и плоти крепких, и плоти коний и седящих на них, и плоти свободных, всех же и рабов, и малых, и великих. И видех зверя и царя земныя и воиства их собраная, сотворити брань с Седящим на кони (л. 896)⁴²³¹ и с воинством Его.

Воинствующая убо со диаволом, воинства множественне именова за многораздирателное греха и разделеное.

Сущее. И⁴²³² ят бысть зверь и с ним лжепророк, сотворивый знамения пред ним, иже прелсти приемшия начертание звериино⁴²³³, и поклоняющияся образу его жива вврежена будета оба в езеро огненое, горяще жупелом. И прочии убиено быша оружием Седящаго на кони, исходящим из уст Его, и вси птицы насытишася от плотей их.

И прочии убиени быша мечем Седящаго на кони, двема смертма сущема. Первей убо разделению души и телесе. Вторей же (л. 896 об.)⁴²³⁴ отсланию в геену. Аще убо на воинствующих со антихристом возрим, слово да имать, яко первая смерть телесная предварит оружием Божиим, сиречь Того повелением. Таже сице последовати имать вторая и благо бы имело. Аще ли же ни, то и сии приобщатся со прелстившими я, вторая смерти вечныя муки. А еже насытитися птицам от плотей их, по предъизданому и ныне восприяхом. К сему же зане, якоже глаголет некоим Исаием Бог, зане бысте Ми в сытость, суще и святым всякое движение плотское безсластно есть и тяжестно и мерзостно.

Смотрити же зде потреба велми опасно, како святии (л. 897)⁴²³⁵ ангели на себя Божественыя славы не восприемлют, по писаному: Отдадите убо кесарева Кесареви и божия Богови. Не безбедно есть рабу царьским себя чином, именем и достоянием почести. Тако и царю не без муки, еже предпочитати самому себя и описоватися между Божественых таинств Ветхаго и Новаго Заветов, разширяяся. Зри на устроние святых ангел.

Сущее. И⁴²³⁶ падох под ногама Его поклонитися Ему, и глаголет ми: Зри, ни клеврет бо твой есмь и братий твоих и имущих свидетельство Иисусово. Богу поклонися, свидетельство Иисусово есть дух пророчества.

Глаголет божественный ангел ко Иоанну, ни клеврет твой есмь, (л. 897 об.)⁴²³⁷ не кланяйся мне, яко будущая предглаголющему. Исповедание бо, сиречь свидетельство о Христе, си есть пророческаго духа подателно. Тем же не кланяйся мне, клеврету своему, но поклоняйся вся Содержащему и от сего смиреномудрие навыцаем святых ангел, како не присвояют себе славу Божественую, по горким и убийственым бесом, но сию Создателю своему и Владыце приносят. Яко да научимся и мы не преписовати на ся Божественую славу, глаголаную от пророк на апостол, ниже написоватися, разширяяся посреди Божественых таинств Ветхаго Завета и Новаго, якоже есть написано в Библии московскаго (л. 898)⁴²³⁸ друку царьское изображение на орле и на коне гордо велми и с приписании пророческими, иже о Христе пророчествоваша. Божественыя же таинства древния и новые Христовы, Крест и Воскресение, ово якож Крест Христов, то есть распятие, мало превыше, но в тесноте и безславии, ово же, якоже Воскресение Христа Бога нашего сточнил себе и славе своей, коню и орлу, ово же, якоже самаго Христа Бога нашего прениже всякоя своея славы и под ногама коня и орла и в тесноте некакой безславии. Ох, ох, увы, увы, люте, люте! В каковы времена достигохом! Збышася писаное: Измениша бо славу Божию в славу человеческу (л. 898 об.)⁴²³⁹ и четвероногих скот и птиц. И паки другое писание: Возлюбиша славу человеческую нежели славу Божию. Сего ради предаст их Бог в страсти безчестия, воеже творити им волю языческу. И паки ино писание: Безумие бо их явно будет всем.

