ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (20)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

Имеет ли Государь наш грех, что оставил овдовевшую Церковь Божию?

стли то делает для достойных притчи и обычаем строительским для причин которые нам неведомы, не согрешает и не имеет смертнаго греха, однакож не есть свободен от меншаго греха, для того что многие соблажняются и почитают то дело в ленность, что не радеет и прилежности в том не имеет; а радение болшее царьское есть радение церковное, потому что никогда не укрепляются дела царьския, покамест не укрепятся дела Матери Его Церкви Божии: Мати бо твоя есть, наияснейший царю, Церковь Божия; и как должен ты еси почитати матерь свою, которая тебе родила, так должен еси много паче возлюбить и почитать духовную свою Матерь, которая тебе отродила во святой купели святаго крещения и которая тебе помазала на царьство маслом и харизмою радости.

Глаголеши, совопросниче, имеет ли государь наш грех, что оставил овдовевшую Церковь Божию? Изорцы ми прежде, что есть Церковь. Тем же и аз ти реку. Аще ли не веси, вопроси, и аз ти реку, что⁵⁶ Церковь есть.

Господу глаголющу: Яко ты еси Петр и на сем камени созижду Церковь мою, и врата адова не удолеют Ей.

Церковь⁵⁷ же, глаголю, не место точию, но нрав, не стены церковныя, но законы церко(л. 198)вныя⁵⁸. Церковь бо не стены и покров есть, но вера и житие. Како⁵⁹ же ли не одолеша врата адова Церкви, како ли всегда с нами есть Христос, не бо аще не был с нами, одолена бы Церковь. Како Евангелие простреся всюду по вселенней от святых апостол, яко⁶⁰ основателем церковным евангельскаго словесе сеятелем, воистину же суть и основания Церкви апостоли.

И⁶¹ стена града имущая 12 оснований и на них 12 имен 12 апостолов Агнчих. Основания же стены, якоже глаголет, блаженнии суть апостоли, на них же Христова Церковь основана бысть, их же имена аки в предписании, и дщицы на сих написана быша ко удобному навыкновению и научению чтущим, (л. 198 об.)⁶² стена же велия церковная, высокая же и хранительная сущим во святем граде Христос есть и Глава той же есть.

Что же ли ты, ответотворче, глаголеши неправедно. Естли то делает для достойных притчей и обычаем строительским для причин, которыя нам не ведомы, не согрешает⁶³ и не имеет смертнаго греха, однако же не есть свободен от меншаго греха для того, что многия соблажняются и почитают то дело в ленности, что не радеет и прилежности в том не имеет. А радение болшое царьское есть радение церковное, потому что никогда не укрепляются дела царьския покамест не укрепятся дела Матери (л. 199)⁶⁴ его Церкви Божией. Мати бо есть твоя, наияснейший царю, Церковь Божия и как ты должне еси почитати матерь свою, которая тебя родила, так же должен еси много возлюбити и почитати духовную свою Матерь, которая тебя отродила во святей купели святаго крещения и которая тебя помазала на царьство маслом и харизмою радости.

Слышал еси, ответотворче, к совопроснику твоему, что есть Церковь и что основание Церкви, и что стены и глава. Послушай, прелестниче, Павла апостола законоположника Церкви Божией, да почтет тебе по степенем чин святыя Церкви. И⁶⁵ овех убо положи Бог во Церкви, первие апостолы, (л. 199 об.)⁶⁶ второе пророки, третие учители, потом же силы, таже дарования исцелением, заступления, исправления, роди языком, еда вси апостоли, еда вси пророцы, еда вси учители, еда вси силы, еда вси дарования имут исцелением, еда вси языки глаголют, еда вси сказуют. Ревнуйте же дарование болших и еще по превосхождению путь вам показую.

Видел ли еси степень святую, почто не именовася царь в первых за высоту царьства. Добро всякому своя мера хранити⁶⁷ по писаному: в ней же кто призван, в том да пребывает.

