ДУХОВНЫЕ НАСТАВЛЕНИЯ ХРИСТИАНИНУ (2)

и⁴⁵⁷ едино ни в чем же дающе претыкание, да непорочно будет служение, но во всем составляюще себе, яко Божия слуги, в терпении мнозе, в скорбех, в нуждах, в теснотах, (л. 344) в ранах, в темницах, в нестроениих, в трудех, во бдениих, в пощениих, в чищениих, в разуме, в долготерпении, в благости, в Дусе Святе, в любви нелицемерне, в словеси истинне, в силе Божии, оружии правды десными и шуими. Славою и безчестием, гаждением и благохвалением, яко лестцы и истинни, яко неведоми и познаваеми, яко умирающе и се живи есмы, яко показаеми, а не умерщвляеми, яко озлобляеми, присно же радующеся. Яко нищии, мнози же богатяще, яко ничесо же имуще, и содержаще вся.

(л. 344 об.) Прочее⁴⁵⁸ ж, братие, радуйтеся, утвержайтеся, утешайтеся, такожде мудрствующе мирствуйте. Плод⁴⁵⁹ же духовный есть любы, радость, мир, долготерпение, благость, благостыня, вера, кротость, воздержание. Молю⁴⁶⁰ убо вы аз, юзник о Господе, достойно ходити званию, в неже звани бысте, всяцем смиренномудрием и кротостию, с долготерпением, носяще друг друга любовию, тщашеся блюсти единение духа, яко же и звани бысте всяцем смиренномудрием и кротостию с долготерпением, носяще друг друга любовию, тщашеся блюсти единение духа, яко же и звани бысте во едином уповании звания вашего. Бывайте⁴⁶¹ убо друг другу блази, благоутробни, (л. 345) подающе себе, яко же и Бог о Христе дарова нам. Бывайте убо подобни Богу яко чада возлюбленая, и ходите в любви, яко ж и Христос возлюби нас и предаст Себе за ны прошение и жертву Богови в воню благоухания.

Аще⁴⁶² кое убо утешение о Христе, аще утешение любве, аще кое общение духа, аще кое милование и щедроты, исполните ми любовь, да тоже мудрствуете вси, ту же любовь имуще, единодушни, единомудренни, ничто ж по рвению или тщеславию. Прочее⁴⁶³ : Братие, елика суть истина, елика честна, елика праведна, елика чиста, елика любезна, елика (л. 345 об.) похвална. Аще что добродетель, аще что похвала. Сия помышляйте, яже и научистеся и приясте, и слыщасте, и видесте, во мне сия творите.

Аще⁴⁶⁴ совостасте со Христом, вышних ищите, идеже Христос есть, одесную Бога седяй. Вышняя мудрствуйте, а не земная. Умросте бо, и живот ваш сокровен есть со Христом в Бозе. Облецитеся⁴⁶⁵ убо яко избраннии Божии, святии и возлюбленнии, во утробу щедрот, и благость, и долготерпение. Наказуйте⁴⁶⁶ безумныя, утешайте малодушныя, укрепляйте немощныя, долготерпение же ко всем (л. 346) блюдите, да не кто кому зло за зло воздаст, но всегда благое гоните к друг другу и ко всем, всегда радуйтеся, непрестанно молитеся, во всем благодарите. Се бо есть воля Божия о Христе Иисусе в вас. Духа не угашайте, пророчествия не уничижайте. Вся же искушающе, доброе содержите, от всякаго вида зла удаляйтеся. Старцем⁴⁶⁷ трезвеном быти, честном, целомудреном, здравствующем верою, любовию, долготерпением, старицам такожде, в строении священнолепие, ненавидницам, не вину многу порабощеным, доброучителным, да уцелому(л. 346 об.)дряют юныя, мужелюбицам быти, любочадцам, целомудренным, чистым, домодержицам блазем, повинующеся своим мужем, да не слово Божие хулится. Воспоминай⁴⁶⁸ тем, началом и властем повиноватися и покарятися, на всякое дело благо готовом быти, ни единаго же хулити, несварливому быти, кроткому, всяку показующе кротость ко всем человеком.

Братолюбие⁴⁶⁹ да пребывает, страннолюбие не забывайте, тем бо не разумеша нецыи, прияша ангелы. Поминайте юзники, яко с ними связани, озлобленныя, яко и сами суще в теле. (л. 347) Честен брак во всем, и ложе нескверно. Блудником же и прелюбодеом судит Бог. Не сребролюбцы нравом, доволни сущими.

(л. 348) Яко подобает врученым проповеди евангельстей с молением и молитвою приседети, аще диаконом, аще презвитером, неповинным и искушенным перваго жития.

Тогда⁴⁷⁰ глагола учеником Своим: Жатва убо многа, делателей же мало, молитеся убо Господину жатвы, да изведет делателие на жатву Свою. И⁴⁷¹ егда бысть день, пригласи ученики Своя и избра от них дванадесят, их же и апостолы именова, Симона, его же нарече Петра, и Андреа, брата его, Иякова и Иоанна, Филиппа и Варфоломеа, Фома и Матфеа, Иякова Алфеова (л. 348 об.) и Симона, нарицаемаго Зилота, Иуду Ияковля и Иуду Искариотскаго, иже и бысть предатель.

По⁴⁷² сих же яви Господь и инех 70 и посла их по два пред лицем Своим во всяк град и место, аможе хотяше Сам ити. И проч.

Первое⁴⁷³ убо слово сотворих о всех, о Феофиле, их же начат Иисус творити же и учити, до него ж дне заповеда апостолом Духом Святым, их же избра, вознесеся. И⁴⁷⁴ поставиша два, Иосифа, нарицаемаго Варсаву, иже наречен бысть Иуст, и Матфеа, и помолившеся, реша: Ты, Господи, сердцеведче всех, покажи, его же избра от сих (л. 349) обоих единаго прияти причет служения сего и апостолства, от него же испаде Иуда, ити в место свое. И даша жребия има, и паде жребий на Матфеа, и причтен бысть ко единонадесятем апостолом. Аще⁴⁷⁵ кто епископства хощет, добру делу желает. Подобает убо епископу непорочну быти, единой жене муж, трезвену, целомудру, красну, страннолюбцу, учителну, не пианицы, не бийцы, не сварливу, но кротку, не мшелоимцу, не сребролюбцу, своего дома добре правящу, чада имуща в покорении со всякою чистотою. Аще ли кто своего дому не весть (л. 349 об.) правити, како о Церкви Божии прилежит. Не новокрещену⁴⁷⁶ , да не в поношение впадет и сеть диаволю. Диаконом такожде честном, недвоесловцем, не вину многу внимающим, не скверностяжателном, имущим таинство веры в чистей совести. И таковии да искушаются прежде, потом же да служат непорочни суще.

