ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (24-2)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

идиши ли, како царь Константин Великий дав и утвердил даже до скончания века сего. Государь же царь, аще что и дал, и того сам не соблюл, и бывших всех, (л. 329 об.)¹⁷⁸³ и отца своего и свои привилеи везде ни во что обратил. Паки же к сущим царя Константиновым заповедем приидем.

Се же явлено убо, яко рукама блаженнейшаго отца нашего Силивестра святителя и того по нем приемником, сия вся удержана будет. Да возвеселится ныне с нами весь народ и вси, яже по Вселенней языки и роды. Глаголем и молим, яко да с нами Спасителю нашему и Богу и Господу Иисусу Христу безчисленыя исповемы благодати. Яко той есть Бог на небеси горе и на земли доле, иже нас святыми апостолы посети и святую тайну Крещения и телеси здравие достойно сотвори прияти. О них же и подаем тем святым апостолом (л. 330)¹⁷⁸⁴ и владыкам нашим, блаженнейшим Петру и Павлу и с ними Силивестру, нашему отцу, и всем отцем поднебесныя, отцу, крайнему святителю, и соборному града Римскаго папе и всем его, иже по нем приемником святителем, даже до скончания мира, на престоле блаженнаго Петра седящим. Первое, убо в латеринстей полате царьства нашего, яже всех, иже по всей Вселенней, полате препочитается и преимет и славится, якоже диадима, еже есть венец главы нашея, подобне же и фригион, еже есть покрывало, еже митрою нарицают, и не токмо той, но и епомион, еже есть препоясание, еже обычно есть царьской мышце облагатися, рекше омофор, (л. 330 об.)¹⁷⁸⁵ и еще же и багряная одежда и червленая риза и вся царьская одеяния, но и царьскаго председания достоинство и царьских коней утварение, и царьския скипетры, и вся знамения, еще же и колесницы и различныя царьския утвари, и вся, еже в происхождение их, царьскаго верха, славы и силы.

Сице честнейшим же мужем, клириком в различных чинех той священней святей Римской Церкви работающих, оноя же высоты усвоение и силы преизящество имети уставляем, еже и великий наш сигклит славою зрится украшен, сиречь патрикеем, бывати им и ипатом. К сим же и инеми царьскими саны в проповедаемых (л. 331)¹⁷⁸⁶ украшатися им, якоже царьскому воинству. Сице и клиросу святыя Римския Церкве украшатися и чествоватися уставляем. И якоже царьская власть различныма саны кудикуларийскима и остирьяскима и скудиторскима украшается, тако и святей Римской Церкви украшатися. Но и пространнейше святительское благоукрашение священным и Божественым повелением и нашим царьским повелением сияти и чествоватися уставляем. И тех клирик тоя святыя Церкве, кони покровени одеянии, белейшаго зрака украшатись повелеваем и сиятися мимоездящих обувенми, сиречь белейшима одеяний по ногам имущих, (л. 331 об.)¹⁷⁸⁷ якоже сими и наш сигклит одевается. Да якоже небесная, такожде подобает и земная украшати в славу Божию. Прежде же всех волю даем тому святейшему отцу нашему Силивестру, иже града нашего Рима святителю папе и всем, иж по нем приемником, хотящим быти на приходящия веки блаженнейшим святителем ради чести и славы Господа нашего Иисуса Христа в велицей сей соборней и апостольстей власти. Аще кто от великаго нашего царствия велмож восхощет ко благоговейным клириком причетатися, никому же, иже к сему призываему за гордость, отрицатися чина, узаконополагаем же и се всякия чести достойно отцу на(л. 332)шему ¹⁷⁸⁸ Силивестру, крайнему святителю, и всем его, иже по нем приемником, святителем препоясанием и венцем, иже от главы нашея подахом ему, златом чистейшим и каменми многоценными и драгим бисером составленый. Должен есть одеватися и на главе носити на славу Божию и на честь блаженнаго Петра, понеже той блаженный папа на венце главнаго пострижения знамение сотвори, его же ради чести блаженнаго Петра имеет. Не восхоте же ль злата носити венец, мы же венец вместо сего, лицем белейшим светлое Воскресение Господне назнаменавше, на священнейшую его главу своима рукама положихом и брозды (л. 332 об.)¹⁷⁸⁹ коня его своима рукама держаще, чести ради блаженнаго Петра, конюшеским саном ему себе дахом. Повелеваем же того чина и обычая всем, иже по нем, святителем всегда творити в поездех своих по подобию царства нашего. Темже ради сего постриженаго знамения верховнаго святительския главы, да не мнит кто сие пострижение худо быти и безчестно. Но и паче земнаго царьства саном и славою и честию и силою ея украшати подобает. Се же и полата наша, якоже преди речеся, но и Рим град весь и вся Италия и западныя страны и пределы и места и грады и земли. Сему же множицею предреченому блаженнейшему (л. 333)¹⁷⁹⁰ отцу нашему Силивестру соборному папе предаем и отступаемся ему и всем, иже по нем бываемым святителем, и по всей Вселенней, идеже православная наша вера обдержит, и владение и суд держати им Божественым нашим и делным сим законоположением повелеваем пребывати наместнику святей Римской Церкви. И подлежащее и пребывающее отдаваем ей, отнюду же судихом нашему царьству и его славе на Восточныя страны преселитися вместо Византии, краснейшее место о нашем имени град создавше, тамо царьство наше утвердим, идеже бе святительская власть и христианскаго благочестия глава небесным царем уставлена бысть, (л. 333 об.)¹⁷⁹¹ недостойно есть тамо власть имети земному царю. Сия убо вся яже священным нашим сим писанием и инеми Божествеными суды повелена же и укреплена, даже до скончания мира, яже по всей Вселенней. Даныя же святителем церковныя пошлины неприкосновенна и непоколеблема пребывати уставляем в наших летех и по нас в приходящыя лета и роды. Заповедаем православным царем и князем и всем людем, яже по всей Вселенней, даже и до скончания мира. Отнюду же пред живым Богом, иже повелевшем нам царьствовати, и Страшнаго Его суда предзасвидетельствуем, священым и Божественым повелением (л. 334)¹⁷⁹² и царьским сим нашим уставлением, всем нашим по нас преемником царем и всем силным и всем тысящником и всем сотником и всем велможам Римским, всему пространнейшему сигклиту полаты нашего царства, и всем, иже по всей Вселенней людем и иже ныне сущим в сих летех и потом, по вся лета впреди бывающим, и нашему царьству подлежащих. Ни единому же сих мощно буди по некоторому образу, яже нами и царьским нашим законоположением священнейшей святей Римской Церкви и всем, иже по нею, святителем, по всей Вселенней бываемая данная порушити, или пречинити, или которым образом досадити. (л. 334 об.)¹⁷⁹³ Аще ли же кто силою, или недоверием, или гордостию преобидник будет о сих, вечныма да объят будет осуждении и онех да подпадет томлением и обрящет тогда себе сопротивных святых Божиих и началных апостолов Петра и Павла и в настоящем убо житии, и в будущем, и да в преисподнем аде мучим будет, и да исчезнет со диаволом и со всеми нечестивыми. Сего же нашего царьскаго повеления писание своима рукама укрепивше, честному телеси началнаго апостолом блаженнаго Петра своима рукама в раку положихом, сим Божию апостолу обращахомся, непорушима нами сия вся соблюдати и нами и по нас (л. 335)¹⁷⁹⁴ приемники царьскими, зде и по всей Вселенней православным царем же и князем и велможам владалным, соблюдаема Божественыма заповедьми и нашима уставы укрепихом. И блаженному отцу нашему Силивестру, соборному папе и, его ради, всем его приемником святителем Господа нашего Иисуса Христа благонравно поведавше вечно и благополучно сих воздаяние предавше. Такожде инем четырем Патриаршеским престолом, коемуждо пределу честных ради апостол и ученик Христовых, Византийскому, его же во свое имя преименовахом Андрея ради апостола, яко много потрудившася к богоразумию тех привести и Церкви водрузити православных, (л. 335 об.)¹⁷⁹⁵ такожде и Александрийскому, Маркову преемнику, и Антиохийскому, Лукину настолнику, и Иерусалимскому, Ияковля брата Господня, коемуждо во своем пределе подобающую честь подаем и наши по нас преемницы до века, такоже и всем Церквам Христовым, митрополиям, архиепископиям и епископиям и иже по них настолником их, честь сами даем и наши по нас преемницы и велицыи сатрапы, яко служителем Божиим, преемником Христовым апостолом, сице твористе и соблюдайте, яко да не предреченой тягости подпадете и славы Божия лишени будете, но держите предание, якоже приясте. Бога (л. 336)¹⁷⁹⁶ бойтеся и священную Его Церковь и настоятели Ея чтите, да милость Божию получите и в сем веце и в будущем и сынове Света будете.

Божество вас да соблюдет во многая лета святейшии блаженнейшии отцы. Дадеся в мире в день третий каланд априлиевых владыки нашего Флавия Константина Августа Галаканом мужем честнейшим Ипат славнейших.

Видели, совопросниче, великаго царя Константина веру и деяние и утвержение, како при себе и по себе и навеки до скончания века утвердил и заклял страшным прещением, кто не сохранит заповеди его, глаголя: (л. 336 об.)¹⁷⁹⁷ Аще ли же кто силою, рече, или неверием, или гордостию преобидник будет, вечными объят будет осуждении и онех да подпадет томлением, и обрящет тогда сопротивных святых Божиих и началных апостолов Петра и Павла и в настоящем убо житии и в будущем, и да в преисподнем аде мучим да будет, и да исчезнет со диаволом и со всеми нечестивыми. Такожде и Иустиниана, царя великаго, законы даныя Церкви на утвержение, во всем последуя святых апостол и святых отец правилом, 87-го правила, еже не вместно скупости ради времене вписати, сам на месте их (л. 337)¹⁷⁹⁸ прочти во святых правилех. Такожде и прочия Греческия цари благочестивыя.