Господу свидетельствующу: Вшед же Царь видети возлежащих, виде (л. 200)⁶⁸ человека не оболчена во одеяние брачное и глагола ему: друже, како вниде семо, не имый одеяния брачна? Он же умолче. Тогда рече Царь слугам: Связавше ему руце и нозе, возмите его. И прочая. Мнози бо суть звании, мало же избранных.

Почто вводиши на божественный брак не имущих одеяния брачна? Виде еси грозу Царя, еже рече слугам своим: Связавше ему руце и нозе, возмите его, вверзите его во тму кромешную, ту будет плач и скрежет зубом. И не избавится, избавит ли человек, и не даст Богу измены за ся.

Он⁶⁹ же раб, ведый волю Господина своего и не сотворь, ниже уготовлься к хотению Его, биен будет много.

(л. 200 об.)⁷⁰ Яко⁷¹ не подобает мнети дар Божий имений или иным неким видом стяжавати.

Видев⁷² же Симон, яко возложением рук апостолских дается Дух Святый, принесе им имения, глаголя: Дадите и мне власть, да на него же возложу руце приимет Дух Святый. Петр же рече к нему: Сребро твое с тобою буди в погибель, яко дар Божий мнел еси сребром стяжати. Несть ти части, ни жребия в словеси сем, сердце бо твое несть право пред Богом. Покайся убо о злобе твоей сей и молись Господеви, да оставитися умышление сердца твоего. В желчи бо горести и союзе неправды вижу тя суща. Отвещав же Симон, рече: Помоли(л. 201)теся⁷³ вы о мне ко Господу, яко да ничтоже найдет на мя, ихже рекосте.

И⁷⁴ начаша нецый от скитающихся июдей, обаянник, именовати над имущыя духи лукавыя, имя Господа Иисуса Христа глаголюще: Заклинаем вы Иисусом, Его же Павел проповедает. Бяху же нецыи сынове Скевы июдеанина архиерея седмь, еже се творяше. Отвещав же дух лукавый, рече: Иисуса знаю и Павла свем, вы же кто есте? И скача на них человек, в нем же бе дух лукавый, и одолев им, укрепися на них, якоже нагом и ураненым избежати от храма онаго. Се же все бысть разумно всем живущим во Ефесе июдеом же и еллином, и нападе страх на всех их (л. 201 об.)⁷⁵ и величашеся имя Господа Иисуса Христа.

Бывшу⁷⁶ же дни молва немала в воинех, что убо Петру бысть, и Ирод же поискав его и не обрет, истязав стражие, повеле отвести их. И изшед от Июдея в Кесарию⁷⁷ живяше. В нарочит же день оболкся Ирод во одежду царьску и сед на судищи пред народом, с гордостию глаголаше к ним. Народ же возглашаше глас Божий, а не человеч. Внезапу порази его ангел Господень⁷⁸, зане не даде славу Богу, и быв червьми изъяден и издше. И слово Божие растяше и множашеся.

Видел ли еси, ответотворче, страха и грозы полно, до коликих мук осуждает Бог не имущих одеяния брачна (л. 202)⁷⁹ и имже не подобает действовати, аще и царь будет, да не действует. Что же ты глаголеши, яко Мати твоя есть, наияснейший царю, Церковь Божия. И как должен ты еси почитати матерь свою, которая тебе родила, также должен еси много возлюбити и почитати духовную свою Матерь, которая тебя отродила в святой купели святаго крещения и которая тебя помазала на царьство елеом и харизмою радости.

И се совершися твое, ответотворче, блядное речение и лжи полное. Откуду ты таковое дерзновение прият, еже на грех толковати, а не от Божественаго писания?

Павел глаголет: Аще мы или ангел благовестит паче⁸⁰ еже (л. 202 об.)⁸¹ приясте, анафема. А ты безстрашием своим чрез сие страшныя клятвы новозаконие вводиши и глаголеши. Однако же несть свободен от меншаго греха для того, что многия люди соблажняются и почитают то дело в ленности, что не радеет и прилежности в том не имеет.