Сего⁴⁷⁷ ради оставих тя в Крите, да ненаконченная исправиши и поставиши по градох попы, яко же ти аз завещах, аще кто есть без вины единой жене муж, чада имея верна, не во укорении блуда или непоко(л. 350)рива. Подобает бо епископу без порока быти, яко Божию строителю, не напрасну, не гневливу, не пианицы, не бийце, не скверностяжателну, но страннолюбцу, боголюбцу, целомудрену, праведну, преподобну, воздержану, пособствующу по вернем словеси, да силен будет и утешати в здравом учении, и сопротивящаяся обличати.

(л. 351) Яко не достоит у рукоположениих благоудобном⁴⁷⁸ быти, ниже непокровенне на та приходити, не бо безбедно есть неискусное, водящаго же ся о нечесом явлевати, да ниже той причастится греху, ниже прочии отсечени будут, но паче боятися навыкнут.

Руки⁴⁷⁹ скоро ни на кого же возлагай, ниже⁴⁸⁰ причащайся гресех чюжих. На⁴⁸¹ попа хулы не приемли, разве аще не при двою или триех свидетелех согрешающая же пред всеми обличай, да и прочии страх приимут.

(л. 352) Яко не подобает избранному о себе приходити на проповедь, пождавати же время Христова благоволения и начинати убо проповедание, егда повелен будет проповедати же о Нем, к ним же послан бысть.

Сия⁴⁸² обанадесяте посла Иисус, заповедав им, глаголя: На путь язык не идите и во град Самарянский не внидите. Идите ж паче ко овцам погибшим дому Израилева. Аз от Бога изыдох и приидох, не бо от себе приидох, но Он Мя посла. Ови⁴⁸³ убо разсеяни бывша от скорби, (л. 352 об.) бывшая при Стефане, проидоша до Финикии и Кипра и Антиохии, никому же глаголюще слово, разве единем иудеом. Павел⁴⁸⁴ , раб Иисус Христов, зван апостол, отлучен во благовествование Христово. Како же услышат без проповедающаго, како же проповедят, аще не послани будут. Павел, апостол Иисус Христов, по повелению Бога и Спаса нашего.

(л. 353) Яко подобает званому в проповедь евангельскую абие послушати, а не отлагати.

Рече⁴⁸⁵ же к другому: Прииди, последуй Ми. Он же рече: Господи, повели ми первие ити и погребсти отца моего. Рече же ему Иисус: Остави мертвых погребсти свою мертвеца, ты же шед, проповедуй Царствие Божие.

Егда⁴⁸⁶ же благоволи Бог, избравый мя от чрева матере моея и призвав благодатию своею открыти Сына Своего во мне, да благовествую Его во языцех, абие не приложихся плоти и крови, ни взыдох в Иерусалим, кои же пред ним мене апостолом, но идох во Аравию (л. 354) и паки возвратихся в Дамаск.

(л. 354 об.) Яко не достоит инако учити.

Аминь⁴⁸⁷ , аминь, глаголю вам, не входяй дверми во двор овчий, но прелазя инуде, он тать есть и разбоиник, а входяй дверми пастырь есть овцам. И по мале. Аз есмь Пастырь добрый. Вси, елицы приидоша, татие бяху и разбойницы, но не послушаша их овцы.

Но⁴⁸⁸ и аще мы вам или ангел с небесе благовестит паче, еже благовестихом вам, проклят да будет. Яко же преже рекох и ныне паки глаголю: Аще кто вам благовестит паче, еже приясте, проклят да будет.

Аще⁴⁸⁹ кто инако учит и не при(л. 355)ходит к здравым словесем Господа нашего Иисуса Христа, ниже по благочестии учению разгорде ничтож сведый. И прочее.

(л. 355 об.) Яко подобает вся предвчиненная от Бога в Евангелии и от апостол учити веровавшая и елика сим последующая.

Шедше⁴⁹⁰ , научите вся языки, крещающе их во имя Отца и Сына и Святаго Духа и учаще их блюсти вся, елика заповедах вам.

(л. 356) Яко ввереным словесем Господня учителства, аще умолчит что от нуждных, еже к Божию благоугождению, повинен есть крови, еже в беду впадающих.

Горе⁴⁹¹ вам, законником, яко взясте ключ разумения, сами не входите и хотящим внити возбраняете. И якож⁴⁹² снидоша от Македония Сила и Тимофей, тужаше духом Павел, засвидетелствуя иудеом Христа Иисуса, противящим же ся им и хулящим, отряс ризы, рече к ним: Кровь ваша на главах ваших, чист аз, отныне во языки иду. Тем же свидетелствую вам в днешний день, яко чист есмь (л. 356 об.) от крове всех, не бо обинухся возвестити вам весь совет Божий.

(л. 357) Яко не достоит иным нуждная возлагати, их же сам не исправи. И вам, законником, горе, яко связуете человеком бремена тяжка, неудобь носима, и сами единем перстом вашим не прикасаетеся бременем.

(л. 357 об.) Яко подобает предстоятелю Слова образ предлежати иным всякаго блага и исправлену прежде даже учити.

Приидите⁴⁹³ ко Мне вси тружающиися и обременении, и Аз упокою вы. Возмите иго Мое на ся и научитеся от Мене, яко кроток есмь и смирен сердцем.