Таков же и равноапостолный великий князь Владимир крестився и созда церковь соборную Пресвятыя Богородицы десятинную. И дах ей десятину со всего своего княжения от всякаго суда десятое и с торгу десятую неделю во всех градех, и на всякое лето десятое от всякаго стада, и от всякаго живота на всякое лето десятое Господу Богу и Спасу нашему Иисусу Христу и Пречистей Его Матере Пресвятей Богородице и отцу своему митрополиту. Такожде и епископом по всей земли Руской, во всех княжениях в соборную церковь епископом устроил по греческим номоканоном. И паки разсмотрив греческия номо(л. 337 об.)каноны ¹⁷⁹⁹, обрете в них написано, яко не подобает церковных судов мирским князем судити, ни бояром, ни тиуном их, и той такожде сотвори. Седе со отцем своим Леоном, митрополитом же всеа Руси, и со всеми детми и со всеми князи своими, и с боляры и дал те все суды по греческим законом святей Божией церкви Пресвятыя Богородицы и отцем митрополитом всеа Русии и всем епископом по всей русской земли в род и в род до века, глаголя: завещаю и заклинаю Богом и Пречистою Богородицею все, еже соблюдати сия неподвижно, и никако же вступатися во святительския суды и во власти их и в люди их ни детем (л. 338)¹⁸⁰⁰ моим, ни внучатом, ни правнучатом, ни всему роду моему в род и в род до века. А бояром нашим и тиуном нашим и всем судиам нашим и иже по нас в род и в род до века никако же судов святительских церковных не судити и наших мирских судов без судей митрополичьих не судити десятаго ради дохода. Богом заклинаем и Пречистою Богородицею соблюдати сия неподвижно даже до скончания мира. Аще же кто преобидит сей устав, таковым грех и непрощеным быти от Господа Бога, аще не покаются. И своим убо судиам и тиуном приказываю и засвидетельствую пред Христом (л. 338 об.)¹⁸⁰¹ Богом и пред всеми святыми Его и пред всем народом, священных доходов и пошлин и управ, судов церковных не обидети и с судов градских давати 9 частей князю, а десятую часть святей церкви, отцу нашему святителю. Такожде и всем святителем по всей рустей земли, где суть священнии епископстии престоли. А се люди церковнии по Божественым правилом предани патриарху или митрополиту или епископу, в коем аще предел будет. Епископи, архимандрити и игумены, игумении, попы, диакони, попадьи и диаконицы и дети их, и иже суть в клиросех, иноки и инокини, понамари, проскурницы, стражи священнии (л. 339)¹⁸⁰² церковнии, местницы, прощеницы, бабы, вдовицы, задушнии человецы, прикладницы, странницы, нищии, монастыри и бани их и врачи их, болницы и врачи их, пустынницы, странноприемницы, и кто святая одеяния иноческая свержет, те вси по древнему уставу святых апостол и святых отец и благочестивых православных царей святым церквам даны, патриарху или митрополиту или епископу, в коемждо аще пределе будет, да ведает их той и управу дает и разсуждает, аще что будет промеж ими или которание, или безчиние, или нестроение, или суды, или обиды, или насилие, или церквам и закону христианскому что (л. 339 об.)¹⁸⁰³ неподобно содевается, или лихоимством имение преставлшаго восхитится, душа вышши и болши всего есть, или мерила неправедна и весы и спуды, или задница, аще ли иному человеку будет с ними суд или обида которая, то общий суд и пересуд наполы.

Сия и убоися, аще кто преступит правила, якоже есмь управил по святых апостол и по святых отец и по первых православных благочестивых царей управлению. А кто имет поругати и преступати сия правила, или дети мои, или внуцы мои, или правнуцы, или по тех князи и бояре, или в которых городех наместницы, или судьи, или тиуны, аще (л. 340)¹⁸⁰⁴ имут поругати и обидети те священныя суды и управы и доходы и пошлины церковныя святительския или отъимати, да будут прокляти в сий век и в будущий и от святых апостол и от седми соборов святых отец Вселенских.

Глаголет бо во Евангелии своем Господь к таковым: Отъидите от Мене, проклятии, во огнь вечный, уготованый диаволу и аггелом его.

Сие убо искони поручено Господем Богом святителем и епископиям их, градския и торговыя и везде всякия мерила и спуды и весы и ставила от Господа Бога тако изначала уставлено есть и непоколеблемо никогда же быти даже (л. 340)¹⁸⁰⁵ и до скончания мира. И святителю блюсти без пакости всего того подобает, за все бо за то воздати ему слово в день великаго Суда Христова, якоже и о душах человеческих.

От всякаго княжа суда десятая векша, и ис торгу десятая неделя и от дани, и от веры, и из всего схода, и прибытка, и от лова княжа, и от всякаго стада, и от всякаго жита десятое в соборную церковь епископу. Царь или князь в девятих частех, а церковь соборная в десятей части. Глаголет бо апостол: Основания же инаго никто же может положити, паче лежащаго сего от начала век положенаго от Господа Бога и святых Его. И да вси со(л. 341)граждают ¹⁸⁰⁶ на сем основании. Аще кто разсыплет храм Божий, разсыплет того Христос Бог, Церковь бо Божия свята есть и утвержена Господем Богом в век века. Аще кто обезчестит и разорит святый сей устав апостолский и отеческий, гнев Божий на себе привлечет и гнев не прощен, и проклятие в сий век и в будущий, якоже во Евангелии писано есть, яко с проклятием таковии отсылаются от Господа Бога во огнь вечный, уготованый диаволу и аггелом его.

Аще кто поругает и изобидит священныя доходы и пошлины и управы и суды церковныя святительския, четверицею да воздаст и страшен ответ воздаст на страшнем Суде (л. 341 об.)¹⁸⁰⁷ Христове, идеже никто же никому же поможет, развее истиныя веры православныя и добрых дел. Аще кто завещание мое сие и уставление мое порушает, или сынове мои, или внуцы мои, или от бояр или кто от властелей, или от тиунов и от прочих кто ни буди, аще порушает мой ряд, или вступятся в суды священныя святительския или в доходы и пошлины, что есми дал митрополиту, своему отцу и епископом во всех княжениих по святых апостол и святых отец и по первым православных благочестивых царей управлению, да приимет от Христа Бога и от достойне держащаго державу Русскую. Аще же вся сия преобидит (л. 342)¹⁸⁰⁸ кто и имет вступатися и отнимати, и судити, преслушав спасеныя заповеди Божия и апостолския и отеческия и православных и благочестивых первых царей, и неключимых нас завещание священныя церковныя управы и суды и доходы и пошлины, той да станет со мною пред Христом Богом на нелицемернем и грознем и страшнем Суде, и да не будет на нем милости Божия в сем веце и в будущем, и да будет проклят.

И таковая с молитвою завещания трудолюбезно от святых Писаний снискав и завет сугубо доволен написа, и клятвами страшными утвердив, и таковое писание в той велицей церкви (л. 341 об.)¹⁸⁰⁹ Богоматере на утвержение благочестия, еже и доныне благодатию Христовою многоразличныя даяния Богу даная, свидетелствуют, благословенный плод сего святаго Владимира, иже суть наследницы богохранимыя державы его, божественне ревнующе по истиннем благочестии, якоже прияша отеческая правоверная вера законоположения. И сия вся не токмо непоколебаемо держаще исправляху, наипаче же того много сугубно и приложиша, созидающе многия церкви и епископы устрояху, и честныя монастыри воздвизаху, и нещадно даяху вечное наследие, грады и погосты, села и винограды, земли и болоти, езера и реки, и ве(л. 343)ликия ¹⁸¹⁰ власти со всеми прибытки. К сим же и десятое изо всего царьствия и княжения.

Такоже ¹⁸¹¹ и христолюбивыя их царицы и благоверныя княгини усердно вдаваху свою лепотную утварь и всякую нарочитую кузнь и светлыя ризы, злато же и камение драгое и великий жемчюг, и святыя иконы, и евангелия, и царьскими сосуды святыя престолы украсивше, обогатили паче тех, от кого сия прияли суть, внимающе писанию апостольских правил. Якоже церковное богатство нищих есть богатство, еже сим издовляти весь освященный чин и вся причетники церковныя, и возраста ради и сирот, и в старость пришедшим, и в немощи (л. 343 об.)¹⁸¹² и в недуги впадшим, нищим в прекормление и много убо чади, и странным в прилежание, и убогим сиротам в промышление, вдовицам же пособие, девицам потребы, обидимым заступление, пленным искупление, во гладе прекормление, в худобу умирающим покровы и гробы и погребание, церквам пустым и монастырем подъятие, живым прибежище и утешение, а мертвым память.

Сих ради потреб церковных людие даваху имения своя, о таковых потребах блаженный Владимир велик подвиг показа и вечное блаженство получи.

Что же ли, совопро(л. 344)сниче ¹⁸¹³, государь царь подобно сим сотвори? Но все сопротивно священному Христову Евангелию и святых апостол и святых отец и благочестивых царей и великих князей преданием и утвержениям, якоже выше много множество писано есть. Архиерейство ли почте, якоже Господь заповеда: Слушаяй вас, Мене слушает? То таково государь царь не почел, но и обесчестил тако, что невозможно и писати, безчестнее и поганых царей обезчестил.

Глаголет государь царь, якоже всенародное слово слышится во всем мире, что бутто он нас избрал на архиерейство. Едина весть Святая Троица, Отец и Сын и Святый Дух, яко не искал, ни хотел, и иже имать судити Господь, (л. 344 об.)¹⁸¹⁴ тогда познано будет. А я, аще бы ведал таковое его государево немилосердие, не бы помыслил, якоже весть Господь и всенародное множество, как молил сам государь. Ныне же от всенароднова множества общий глас слышится, кто де он был, толко де бы не аз ево избрал? Говорили и на Христа моего: Кто Сей есть? Инии глаголаху: Не Сей ли есть тектонов сын? И инии же глаголаху: Откуду Сему сия и что премудрость даная Ему, и силы таковы рукама Его бывают, не Сей ли есть тектон, сын Мариин, брат же Иякову и Иосии и Июде и Симону, и не сестры ли Его зде суть в нас. И блажняхуся о Нем.

Глаголаше же им Иисус: Яко несть пророк (л. 345)¹⁸¹⁵ без чести, токмо во отечествии своем и в сродстве и в дому своем, то есть от отечствия своего, яко знает кто отечствие пророческое и соблажняет и не верует быти яко пророк. Якоже глаголется: Ни братия Его вероваху в Него. И паки: Сотвори что и зде, во отечествии своем, то есть в сродстве своем и в дому своем. И несть чюдно и государю царю, что ныне говорит, яко аз избрал на хулу Святому Духу, аще исперва благ явился и достоин помазанием и возложением руки архиерейския нашествия Святаго Духа, якоже и Саул по помазании на царьство Израилю от Самуила дар Святаго Духа име и пророчествова. И ¹⁸¹⁶ бысть, рече, егда возвратися (л. 345 об.)¹⁸¹⁷ Саул от совокупления, разытися с Самоилом, и преложи ему Бог сердце на ино, и приидоша вся знамения в день онь. И взыдет оттуду на холм и се лик пророческий противу ему, и взыде нань Дух Божии, и прорицаше среде их. И реша вси людие, кийждо ко искреннему своему: Что се бывшее сыну Киссову, еда и Саул есть во пророцех? Егда возгордев и пождав Самоила, якоже заповеда ему, и коснуся неприкасаемых, и вознесе всесожжение, тогда и царьство его разрушися и отъятся. И во царя место вождь наречеся, и Дух Господень отступи от Саула, и даваяше дух лукавый от Господа. Егда же второе сотвори вознести жертву, от Малик (л. 346)¹⁸¹⁸ возвратився, и архиерея Господня уби и прочих 80 священников, тогда от Бога и сам осужден, со всем родом его побиен быти, якоже и бысть. Тако и Соломон, от исперва благочестив бысть, но конец жития не подобен юности соверши.

Тако несть чюдно и государю царю, от исперва по помазании елея имети Святаго Духа, якоже и прежде бывше мнози царие благочестивии и потом бывше злии, отступницы и гонителие и мучителие, о них же повествует книга летописная.