Которое радение имети велишь, се ли, якоже Давид сотвори убийство и прелюбодейство? А радение, глаголешь, болшое царьское есть радение церковное. Откуду ты такой гнилой глагол взял, еже царем церковное правити, потому глаголеши, что никогда не укрепляются дела царьския, покамест не укрепятся дела Матери его Церкви Божии. Которыя дела, сия ли, да Матерь (л. 203)⁸² свою в прелюбодейство низведет.

Послушай, прелестниче, Господу свидетельствующу: Всяко царьство, разделшееся на ся, запустеет, и всяк град или дом разделивыйся на ся, не станет. Богу свидетельствующу, не быти в разделении никоторому добру. Кто может инако преложити, небо и земля преидет, словеса же моя не преидут, глаголет Господь.

Подобает коемуждо своя мера знати, а не совосхищатися на не сущая своя, ниже се строение Церкви, но паче гонение, якоже пишется во Откровении:⁸³ Аще⁸⁴ ли гряду скоро и двигну светилник твой от места его, аще не покаешися.

Движение же светилника или Церкве есть обнажение Боже(л. 203 об.)ственыя⁸⁵ благодати, им же обнажение и волнений и смятений от духов лукавствия и пособствующих им лукавых человек.

И⁸⁶ змий, стояше пред Женою, хотящею породити, да егда родит, Чадо Ея снесть.

И змий, стояше пред Женою, приоба отступник противу Церкве вооружается, от рожденыя по времене из Нея свое си брашно творити со тщанием желая, паче же чрез Церковь и самаго Христа гоняй, яко главу Ея, яже верных присвояющаго себе. Тем же и Савле, Савле, что Мя гониши, глаголаше.

И⁸⁷ Жена побеже в пустыню, идеже имать тамо место уготованное от Бога, да тамо питают Ю дний (л. 204)⁸⁸ тысящу двесте шестьдесят.

И Жена побеже в пустыню, егда, глаголет, действуяй во антихристе диавол, им же на Церковь ополчится избранный сей и верховнейший поплевавше гражданския плища и смятения и мирския сласти. В пустыню всякоя злобы, в плодоносное же всякоя добродетели жительство побегнут, по великому Мефодию, и тамо борющих Ю бесов и лукавых человек прилогов избежат. Достоверно же, яко и чювственная пустыня спасает, в горы и вертепы и в пропасти земныя, навета ради отступнича и лжехриста бегающия, якоже и прежде мученики на три же (л. 204 об.)⁸⁹ и пол являемая днями тысяща двесте и шестьдесятми, в них же державствова будет отступление. Его же нас избавляяй велий Подвигоположник, не оставляяй, кому над силу искуситись дарует нам крепкий ум и противными прилогами не растаенный и непреоборимый, да законе противоначалством тмы и властем страдалчествовавше, венцем правды украсимся и победныя почести и дары приимем.

Завидяй⁹⁰, с Богом ратуется, а не со онем. Егда бо увидиши благодать имущаго и болезнуеши и хощет низложити Церковь, не со онем ратуется, но с Богом. (л. 205)⁹¹ Рцы бо ми, аще бы кто украсил отроковицу цареву и благоискусствовал бы, украшая ю и честну соделовая, и ин же некто хотел бы сию безобразовати, и не мощну бывшу украсити ю, то его бы наветовал сего, или оную и отца ея? Такожде и ныне. Ты завидяй, ратуешися с Церковию, на Бога ополчаешися, понеже бо благоискусству братнему сплетен и церковная полза, нужда сему разрушающуся и оной разоритися. Тем же по сему дело сатанинско твориши, наветуяй на тело Христово. Не сего болезнуеши, иже ничтоже обидевшаго, много же паче на Христа, чем тя обидел есть, яко не оставляеши Невесту (л. 205 об.)⁹² утварию облагатися.

Хощеши⁹³ ли навыкнути, яко священство и самаго царьства честнейши и болши есть началство, и да неба границу речеши ми, ниже диадиму, ниже ризы златы, сень бо вся она и весных цветков худейша.