Егда⁴⁹⁴ убо умы ноги учеником, взях ризы и возлег паки, рече учеником: Весте ли, что сотворих вам? Вы глашатаете Мя, Учителя и Господа, и добре глаголете, есмь бо. Аще убо Аз омых вам ноги, Господь и Учитель, и вы должни есте друг друга умывати нозе, образ бо дах вам, (л. 358) да яко же Аз сотворих вам, и вы творите. Вся⁴⁹⁵ показах вам, яко тако тружающимся подобает заступати немощныя. Подобни⁴⁹⁶ ми бывайте, яко же и аз Христу. Никто⁴⁹⁷ же от юности своея да не нерадит, но образ буди верным в слове, в житии, в любви, в вере, в чистоте.

(л. 359) Яко не подобает предстоятелю Слова своими исправленми уверити веровавшая.

Вы⁴⁹⁸ есте соль земли. Аще же соль обуяет, чим осолится? Ни во что же потребна есть, разве да иссыпана будет вне и попираема от человек.

Все⁴⁹⁹ , еже даст Ми Отец, ко Мне приидет и грядущаго ко Мне не изждену вон, яко снидох с небесе, не да творю волю Мою, но волю пославшаго Мя Отца. Се же есть воля пославшаго Мя, да всяк видяй Сына и веруяй в Он, имать живот вечный.

Кто⁵⁰⁰ бо наше упование или радость или венец похвале, (л. 359 об.) аще не вы пред Господем нашим Иисусом Христом в пришествие Его, вы бо есте слава наша и радость.

(л. 360) Яко подобает предстоятелю Слова проходити грады и веси вся врученыя ему.

И⁵⁰¹ прохождаше всю Галилею Иисус и уча на сонмищах, и проповедуя Евангелие Царствия, и исцеляя всяк недуг и всяку болезнь. И Сам хождаше во вся грады и веси, проповедая Царствие Божие и благовествуя, и дванадесяте с Ним.

(л. 361) Яко подобает вся призывати к послушанию Евангелия и со всяцем дерзновением возвещати слово и свидетелствовати истину, аще и нецыи возбраняют и гонят яковем годе нравом даже и до смерти.

Еже⁵⁰² , глаголю вам, во тме, рцыте во свете, и еже во уши слышите, проповедите на кровлех и не убойтеся от убивающих тело, души же не могущих убити. Брак⁵⁰³ убо уготован, звании же не быша достойни, шедше убо на распутия, и еликих аще обрящете, призовите на брак. Отвеща⁵⁰⁴ им Иисус: (л. 361 об.) Аз со дерзновением глаголах миру, Аз всегда учих на сонмищи и в церкви, идеже людие сходятся, и особе не глаголах ничтоже.

Введше⁵⁰⁵ же их, поставиша на сонмищи, и вопроси их архиерей, глаголя: Не запрещением ли запретихом вам не учити о Имени сем? И се исполнисте Иерусалим учения вашего и хощете навести на ны кровь Человека сего. Отвещав же Петр и апостоли, реша: Повиноватися подобает Богу паче, нежели человеком. Обаче⁵⁰⁶ Дух Святый во градех⁵⁰⁷ свидетелствует ми, глаголя, яко узы мене и скорби ждут. Но ни единем же (л. 362) словом творю, ни имам душу мою честну себе, яко совершити течение мое с радостию и служение, еже приях от Господа Иисуса Христа, засвидетелствовати благовествование благодати Божия.

Сами⁵⁰⁸ бо весте, братие, вход наш, иже к вам, яко не тощ бысть, но преже пострадавше с досаждением, яко же и сами весте, в Филиппех дерзнухом о Бозе нашем глаголати к вам Евангелие Бога нашего со многим подвигом.

(л. 363) Яко подобает приемших слово истинное утвержати посещением.

По⁵⁰⁹ днех же неких рече Павел к Варнаве: Возвращшеся посети бе братию нашу по всех градох, в них же возвестихом слово Божие, како суть. Мы⁵¹⁰ бо, братие, осиревше от вас ко времени и часу лицем, а не сердцем, лишше же потщахомся лица вашего видети многим желанием, зане восхотехом приити к вам, аз убо, Павел, и единою и дващи, но возбрани нам сатана. И по мале. Тем же уже не терпяще благоволихом остати (л. 363 об.) во Афинех едини и послахом Тимофея, брата нашего и служителя Божия во благовествовании Христове, утвердити вас и утешити о вере вашей, еже ни едино смущение имети в скорбех сих, сами бо весте, яко вси и с тое лежим.

(л. 364) Яко свойственно есть любящему Христа, еже во мнозей твердости любве о учимых со всяцем прилежати тщанием и всяцем образом, аще и даже до смерти пождавати учителством и во общине и особь.

Пастырь⁵¹¹ добрый душю свою полагает о овцах. Егда⁵¹² ж обедоваша, глагола Симону Петру Иисус: Симоне Ионин, любиши ли Мя паче сих? Глагола ему: Ей, Господи, Ты веси, яко люблю Тя. Глагола ему: Паси агнца Моя. Глагола ему паки второе: Симоне Ионин, любиши ли Мя? Глагола Ему: Ей, Господи, Ты веси, яко люблю Тя. (л. 364 об.) Глагола ему третицею: Симоне Ионин, любиши ли Мя? И рече Ему: Господи, Ты вся веси, Ты веси, яко люблю Тя. Глагола ему Иисус: Паси овцы Моя. Во⁵¹³ едину ж от суббот собраным учеником преломити хлеб. Глаголаше им Павел, хотя изыти наутрия, прострех же слово даже до полунощи. И по мале. Шед же и преломив хлеб и вкусив, беседовав даже и до зореи, изыде. Яко⁵¹⁴ ничто же обинухся от полезных, еже не сказати вам и научити вас пред людьми и по домех, (л. 365) засвидетелствую иудеом же и еллином, иже к Богу покаяние и веруя же в Господа нашего Иисуса Христа. Тем⁵¹⁵ же бодрствуйте, поминающе, яко три лета нощь и день не престах со слезами наказуя единаго коегожде вас. Самимо⁵¹⁶ бо веста, братие, болезнь вашу и труд нощь и день делающе, за еже не отягчити никого же от вас, проповедахом слово Божие. И прочее.

(л. 366) Яко предстоятелю Слова милостиву и благоутробну быти подобает и паче же о озлобленных душах.

Видевше⁵¹⁷ же фарисеи, реша ко учеником Его: Почто с мытари и грешники яст Учитель ваш? Иисус же слышав, рече: Не требуют здравии врача, но болящии, шедше научитеся, что есть милости хощу, а не жертвы. Не приидох бо призвати праведных, но грешных на покаяние.