Кто преславнее Моисея в роде сем бысть, его же сам Господь свидетельствова яко: Аз на се ис тое воздвигох тя. И паки: Се⁴²⁴⁰ дах тя Бога фараону. Сей же отвещавше Богу: Кто есмь аз, яко да иду к фараону, царю Египетскому, да изведу сыны Израилевы от земли Египетския. Молю Ти ся, Господи, избери могуща инаго, его же послеши, яко несмь речист, худогласен и косноязычен. Кто⁴²⁴¹ праведнее Давида, о нем же (л. 899)⁴²⁴² сам Господь свидетельствова: Обретох Давида Иессеова, мужа по сердцу Моему, иже сотоврит вся хотения Моя. И паки инде речеся⁴²⁴³: И избра Давида, раба Своего, и восприят и от стад овчих и от доилиц поят его, пасти Иякова, раба Своего, и Израиля достояние Свое, ему же даст Господь Бог низложити человека исполина на брани. И отъят Господь поношение от сынов Израилевых и во тмах славу прият. И отъят Господь врази его и вознесе род его вовеки. И даст ему Господь завет царьск и престол славы его во Израили. Но си сей не похвалися гордо, глаголя⁴²⁴⁴: Се бо в беззакониих зачат есмь и во гресех роди мя мати моя. И паки: Аз⁴²⁴⁵ есмь червь, а не человек, поношение человеком и уничижение людем. И инде: Яко⁴²⁴⁶ (л. 899 об.) не оправдится пред собою всяк живый. И паки: Нищ есмь аз и в трудех от юности моея. И паки: Смирихся и спасе мя. И паки: Благо мне, яко смирил мя еси, да научюся оправданиом Твоим. И паки: Грех юности моея и неведения моего не помяни. И паки: И⁴²⁴⁷ вниде Давид и седе пред Господем и рече: Кто есмь аз, Господи мой, Господи. Или что дом мой, яко возлюби мя до сего и согреших пред Тобою много, Господи мой, Господи. И что приложит Давид еще глаголати к Тебе, и ныне Ты веси, Господи мой, Господи, раба Своего. И инде речеся⁴²⁴⁸: И благослови царь Господа пред всем множеством. И рече: Благословен еси Господи Боже Израилев отец наших от века вовеки. Твое есть, (л. 900)⁴²⁴⁹ Господи, величество, и сила и слава и одоление, исповедание и крепость, яко Ты всем, иже на небеси и на земли, владееши. От лица Твоего, Господи, исправится всякое царьство и всяк язык. Тебе бо, Господи, богатство и Тебе царьство и величество во вся и во всяко начало. От Тебе богатство и слава. Ты всех начало, Господи, начало всякаго начала и власть в руку Твоею, величество и царьство всех, в руку Твоя милость и вседержителство вся. Ныне убо, Господи Боже наш, исповемся Тебе и хвалим имя Твое преславное. Кто есмь аз и кто людие Твои, яко возмогохом сия Тебе вся благовонне обещати. Твоя бо суть вся и иже (л. 900 об.)⁴²⁵⁰ от руку Твоею прияхом, дахом Тебе. Путницы бо есмы пред Тобою и пришелцы, якоже и вси отцы наши, яко сень на земли дние наши.

Кто⁴²⁵¹ же есть мудрее Соломона, о нем же свидетельствова Господь Давиду, глаголя: И будет, егда скончаются дние и уснеши со отцы твоима и воставлю семя твое по тебе, иже есть от чрева твоего, и уготовлю царьство его, и той созиждет дом имени Моему, и управлю престол его до века. И Аз буду ему во Отца и той будет Мне в сына.

И⁴²⁵² царьствуя Соломон, и возлюби Соломон Господа, и ходи в научениих Давидовых, отца своего. Ему⁴²⁵³ ж, Соломону, явися Господь⁴²⁵⁴ во сне нощию и рече (л. 901)⁴²⁵⁵ ему: Проси, что хощеши и дам ти. И рече Соломон: Аз есмь отрочищ мал и не веде исхода своего и входа. Раб же Твой посреде людий Твоих, яже избра люди многи, яко песок иже при мори, его же никто же не изочтет от множества. Сего⁴²⁵⁶ ради даждь рабу Своему сердце смыслено на послушание и суждение людем Твоим в правду, иже разумети посреди добру и злу, яко кто может судити людем Твоим тяжким сим. И угодно бысть слово се пред Господем Богом, яко испроси Соломон глагол. И рече Господь к нему: Занеже проси от Мене дний много и не проси богатства, ниже проси душа враг твоих, но испроси себе мудрости (л. 901)⁴²⁵⁷ и разума, да послушаеши суда. Се сотворих по глаголу твоему, се дах ти сердце смыслено и мудрость, якоже несть был муж пред тобою и по тебе не поставлен подобен тебе.