Всяко бо слава человечя, рече, яко цвет травный, аще и самую, речеши, царьскую багряницу, не убо ми сия глаголи. Но аще хощеши иерейское ко царю разнство видети, яже коемуждо даныя власти истязуй и множае от царя высочайши узриши иерея седящи. Аще бо и честне вам престол царьский является от приложных ему камений и обдержаща и злата, должен есть судитися яко царь, (л. 206)⁹⁴ но обаче, яже на земли получил есть строительствовати и множае сея власти не имать ничтоже.

Священства же престол на небеси посажден есть. Кто сия глаголет, сам Небесный Царь. Елика⁹⁵ бо аще свяжете на земли, будут связани на небесех. Что сея равно убо будет чести от земли начало суда приемлет небо, понеже судия на земли седит, Владыка последует рабу. И яже убо сей отсудит, сия Он горе утвержает; и между Бога и человеческаго естества стоит священник, яже отонуду чести сводя к нам, яже от нас. Гневающась, того ко общему примирив естеству, приразившая ся нас, изхи(л. 206 об.)щая⁹⁶ от того руку. Сего ради и царие помазуются от священническую руку, а не священники от царьския руки. И самую царьскую главу, под священникове руце принося, полагает Бог, наказуя нас, яко се онаго болши есть властник, менше бо от болшаго благословляется. Аще бы имел кто глас велий испустить по вся люди, яко царь Христа отверглся, есть и Бога, кто бы похвалил то, развее отступник. Како же таковый несть отступник Христа, аще и царь, всем бо Господь рекл есть обще: Слушаяй вас, Мене слушает, отметаяйся вас, Мене отметается, отметаяй же ся Мене, и Отца Моего отметается. Благотворяй, от Бога есть, (л. 207)⁹⁷ а злое творяй, не веде Бога.

Да кто может того назвати христианином, кто Христа отметается. И аще бы кто рекл, яко царь безчестит отца своего духовнаго, то кто осудит, яко по правде, аще не ума изступивый, колми же паче, аще главу онаго отца его духовнаго бесчестит, суд приимет и месть сугубуя от Бога. Слышал ли еси не человека, но самаго Христа, глаголюща: Елико сотвористе меншим Моим, Мне сотвористе, аще добро или зло, и идут, рече, в муку вечную.

И аще бы кто видел царя, в царьских священствуя, литоргию служа или иныя священству достойная творя, кто бы то могл глаголати, яко (л. 207 об.)⁹⁸ в правду и достойно есть, аще не изумленый умом. Како же ты глаголеши, изумленый ответотворче, яко радение есть царю радение церковное, еда глава есть Церкви царь? Ни, но глава есть Христос, якоже пишет апостол⁹⁹, яко о Нем создана всяческая яже на небеси, яже не земли видимая и невидимая. Аще престоли, аще господствия, аще начала, аще власти всяческая тем и о Нем создашася. И Той есть прежде всех и всяческая о Нем состоятся. И Той глава телу Церкви, иже есть Начаток, перворожден из мертвых, яко да будет во всех Той первенствуя, яко в Нем благоизволи все исполнение (л. 208)¹⁰⁰ вселитися и тем примирити всяческая к Себе, умирив кровию Креста Своего, Собою аще земная, аще небесная.

Царь же ни есть, ни может быти глава Церкви, но яко един от уд. И сего ради ничтоже может действовати во Церкви, ниже последняго четца чин. А кто ныне чрез волю Божию действует насилством, церкви Божии насилует и вся, яже их отъемлет, архиереов, архимандритов и весь священный чин судит, имать сам судим быти от нелицемернаго судии Христа, который имеет власть преступающих святыя Его заповеди по отшествии сего жития осудити (л. 208 об.)¹⁰¹ правду и воздати коемуждо по делом его. Сам той глаголет: Аз не приидох да сужду, но да спасу мир. Отметаяйся Мене и не приемляй словес Моих имать судящаго слово, се заповедах, то судит ему в день Судный.