Видев⁵¹⁸ же народ милосердова о них, яко бяху смятени, аки овцы, не имуща Пастыря.

(л. 367) Яко подобает и в телесных потребах милосерду быти о веровавших и пещися ими.

Милосердую⁵¹⁹ о народе, яко уже три дни преседят Ми и не имут, что ясти, и отпустити их не ядшя не хощу, да не како изнемогут на пути. И⁵²⁰ пришед к Нему прокажен, моля Его и кланяяся Ему, глаголя: Аще хощеши, можеши мя очистити. Иисус же милосердовав простер руку, косну и и глагола ему: Хощу, очистися. Во⁵²¹ дни же тыя множащимся учеником бысть в еллинех и ко иудеом, яко презираеми бяху в службе повседневней вдовицы их, (л. 367 об.) призваша же дванадесяте множество ученик, реша: Изберите, братие, мужи от вас свидетелствованы седмь, исполнени Духа Свята и премудрости, их же поставим над требованием сим.

(л. 368) Яко не подобает предстоятелю Слова и в малых сам действовати, любопочитаем должными, о лучшем же потщании остаяти.

Призвавше же дванадесяте множество ученик, реша: Не угодно есть нам, оставлшем слово Божие, служити трапезам, мы ж в молитве и служении Слова претерпим.

(л. 368 об.) Яко не подобает преходити останки словесныя учителством, в ласкании слышащих, во извет своих сластей или потреб, но таковем быти, яко пред Богом, в славу Его глаголющим. Вся же дела своя творят, воеже видетися от человек, разширяют богохранилища своя и величаются вскрилием риз своих, любят же предвозлежание на вечерях и председания на сонмищах и еже зватися от человек равви. Вы же не нарицайтеся учители, един бо есть Учитель ваш Христос, вси же вы братия есте. И не нарицайте себе отца на земли, един бо есть Отец ваш, иже на небесех, (л. 369) ниже нарицайтеся наставницы, един бо есть Наставник ваш Христос.

Мое⁵²² учение несть Мое, но пославшаго Мя, аще кто волю свою творит, познан будет от учения, аще от Бога есть или аз о себе глаголю, иже о себе глаголя и славу свою ищет. Ищай же славы Пославшаго его, сей истинен есть, и неправды в нем несть.

Несть⁵²³ мы бо, яко же нецыи, корчемствующе слово Божие, но от чистоты, яко от Бога, пред Богом о Христе глаголем.

Утешение⁵²⁴ бо наше не от прелести, ни нечистоты, ниже лестию, но яко ж искусихомся от Бога верни быти, прияти благовествование, сице (л. 369 об.) глаголем, не яко человеком угождающе, но Богу искушающему сердца наша. Не бо в слове ласкания, когда быхом, яко ж весте, ниже виною лихоимания, Бог свидетель, ни ищуще от человек славу, ни от вас, ниже от инех, могуще в тяготе быти, яко Христови апостоли.

(л. 370) Яко не подобает предстоятелю Слова в подлежащих безчестие приимати властию, но ниже возвышатися на тех, но паче вину еже к тем смиреномудрия степень имети.

Кто⁵²⁵ убо есть верный раб и мудрый, его же поставит Господь над рабы Своими, еже даяти им пищу вовремя. Блажен раб, его же пришед Господь его обрящет тако творяща. Аминь, глаголю вам, яко над всем имением Своим поставит его. Аще ли же речет злый раб он в сердцы своем: Укоснит Господин мой приити; а начнет бити срабныя своя, ясти же и пити с пияницами. (л. 370 об.) Приидет Господин раба онаго в день, в онь же не чает, и в час, в онь же не весть, и протешет его и часть его с лицемеры положит, ту будет плач и скрежет зубом.

Вы⁵²⁶ глашаете Мя Учителя и Господа и добре глаголете, есмь бо, аще убо Аз умых вам нозе, Господь и Учитель. И прочее.

Бысть⁵²⁷ же и любопрение в них, кто от них более мнится. Иисус же рече им: Царие земстии обладают ими и началствующим благодателе нарицаются. Вы ж не тако, но болий вас, да будет всех последнейший и вождь, яко раб, кто болий возлежай или служай, (л. 371) не возлежай ли.

От⁵²⁸ Милита ж посла во Ефес призвати попы церковныя, яко же приидоша к нему, рече к ним: Вы весте, яко от перваго дни, отнелиж приидох во Асию, како с вами все лето бых, работая Господеви со всяцем смиреномудрием и многими слезами и напастьми, прилучшимися от иудейских⁵²⁹ навет.

В⁵³⁰ сладость бо приемлете безумныя мудри суще, приемлете бо, аще кто вас порабощает, аще кто поядает, аще кто приемлет, аще кто величается, аще кто вы в лице биет. По досаждению глаголю, зане мы, яко изнемогохом в части сей.

(л. 372) Яко не подобает по зависти или рвению или любопрению, еже к неким, проповедати Евангелие.

Се⁵³¹ отрок Мой, его же возлюбих, и возлюбленный Мой, нань же благоволи душа Моя. Положу дух Мой на нем и суд языком возвестит.

Нецыи⁵³² убо завистию и рвением, нецыи же и благоволением Христа проповедают. Ови убо от любве ведяще, яко во ответе Евангелия лежу, ови же рвением Христа проповедают нечисте, мняще печаль навести узам моим.

(л. 373) Яко не подобает человеческими лихоимании приимати в проповедь евангельскую, да не скрыется от них Божественая благодать.

Исповедаю Ти ся, Отче Господи небеси и земли, яко утаил еси сия от премудрых и разумных и открыл еси та младенцем.

Не⁵³³ посла бо мене Христос крестити, но благовестити не в премудрости слова, да не упразднится Крест Христов. И аз убо пришед к вам, братие, не по преодержиму словеси или премудрости, возвещая вам тайну Божию, не бо судих ведети, что в вас точию Иисуса Христа, и сего распята, и аз в немощи и страсе и тре(л. 373 об.)пете мнозе бых к вам. И слово мое и проповедь моя не по препрению человеческия мудрости, но в явлении духа и силы, да вера ваша не в премудрости человечестей, но в силе Божией.