Тако и государь царь, аще от исперва был милостив, кроток, благопослушлив, ведаем и хвалим, а еже ныне явился противе во всем священному (л. 346 об.)¹⁸¹⁹ Евангелию, Духа Святаго обезчести, правила святых апостол и святых отец и всех благочестивых царей и великих князей законы и уставы, преданыя Церкве, испроверже. И елико отец ево, государев, царь и великий князь Михаил Феодорович всеа Русии со отцем своим великим государем святейшим кир Филаретом, патриархом Московским и всеа Русии, исправили и обновили и утвердили, все до конца ни во что положи. И елико сам от исперва быв благ и кроток и милостив, исправи и устави, все ни во что положи, забыв страх Божий и святыя Его заповеди. Господу глаголющу: Аще вы в словеси Моем пребудете, воистину ученицы Мои будете (л. 347)¹⁸²⁰ и разумеете истину, и истина свободит вы. Тако и всяк, не пребываяй в словеси Божии, несть ученик Христов, ни разумеет истины, ниже свободен есть от истины. И паки Господу глаголющу: Аминь ¹⁸²¹, аминь, глаголю вам, яко творяй грех, раб есть греху, раб же не пребывает в дому вовеки, сын пребывает вовеки. Аще убо Сын свободит вы, воистину свободни будете. Явно есть, яко их же не свободит, не будут свободни. Паки Господу глаголющу: Веруяй ¹⁸²² в Сына, имать живот вечный, а иже не верует в Сына, не узрит живота, но гнев Божий пребывает на нем. Паки Господу глаголющу: Аминь, аминь, глаголю вам, яко слушаяй (л. 347 об.)¹⁸²³ словесе Моего и веруяй пославшему Мя, имать живот вечный и на суд не приидет, но прейдет от смерти в живот. Явно есть, яко не слушаяй словес Господних, ниже веруяй пославшему Его, не имать живота вечнаго, ниже может приити от смерти на живот.

Господу глаголющу: Се же есть воля пославшаго Мя, да всяк видяй Сына и веруяй в Него, имать живот вечный, и воскрешу его Аз в последний день. Всяко и не веруяй в Сына, не воскресит тех Господь в последний день, по писаному: Не воскреснут нечестивии на Суд, ниже грешницы в совет праведных. Господу глаголющу: Аминь, аминь, глаголю вам, аще кто слово (л. 348)¹⁸²⁴ Мое соблюдет, смерти не имать видети во веки. Явно есть, яко аще кто и не соблюдает словес Божиих, не избавится смерти вечныя.

Видели, колико добро есть слушати словес Божиих и заповеди соблюдати. Таковым Господь обеща живот вечный, и воскреснет в последний день, и смерти не имать видети вовеки. И колико зло есть преслушати заповеди Божия, яко гнев Божий пребывает на них, ниже имать преити от смерти на живот, ниже имать воскреснути в последний день, ниже имать наследовати живота вечнаго. Сия вся государь царь презре и не страшится. Аще ли кто возглаголет, яко соблюдает (л. 348 об.)¹⁸²⁵ государь сия вся, и аз к таковым реку. Господу глаголющу: Аще кто любит Мя, слово Мое соблюдет. И паки: Имеяй заповеди Моя и соблюдая их, той есть любяй Мя. Аще заповеди Моя соблюдете, пребудете в любви Моей. Которую ли заповедь? Се есть заповедь Моя: да любите друг друга. И паки: По сему познают вы, яко Мои ученицы есте, аще любите друг друга. И се всем повсюду ведомо, яко государь царь не любит Господа, понеже не хранит заповеди Его, ниже есть ученик Христов, понеже не любит нас.

Господу свидетельствующу: Не любяй Мя, словес Моих не соблюдает. И паки: Ненавидяй Мя и Отца Моего ненавидит. (л. 349)¹⁸²⁶ И ¹⁸²⁷ не любяй брата своего, пребывает в смерть. Всяк ненавидяй брата своего, человекоубийца есть. И ¹⁸²⁸ весте, яко всяк человекоубийца не имать живота вечнаго в себе пребывающа. Аще ли кто речет, яко люблю Бога, а брата своего ненавидит, ложь есть. Ибо не любяй брата своего, его же виде, Бога, Его же не виде, како может любити? И сия заповедь имамы от Него, да любяй Бога, любит и брата своего. Благотворяй ¹⁸²⁹, от Бога есть, а злое творяй, не веде Бога.

Что же есть благотворение государево? Се ли есть, еже восхити на ся чин священства? Ино бо есть священства чин и ино царьства, якоже выше писахом много. Но и ныне еще при(л. 349 об.)глаголем ¹⁸³⁰, яко священство более есть царьства. Священство от Бога есть, от священства же царьства помазание.

Аще ли хощеши навыкнути, послушай. Сниде же Господь на гору Синайскую, на верх горы, и воззва Господь Моисея на верх горы, и взыде Миосей, рече же Бог к нему, глаголя: Иже рцы же, приступаяй к Богу, да ся отстоят, да некогда изменит от них Господь. И по мале. Взыди ты и Аарон с тобою, и ту прият Моисей оправдания и суды. И паки сниде к людем и паки рече Господь к Моисею: Взыди ты на гору и стани ту. И взыде Моисей и бе ту на горе 40 дний и 40 нощий. Сходящю же Моисею с горы Синайския, и обе досце в руку беста (л. 350)¹⁸³¹ Моисеину. Сходящю же ему з горы, Моисей же не ведяше, яко прославися обличие плоти лица его, егда глаголаше с ним. И зре Аарон и вси сынове Израилевы Моисея, бяше бо прославлено обличие плоти лица его. И се есть освящение Моисеова священства.

Та же Моисей по заповеди Господней освяти и сыны его. Ты ¹⁸³² же приведи к себе Аарона, брата твоего и сыны его от сынов Израилевых зрети Мне, Аарона и Надапа, и Авиуда, и Елиазара, и Фамара сыны Аароня. И да сотвориши ризы святы Аарону, брату твоему, на честь и славу. Аарона же и оба сына его, приведеши я пред двери храму свидения и измыеши я водою. И взем ризы (л. 350 об.)¹⁸³³ святыя и облечеши Аарона, брата твоего, до земли ризою, и ризу утрьнюю, и слово совокупиши ему, слово ко утрьней ризе. И возложиши на главу его клобук и возложиши доску освящения на увясло. И да возмеши от елеа помазанаго и да возлиеши на главу его и мажеши и. И сыны его приведоша и облечеши я в ризы, и опояшеши я пояса, и возложиши има клобука. И да будет има жрети мне во веки. И да возмеши от крове, яже на олтари и от елеа помазанаго, и да воскропиши на Аарона и на ризу его и на сыны его, и на ризы сынов его с ним. И освятится сам и ризы его, и сыны его, и ризы сынов его. (л. 351)¹⁸³⁴

Се есть начало священства Ветхаго Завета, ни от человек, ни человеком, но самем Богом. И потом распростреся священство во вся дни Израиля.

Егда же Ветхому Закону прииде время исполнитися, якоже Господь свидетельствует: Не приидох разорити закона, но исполнити. Якоже и апостол пишет: Егда прииде кончина лету, посла Бог Сына Своего единароднаго, раждаемаго от жены. И прочее. О Нем же есть писано: Се отрок Мой, Его же изволих, возлюбленый Мой, нань же благоволи душа Моя. Положу дух Мой на Нем, и суд языком возвестит. Вы ¹⁸³⁵ весте глагол, бывший по всей Июдеи, начет от Галилеи, по крещении же проповеда Иоанн Иисуса, (л. 351 об.)¹⁸³⁶ иже от Назарета, яко помаза Его Бог Духом Святым и силою, иже прииде, благодетельствуя и исцеляя вся насилованыя от диавола, яко Бог бяше с Ним.

Се священства Христова показание есть. И паки: И прииде, рече, в Назарет, идеже бе воспитан, и вниде по обычаю своему в день субботный в сонмище, и воста чести, и даша Ему книгу Исаии пророка. И разгнув книгу, обрете место, идеже бе написано: Дух Господень на Мне, его же ради помаза Мя, благовестите нищим, посла Мя. И прочее. И согнув книгу, отдав слузе, седе. И всем в сонмищи очи бяху зряще нань. И начат глаголати к ним яко: Днесь збысться во ушию вашею. И вси (л. 352)¹⁸³⁷ свидетельствоваху Ему и дивляхуся о словесех благодати, исходящих из уст Его. Се же явно есть, еже рече Господь: Дух Господень на Мне, Его же ради помаза Мя, священства совершение и еже седети и глаголати со архиереи. Аще не бы священник Христос был, не бы места имел архиерейскаго и председания и слова учение. Аще и не суть от колена Левиина, но зависть бесовския и тогда не умолча о худородстве Христове. Глаголаху бо: Не се ли есть сын Иосифов, Ему же мы знаем отца и матерь? Якоже и днесь глаголют о нас, смиренных: А кто Он есть? Мы знаем, каков Он был, и мы Его и избрали.

Пишет же ся и во истории евреина (л. 352 об.)¹⁸³⁸ некоего, яко обычай бе июдеом в церкви число имети по 22 священников. И тако свиток учинен, лежаше в церкви, да егда от них един умрет, тогда вместо избираху инаго. И по освящении написоваху имя Его в книгу, и отца и матерь Его. И егда вниде Христос по обычаю в день субботний, якоже выше писано есть, и в то время един от 22 священник умре. И овии глаголаху сего, овии глаголаху инаго. И един архиерей рече, яко не имать ин быти, развее Иисуса, сына Иосифова, аще и не суть от колена Левиина, но от Июды. И тако рукоположиша и даша Ему книгу Исаии пророка, якоже есть выше писано. И посадиша Его на архиерейстем (л. 353)¹⁸³⁹ месте, о Нем же апостол пишет. Аще убо совершено левитском священством бы было, людие бо на Нем взаконени быша. Почто еще требе по чину Мелхиседекову иному востати священнику, а не по чину Ааронову глаголатися? Прелагаему убо священству по нужди и закону пременение бывает. О Нем же глаголются сия: Колену иному причаститися. От него же никто же причастися ко олтарю, яве бо, яко от колена Июдова возсия Господь наш. О нем же, колене, Моисей о священстве ничесо же глагола, и лишшее еще яве, яко по подобию Мелхиседекову востанет священник ин, иже не по закону заповеди плотския, но по силе живота неразрушенаго. Свидетель(л. 353 об.)ствует ¹⁸⁴⁰ бо яко: Ты еси священник по чину Мелхиседекову. И по мале. Закон бо человеческий поставляет архиереи, имущая немощь, слово же клятвеное, еже по законе, Сына вовеки совершенна. И аще не был архиерей Господь наш Иисус Христос, не бы из церкви, взем бич, изгна продающыя и купующыя во церкви, глаголя: Храм Мой храм молитвы. Вы же сотвористе его вертеп разбойником. Яко и ныне святая великая Церковь бысть вертеп разбойнич. И аще кто Христову ревность восприемше, изгонит, аки бочем, законом заповеди, и ныне безгрешно есть. И о Христове архиерействе до зде.