Да где есть Христово слово, да власть имать царь над Церковию? Христос глаголет: Дасть Ми всякая власть на небеси и на земли оставляти грехи. И паки рече: Его же свяжеши на земли, будет связан на небеси. Кому же таковая власть дана есть? Слышал еси, яко святым апостолом и по них приемником тех архиереом, а не царем. Царь здешним вверен есть, а аз небесным. Царь телесем вверяем есть, иерей же душам. (л. 209)¹⁰² Царь долги имением оставляет, священник же долги согрешением. Он принуждает, а сей утешает. Он нужею, сей же советом. Он оружия чювственна имать, а сей духовная. Он брань имать к сопостатом, сей же к началом и к миродержителем тмы века сего. И сего ради священство царьства преболе есть. Дивно есть, како человеколюбие Божие терпит, еже ныне не точию царь сам святительства на ся восприял, но и вси, во власти его сущии, то творят.

Не слышал ли еси, что случися древле Дафану и Авирону и Корею, воставшим на Аарона, якоже писано есть: И прогневаша Моисея в стану (л. 209 об.)¹⁰³ и Аарона святаго Господня¹⁰⁴, отверзеся земля и пожре Дафана и покры на сонмищи Авирона, и разжеся огнь в сонме их пламень попали грешники.

Послушай же и еще, что бысть Саулу, первому царю во Израили.

И¹⁰⁵ бысть глас Господень к Самоилу, глаголя: Раскаяхся, яко помазал Саула на царьство, понеже отвратися от Мене. Что же отвращение Саулово, понеже, рече, словес Моих не соблюде.

И урани Самоил, идяше на стретение израилтяном заутра, и возвестиша Самоилу, глаголюще: Приближается Саул в Кармил, и се уже ослабе ему рука, и возвратися со оружием в Галгалы. И прииде Самоил к Саулу, и сей той сам возно(л. 210)сяй¹⁰⁶ всесожжения Господу первые корысти, иже взя на аммалицех. И прииде Самоил к Саулу, и рече ему Саул: Благословен ты Господу, сотворих бо все, елико ми глагола Господь. И рече Самоил: Что есть глас стад сих во ушию моею и глас говяд, еже аз слышу? И рече Саул: От Аммалика аз пригнахом, яже собраша людие силнейшая паствиня, яко пожрети аз Господу Богу своему, а прочая избих. И рече Самоил к Саулу: Пожди, возвещу ти, еже глагола Господь ко мне в нощь сию. И рече ему Саул: глаголи. И рече Самоил к Саулу: еда не мал ты бысть пред Ним и не властелина тя поставих хоругви колена Израилева, и помаза тя Господь на царьство, (л. 210 об.)¹⁰⁷ на царьство Израилево, и посла тя Господь путем, и рече ти: Иди, искорени Аммалика и не помилуй согрешивших предо Мною, и победися с ними до скончания их. И почто не послушал гласа Господня по всему, елика ти глагола, но устремися на корысть пожрети ю. Егда ли быша и угодны Господу всесожжения и жертвы, но лутчи есть послушати гласа Господня. И уне есть жертвы благи послушание и паче тука овня, яко убо грех есть чарование, тако грех есть противление, яко грех есть идолопоклонение, тако грех есть преступати заповеди Господня, и уничижит тя Господь, не быти тебе царю (л. 211)¹⁰⁸ во Израили. И по мале. Отъят Господь царьство Израилево от руку твою днесь.

Видел, ответотворче, глагол Божий, а не человеч, яко властелина тя поставих хоругви колена Израилева и помаза тя на царьство Израилево, а не жертвы и всесожжения приносити, предъявляя, яко священство болши есть царьства. И еже пожелал болшее, сущее свое погубил.