(л. 374) Яко не подобает благоволение проповедания мнети своею силою содевати, но во всем на Бога уповати.

Упование же таково имамы Христом к Богу, не яко доволни есмы о себе помыслити, что яко от себе, но доволство наше от Бога, иже удоволи нас служителями быти Новому Завету.

(л. 375) Яко не подобает учиненному в проповедь евангелскую стяжавати множае, что от нуждных, яже о нем потреб.

Не⁵³⁴ стяжите злата, ни сребра, ни меди при поясех ваших, ниже сапоги, ни жезла, достоин бо есть пищи⁵³⁵ делатель мзды своея есть. Ничто же да возмете на путь, ни жезла, ни пиры, ни хлеба, ни сребра, ниж по двою ризу имети.

Никто⁵³⁶ же, воин бывая, обязуется куплями житейскими, да воеводе угоден будет.

(л. 376) Яко не подобает влагатися бе в житейская попечения и пристрастием сих упражнятися.

Рече⁵³⁷ же некий к Нему от народа: Учителю, рцы брату моему, да разделит со мною наследие. Он же рече: Человече, кто Мя постави судию или делителя над вами?

Никто⁵³⁸ же воин бывая оплетается куплями житейскими. И прочее.

(л. 377) Яко иже ради угождения слышащих не брегущий дерзновение, еже о Божественных хотениох, о нем себе порабощают, им же угодити хотят, Господня владычествия отпадают.

Како⁵³⁹ можете вы веровати, славу друг от друга приемлюще и славу от единаго Бога не ищущу.

Аще⁵⁴⁰ и еще человеком угождал бых, Христов раб не бых был.

(л. 378) Яко подобает разум предлежати учащаго, всех убо в мужа совершена сочетати, в меру возраста исполнения Христова возводити коегождо во своем чину.

Будите⁵⁴¹ убо вы совершени, яко же Отец ваш небесный совершен есть.

Не¹ 542 о сих молю токмо, но и о верующих словесем их в Мя, да вси едино будет, яко же Ты, Отче, во Мне, и Аз в Тебе, да и ти в Нас едино будут.

Пастыря⁵⁴³ и учителя в сочетание святым в дело служения, в созидание тела Христова, дондеже достигнем вси в единение веры (л. 378 об.) и в познание Сына Божия, в мужа совершена, в меру возраста исполнения Христова.

(л. 379) Яко подобает в незлобии и в кротости наказовати сопротивляющаяся, надеяти же ся тех покаяния, дондеже аще исполнит меру, еже в них прилежания.

Не⁵⁴⁴ преречет, ни возопиет, ниже услышит кто на разпутиих гласа Его, трости сокрушены не преломит и ленна внемшася не угасит, дондеже изведет на победу суд.

Рабу⁵⁴⁵ Господню не подобает сваритися, но тиху быти ко всем, учителну, незлобиву, в кротости наказующу сопротивныя, еда како даст им покаяние в познание истины, возникнути (л. 379 об.) от диаволския сети.

(л. 380) Яко подобает, иже страха ради и благоговейнства отрицающемуся пришествия, проповедающаго слово покарятися и нелюбопрепирателне належати.

И молиша Его все множество страны Гадаринския отыти от них, яко страхом велицем содержими бяху. Той же, сед в корабль, возвратися.

(л. 380 об.) Яко подобает, иже в разуме не приемлющаго проповедь евангелскую, удалятися, и ниже яже к нуждным телесе потребам от него благодеяния восприимати.

Ниже⁵⁴⁶ аще не приемлет вас, ниже услышит словес ваших, исходяще от дому онаго или града, отрясите и прах от ног ваших.

В⁵⁴⁷ онь же град аще внидете, и не приемлют вас, исходяще на распутия его, рцыте: И прах, прилепший от града вашего, отрясаем вам, обаче се ведите, яко приближися на вы Царствие Божие.

Яко⁵⁴⁸ же снидоша (л. 381) от Македония Сила же и Тимофей, тужаше духом Павел, свидетелствуя иудеом Христа Иисуса. Сопротивящим же ся им и хулящим, отряс ризы своя, рече к ним: Кровь ваша на главах ваших, чист аз, отныне во языки иду.

(л. 381 об.) Яко подобает по еже исполнити в них всяк образ прилежания, не повинующих же ся, далече удалятися от них.

Иерусалим⁵⁴⁹ , Иерусалим, избивый пророки и камением побивая посланыя к тебе, колижды восхотех собрати чада твоя, им же образом собирает кокошь птенцы своя под криле, и не восхотесте, се оставляется вам дом ваш пуст.

Вам⁵⁵⁰ бе нужда глаголати слово Божие, но понеже отреваете его и не достойни сами себе творите вечныя жизни, се обращаемся во языки. Сице бо заповеда нам Господь: Положих тя во свет (л. 382) языком, еже быти во спасение даже до последних земли.

(л. 382 об.) Яко ко всем во всякой вещи хранити подобает опаство Господних глагол и ничто же творити по умолению.

Засвидетелствую пред Богом и избранными ангелы, да сия сохраниши без всякия вины, ничтоже творя по умолению.

(л. 383) Яко подобает предстоятелю Слова с промышлением и искусом мнозем смотряти по еже к Богу благоугождению коегождо творити же и глаголати, яко должна суща, и от самых ввереных ему искушатися и свидетелствоватися.

Вы⁵⁵¹ весте, яко от перваго дне, отнелиже приидох во Асию, како с вами все время бых, работая Господи со всяцем смиренномудрием и многими слезами и искушеньми.

И по мале. Сребру или злату, или одеянию никако ж вожделех. Сами бо весте, яко требованию моему и сущим со мною послужисте (л. 383 об.) руце сей. Вы⁵⁵² свидетелие и Бог, яко преподобно и праведно и непорочно вам верующим бых, яко же весте.

(л. 384) Елика совокупно рекошася о епископех и презвитерех.