К⁴²⁵⁸ сему их же не проси, дах ти и богатство и славу, яко несть был подобен ти во царех по вся дни твоя. И аще ходиши по пути Моему и сохраниши заповеди Моя и повеления Моя, якоже ходи и Давид, отец твой⁴²⁵⁹, умножу дни твоя. О нем же рече Сирах: Соломон⁴²⁶⁰ воцарися во дни мира, яко Бог препокои окрест, да созиждет дом во имя Его и да уготовит святилище вовеки⁴²⁶¹. Коль упремудрися в юности своей и наполнися, яко река разума и землю покры (л. 902)⁴²⁶² душа твоя. Исполнил еси притчам гадания, проиде имя твое во островы далече и возлюблен бысть о мире своем песньми и притчами и приображением. И во искании подивишася страны именем Господа Бога, нареченаго Бога Израилева. И собра яко медь и злато и яко олово умножи сребро. Но ни сей, что любо написа о себе гордо, приписуя от пророк реченое о Бозе. Но и по приятии мудрости и суда глаголаше⁴²⁶³, яко аз раб Твой и сын рабы Твоея, и человек немощен и маловременен и умален в разуме суда и закон. И аще убо кто будет совершен в сынех человеческих, аще удалится премудрость Твоя, ни во что же почтеся, (л. 902 об.)⁴²⁶⁴ кто бо человек познает совет Божий и кто помыслит, что хощет Бог? Помышления смертна боязнена и неведомы провидения наша, тело бо тленное отягчает душу и земное житие одебелевает ум и велие попечение многа помышляюща, едва разумеем иже на земли. А яже на небеси, кто изследи, волю же Его кто позна?

Не буди⁴²⁶⁵ правдив велми, не мудрися о себе изобилне, еда когда изумнеешися, благо ти есть содержатися о сем, яко несть праведен человек на земли, иже сотворит благое и не согрешит, не последуй души своей и крепости своей холити в похотех сердца своего, (л. 903)⁴²⁶⁶ и не рцы, кто мя поможет. Господь бо мстяй, отмстит ти. Не рцы, согреших и что ми бысть. Како может о себе кто глаголати и написавати: Се Царь правдивый царьствует и началницы судом владети начнут.

Истина же есть слову о Господе Бозе и Спасе нашем Иисусе Христе. О Нем же Даниил прорече⁴²⁶⁷: И в день царь тех востави Бог небесный Царьство, еже во веки не разсыплется. И Царьство Его инем не останет, отончит и извеет вся царьства, а то станет вовеки, якоже виде. Яко отсечеся от горы камык без руку и отончи глину и железо и медь и сребро. И Тому ся⁴²⁶⁸ (л. 903 об.)⁴²⁶⁹ даст власть и честь и царьство и вси людие племена и языцы Тому поработают, и власть Его власть вечная, яже не мимо идет и Царьство Его не разсыплется. А еже князи Его судом владети начнут, сие о святых апостолех, якоже и Давид глаголет, и поставиши князи их по всей земли, якоже и Даниил виде. Зрях, рече, дондеже престоли поставишася. И паки Соломон рече⁴²⁷⁰: Судят языком и обладают людьми и воцарится в них Господь вовеки. И во Евангелии писано есть⁴²⁷¹: Тогда отвещав Петр, рече Ему: Се мы оставихом вся и по след Тебе идохом, что убо будет нам? (л. 904)⁴²⁷² Иисус же рече им: Аминь, глаголю вам, яко вы, шедшии по Мне, паки в бытие. Егда сядет Сын человеческий на престоле славы Своея, сядете и вы на двоюнадесять престолу, судяще обеманадесяте коленома Израилевыма. И паки апостол свидетельствует⁴²⁷³: Не весте ли, яко святии мирови хотят судити? И по мале: Не весте ли, яко ангелом судити хощем, а не точию житейским? И паки ин апостол рече⁴²⁷⁴: Побеждающему дам сести со Мною на престоле Моем, якоже и Аз победих и седох со Отцем Моим на престоле Его. И паки⁴²⁷⁵: И видех престолы и седоша на них и суд дадеся им, (л. 904 об.)⁴²⁷⁶ и душа усеченых за свидетельство Иисусово и за слово Божие, иже не поклонишася зверю, ниже образу его, и не прияша начертание на челе или на руце своей, и жиша и царьствоваша со Христом тысящу лет.