Таже Христос рукоположи святыя Свои ученики и апостолы, (л. 354)¹⁸⁴¹ глаголя: Приимите, рече, Дух Святый, им же отпустите грехи, отпустятся им, и им же держите, держатся. И се яве Господь рукоположил святых апостол. Приятие Святаго Духа не ино что знаменует, точию Божественыя благодати и власти преподаяние, сего ради и рече. Шедше, убо научите вся языки, крестяще их во имя Отца и Сына и Святаго Духа, учаще их блюсти вся, елика заповедах вам. И иже веру имет креститися, спасен будет, а иже не имет веры, осужден будет. Се есть священническия власти деяние. Та же рече: Знамение же веровавшим сия последуют, именем Моим бесы ижденут, языки возглаголют новы. И прочее. И паки: Приимите, (л. 354 об.)¹⁸⁴² рече, силу, нашедшу Святому Духу на вы. И паки: Бысть, рече, внезапу с небесе шум, яко носиму дыханию бурну, и исполнь весь дом, идеже бяху седяще. И явишася им разделени языцы яко огнени, седе на единем коегождо их, и исполнишася Духа Свята. И по сошествии Святаго Духа на апостолы, разделиша верховнии апостолы страны и метнуша жребий, якоже пишет: и кийждо идоша во свою страну. И по словеси Божию учаще и проповедающе всюду, Господу поспешствующу. И по избрании коегождо в своей части рукоположиша седмьдесят апостол, якоже Писание свидетельствует Никифора Калиста в книзе второй (л. 355)¹⁸⁴³ во главе 35, яко Петр апостол Марка евангелиста рукоположи во Александрии. Таже Андрей апостол постави Стахию апостола, его же Павел апостол воспоминает во епистолии к Римляном, первый Византии епископом. Сам же верховный апостол в проповеди трудися, еже пишется в книгах, яко проходя некогда, и Киевское место минуя, благослови и водрузи божественный крест Христов. Таже и Великий Новград благослови. И тако святыми апостолы по местом и градом рукоположишася епископи.

По преставлении же святых апостол распространися евангелская проповедь и вера Христова всюду во Вселенную по Писанию: Во всю землю изыде вещание их и в концы Вселенныя глаголы их. (л. 355 об.)¹⁸⁴⁴

И тако благодатию Святаго Духа устроишася первопрестолства архиерейския пятеры: Римское, Константинополское, Александрийское, Антиохийское и Иерусалимское. Яко человеком телеси единогласие имети и едину веру содержати под единым Наставником спасения нашего и главою Иисус Христом. И убо от исперва верховнейший бе папа Римский, и егда папа умре, и тогда советом и избранием четырех Вселенских патриарх поставляшеся ин вместо умершаго на апостолский престол. Такожде, егда которому от четырех патриарх преставашуся, абие советом папы Римскаго и триех патриарх избранием четвертый патриарх по(л. 356)ставляшеся ¹⁸⁴⁵. Егда же Римский папа в ересь впаде, и тогда папа от четырех Вселенских патриарх от обычнаго поминания извержеся, и по нем первенство имея Константинополский и Вселенский патриарх.

Егда благоволи Бог по пророчеству и благословению верховнаго Андрея апостола свету возсияти в Русох евангелския проповеди, в лето от воплощения слова Божия 886-е при блаженнейшем Фотии патриарсе Царяграда, при царе гречестем Василии Македонине по прошению великаго князя Владимира Киевскаго и всеа Русии присла патриарх Михаила митрополита, мужа свята, к Киеву граду и той просвети святым крещением и на(л. 356 об.)учи ¹⁸⁴⁶ русов вере Христове. И по преставлении Михаила митрополита един по единому поставляхуся на Рускую митрополию в Цареграде от Вселенскаго Константинополскаго патриарха. И потом грех ради Греческому царьству, гордости ради падшу, по писаному: Всяк возносяйся, смирится, и попущением Божиим туркам власть приемшим. И невозможно стало за тесноту пути во царьград на Рускую митрополию ко Вселенскому патриарху отходити поставления ради. И по прошению Руския митрополии митрополита и всех архиерей Вселенстии четыре патриархи единою посланием согласившемся, даша благословение и власть (л. 357)¹⁸⁴⁷ по правилом святых апостол и святых отец избиратися и поставлятися на Рускую митрополию своими епископы, якоже и сами тии Вселенстии патриарси чин и устав во своих епархиях прияли, от своих епископ избрание и поставление приемлют. И тако и грамотами утвердиша. И бысть до лета 7097-го году.

По Божественому же смотрению в лето 7097-го прииде во царьствующий град Москву Иеремия, архиепископ Царяграда и Вселенский патриарх, и с ним Моновасийской митрополит Иерофей и Еласонской архиепископ Арсений во царьство благочестиваго царя и великаго князя Феодора Ивановича всеа Русии. Их же благочестивый царь и архиерей в царьствующий град прияша с радостию (л. 357 об.)¹⁸⁴⁸ и с достойною честию. И разсмотрив, Вселенский патриарх, яко царьство христианское несть инуде пространнее развее царьствующаго града Москвы, приложи царю и митрополиту слово, яко да устроится в царьствующем граде Москве Патриаршеский престол во святей велицей Церкви на лучшее христианское благохваление. И бысть царю и архиерею в любовь и всему освященному собору. И по малех днех совершается слово се делом и бывает по избранию Вселенскаго патриарха Иеремия Константинополскаго и иже с ним и всех руских архиерей области и советом благочестиваго царя, бывает царьствующаго града Москвы (л. 358)¹⁸⁴⁹ и всеа Русии Иов митрополит наречен и освящен благодатию Святаго Духа святейший патриарх царьствующаго града Москвы и всеа Русии в лето 7097-е индикта 2-го. Якоже имать деяние о сем болшее свидетельство в книзе правил святых апостол и святых отец московския печати, нареченой Кормчей.

И по отшествии святейшаго Иеремия Константинополскаго патриарха, еже и достигшю ему на свой стол в Царьград, совет сотвори по умолению и прошению благочестиваго царя и великаго князя Феодора Ивановича Московскаго и всеа Русии со всеми патриархи Вселенскими и митрополиты и архиепископы и епископы прислали ставленую грамоту, то есть (л. 358 об.)¹⁸⁵⁰ хрисовул патриаршеский, имже, хрисовулом, повеле и извести, да той же архиепископ Московский господин Иов будет пятый патриарх, и имать патриаршеское достоинство и честь и сочетается и мерится с прочими патриархи на вся веки. Но и по смерти хотящим поставленым быти у Московскаго собора первым архиереом патриархом именоватися повелеваем по правилу и образу бывшему, наченшемуся от патриарха сего Московскаго господина Иова во Святем Дусе возлюбленаго брата и сослужебника нашего смирения. На сем бо и настоящий соборный свиток бысть во всегдашнее (л. 359)¹⁸⁵¹ утвержение. В лето 7098-е маия во 8 день. Подписаша же ся три патриархи Вселенския Константинополский, Александрийский и Иерусалимский, с ними же инех святителей 79.

Такожде и в лето 7127-м по благочестивом государе царе и великом князе Михаиле Феодоровиче всеа Русии блаженныя памяти святейший Феофан патриарх святаго града Иерусалима и всеа Палестины с преосвященными митрополиты и архиепископы и епископы о Святем Дусе избраша блаженныя памяти Филарета патриарха, но не без свидетельства, но обретше в газофилакии оную же грамоту Иеремия патриарха с прочими патриархи Вселенскими. И тако рукополо(л. 359 об.)жиша ¹⁸⁵² святейшаго Филарета патриарха по благодати Святаго Духа, а не по царьскому избранию, якоже свидетельствуют оныя святыя грамоты. Аще ли бы по царьскому избранию избраны, то не бы утаилось в грамотах святейшаго Иеремия патриарха Константинополскаго и с прочими Вселенскими патриархи и Феофана патриарха Иерусалимскаго. Но и завет свой заповедал благочестивому царю государю и великому князю Михаилу Феодоровичю всеа Русии самодержцу: И по благодати, данней нам от Святаго Духа, завещаем сему, яко да хранит и соблюдает ко оному новопоставленому во святейших Филарету Никитичю, Божиею (л. 360)¹⁸⁵³ милостию патриарху Московскому и всеа Русии, любовь, милость, щедроты благое подаяние, наипаче же святительства ради в духовных вещех повиновение, в телесных же послушание и покорение, и всегда имети главу и пастыря и отца чадолюбива, и о спасении того промышляюща и пекущася, якоже лепо по превосходящему святительству. И тако возмогоша в таковых спешнейша того сотворити, еже о нем ходатайствовати и о святем его царьствии молящася к Богу, милостива того обрести, понеже и ваше царьское благородие человек еси и тоюжде плотию обложен, якоже и вси.

Таже по сем и всем велможам наказа повиноватися, (л. 360 об.)¹⁸⁵⁴ якоже и Христос и святый апостол Павел глаголя: Вас убо, о благороднии велможи и честнии в сигклите пребывающии, соблюдащии царево здравие и пребывающии в воинстве и управляющии царьския потребы и все, яже о Христе, многонародное христолюбивое множество, воспоминаем и завещаем, со всяцем покорением священному сему мужу, ныне же благодатию Божиею вашему отцу и учителю и вождю вашего спасения, предложити тому душа ваша со всяцем смирением и послушанием, и ничесо же о таковом безместно что помышляти, но якоже самому Владыце Христу служаще повиноватися по Божественому Того речению: Слушаяй, рече, вас, (л. 361)¹⁸⁵⁵ Мене слушает, и отметаяйся вас ¹⁸⁵⁶, Мене отметается, отметаяй же ся Мене, отметается пославшаго Мя. И паки: Иже чтит иерея, чтит вышняго Бога, понеже иерейская честь на Бога восходит. Да аще убо тако к простым иереом завещание и повиновение подобает соблюдати, колми паче ко превозходящим честию, наипаче же сему ныне святопомазаному превысокому патриарху, отцем отцу и крайнему святителю. Его же сан святительства не точию зде, но и в самом небеси мощен есть по Божественому Спасову речению: Иже бо аще свяжете, рече, на земли, связан будет на небеси, а иже разрешите на земли, на небеси разрешено будет. (л. 361 об.)¹⁸⁵⁷ И да никто же, речет, яко ко апостолом единем сия речена суть, но и ко всем, хотящим быти преемником сих, иже убо от апостол и доныне хранимо и соблюдаемо ненаветно в православных, ему же милостивый Христос буди и соблюдатися и хранитися и до втораго и страшнаго пришествия, паче же и молю соблюдатися сему непременно и до скончания века. Самому же превысочайшему патриарху поставляти сущих под ними Росийския области митрополитов и архиепископов и епископов и прочих освященных муж, якоже Церковь прият по апостолскому преданию и святых отец правилом. К болшему же (л. 362)¹⁸⁵⁸ утвержению ныне нами новопоставленаго патриарха Филарета Никитича и прочих, хотящих по нем быти, аз, смиренный Феофан, Божиею милостию патриарх святаго града Иерусалима и всея Палестины, и митрополиты и архиепископы и епископы и честнии архимандриты и игумены посудихом сие наше писание написати на хартии и подписати рукама нашима и печатми затвердити, яко да будет к поставлению патриаршества свидетельствовано и утвержено во веки и никим же пременяемо. Аминь. Писана в царьствующем граде Москве лета от создания мира 7127-го месяца июния.

Видели, совопросниче (л. 362 об.)¹⁸⁵⁹ неправедный, како священство начася, не от человек, ни человеком, но от самаго Бога, и древнее и нынешнее, а не от царей, якоже ты глаголеши, но паче от священства царьство произыде. И ныне есть, якоже устав царьскаго поставления свидетельствует, священство всюду пречестнейши есть царьства, якожде выше назнаменах от Божественаго писания и ныне паки речем.

Царьство, аще и от Бога дадеся в мир, но во гневе Божии, и се чрез священство помазуется чювственым елеом, священства же помазание Святым Духом непосредственне, якоже Господь наш Иисус Христос помазан на архиерейство, яко выше сего писано есть такожде и святии апостоли. Сего ради (л. 363)¹⁸⁶⁰ на помазании архиерейства архиереи, приемше святое Евангелие, распростерше свыше держат над главою поставляющагося архиерея.