Аще⁵⁵³ кто епископства желает, добру делу желает, но подобает епископу непорочну быти. И прочая. Старцу⁵⁵⁴ не твори пакости, но утешай, яко отца, юнейшая, яко братию, старицы, яко матери, юных, яко сестры со всякою чистотою. Юных⁵⁵⁵ же помышлении бегай, гони же правду, веру, любовь, мир с призывающими Господа от чиста сердца. Буих же и ненаказанных стязаний отрицайся, ведый, яко рождают свары, рабу ж Господню не подобает сваритися, но тиху быти во всем. И проч.

(л. 384 об.) Ты⁵⁵⁶ же последовал ми еси вере, учению, образу, тщанию, терпению, гонениом, страданиом. Сего⁵⁵⁷ ради оставих тя в Крите, да ненакончанная исполниши и поставиши по градох презвитеры, яко же ти аз заповедах. И прочая.

И⁵⁵⁸ избраша Стефана, мужа исполнь веры и Духа Свята, и Филиппа, и Прохора, и Никанора и прочих, их же поставиша пред апостолы и помолишася, возложиша руце. Диаконом⁵⁵⁹ також честном, не двоесловцем, ни вину многу внимающем, (л. 385) не мшелоприбытком. И прочее.

(л. 385 об.) Яко подобает слышателем слова наученым писаниом искушати, яже от учителей глаголемая и убо соглашающая писаниом приимати: чюждая же отревати и в таковых пребывающаго учениих отвращатися зелнейше.

Горе⁵⁶⁰ человеку оному, им же соблазн приходит. И аще око твое соблажняет тя, изми его, подобно и о руце, и о нозе.

Аминь⁵⁶¹ , аминь, глаголю вам, не входяй дверми во двор овчий, но влазя инуде, он тать есть и разбойник.

И по мале. Чюжему ж не последуют, но бежат от него, яко не ведят чюждаго гласа. Но⁵⁶² и аще мы (л. 386) или ангел с небесе благовестит вам паче, еже приясте, проклят да будет. Пророчествиа⁵⁶³ не уничижайте. Вся искушающе, доброе содержите. От всякаго вида зла удаляйтеся.

(л. 386 об.) Яко подобает много имущих пророческий разум в духовных плодех познавати воображение святых и таковыя убо приимати, инако же имущих отвращатися.

Внемлите же от лживых пророк, иже приходят к вам во одеждах овчих, внутрь же суть волцы хищницы, от плод их познаете их. Подобни мне бывайте, братие, и блюдитеся, иже не тако ходящих, яко же имате образ нас.

(л. 387) Яко подобает правящих слово истинное сице восприимати, яко Богу тех в славу свою пославшу Иисусу Христу Богу нашему.

Приемляй⁵⁶⁴ вас, Мене приемлет, слушаяй вас, Мене слушает, но яко ангела Божия приясте Мя, яко Христа Иисуса.

(л. 388) Яко иже не покаряются иже от Господа посланным, но досаждают, не даже до сего стают, но возводят на пославшаго их и суд себе горшии паче содомлян и гоморян содевают.

Иже⁵⁶⁵ аще не приемлет вас, ниже послушает словес ваших, исходяще из дому или из града того, отрясите прах от ног ваших. Аминь, глаголю вам, отраднее будет земли Содомстей и Гоморстей в день судный, неже граду тому. Отметаяйся566 вас Мене ся отметает. Отметаяй⁵⁶⁷ бо ся не человека отмещется, но Бога, давшаго Дух Свой (л. 388 об.) Святый в нас.

(л. 389) Яко подобает учителство заповедей Господних сице приимати, яко живот вечный и Царствие Небесное, и усердно делати тыя, аще и болезнь быти мнится.

Аминь⁵⁶⁸ , аминь, глаголю вам, яко слушаяй словесе Моего и веруяй пославшему Мя имать живот вечный и на суд не приидет, но прейдет от смерти в живот.

Благовестивше⁵⁶⁹ же градом онем и научивше доволне, возвратишася в Листру и Иконию и Антиохию, утвержающе душы учеником, утешивше пребывати в вере, яко многими скорбми подобает (л. 389 об.) нам внити в Царствие Небесное.

(л. 390) Яко подобает обличение и запрещение сице приимати, яко лечбу чистителну страстем и здравие содевающу. Отонюду же яве есть, яко иже страстию человекоугодия доволне одержимыи и не обличающе согрешающих, всячески оттщетеваются и в самую истинную жизнь наветуют.

Аще⁵⁷⁰ согрешит в тя брат твой, шед, обличи его пред тобою и тем единем. И аще тебе послушает, приобрел еси брата твоего.

Сшедшемся⁵⁷¹ вам и моему духу с силою Господа нашего Иисуса Христа, (л. 390 об.) предадите таковаго сатане во измождение плоти, да дух спасется в день Господа Иисуса.

Послание⁵⁷² оно, аще и на время оскорби вас, ныне радуюся, не яко оскорбистеся, но яко оскорбесте в покаяние, оскорбисте бо ся по Бозе, да ни в чем же отщетитеся нас, яже бо по Бозе скорбь покаяние во спасение нераскаянно содевает.

(л. 391) Яко идеже Церковь под мирскую власть снидет, несть Церковь, но дом человеческий и вертеп разбойником.

И⁵⁷³ вниде в церковь Божию, и изгна вся продающыя и купующыя в церкви, и трапезы торжником испроверже и седалища продающих голуби, и глагола им: Писано есть: храм Мой, храм молитвы наречется; вы же сотвористе и вертеп разбойником.

И⁵⁷⁴ приидоша паки во Иерусалим, и вшедше Иисус в церковь, начат изгонити продающия и купующия в церкви и трапезы торжником и седалища продающих голуби испроверже, и не даяше, (л. 392 а) да кто мимо несет сосуд сквозе церковь. И учаше, глаголя им: Несть ли писано, яко храм Мой храм молитвы наречется всем языком; вы же сотвористе его вертеп разбойником.

И⁵⁷⁵ вшед в церковь и начат изгонити продающия в ней и купующия, глаголя им: Писано есть дом Мой дом молитвы есть; вы же сотвористе его пещеру разбойником.

И⁵⁷⁶ взыде во Иерусалим Иисус, и обрете во церкви продающия овцы и волы, и голуби и пеняжники седящия, и сотворив бич от вервий, и вся изгна из церкви, овцы и волы и торжником разсыпа (л. 392а об.) пенязи, и дски опроверже и продающим голуби рече: Возмите сия отсюду и не творите дому Отца Моего дому купленнаго. Помянуша⁵⁷⁷ же ученицы Его, яко писано есть: Жалость дому Твоего снесть Мя.