И уже убо святым апостолом учительстии престоли дани быша, ими же языцы световодими суть, дани же будут по Божественому обещанию и в будущем веце на осуждение отринувшим Евангелскую проповедь. Якоже Давид глаголет: Тамо бо взыдоша колена, колена Господня свидение Израилево⁴²⁷⁷ и прочая. Яко ту седоша престоли на суде. И прочим святым мучеником, (л. 905)⁴²⁷⁸ за Христа пострадавшим, не поклонившимся зверю и образу его, дань бысть суд, сиречь власть судити им же бесов, даже доныне, яко зрим, судят с прославляеми Христу даже до настоящаго века и от царей благочестивых и князей верных почитаеми и поклоняеми.

1 2 3 4 5 6 7 8 9 10 11 12 13 14 15 16 17 ... 19 20

<<< Предыдущая страница ... Следующая страница >>>

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 ... 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

⁴¹³⁶ На левом поле листа помета: 4 Моис. 18.

⁴¹³⁷ На верхнем поле листа киноварная помета: на 26-й вопрос и ответ.

⁴¹³⁸ На верхнем поле листа киноварная помета: 26-е возражение.

⁴¹³⁹ На левом поле листа помета: Иисус Нав. 13.

⁴¹⁴⁰ На левом поле листа помета: 3 Моис. 2.

⁴¹⁴¹ На верхнем поле листа киноварная помета: на 26-й вопрос и ответ.

⁴¹⁴² На правом поле листа помета: 5 Моис. 10 и 18; Иисус Нав. 13 и 33; Езек. 44; Евреом 7.

⁴¹⁴³ На верхнем поле листа киноварная помета: 26-е возражение.

⁴¹⁴⁴ На левом поле листа помета: 5 Моис. 10.

⁴¹⁴⁵ На верхнем поле листа киноварная помета: на 26-й вопрос и ответ.

⁴¹⁴⁶ На правом поле листа помета: 5 Моис. 18; Иисус Навв. 13; Езекииль 44; Евреом 7.

⁴¹⁴⁷ На верхнем поле листа киноварная помета: 26-е возражение.

⁴¹⁴⁸ На левом поле листа помета: 5 Моис. 4; Иисус Навв. 21.

⁴¹⁴⁹ На верхнем поле листа киноварная помета: на 26-й вопрос и ответ.

⁴¹⁵⁰ На правом поле листа помета: 4 Моис. 31.

⁴¹⁵¹ На верхнем поле листа киноварная помета: 26-е возражение.

⁴¹⁵² На верхнем поле листа киноварная помета: на 26-й вопрос и ответ.

⁴¹⁵³ На правом поле листа помета: Иисус Навв. 6.

⁴¹⁵⁴ На верхнем поле листа киноварная помета: 26-е возражение.

⁴¹⁵⁵ На верхнем поле листа киноварная помета: на 26-й вопрос и ответ.

⁴¹⁵⁶ На правом поле листа помета: 4 Моис. 14.

⁴¹⁵⁷ На верхнем поле листа киноварная помета: 26-е возражение.

⁴¹⁵⁸ На верхнем поле листа киноварная помета: на 26-й вопрос и ответ.

⁴¹⁵⁹ На правом поле листа помета: лист 10.

⁴¹⁶⁰ На верхнем поле листа киноварная помета: 26-е возражение.

⁴¹⁶¹ На левом поле листа помета: лист 11.

⁴¹⁶² На верхнем поле листа киноварная помета: на 26-й вопрос и ответ.

⁴¹⁶³ На верхнем поле листа киноварная помета: 26-е возражение.

⁴¹⁶⁴ На левом поле листа помета: 5 Моис. 18; 1 Кор. 142.

⁴¹⁶⁵ На верхнем поле листа киноварная помета: на 26-й вопрос и ответ.

⁴¹⁶⁶ На верхнем поле листа киноварная помета: 26-е возражение.

⁴¹⁶⁷ На левом поле листа помета: 4 Моис. 16; Псалом 104.

⁴¹⁶⁸ На левом поле листа помета: 2 Царств 6.

⁴¹⁶⁹ На верхнем поле листа киноварная помета: на 26-й вопрос и ответ.

⁴¹⁷⁰ На верхнем поле листа киноварная помета: 26-е возражение.

⁴¹⁷¹ На верхнем поле листа киноварная помета: на 26-й вопрос и ответ.

⁴¹⁷² На верхнем поле листа киноварная помета: 26-е возражение.

⁴¹⁷³ На верхнем поле листа киноварная помета: на 26-й вопрос и ответ.

⁴¹⁷⁴ На верхнем поле листа киноварная помета: 26-е возражение.

⁴¹⁷⁵ На верхнем поле листа киноварная помета: на 26-й вопрос и ответ.