Но ли сего не доволно ти ко указанию. Царь¹⁰⁹ Иозия вниде в храм Господень, не послуша священника, хотя покадити, глаголя, понеже праведен есмь, преподобне еси. Но пребывай внутрь устав своих. Ини уставы царьствия и ини уставы священничества, но сие есть более онаго. Вниде же (л. 211 об.)¹¹⁰ Азария иерей во след его, ибо еда всуе глаголах, яко болши есть царя священник, не бо яко царя хотя изгнати, но якоже изгонника и раба неблагодарна. Сице привниде с зелостию, якоже некий пес доблествен притек на нечистаго зверя, яко того изгнати от владычния храмины.

Видели душю иереову дерзновения исполнену многа и мудрования высока, не поблюде на началства величество, не помысли, колико душю, похотением пиану сущу, удержати, не слыша Соломон, глаголюща: Прещение царево подобно ярости лвове, но ко истинному Царю Небесному поблюде и судище помыслив оно и воз(л. 212)даяние¹¹¹ и сам себе помыслы утверждь. Сице наскочи на мучителя, ведяше, убо ведяше яве, яко прещение царево подобно ярости лвове, иже к земли блюдущему человеку мечтаемому и приготовлену душю внутрь в невходных отдати, нежели священныя законы презрети, ругаемы. Пса всякаго немощнейший есть он. Ничтоже бо немощнейший от иже Божественыя законы преобидящаго, якоже убо ничтоже крепчайши от иже Божественыя законы отмщающаго. Иже бо грех творяй, раб есть греху, аще и тмами на главе венца имать. А иже правду делаяй, самаго царя царьственнейши есть, (л. 212 об.)¹¹² аще и всех последнейши будет. Сия в себе любомудрствова доблий он, привниде цареви, совнидем и мы, аще мнится, яко да видим, что цареви беседует, не мало есть ползования слово обличаема видети от священника царя, что же бо рече священник. Не лепо ти есть покадити Господеви, наименова его царя, ниже от началственнаго нарече его имени, понеже бо сам себе предварив изгна от чести.

Что убо Бог, понеже священник преобиден бысть, и слово священничества попираемо бе, и ничтоже можаше к тому священник. Священника, еже обличити точию есть и дерзновение показати, а не оружия (л. 213)¹¹³ подвизати, ни щиты похищати, ни копия потрясати, ни лук наляцати, ни стрелу пущати, но точию обличати и дерзновение показовати¹¹⁴. И понеже обличаше иереи, не повинужеся царь, но оружия подвизаше и щиты и копия и областию приемляше своею. Иерей рече: Аз свое сотворих, ничтоже множае могу. Помози священству попираему, закони преобидими суть, уставы превращаеми бывают. Что убо человеколюбец Бог абие яви проказу на челе ему, идеже безстудие ту и мучение.

Видели человеколюбие Божие и мучение, не тресновение попусти, ни землю потрясе, ни смути небо, но израсти (л. 213 об.)¹¹⁵ проказу не на ином месте, но на челе, яко да мучения показание носит. Да якоже на столпе писмена суть лежаща, ни бо ради того бы¹¹⁶ суть, но за иже по Дафане и Авироне хотящих со Аароном священствовати, еже земля проседесь, пожре. Могий бо достойне мучение навести, не наведе.

Сия же глаголю, не царя укоряющи, но иже возношением и яростию пияны бывающая, да навыкнеши, яко священство царьства болши есть. Изыде Иозия, всем в показание бывая, очистися святилище и изгоняшеся, никому же поревающу его и хотяше свяшенство взяти, и еже имяше, погуби.

Мати твоя есть, наияснейший царю, (л. 214)¹¹⁷ Церковь Божия, и как должне ты еси почитати матерь свою, которая тебя родила, также должен есть возлюбити и почитати духовную свою Матерь, которая тебя отродила во купели святаго крещения и которая тебя помазала на царьство маслом и харизмою радости.

Велми возлюбил царь духовную свою Матерь Церковь Божию толко не таковою любовию, яковою любовию возлюби Христос, иже бе предаст за Ню, на Себе тую обручи и елико нас, нищих, от сосец Своих питала, себе пищу сотвори и сущим с собою.