Веждь, яко не единою се сотвори от Матфея убо близ страсти се сотворит, ныне же от Иоанна знамения начиная.

Иерусалиме⁵⁷⁸ , Иерусалиме, избивый пророки и камением побивая посланныя к тебе, колькраты восхоте собрати чада твоя, яко ж кокошь гнездо свое под криле, и не возхотесте. Се оставляется вам дом ваш пуст. Глаголю же вам, (л. 393) яко не имате Мене видети, дондеже приидет, егда речете: Благословен грядый во имя Господне.

Ничто ж бо ино⁵⁷⁹ тако разделяет от Бога, яко ж грех, яко ж паки и благая совесть и дела сочетают, любоприятие ж показа Господь, кокошино приказание предложи. Тем же убо понеже не хощеши, рече, оставляется храм пуст. От сего убо разумеем, яко нас ради живет во храмех Бог. Егда ли мы отчаемся, тогда и храми оставляются. Глаголет же, яко: не имате Мене видети до втораго пришествия.

Толма⁵⁸⁰ возненавидех лукавство ваше, яко ни Церкви, дому Моему, (л. 393 об.) глаголю быти, но дом ваш, донели ж бо живяше в нем добродетель, дом Мой бе. А понеже осквернисте, и торг и пещеру разбоиником соделасте.

<<< Предыдущая 1 ...

Ссылки:

³²³ РГАДА. Ф. 27. Приказ Тайных дел. Оп. 1. Д. 140. Ч. 1. См. также редакцию и комментарий рукописного источника: Осипенко М.В. Наставления христианину Святейшего Патриарха Никона // Социальные конфликты в России XVII-XVIII веков. Саранск, 2004; Севастьянова С.К. «Наставления царю» Патриарха Никона // Материалы к «Летописи жизни и литературной деятельности Патриарха Никона». СПб., 2003. назад

⁴⁵⁷ На левом поле листа киноварная помета: 2 Кор. 181. назад

⁴⁵⁸ На левом поле листа киноварная помета: 2 Кор. 197. назад

⁴⁵⁹ На левом поле листа киноварная помета: Гал. 213. назад

⁴⁶⁰ На левом поле листа киноварная помета: Ефес. 224. назад

⁴⁶¹ На левом поле листа киноварная помета: Ефес. 227. назад

⁴⁶² На правом поле листа киноварная помета: Фил. 239. назад

⁴⁶³ На правом поле листа киноварная помета: Фил. 247. назад

⁴⁶⁴ На левом поле листа киноварная помета: Кор. 256. назад

⁴⁶⁵ На левом поле листа киноварная помета: Кор. 288. назад

⁴⁶⁶ На левом поле листа киноварная помета: 1 Сол. 273. назад

⁴⁶⁷ На правом поле листа киноварная помета: Тит. 301. назад

⁴⁶⁸ На левом поле листа киноварная помета: Тит. 202. назад

⁴⁶⁹ На левом поле листа киноварная помета: Евр. 333. назад

⁴⁷⁰ На правом поле листа киноварная помета: Матф. 34. назад

⁴⁷¹ На правом поле листа киноварная помета: Лук. 23. назад

⁴⁷² На левом поле листа киноварная помета: Лук. 50. назад

⁴⁷³ На левом поле листа киноварная помета: Деян. 1. назад

⁴⁷⁴ На левом поле листа киноварная помета: Деян. 2. назад

⁴⁷⁵ На правом поле листа киноварная помета: Тим. 283. назад

⁴⁷⁶ В ркп.: нокрещену. назад

⁴⁷⁷ На левом поле листа киноварная помета: Тит. 300. назад

⁴⁷⁸ В ркп.: благоугодном. «Доб» написано со знаком вставки на правом поле листа. назад