⁴¹⁷⁶ В ркп. пропущено одно слово.

⁴¹⁷⁷ На правом поел листа помета: лист 12.

⁴¹⁷⁸ На верхнем поле листа киноварная помета: 26-е возражение.

⁴¹⁷⁹ На левом поле листа помета: лист 79.

⁴¹⁸⁰ На верхнем поле листа киноварная помета: на 26-й вопрос и ответ.

⁴¹⁸¹ На правом поле листа помета: лист 80.

⁴¹⁸² На верхнем поле листа киноварная помета: 26-е возражение.

⁴¹⁸³ На левом поле листа помета: лист 121.

⁴¹⁸⁴ На верхнем поле листа киноварная помета: на 26-й вопрос и ответ.

⁴¹⁸⁵ На правом поле листа помета: лист 150.

⁴¹⁸⁶ На верхнем поле листа киноварная помета: 26-е возражение.

⁴¹⁸⁷ На левом поле листа помета: лист 156.

⁴¹⁸⁸ На верхнем поле листа киноварная помета: на 26-й вопрос и ответ.

⁴¹⁸⁹ На верхнем поле листа киноварная помета: 26-е возражение.

⁴¹⁹⁰ На верхнем поле листа киноварная помета: на 26-й вопрос и ответ.

⁴¹⁹¹ На верхнем поле листа киноварная помета: 26-е возражение.

⁴¹⁹² На верхнем поле листа киноварная помета: на 26-й вопрос и ответ.

⁴¹⁹³ На верхнем поле листа киноварная помета: 26-е возражение.

⁴¹⁹⁴ На левом поле листа помета: лист 8; лист 75; лист 15; лист 69.

⁴¹⁹⁵ На верхнем поле листа киноварная помета: на 26-й вопрос и ответ.

⁴¹⁹⁶ На правом поле листа помета: 1 Царств 15.

⁴¹⁹⁷ На правом поле листа помета: Сирах 10.

⁴¹⁹⁸ На верхнем поле листа киноварная помета: 26-е возражение.

⁴¹⁹⁹ На левом поле листа помета: Притч. 16.

⁴²⁰⁰ Написано на левом поле листа.

⁴²⁰¹ На верхнем поле листа киноварная помета: на 26-й вопрос и ответ.

⁴²⁰² На верхнем поле листа киноварная помета: 26-е возражение.

⁴²⁰³ На левом поле листа помета: Исаия 32.

⁴²⁰⁴ На левом поле листа помета: Исаия 45.

⁴²⁰⁵ На верхнем поле листа киноварная помета: на 26-й вопрос и ответ.

⁴²⁰⁶ На правом поле листа помета: 1 Царств 7.

⁴²⁰⁷ На верхнем поле листа киноварная помета: 26-е возражение.

⁴²⁰⁸ На левом поле листа помета: 1 Царств.

⁴²⁰⁹ На левом поле листа помета: 1 Кор. 15; Псалом 109; Деян. 2.

⁴²¹⁰ На левом поле листа помета: Евреом 1.

⁴²¹¹ На левом поле листа помета: Колос. 1.

⁴²¹² На левом поле листа помета: Мудр. 7.

⁴²¹³ На верхнем поле листа киноварная помета: на 26-й вопрос и ответ.

⁴²¹⁴ На правом поле листа помета: Псалом 2.

⁴²¹⁵ На правом поле листа помета: Евреом 7.

⁴²¹⁶ На верхнем поле листа киноварная помета: 26-е возражение.

⁴²¹⁷ На левом поле листа помета: Апокалип., слов. 19, глав. 19, стих 6 и 7.

⁴²¹⁸ На верхнем поле листа киноварная помета: на 26-й вопрос и ответ.

⁴²¹⁹ На верхнем поле листа киноварная помета: 26-е возражение.

⁴²²⁰ На левом поле листа помета: Апокал., слов. 20.

⁴²²¹ Исправлено из: венцы.

⁴²²² На верхнем поле листа киноварная помета: на 26-й вопрос и ответ.

⁴²²³ На правом поле листа помета: диадимы, венцы многия на главе Христовой таинственно.

⁴²²⁴ На правом поле листа помета: Псалом 50.

⁴²²⁵ На правом поле листа помета: стих 16.

⁴²²⁶ На правом поле листа помета: Царь царей и Господь господей Христос.

⁴²²⁷ На верхнем поле листа киноварная помета: 26-е возражение.