Владыко, Господи Боже наш, законоположивый нам всехвалным си апостолом Павлом степенем и чином устав, еже работати и служити честным и пречестным Ти таинам во святем жертвенице, первое апостолы, второе пророки, третие учители, сам Владыко всем и сего нареченаго сподобашагося подоити Евангелскому игу и святительскому достоинству рукою моею, грешнаго и с сущими служители, с митрополиты и со архиепископы и епископы, и осиянием и силою и благодатию Святаго Твоего Духа. И паки вся молитва. (л. 363 об.)¹⁸⁶¹ Господи Боже наш, заеже немощи человеческому естеству Божества существо понести, сего ради Твоим смирением подобострастным нам учителя уставив Твой предержащий престол и яко подобники Твоя на величествии престоле Твоем седяща, воеже приносити Тебе жертву и приношение о всех людех Твоих. Ты, Господи, и сего явленаго строителя святительския благодати сотвори быти подобника Тебе, истинному Пастырю, положшаго душю Свою о овцах Твоих, наставника слепым, света сущим во тме, наказателя безумным, светилника в мире, яко да устроит душа ввереныя ему в насто(л. 364)ящем ¹⁸⁶² сем житии и предстанет судищу Твоему непосрамлен и великую мзду приимет, юже уготовал еси пострадавшим о благовестии Евангелия Твоего.

Слышели, безумне, коликая дарования архиереи имут от благодати Святаго Духа, яже священное слово показа, яко архиереи подобники Божия. Почто Божиих подобников порицаеши и на величии престола Божия седящих уничижаеши, и пастыря словесным овцам отбегаеши, наставника слепым отреваешися, света сущим во тме зрением не услаждаешися, наказателя безумным отметаешися? Яже ти Господь заповеда: Слушаяй вас, Мене (л. 364 об.)¹⁸⁶³ слушает и отметаяйся вас, Мене отметается. Светилника суща в мире лишаешися, могущаго ему души ввереныя в настоящем сем житии представити судищу Христову не посрамлены и великия мзды достойных показати. Аки немощна уничижаеши, яже Божественый апостол свидетелствует, глаголя: Братие, повинуйтеся наставником вашим и покаряйтеся, яко тии бдят о душах ваших, аки слово воздати хотяще. Сия бо власть толико гражданския лучши есть, елико земли небо, паче же и много вящше. Наше бо, рече, житие на небесех есть, и живот наш тамо сокровен со Христом в Бозе, и почести тамо (л. 365)¹⁸⁶⁴ и течение о сущих тамо венцех, ниже бо разоряется по скончании сей живот, но тогда сияет болше. Сего ради не точию князей и местных, но и самых, иже диадимою обложеных болшую прияша честь, ти у сущих сию власть, аки в болших и над болшими предворяюще человеки. И сия тако, совопросниче, а не инако свидетельствует истиною и Божественым писанием, а не якоже ответотворец ваш лестный лстит, к нему же ныне паки приидохом. О них же и вас божественный апостол издалека предзрев пишет, глаголя: дух же явственне глаголет, яко в последняя времена отступят нецыи от веры, внемлюще духовом лестчим (л. 365 об.)¹⁸⁶⁵ и учением бесовским в лицемерии лжесловник сожженых своею совестию. И паки, суть бо мнози непокориви суесловцы и умом прелщени, их же подобает крепце обличати и уста их заграждати, иже вся домы развращают, учаще, яже не подобает, сквернаго ради прибытка. О коемждо ли апостол глаголет: Дух явствен глаголет и прочее, о вас. Кому же ли внемлюще духовом лестчим и учением бесовским в лицемерии лжесловеснем сожженых своею совестию, Газскому митрополиту умом прелщеному, иже учит, яже не подобает сквернаго ради прибытка своего трапез пространных и ризнаго украшения, (л. 366)¹⁸⁶⁶ еже имать наг быти в день брака и не имеяй брачныя одежды, якоже самыя ево лестныя и бесовския ответы имут обличити. Глаголеши, ответотворче, на воле то есть цареве почитати которых хощет, а наипаче егда ради достоинства и чести церковной делают. Где, ответотворче, писано есть о сих, еже царю почитати которых хощет? Лепо есть царю почитати подданых слуг своих, их же хощет, а не о архиереи се речено есть. О архиереи же инако рече Спас: Слушаяй, рече, вас, Мене слушает, и отметаяйся вас, Мене отметается. И паки апостол засвидетельствует, глаголя: Братие, повинуйтеся наставником вашим (л. 366 об.)¹⁸⁶⁷ и покаряйтеся. И паки: Без всякаго прекословия меншее от болшаго благословляется, како же может царь, его же хощет почитати таковых, котории от самаго Бога славою и честию венчали, и честь и слава паче царьства, елико небо земли честнейши есть, якоже свидетельствуют богословцы. Разсмотри, самомниме, чести посредство небеси и земли, кто убо свидетель. Сам Бог глаголет: Небо Мне престол есть, земля же подножие ногама Моима. Такоже и о пространстве небеси разумети есть, якоже капля дождя от великия тучи, то есть земля от небеси мерится, тако и царьство меншится от священства. (л. 367)¹⁸⁶⁸ Царь аще и власть приял от Бога в маловременнем сем царьстве почтити или уничижити кого, но не пребывает ввек, и Бог того разрешити может и время и царьствия пременением разрешает, и на самаго того царя суд Божий настоит. Аще почтил, его же почтил благозаконно, а не по своей любви, и уничижил, его же уничижил по закону заповедей, а не по своей ненависти. Священник же аще кого свяжет на земли, ни сам Бог разрешит того, якоже свидетельствует, будет, рече, связан и на небеси.

Зриши ли, яко небеснаго жительства достойнаго свяжет священник на земли, Бог того на небеси (л. 367 об.)¹⁸⁶⁹ не разрешит. О грешницех связаных инако Господь показа и не просто. Связавше ему, рече, руце и нозе, вверзите во тму кромешную, ту будет плач и скрежет зубом.

Ты же, лицемере, како глаголеши чрез Божия заповеди почитати и не почитати на воле есть цареве. Где есть то писано? Новозаконие бесовское вводиши, а не закона Божия. Господь равночестна Себе архиерея почте, глаголя: Слушаяй, рече, вас, Мене слушает, и отметаяйся вас, Мене отметается, отметаяй же ся Мене, отметается пославшаго Мя. И паки глаголеши: Однако же и тыя, которыя приимают честь от царя, надобно, чтоб (л. 368)¹⁸⁷⁰ бережно и опасно приимали оберегали. Надобно тем, которые честь от царя приемлют, чтоб бережно и опасно приимали, то есть мирским всяким подданым его, а не к нам. К нам же и самому носящему диадиму дары носити по долгу есть и во всем повиновение, якоже Господь заповеда: Слушаяй вас, Мене слушает. И прочее.

А ты, малоумне, Божию благодать хулишь, даную нам Святым Духом и низводиши покорятися царем, якоже и Навуходоносору и образу златому, якоже пишется.

Тогда ¹⁸⁷¹ приступиша мужие халдейстии и наскочиша на июдея, якоже ты ныне, и отвещавше, реша, царю (л. 368 об.)¹⁸⁷² во веки живи. Ты, царю, заповеда заповедь, весь человек, иже аще услышит глас трубы и прочаго мусикийскаго рода, да падет и поклонится телу златому. Аще ли же ни, да ввержен будет в пещь, огнем горящую. Суть бо мужи иудейстии, их же постави над делы земли Вавилонския Седрах, Мисах и Авденаго. Мужи тии не послушаша заповеди твоея, царю, и богом твоим не служат и телу златому, еже постави, не поклоняются. Тогда Навуходоносор с яростию и гневом рече: Привести Седраха, Мисаха и Авденаго. И мужи тии приведени быша пред царя. Отвещав же Навуходоносор и рече (л. 369)¹⁸⁷³ им: Аще воистину Седрах, Мисах и Авденаго богом моим не служисте и телу златому, еже поставих, не поклоняетеся, ныне убо аще есте готови, да яко услышисте глас трубы, пищалий же и гуслий, цевница же и прегудница, и писк и всего рода Мусикийска, падше, поклоняйтеся телу, еже сотворих. И аще не поклонитеся, в той год ввержени будете в пещь огнем горящю. И кто есть Бог, иже измет вы от руку моею. И отвещаша Седрах, Мисах и Авденаго, глаголюще царю Навуходоносору: Не требуем мы о глаголе сем отвещати тебе. Есть бо Бог наш на небесех, Ему же мы служим. Силен изъяти (л. 369 об.)¹⁸⁷⁴ ны от пещи, огнем горящия, и от руку твоею избавити ны, царю. Аще ли ни, вестно дати есть царю, яко богом твоим не служим, и телу златому, его же постави, не поклоняемся.

Тако и мы за милостыню царьскую не будем кланятися, но будем Бога молити. Да которую же ли честь от царя приемлем? Се ли, что малое подание за оставление грех своих, то не дает, паче царь приемлет. Не слышал ли еси свидетелства Божия, яко сторицею приимет и живот вечный наследит, а не даяй, что имать прияти или како живот вечный наследит, аще и царь будет. Елико бо, рече, (л. 370)¹⁸⁷⁵ сотвористе менших Моих братий, Мене сотвористе. Да иже сотворив Богу, почто ныне, лицемери, от нас истязовати чести творите царя? Не слышасте ли слова Божия, глаголюща, яко: Не сотвористе менших Моих братий, ни Мене сотвористе. И что по сих, сам разсмотри. А иже малое что сотворив Бога ради и раскаивается, которух мук достоин есть.

Паки глаголеши, ответотворче: Царь Артаксеркс рек ко Аману, ближнему своему боярину: Что зделаю человеку, котораго хочю учтити? И Аман, знаючи за то, он будет учтен, отвеща: Чтоб тот человек, которой имать быти учтен, надобно (л. 370 об.)¹⁸⁷⁶ чтоб был в добросветлыя ризы и сел бы на лошадь царьскую и пошел бы чрез улицы, возглашая: Так будет человеку, котораго хощет царь учтить.

Добро бы было, аще бы и нашего царя государя отъял Господь сон забвения, якоже и от царя Артаксеркса, якоже пишется: Господь же отъят сон от царя в нощи оной и повеле рабу принести книги памятныя дни и прочитати, в них же написано, обрете. Иже поведа Мардохей царю о дву евнуху царьских, внегда стрегущих им, иже умыслиша убити царя Артаксеркса.

Помянул бы государь наш и нашу к ним, государем, работу и молитвы (л. 371)¹⁸⁷⁷ и слезы, якоже есть ведомо им, государем, во два моры, и превратив свое к нам немилосердие на первую любовь. И иже советующим на мя злое, сотворил бы якоже и Аману, иже приготова Мардохею виселицу в дому своем 50 лакоть, понеже ¹⁸⁷⁸ Мардохей не кланяшеся Аману и зависти ради, что седел Мардохей в дому цареве. Дабы и наш государь сотворил тем, которыя душю его смущают и ненавидети нас творят, и тогда бы и нашего государя царя утишил Господь Бог, якоже царя Артаксеркса от ярости.