⁴⁷⁹ На правом поле листа киноварная помета: Тим. 287. назад

⁴⁸⁰ Слова «ниже» в ркп. повторены дважды. назад

⁴⁸¹ На правом поле листа киноварная помета: 1 Тим. 286. назад

⁴⁸² На правом поле листа киноварная помета: Матф. 34. назад

⁴⁸³ На правом поле листа киноварная помета: Деян. 28. назад

⁴⁸⁴ На левом поле листа киноварная помета: Рим. 79. назад

⁴⁸⁵ На левом поле листа киноварная помета: Лук. 49. назад

⁴⁸⁶ На левом поле листа киноварная помета: Гал. 200. назад

⁴⁸⁷ На левом поле листа киноварная помета: Иоан. 36. назад

⁴⁸⁸ На левом поле листа киноварная помета: Гал. 199. назад

⁴⁸⁹ На левом поле листа киноварная помета: Тим. 287. назад

⁴⁹⁰ На левом поле листа киноварная помета: Матф. 116. назад

⁴⁹¹ На правом поле листа киноварная помета: Лук. 61. назад

⁴⁹² В ркп.: кож. Пропущена буква «я». назад

⁴⁹³ На левом поле листа киноварная помета: Матф. 43. назад

⁴⁹⁴ На левом поле листа киноварная помета: Иоан. 45. назад

⁴⁹⁵ На правом поле листа киноварная помета: Деян. 44. назад

⁴⁹⁶ На правом поле листа киноварная помета: 1 Кор. 147. назад

⁴⁹⁷ На правом поле листа киноварная помета: 1 Тим. 285. назад

⁴⁹⁸ На правом поле листа киноварная помета: Матф. 11. назад

⁴⁹⁹ На правом поле листа киноварная помета: Иоан. 21. назад

⁵⁰⁰ На правом поле листа киноварная помета: 1 Сол. 266. назад

⁵⁰¹ На правом поле листа киноварная помета: Матф. 9. назад

⁵⁰² На правом поле листа киноварная помета: Матф. 37. назад

⁵⁰³ На правом поле листа киноварная помета: Лук. 76. назад

⁵⁰⁴ На правом поле листа киноварная помета: Иоан. 58. назад

⁵⁰⁵ На левом поле листа киноварная помета: Деян. 15. назад

⁵⁰⁶ На левом поле листа киноварная помета: Деян. 44. назад

⁵⁰⁷ Так в ркп. назад

⁵⁰⁸ На правом поле листа киноварная помета: Сол. 264. назад

⁵⁰⁹ На правом поле листа киноварная помета: Деян. 37. назад

⁵¹⁰ На правом поле листа киноварная помета: 1 Сол. 266. назад

⁵¹¹ На правом поле листа киноварная помета: Иоан. 36. назад

⁵¹² На правом поле листа киноварная помета: Иоан. 67. назад

⁵¹³ На левом поле листа киноварная помета: Деян. 43. назад

⁵¹⁴ На левом поле листа киноварная помета: Деян. 44. назад

⁵¹⁵ На правом поле листа киноварная помета: Деян. 44. назад

⁵¹⁶ На правом поле листа киноварная помета: 1 Сол. 264. назад

⁵¹⁷ На правом поле листа киноварная помета: Матф. 30. назад

⁵¹⁸ На правом поле листа киноварная помета: Матф. 34. назад

⁵¹⁹ На правом поле листа киноварная помета: Матф. 64. назад

⁵²⁰ На правом поле листа киноварная помета: Матф. 6. назад

⁵²¹ На правом поле листа киноварная помета: Деян. 16. назад

⁵²² На правом поле листа киноварная помета: Иоан. 26. назад

⁵²³ На правом поле листа киноварная помета: Кор. 172. назад

⁵²⁴ На правом поле листа киноварная помета: 1 Сол. 264. назад

⁵²⁵ На правом поле листа киноварная помета: Матф. 103. назад

⁵²⁶ На левом поле листа киноварная помета: Иоан. 45. назад

⁵²⁷ На левом поле листа киноварная помета: Лук. 108. назад

⁵²⁸ На правом поле листа киноварная помета: Деян. 44. назад

⁵²⁹ В ркп.: идейских. назад

⁵³⁰ На правом поле листа киноварная помета: Кор. 192. назад

⁵³¹ На правом поле листа киноварная помета: Матф. 46. назад

⁵³² На правом поле листа киноварная помета: Фил. 237. назад

⁵³³ На правом поле листа киноварная помета: 1 Кор. 124. назад

⁵³⁴ На правом поле листа киноварная помета: Матф. 35. назад

⁵³⁵ Написано со знаком вставки на правом поле листа. назад

⁵³⁶ На правом поле листа киноварная помета: Тим. 292. назад

⁵³⁷ На правом поле листа киноварная помета: Лук. 65. назад

⁵³⁸ На правом поле листа киноварная помета: Тим. 292. назад

⁵³⁹ На правом поле листа киноварная помета: Иоан. 17. назад

⁵⁴⁰ На правом поле листа киноварная помета: Гал. 199. назад

⁵⁴¹ На правом поле листа киноварная помета: Матф. 15. назад

⁵⁴² На правом поле листа киноварная помета: Иоан. 57. назад

⁵⁴³ На правом поле листа киноварная помета: Ефес. 224. назад

⁵⁴⁴ На правом поле листа киноварная помета: Матф. 46. назад

⁵⁴⁵ На правом поле листа киноварная помета: Тим. 294. назад

⁵⁴⁶ На левом поле листа киноварная помета: Матф. 35. назад

⁵⁴⁷ На левом поле листа киноварная помета: Лук. 50. назад

⁵⁴⁸ На левом поле листа киноварная помета: Деян. 40. назад

⁵⁴⁹ На левом поле листа киноварная помета: Матф. 96. назад

⁵⁵⁰ На левом поле листа киноварная помета: Деян. 33. назад

⁵⁵¹ На правом поле листа киноварная помета: Деян. 44. назад

⁵⁵² На левом поле листа киноварная помета: Сол. 265. назад

⁵⁵³ На правом поле листа киноварная помета: Тим. 283. назад

⁵⁵⁴ На правом поле листа киноварная помета: Тим. 285. назад

⁵⁵⁵ На правом поле листа киноварная помета: Тим. 294. назад

⁵⁵⁶ На левом поле листа киноварная помета: Тим. 296. назад

⁵⁵⁷ На левом поле листа киноварная помета: Тим. 300. назад

⁵⁵⁸ На левом поле листа киноварная помета: Деян. 16. назад

⁵⁵⁹ На левом поле листа киноварная помета: Тим. 283. назад

⁵⁶⁰ На левом поле листа киноварная помета: Матф. 74. назад

⁵⁶¹ На левом поле листа киноварная помета: Иоан. 35. назад

⁵⁶² На левом поле листа киноварная помета: Гал. 199. назад

⁵⁶³ На правом поле листа киноварная помета: Сол. 273. назад

⁵⁶⁴ На правом поле листа киноварная помета: Иоан. 45; Лук. 51; Гал. 210. назад

⁵⁶⁵ На правом поле листа киноварная помета: Матф. 35. назад

⁵⁶⁶ На правом поле листа киноварная помета: Лук. 51. назад

⁵⁶⁷ На правом поле листа киноварная помета: 1 Сол. 269. назад

⁵⁶⁸ На правом поле листа киноварная помета: Иоан. 45. назад

⁵⁶⁹ На правом поле листа киноварная помета: Деян. 35. назад

⁵⁷⁰ На правом поле листа киноварная помета: Матф. 75. назад

⁵⁷¹ На правом поле листа киноварная помета: 1 Кор. 132. назад

⁵⁷² На левом поле листа киноварная помета: 2 Кор. 183. назад

⁵⁷³ На правом поле листа киноварная помета: Матф. 83. назад

⁵⁷⁴ На правом поле листа киноварная помета: Матф. 50. назад

⁵⁷⁵ На правом поле листа киноварная помета: Лук. 98. назад

⁵⁷⁶ На правом поле листа киноварная помета: Иоан. 7. назад

⁵⁷⁷ На левом поле листа киноварная помета: Псал. 68. назад

⁵⁷⁸ На левом поле листа киноварная помета: Лук. 74. назад

⁵⁷⁹ Написано тем же почерком над строкой. назад

⁵⁸⁰ На правом поле листа киноварная помета: Лук. 73. назад

Домашняя страница
священника Владимира Кобец