⁴²²⁸ На левом поле листа помета: 1 Тим. 6, 15.

⁴²²⁹ На левом поле листа помета: стих 17, 18.

⁴²³⁰ Так в ркп.

⁴²³¹ На верхнем поле листа киноварная помета: на 26-й вопрос и ответ.

⁴²³² На правом поле листа помета: стих 20.

⁴²³³ На правом поле листа помета: который между Божиих образов живописуется.

⁴²³⁴ На верхнем поле листа киноварная помета: 26-е возражение.

⁴²³⁵ На верхнем поле листа киноварная помета: на 26-й вопрос и ответ.

⁴²³⁶ На правом поле листа помета: слов. 19, глав. 19, стих 10.

⁴²³⁷ На верхнем поле листа киноварная помета: 26-е возражение.

⁴²³⁸ На верхнем поле листа киноварная помета: на 26-й вопрос и ответ.

⁴²³⁹ На верхнем поле листа киноварная помета: 26-е возражение.

⁴²⁴⁰ На левом поле листа помета: 2 Моис. 7; 2 Моис. 3.

⁴²⁴¹ На левом поле листа помета: Деян. 13; 1 Царств 16. Псалом 12.

⁴²⁴² На верхнем поле листа киноварная помета: на 26-й вопрос и ответ.

⁴²⁴³ На правом поле листа помета: Псалом 77; 1 Царств 16; 2 Царств 7; 2 Царств 5.

⁴²⁴⁴ На правом поле листа помета: Псалом 50.

⁴²⁴⁵ На правом поле листа помета: Псалом 21.

⁴²⁴⁶ На правом поле листа помета: Псалом 142.

⁴²⁴⁷ На левом поле листа помета: 2 Царств 7.

⁴²⁴⁸ На левом поле листа помета: Паралип. 29.

⁴²⁴⁹ На верхнем поле листа киноварная помета: на 26-й вопрос и ответ.

⁴²⁵⁰ На верхнем поле листа киноварная помета: 26-е возражение.

⁴²⁵¹ На левом поле листа помета: 2 Царств 78; 3 Царств 3; Псалом 131.

⁴²⁵² На левом поле листа помета: 3 Царств 3.

⁴²⁵³ На левом поле листа помета: 3 Царств 3.

⁴²⁵⁴ На верхнем поле листа помета: 2 Парал. 1.

⁴²⁵⁵ На верхнем поле листа киноварная помета: на 26-й вопрос и ответ.

⁴²⁵⁶ На правом поле листа помета: Мудр. 6.

⁴²⁵⁷ На верхнем поле листа киноварная помета: 26-е возражение.

⁴²⁵⁸ На левом поле листа помета: Мудр. 7.

⁴²⁵⁹ На левом поле листа помета: 3 Царств 4.

⁴²⁶⁰ На левом поле листа помета: Сирах 47.

⁴²⁶¹ На левом поле листа помета: 3 Царств 4.

⁴²⁶² На верхнем поле листа киноварная помета: на 26-й вопрос и ответ.

⁴²⁶³ На правом поле листа помета: Мудр. 9; Псалом 115.

⁴²⁶⁴ На верхнем поле листа киноварная помета: 26-е возражение.

⁴²⁶⁵ На левом поле листа помета: Екклис. 7.

⁴²⁶⁶ На верхнем поле листа киноварная помета: на 26-й вопрос и ответ.

⁴²⁶⁷ На правом поле листа помета: Даниил 3.

⁴²⁶⁸ На правом поле листа помета: Даниил 8.

⁴²⁶⁹ На верхнем поле листа киноварная помета: 26-е возражение.

⁴²⁷⁰ На левом поле листа помета: Мудр. 3.

⁴²⁷¹ На левом поле листа помета: Матф. 19; 1 Кор. 6; Лук. 22.

⁴²⁷² На верхнем поле листа киноварная помета: на 26-й вопрос и ответ.

⁴²⁷³ На правом поле листа помета: 1 Кор. 6; Мудр. 3.

⁴²⁷⁴ На правом поле листа помета: Апокал. слов. 3, глав. 3.

⁴²⁷⁵ На правом поле листа помета: Апокал. слов. 21 глав. 20.

⁴²⁷⁶ На верхнем поле листа киноварная помета: 26-е возражение.

⁴²⁷⁷ На левом поле листа помета: Псалом 121.

⁴²⁷⁸ На верхнем поле листа киноварная помета: на 26-й вопрос и ответ.

Домашняя страница
священника Владимира Кобец