Паки глаголеши, совоспросниче: Конечнее так зделал великий Константин святому Силивестру и Иустиниян царь Агапиту, который (л. 371 об.)¹⁸⁷⁹ посвятил Мину, патриарха Цареградскаго, и Иустиниян убо держал лошадь, на которой сидел Агапит, за узду, как и ты, благочестивейший царю Алексей Михайлович, на Вербное воскресение. Однако же не вси знают разсудить, разсуждение бо всех правд мати. Солгал ты на государя нашего и царя, что он, государь, конечно так зделал, как великий Константин святому Силивестру. Посмотри в вышеписаном к совопроснику нашему ответе написаное от заповедей великаго царя Константина к Силивестру и прочим Римским папам. Есть ли малое что подобно, но ничто же. О Иустиниане и Агапите, котором любо (л. 372)¹⁸⁸⁰ не свемы, в наших книгах не обретается. А что государь царь под Крутицким митрополитом лошадь водит, как государь царь изволит, хотя и ино что посадит да поведет, на ево то воли. Но Господь Бог не благоволи, ни заповеда учеником Своим о сем, еже бы рекл, се творите в Мое воспоминание, якоже о хлебе и вине, и ногы умы, глаголя: Якоже Аз сотворих, и вы твористе и болящих исцеляти, прокаженых очищати и беси изгоняти. И прочее.

Верховный же Петр не точию се сотворити не восхоте, якоже Христос на осля вседе, но ни смертию тою восхоте умрети, якоже Христос, но умоли мучителей, да обесится (л. 372 об.)¹⁸⁸¹ на кресте стремглав. Аки глаголеши: Похвалился сатана в дарех, которыми Господь Бог подарил его, не умеючих утребити смирно. Господу глаголющу: Видех сатану, яко молнию с небесе спадша. Аще на рабы своя не веруй, на аггелы своя жестоко. И паки Петр верховный глаголет: Аще бо Бог аггелов согрешивших не пощаде, но пленицами мрака связав, предаст на суд мучимы блюсти. И паки Июда апостол глаголет: Аггелех же и не соблюдших своего началства, но оставлших свое жилище, на суд Великаго дне узами ¹⁸⁸² вечными под мраком соблюде. А яже коея ради вины спаде с небесе, Христос глаголет: И не верует (л. 373)¹⁸⁸³ на ангелы жестоко и предаде на суд мучимы блюсти. Послушай Исаии: како ¹⁸⁸⁴ спаде денница заутра возсиявающи. Сий бо свет создан бысть от Содетеля и за светлость денница именуем. И понеже взятия на Сотворшаго и Бога, противен быти Тому восхотев, на небо, рече, взыду и верху звезд небесных положу престол мой. Взыду на облацех и буду подобен Вышнему. Тма от произволения за таковую гордыню и бысть и глаголется.

Видели, ответотворче, яко аггелов Бог не пощаде, понеже взят ся на Бога сотворшаго и, где сниде. Тако и ныне кто вознеистовися на Бога, не даною благодатию действует, (л. 373 об.)¹⁸⁸⁵ якоже государь царь архиерейским достоинством обладает и повелевает, якоже выше писано есть, ина убо власть царю и ина архиерею, но едина другой преболе, архиерейство, глаголю, царства, якоже небо земли болши и честнейши есть, яко выше в молитвах поставления явлено есть. Архиерей убо подобник Божий и на престоле Божии седит, царь ни в четцы, ни в поддиаконы, ни во диаконы, ни во презвитеры, ни во архиереи не ставлен есть, но на царьство мира сего помазан есть. И еже дарова ему власть Бог чрез архиерейское благословение, послушай. Поставляемому царю преклоншу главу и патриарх возложит на верх главы его руку (л. 374)¹⁸⁸⁶ и глаголет молитву во услышание всем. Зри, человекоугодниче, кто кому привилеи дает. Се не царь на патриаршю главу руце возлагает, но патриарх на царьскую главу. Сего ради всегда, яко долг отдая, благодетелю царь главу свою поклоняет под священническия руки. Таже глаголет архиерей во услышание всем.

Господи Боже наш, Царь царьствующим и Господь господьствующим, иже Самоилом пророком избрав раба своего Давида и помазав того во церкви над людми своими Израиля. Ты и ныне услыши молитву нашу недостойных и виждь от святаго жилища Твоего благовернаго раба Своего царя и великаго князя Алексия Михайловичя всеа Русии, еже благоволил (л. 374 об.)¹⁸⁸⁷ еси воздвигнути царя в языце Твоем святе, его же стяжал еси честною кровию единороднаго Ти Сына, помазати сподобил елеом возрадования. Одей того свыше силою, положи на главе его венец от камене честна, даруй тому долготу дний, дай же в десницы его скифетро царьствия, посади его на престоле правды, огради того всеоружством Святаго Ти Духа, утверди того мышцу, покори ему вся языки варварския, всей в сердцы его страх Твой, и еже к послушным милостивное, соблюди того в непорочней вере, покажи того опасна хранителя святыя Твоея соборныя Церкви велениях, да судит люди (л. 375)¹⁸⁸⁸ Твоя правдою и нищих Твоих судом, спасет сыны убогих и наследник будет Ти небеснаго царьствия.

И паки вторую молитву патриах глаголет: Тебе, единому Царю веком, иже земное царьство Тобою ввереный, поклони выю с нами и молим Ти ся, Владыко всех. Сохрани того под покровом Твоим, удержави того царьство, благоугодная Ти творити всегда того сподоби. Возсияй во днех его правду и множество мира, да в тихости его тихо и безмолвно житие поживем во всяком благочестии и чистоте.

Возглас: Ты бо еси Царь мирови и Спас душам нашим и Тебе славу возсылаем Отцу и Сыну и Святому Духу ныне и присно и вовеки веков. Аминь.

(л. 375 об.)¹⁸⁸⁹ Зри, ответотворче, в молитвах сих где есть речено, якоже во святительских, еже работати и служити, честным и причестным Тайнам во святем жертвенице и предержащих престол яко подобники Твоя и на величествии престоле Твоем седяща, во еже приносити Тебе жертву и приношение о всех людех Твоих; Ты, Господи, и сего явленаго строителя святительския благодати сотвори быти, подобника Тебе, истиному Пастырю, положшаго душу Свою о овцах Твоих.

В царьских же молитвопоставлениях не тако: разсмотри выше в молитвах и ныне. Ты и ныне услыши молитву нашу, недостойных раб Твоих и виждь (л. 376)¹⁸⁹⁰ от святаго жилища Твоего благовернаго раба своего царя и великаго князя Алексия Михайловичя всеа Русии, еже благоволил еси воздвигнути царя в языце Твоем святе, его же стяжал еси честною кровию единороднаго Ти Сына, помазати сподобил елеом возрадования. Одей того свыше силою, положи на главе его венец от камене честна, даруй тому долготу днии, дай же в десницы его скифетро царьствия, посади того на престоле правды. Зри, а не на престоле величествия Твоем седяща. Огради того всеоружством Святаго Ти Духа, утверди того мышцу, покори ему вся языки варварския, всей в сердцы его страх Твой, (л. 376 об.)¹⁸⁹¹ а не жертвы и приношения и святительства и благодати, ниже подобника Божия быти речеся. Но еже к послушным милостивное, его же не бысть. И паки рече: Соблюди того в непорочней вере, и грех ради наших ничто же есть. Покажи того опасна хранителя святыя Твоея соборныя Церкви велениях, и не бысть хранитель, но разрушитель и преобидник. Да судит люди Твоя правдою, и отнюдь всюду неправда умножись. И нищих Твоих судом, и ни есть, ни именуется суд. И спасет сыны убогих, и никако же бысть, но всех сотвори сыны убогих, аще кто и бысть богат.

Таже паки воследованию поставления (л. 377)¹⁸⁹² царьскаго приидем. И по молитве патриарх посылает дву архимандритов да игумена болших по святыя бармы и повелевает им с налоя взяти честно на златом блюде. И как архимандриты и игумен святыя бармы к месту принесут, и патриарх повелевает трем митрополитом или архиепископом у них взяти святыя бармы на златом блюде и принести к себе, и патриарх покланяется святым бармам и потом целует их. И прием своима рукама, и знаменует ими поставляемаго царя и великаго князя, и повелевает ему, прекрестився, их поцеловати. И потом патриарх возлагает (л. 377 об.)¹⁸⁹³ святыя бармы на царя и великаго князя и потом благословит его крестом и глаголет патриарх: Мир всем. Архидиакон же: Главы ваша Господеви преклоните. И патриарх глаголет молитву 2-ю вышеписаную: Тебе, единому Царю веком. И прочее.

И по скончании молитвы патриарх посылает всех архимандритов и игуменов по царьский венец и повелевает взяти им с налоя честно на златом блюде. И архимандриты и игумены принесут царьский венец на златом блюде к месту. И патриарх повелевает епископом у них взяти царьский венец на златом блюде да принести ко архиепископом. И (л. 378)¹⁸⁹⁴ архиепископы со всеми епископы, приимше царьский венец, принесут к патриарху на златом блюде. И патриарх, прекрестив рукою, царьский венец целует и благословит царя и великаго князя крестом, глаголя: Во имя Отца и Сына и Святаго Духа. И возлагает на него той царьский венец. И потом приим его за десную руку и поставляет его на царьском месте, и благословляет его рукою, и отшед, поклонится ему мало. И потом патриарх станет на своем месте, и царь и великий князь против патриарха поклон творит, подняв царьский венец. Таже патриарх посылает по царьский скифетр архимандрита (л. 378 об.)¹⁸⁹⁵ и дву игуменов. И как архимандрит и игумены принесут той царьский скифетр к месту, и митрополиты со архиепископы и епископы у них возмут да принесут патриарху. И патриарх, приим у них той царьский скифетр, да прекрестив его рукою, и вдает его царю и великому князю, глаголет ему сице: О боговенченный царь и великий князь Алексий Михалович всеа Русии самодержец, приими от Бога вданое ти скифетро, правити хоругви великаго царьства Росийскаго, и блюди и храни его, елика ти сила.

Царь же и великий князь покланяется. Таже патриарх благословит боговенчаннаго (л. 379)¹⁸⁹⁶ царя и приим его за десную руку и посадит его на царьском месте.

Виждь, ослеплене умом, кто кого венчает и кто кому божественыя по твоему привилеи дает. И како кто может дающему что дати? Аще государя царя и не аз, Никон, на царьство помазал, но преждебывший отец и брат наш святыя памяти всесвятейший Иосиф, патриарх Московский и всеа Русии, его же мы по Божественей благодати наследницы есмы. Таже по обычных молитвах и по здравии всех людей, послушай поучения и заповеди архиерейской ко царю.

Поучение архирейское ко государю царю и великому князю Алексию Михайловичю (л. 379 об.)¹⁸⁹⁷ всеа Русии самодержцу.

О Святем Дусе господин и возлюбленый сын святыя Церкве и нашего смирения, царь и великий князь Алексий Михайлович всеа Русии самодержец. Се отныне от Бога поставлен еси боговенчанный царь и великий князь правити хоругви и содержати скифетры великаго царьства Росийскаго. И венчан еси царьским венцем по благодати Святаго Духа и по милости Пресвятыя Богородицы и по благословению великаго чюдотворца Петра митрополита Киевскаго и всеа Русии и всея святых молитвами, и по благословению приснопомнимаго святаго отца твоего царя и великаго князя Михаила Феодоровича (л. 380)¹⁸⁹⁸ всеа Русии самодержца, и по данней нам благодати от Святаго и Животворящаго Духа рукоположением нашего смирения с митрополиты и со архиепископы, и с епископы Руския митрополии и со всеми священными соборы во святей велицей церкви Успения Пречистыя Богородицы у чюдотворных гробов великих чюдотворцов Петра и Алексия и иконы митрополитов всеа Русии и прочих святых митрополит Руския митрополии в царьствующем твоем граде Москве.