Послушай же, ответотворче, страшнаго Владыки и Царя к таковым страшное речение (л. 214 об.)¹¹⁸ в притчи. Кто¹¹⁹ убо есть верный раб и мудрый, его же поставит Господин его над домом Своим, еже даяти им пищу во время их; блажен раб той, его же пришед Господин, его обрящет тако творяща. Аминь, глаголю вам, яко над всем имением поставит его. Аще же речет злый раб в сердцы своем «коснит Господин мой приити» и начнет бити клевреты своя, ясти же и пити с пияницами; приидет Господин раба того в день, в онь же не чает, и в час, в онь же не весть, и протешет его полма и часть его с неверными положит, ту будет плач и скрежет зубов.

Господу паки вопиющу: алчен¹²⁰ бех, (л. 215)¹²¹ и напитасте, жажден, и нопоисте. И прочая. Что же к несотворшим милости в день Судный речет? Тогда, речет сущим ошую Его, идите от Мене, проклятии, во огнь вечный, уготованный диаволу и аггелом его. Взалках бо, и не дасте Ми ясти, возжадахся, и не напоисте Мене, странен, и не введосте Мене, наг, и не одеясте Мене, болен и в темницы, и не посетисте Мене. Тогда отвещает им, глаголя: Аминь, глаголю вам, понеже не сотвористе единому сих же менших, ни Мне сотвористе. И идут сии в муку вечную.

А иже сам не сотворивый, но и инех насилством и властию отъят (л. 215 об.)¹²² и во своя потребы изнури, таковых таковии мук повинни будут.

Аще¹²³ который епископ или презвитер некоему причетнику, убогу сущу, не подаст протребных, да отлучится. Пребывая же немилостив же извержется, яко убийца есть своему брату.

Церковное богатство убогих богатство Святое Писание именует, и подобает раздавати его убогим. Аще бо инем требующим раздавати церковнии властели должни суть, якоже пишет, колми паче сущыя под ними причетники миловати и даяти им потребная должни суть. Сего же (л. 216) не творящии да отлучатся, пребывающии же неисправлени да извергутся, понеже сами быша братоубийцы, ибо, не имея потребных на составление живота, умирает, аще убо и не умре он, от инуду Божественому промышлению, даровавшу ему потребная животу.

1 2 3 4 5 6 7 8 9 10 11 12 13 14 15 16 17 18 19 ... 21 22 23 24 25 26 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

⁵⁶ Написано тем же почерком над строкой.

⁵⁷ На левом поле листа помета: От Иоан. Злат., (Марк) 10.

⁵⁸ На верхнем поле листа киноварная помета: на 20-й вопрос и ответ.

⁵⁹ На правом поле листа помета: 1 Кор. 6.

⁶⁰ На правом поле листа помета: Апок. глава 23 стих 12.

⁶¹ На правом поле листа помета: Апок. глава 23 стих 14.

⁶² На верхнем поле листа киноварная помета: 20 возражение.

⁶³ Вписано над строкой тем же почерком: «со».

⁶⁴ На верхнем поле листа киноварная помета: на 20-й вопрос и ответ.

⁶⁵ На правом поле листа помета: 1 Кор. 153.

⁶⁶ На верхнем поле листа киноварная помета: 20 возражение.

⁶⁷ Исправлено из: знати.

⁶⁸ На верхнем поле листа киноварная помета: на 20-й вопрос и ответ.

⁶⁹ На правом поле листа помета: Лук. 68.

⁷⁰ На верхнем поле листа киноварная помета: 20 возражение.

⁷¹ На левом поле листа помета: Васил. Вел. 58.

⁷² На левом поле листа помета: Деян. 19.

⁷³ На верхнем поле листа киноварная помета: на 20-й вопрос и ответ.

⁷⁴ На правом поле листа помета: Деян. 42.

⁷⁵ На верхнем поле листа киноварная помета: 20-е возражение.