И ты, господине и сыну, боговенчанный православный царь и великий князь Алексий Михайлович всеа Русии самодержец, имей страх Божий в сердцы и сохрани веру христианскую греческаго закона (л. 380 об.)¹⁸⁹⁹ чисту и непоколеблему, и соблюди царьство свое чисто и непорочно, якоже ныне приял еси от Бога, и люби правду и милость и суд правый и к послушным милостивное. Ко святей же соборней Церкви и ко всем святым церквам имей веру и страх Божий и воздавай честь, понеже в ней, царю, второе положен еси от святыя купели духовным своим порождением, и ко святым честным монастырем велию веру держи по данней ти от Бога царьстей власти. К нашему же смирению и ко всем своим богомолцем о Святем Дусе царьское свое духовное повиновение по Христову евангелскому словеси, ко святым своим учеником и апостолом глаголющу: Слушаяй вас, (л. 381)¹⁹⁰⁰ Мене слушает, а отметаяйся вас, Мене отметается, отметаяй Мене, отметается пославшаго Мя. И сего ради ведяще и се, елико кто честь воздает святителю, и та честь самому Христу восходит, от Него же и мзды приимут сторицею. Братию же свою по плоти, о благочестивый и боголюбивый царю, люби и почитай по царьскому своему союзу, по божественному апостолу: Любяй бо, рече, брата своего, в Бозе пребывает и Бог в нем. Бояр же своих и велмож жалуй и береги по отечеству их, ко всем же князем и княжатам и детем боярским и ко всему христолюбивому воинству буди приступен и милостив и приветен (л. 381 об.)¹⁹⁰¹ по царьскому своему сану и чину.

Всех же православных християн блюди и жалуй и попечение имей о них от всего сердца. За обидимых же стой царьски и мужески, не попускай и не давай обидети не по суду и не по правде. Се бо, о царю, приял еси от Бога скифетро правити хоругви великаго царьства Росийскаго и разсудити и управити люди твоя в правду. Блюди и храни бодрено от дивиих волков губящих е, да не растлят стада Христовых словесных овец, от Бога даннаго ти и врученнаго содержати скифетро, по воли Его святей и по вашему исконному царьскому жребию и отечеству того великаго Росийскаго царьства.

(л. 382)¹⁹⁰² И паки глаголю ти, боголюбивый царь, блюди с Богом и храни, елика твоя царьская власть и сила содержит, покрываем Вышняго десницею и храним благодатию Святаго Духа от всех врагов твоих видимых и невидимых. Глаголет бо Господь пророком: Аз воздвигох тя, царя, с правдою и приях тя за руку и укрепих тя. Сего ради слышете, царие и князи, и разумейте, яко от Бога дана бысть держава вам и сила от Вышняго. И сего ради подобает приемше от Вышняго повеления правление человеческаго рода православным царем, не токмо о своих пещися и свое житие точию правити, но и все обладаемое от треволнения спасати и соблю(л. 382 об.)дати ¹⁹⁰³ стадо Его от волков невредимо, и боятися серпа небеснаго, и не давати воли злотворящим человеком, иже душу с телом погубляющих, якоже бо солнцу на земле не сущу, темно суть все и не разсудно. Сице и наказанием души не сущи, размешено все, едина бо точию добродетель от стяжания безсмертна суть. И паки ти глаголю, о боговенчанный царю, цело имей мудрование православным догматом, почитай излише Матере твою Церковь, яже о Святем Дусе тя воздои, да и сам будешь от Нея, и священника стыдися, яко отца духовнаго, ходатая к Богу, честь бо священническая на Бога восходит, (л. 383)¹⁹⁰⁴ тако, иже на них безчестие, множае паче Бога прогневляет. Языка же льстива и слуха суетна не приемли, царю, ниже оболгателя слушай, ни злым человеком веры емли. Смотряй в себе, о боговенчанный царю, яко всем человеком мудрость честнейши есть и всем тщателнейшим, вси бо ту яко благу похваляют. И любомудру ти быти подобает или мудрым последовати, на них же воистину, яко на престоле, Бог почивает. Не тако красная мира вся, якоже добродетель красит царя, но зри доброту духовную и раздавай саны туне, а не дарех продавай власти, еже бо ценою купивый власть, (л. 383 об.)¹⁹⁰⁵ множае паче обладаемыя купует, яко мздовозданию надеяся, ко мздоприятию без боязни зрит. Аще бо и неприступен еси царю нижняго ради царьства, но удобь приступен буди горняя ради власти, но имаши и сам Царя, иже на Небесех. Аще убо он всеми печется яко Бог, сице потребно есть тебе, царю ничто же презирати. Тщися, о боговенчанный царю, не точию сия царьства исправити нравы благими, но и Небесная наследовати добродетелными благодеянми. И аще хощеши милостива имети себе небеснаго Царя и Бога, милостив буди и ты, царю, ко всем, да и зде добре и благо поживеши (л. 384)¹⁹⁰⁶ и царьствуеши во веки веком добрым царьским слухом зде, а тамо славою со ангелы Божиими прежде Воскресения и страшнаго Суда силою Творца и премудростию искупителя и Духа Святаго благодатию. Возмогай, о благочестивый царю, о Христе и паки возмогай, да и наследник будеши Небеснаго Царьствия со всеми святыми православными цари, да возможеши со дерзновением рещи во Второе пришествие Господа Бога и Спаса нашего Иисуса Христа: Се аз, Господи, и людие Твои, их же ми еси дал великаго Твоего царьства Росийскаго. И тогда, о благочестивый и боговенчанный царю, и сам услыши сладкий он глас небеснаго Царя и Бога: Благий рабе, добрый и верный, (л. 384 об.)¹⁹⁰⁷ Росийский царю и великий князь Алексий Михайлович всеа Русии, мале Ми бысть верен, над многими тя поставлю. Вниди в радость Господа своего и тогда, царю, внидеши во Царьство Небесное со всеми святыми и приимеши неувядаемый славы венец по божественному апостолу: Их же око не виде и ухо не слыша, и на сердце человеку не взыде, яже уготова Бог любящим Его. И тогда, боговенчанный царю, против своих царьских подвиг и трудов приимеши от Бога мзду сторицею и начнеши царьствовати со Христом в Небеснем Царьствии, со ангелы и всеми святыми славити Бога, в Троицы певаемаго, и веселитися с ними в без(л. 385)конечныя ¹⁹⁰⁸ веки. Буди же с тобою, боговенчанным и православным царем, и нам получити Царьство Небесное, благодатию и человеколюбием Господа нашего Иисуса Христа, с Ним же Отцу купно и Святому Духу честь и поклонение ныне и присно и в веки веком. Аминь.

И потом патриарх благословляет царя крестом и паки глаголет ему: Боговенчанный царю и великий князь Алексий Михайлович всеа Русии самодержец, буди на тебе милость Божия и Пречистыя Богородицы и сила Честнаго и Животворящаго Креста, и великих чюдотворцов, и всех святых молитва и благословение, да и нашего смирения молитва и благословение, (л. 385 об.)¹⁹⁰⁹ всего священнаго собора Руския митрополии отныне и до века и во многия годы и века, и на твоей богодарованной матере, великой княгине и царице, и на ее богодарованных царьских чадех. И умножит Господь Бог лет живота царьства вашего, и узриши сыны сынов твоих, и устроит Господь царьство твое, и возвысит Господь царьскую десницу надо всеми твоима недруги и враги, и устроит Господь Бог царьство твое мирно и вечно в род и род и навеки. И вси людие рекут: будет и будет многолетно.

Таже бывает литоргия, и на литоргии по пренесении святых Даров возлагает (л. 386)¹⁹¹⁰ патриарх цепь златую аравийскаго злата и святый Крест з Животворящим Древом. И прежде совершения святыя литоргии по причастии Тела и Крове Христовы, помазует патриарх елеом святым царя, яко чин показует. Видел ли еси, ответотворче и человекоугодниче, что откуду начало приемлет? Не от царьства священство, но царьство от священства. Елико святыя молитвы и елико священное деяние и заповедание архиерейское показует, что противу сим наша винность пред царем государем и что суть царьская правда.

В молитвословии глаголется: Опасна хранителя святыя Церкви Твоея, которое хранение разве разорения. Како и древнии уставы гречестии поведают сице: Два меча (л. 386 об.)¹⁹¹¹ владычествовати, иже есть духовный и мирский во представительство людей своих Господь Христос в Церкви утвердил, от них же архиерей духовный, царь же мирский. Помыслил ли кто, еже в оня язвление того проуставлено в сих показуется. Аще которые архиереови не хощут быти послушны от царя, в послушание имут быти принуждени, такожде убо от архиерея, которыя бы царя послушати не восхотели, идеже употребление будет, а сия меча суть владычества и суды двоякия, духовныя и мирския, убо яко мечем мирским казнь имут злодеи. Такожде духовным мечем души грешныя бывают удержани, ту бы кто могл промышляти, аще владычества духовное и мирское теми двема (л. 387)¹⁹¹² мечами содержится, который убо от них выщший и достойнейший. Едини разумевают тако, иже бы царь выщши был, неже архиерей, тыя сумнения своего тако подкрепляют. Первее. Яко господьство ни от кого инаго не походит, токмо от Господа Бога. Второе. Егда бы архиерей имел быти выщши нежели царь, тогда бы и начатки шли от него до архиереа, чего не бывает. Над сими же царь во время дар победы от Церкви емлет, а не архиерей. До сего и то прииде, яко цареви дан есть меч предстательство закона, правды, вдов и сирот, им же и судити всякия вещи может, чесо архиереови не благоизволено. Якоже слышим о святем Петре, ему же Избавитель рек: (л. 387 об.)¹⁹¹³ Вложи меч твой в место его, хотяще всем показати, дабы со властию мира сего не общался и сим помышления своего тощно ограждают. Противу сего суть нецыи тако утверждают, яко архиерей выщши есть, неже царь. И тое убо толкуют сице, яко Господь Бог архиерею великому даде обое владычество и мира сего и духовную судитися в том, яко Господь Иисус Христос святым апостолом рек: Аще кого свяжете на земли, будет связан на небесех. И сие восхоте распространити на вси тыя наместники. И глаголаша же, яко архиереови дана есть власть на Небеси, яже есть достойнейша, нежели мира сего. Се уже известнейше архиерей вышшим имать быти (л. 388)¹⁹¹⁴ над сими же, яко архиерей во время и меча и суда мирских потребует, может то творити, что царь обыкл творити, творит бо законы православныма. Еще же к тому сице, еже царя архиерей поставляет и мощен его и вязати по заповедем Божиим, аще бо священницы, им же царие исповедуют греси своя и наричют их отцем духовным, могут и вязати, колми паче архиерей великий, иже над священником, царевым отцем духовным, власть имея, должне есть царя вязати и решити. Царь убо при помазании на царьство должен есть исповедатися, правду разпространяти, неправду же сокрушати, но отложити сопротивление, со обою страну служащее, буди ведати, како тое (л. 388 об.)¹⁹¹⁵ противное совопрошение разрешити, иже в вещех духовных во славу Божию подлежащих, архиерей есть выщши нежели царь. Тако бо суд духовный содержит, но в тех, яже в заступлении мира сего належат, не мнее до службы Божией прилежат, между же собою противления не имут. Обаче архиерей в суде мирском пристяжание имать для лучшаго исправления и в пристойных вещех. Царь же не к тому в церковных и священных правлениих, якоже выше есть писано, ибо есть ли царь не творит ему пристойнаго в Божественых законех, такожде и архиерею возможно быти противу его запрещати, не яко противу царя, но яко противу изступленаго от закона. Власть же (л. 389)¹⁹¹⁶ и владычество Церкви христианстей вящши процвете во время великаго Константина царя: иже был от святаго Селивестра папы крещен и от болезни уздравлен ¹⁹¹⁷ той, егда знамением Животворящаго Креста, егда виде на небесе, Максентия победил, и иныя мучители отгнал. Царьство же Греческое и Римское умирил, творяще обещаное моление к Богу палату свою, юже Латеранску палату в Риме зовут, даровал Селивестрови и наместником его верховных святых апостол Петра и Павла нарек. Потом и венец со главы своея и багряницу и иное всякое одеяние царьское на него возложил. Над сими же дал ему скипетр царьский и все знаменование и чин престола царьскаго, (л. 389 об.)¹⁹¹⁸ яко разнейшима достоинствы удобрено было воинство его. Такожде и иереи Церкви святей христианстей учтити и украсити повелел, такожде и иныя архиереи по достоинству почтил, над сими же поставил, дабы он, достойнейший пастырь и его наместники венцем, который со главы своея дал, от злата честнейшаго з драгим камением утвореный, венчани были. И сия вся вящшия ради почести святаго Петра над сими всеми ¹⁹¹⁹ христианский царь во знамение великаго покорения ¹⁹²⁰ коня за узду под папою Селивестром приимал. Потом вручил ему Рим и вся Волошскую землю во область даровал. Царьский свой престол пренесл на восток солнца и тамо (л. 390)¹⁹²¹ славное место, его же потом во имя свое Константинополь нарече, сотворил. Аще бы кто рекл, како оттуду между некиими сомнение возрасте, еже та два меча христианскаго царьства между двема особы разделилися, еже есть при архиерействе меч духовный, при царе же меч мира сего уставися. Кто абие от тех обою вышши есть, от нею же разное суть помышление людей. Тако приимем первее разумение ученых в законе духовнем, яже утверждают, яко власть царьская имать быти повинна власти архиерейстей. И тое тако подкрепляют ¹⁹²² и толкуют, власти архиерейстей поручи Господь Бог ключи Царьства Небеснаго и дал ей силу на земли вязати и решати. К сему же (л. 390 об.)¹⁹²³ архиерейская власть духовная, царьская же мира сего дана есть ему, и вещи власти небесныя, сиречь духовныя, изряднейши суть нежели мира сего или временныя.