⁷⁶ На левом поле листа помета: Деян. 30.

⁷⁷ Исправлено из: Кисарию.

⁷⁸ Исправлено из: Божии.

⁷⁹ На верхнем поле листа киноварная помета: на 20-й вопрос и ответ.

⁸⁰ Написано со знаком вставки тем же почерком на правом поле листа.

⁸¹ На верхнем поле листа киноварная помета: 20-е возражение.

⁸² На верхнем поле листа киноварная помета: на 20-й вопрос и ответ.

⁸³ Слова «якоже пишется во Откровении:» написаны тем же почерком со знаком вставки на нижнем поле листа.

⁸⁴ На правом поле листа помета: Апок. слово 2 стих 6.

⁸⁵ На верхнем поле листа киноварная помета (частично размыта): 20-е возражение.

⁸⁶ На левом поле листа помета: Апок. слово 11.

⁸⁷ На левом поле листа помета: Апок. слово 11 стих 6.

⁸⁸ На верхнем поле листа киноварная помета: на 20-й вопрос и ответ.

⁸⁹ На верхнем поле листа киноварная помета (частично размыта): 20-е возражение.

⁹⁰ На левом поле листа помета: Колас. и рав. уч. 11.

⁹¹ На верхнем поле листа киноварная помета: на 20-й вопрос и ответ.

⁹² На верхнем поле листа киноварная помета (частично размыта): 20-е возражение.

⁹³ На левом поле листа помета: Марк. слово 5 о Озии.

⁹⁴ На верхнем поле листа киноварная помета: на 20-й вопрос и ответ.

⁹⁵ На правом поле листа помета: Матф. 76.

⁹⁶ На верхнем поле листа киноварная помета: 20-е возражение.

⁹⁷ На верхнем поле листа киноварная помета: на 20-й вопрос и ответ.

⁹⁸ На верхнем поле листа киноварная помета: 20-е возражение.

⁹⁹ На левом поле листа помета: Колос. 251.

¹⁰⁰ На верхнем поле листа киноварная помета: на 20-й вопрос и ответ.

¹⁰¹ На верхнем поле листа киноварная помета: 20-е возражение.

¹⁰² На верхнем поле листа киноварная помета: на 20-й вопрос и ответ.

¹⁰³ На верхнем поле листа киноварная помета: 20-е возражение.

¹⁰⁴ На левом поле листа помета: 4 Моис. 16.

¹⁰⁵ На левом поле листа помета: 1 Царств глава 15.

¹⁰⁶ На верхнем поле листа киноварная помета: на 20-й вопрос и ответ.

¹⁰⁷ На верхнем поле листа киноварная помета: 20-е возражение.

¹⁰⁸ На верхнем поле листа киноварная помета: на 20-й вопрос и ответ.

¹⁰⁹ На правом поле листа помета: Матф. слов. 3, 4, 5.

¹¹⁰ На верхнем поле листа киноварная помета: 20-е возражение.

¹¹¹ На верхнем поле листа киноварная помета: на 20-й вопрос и ответ.

¹¹² На верхнем поле листа киноварная помета: 20-е возражение.

¹¹³ На верхнем поле листа киноварная помета: на 20-й вопрос и ответ.

¹¹⁴ Вписано тем же почерком над строкой: «ва».

¹¹⁵ На верхнем поле листа киноварная помета: 20-е возражение.

¹¹⁶ Написано со знаком вставки на левом поле листа.

¹¹⁷ На верхнем поле листа киноварная помета: на 20-й вопрос и ответ.

¹¹⁸ На верхнем поле листа киноварная помета: 20-е возражение.

¹¹⁹ На левом поле листа помета: Матф. 103.

¹²⁰ На левом поле листа помета: Матф. 106.

¹²¹ На верхнем поле листа киноварная помета: на 20-й вопрос и ответ.

¹²² На верхнем поле листа киноварная помета: 20-е возражение.

¹²³ На левом поле листа помета: лист.

Домашняя страница
священника Владимира Кобец