Сего ради явнейше царь имать быти мнее архиерея и ему в повиновении. Зане и сие глаголю, яко духовенство есть людие избрании и помазани Духом Святым. Аще ли вси христиане архиереом послушни быти повинни, колми паче той, которой послушание архиереом иныя не покоряющаяся мечем приводит, повинен есть послушание имети.

Второе разумение то есть, яко архиерей силу и власть творити, что належат к суду цареву, еже есть правыми законы во обоем, сиречь в законе сира сего и в духовнем судити (л. 391)¹⁹²⁴ и управляти возможет. Еще же царь повинен учинити исповедание ¹⁹²⁵ веры пред архиереом. Он же его исповедание послушав, должен разсудити, аще добре верует и несть клятве достойно. Обаче сие еще вящши могло поведатися на обую сторону, но дабы в должайшую беседу не вдавали, приступим к сему.

Како бы тое себе противное разумение соединити и власть коегождо истинно показати и тако замкнение сопротиворечия будет. Господь Бог всесилный, егда небо и землю сотворил, тогда два светила, солнце и месяц, на нем ходяще, на земле светити повеле, има же нам показа власть архиерейску и царьску. Солнцем показал есть власть архиерейску, месяцем же (л. 391 об.)¹⁹²⁶ показа власть царьскую, ибо солнце вяще светит во дне, яко архиерей душам, меншее же светило в нощи, еже есть телу. Якоже месяц емлет себе свет от солнца и егда далее от него отступует, тем совершеннейши свет имать. Такоже и царь поемлет посвещение помазание и венчание от архиерея, его же абие восприимет, уже имать свое совершенное светило, еже есть и святейшую силу и власть. Таковое есть то разньствие между тыма двема лицема во всем христианстве, яковая есть между солнцем и месяцем, ибо архиерейска власть во дни, еже есть над душами, царьская же по вещех мира сего и сия власть, еже есть меч царьский, имать готов быти на неприятели веры пра(л. 392)вославныя ¹⁹²⁷, того бо архиерейство и все духовенство потребует, еже их обороняти от всякия неправды и от насилования, то мирстии творити повинни, убо и духовных мирстии для душевнаго избавления и мирских духовнии для обороны потребуют. И тако несть в том един другаго вышши, но киийждо имать власть от Бога. Извествовано есть выше, яко духовенство избраный народ есть, по сему и то имати разумети, яко в закон духовных, еже есть крещение, исповедание и прочая таинства церковная, рукополагают главу, еже есть помазуют благодатию Духа Святаго церковников, мирским же ни. Егда убо поставляют царю, тогда его крестообразно на раменех и сие показует (л. 392 об.)¹⁹²⁸ разньство собства мира сего и духовней. А еже архиерей царя венчает и освящает, тогда то творит виною чина своего. Тем же царь показует доброволное послушание архиереови, ибо аще бы от него и поставлен не был. Обаче бы был царем, достоинства царьскаго достает мечем, имене же царьскаго освящением архиерейским, его же архирей сотворити виновен.

Ведати ¹⁹²⁹ подобает, яко не вредит закон царьский ни в чем закону духовному, понеже в вещех духовных воля царьская не имать быти выше закона духовнаго, ниже что пристойнаго в Церкви царь того проуставляти или властельствовати имать. Такожде разумети должно и о архиереох и о правилех духовных, (л. 393)¹⁹³⁰ яже повелевают содержати и престрегати законов царьских, ибо един единаго законы подтверждают, никто же имать правилам церковным и законом царьским и отец святых учению противитися или отвещати что. От сего разумети можеши, яко в коегождо от них уразумети, но и паче что яко душевному избавлению, в вещех духовных належащих, в сих архиерей великий вышши царя. И кийждо человек православный Патриарху ¹⁹³¹ в послушание повинен, понеже он есть отец наш в вере православней, ему же вверена Православная Церковь. Ведати подобает, якобы их власть едина и равна была, и при коемждо его чин и соизволение утвержалася и кийждо от них (л. 393 об.)¹⁹³² виною своею имать сохраняти чин свой, якоже ему о Матери Святыя Православныя Церкви предано. И иже бы аще един от них преступил, повинен есть правилным законом. Царя егда изберут, первее должен веритися, яко правду творити, неправду искореняти силою своею и уверение его тако имать быти сими словесы: Уверяюся Господу Богу Вседержителю и единородному Его Сыну Господу нашему Иисусу Христу и Святому Духу и Пречистей Богородице и Приснодеве ¹⁹³³ Марии в четыре Евангелия, его же в час сей в руку мою имам пред святыми архангелы Михаилом и Гавриилом, яко хощу чисту совесть и верну службу сохраняти Господу моему, светлейшему Господу, Господу Иисусу Христу, (л. 394) ¹⁹³⁴ еже мне в час сей вручено от него чин и достоинство всяких трудов и службы во благих Его, яко бы аще что и тяжестно не отрицатися. Такожде хощу всем мне порученом достоинстве всяких злых наук и неправд хранитися. Еще же исповедаюся, яко есмь человек православныя веры христианин, ей же никогда которым обычаем противитися не буду и инем не попущу, елико силы дал ми есть Бог. Еще же того достоинства никакими дары, ни обещании приимую, хощу же изрядно и пристойно с поддаными Господа моего пребывати и довольствоватися теми доходы, которыя ми суть назнаменаны. Устав же и чины царьства сего умети и сохраняти хощу и того не отступаю (л. 394 об.) ¹⁹³⁵ для любве и милосердия, благоиметельства государьства того мне врученая и ввереная в целости сохранити хощю, подданы от злых людей и неправд заступати, на судех правдивым судиею быти, правды держатися. Сия вся обещаваюся содержати и хранити, инако же не творити. Аще ли что от сих преступлю, да воздастся мне немилосердый суд Господа нашего Иисуса Христа, да буду участником со Июдою и да приидет на мя проказа Иозиина и трепет, яко на Каина, и меч кленущихся во лжю. Сия вся да приидет на мя. Тако древний устав о царех новопоставляющихся поведает пять знаменований, их же имать собственне царь. Патриарх в посвящении, егда венчан будет, первый есть венец, его же ему возлагает (л. 395)¹⁹³⁶ на главу, знаменует же, якобы венец с неким облаком над главою, иже имать четыре лилей или цветы ¹⁹³⁷ во образ того, яко царь кроткий изрядный богобоязливый имать быти, такожде и иныя люди, яже суть от четырех стихий благостройне водити имать. Такожде има быти покорный, милосердый на добрыя, милостивый и не гневливый, яко лилия между цветы есть. На том венце есть крест в ознаменование, то да памятствует, еже есть на царьство венчан над всеми людьми, их же Сын Божий на Кресте искупил.

Второе знаменование есть хоругвь со орлом, иже имать крест на персех, в ознаменование того, иже Крест пред всеми христианы имать носити ко обороне всех и имать быти всегда готова умрети ради Церкви (л. 395 об.)¹⁹³⁸ Православныя, Ея же он есть щитом. Сего ради и Патриарх, еда его елеом помазует на раменех крестообразно, глаголя и моляся Богови: Господи Иисусе Христе, Сыне Бога живаго, освяти раба Твоего сего, дабы нам был непобедимым щитом противу всех врагов видимых и невидимых. Тако якоже нас Ты сам дрожайшею кровию Своею на древе крестнем освятил и от силы вражия избавил.

Третие знамение есть прапорец посреди жолтый, округ червленый, червлено есть показует истинную милость, юже к Господу Богу и к добрым человеком и благим имети повинен. Желтость показует добродетельство, еже в смертнем телеси показовати прочим повинен, (л. 396)¹⁹³⁹ показует же и смерть, ею же злых казнити по закону должен, понеже желтость, яко врачевствии хитрецы разумеют ¹⁹⁴⁰, смерти знак есть.

Четвертое знаменование есть яблоко златое, иже отверзается и паки затворяется, в него же полно земли ¹⁹⁴¹ полагают, в ознаменование смерти царевы в его изрядстве и достоинстве.

Пятое знаменование есть скипетр златый, то есть милость златая, иже имать на конце двояку лилию, то есть два цвета. Ту милость вымыслил царь Асперус. Показует милосердие царьское, ибо архиереом обыкл давати сие, в ознамение тако, яко архиерей имать жезл от царя виною любве, (л. 396 об.)¹⁹⁴² да знаменует присно покорство царя ко архиерею, яко отец сыну послушание отдая.

Таже паки пишешь: Лутчи б и пожиточнее было Никону меншие привилеи, потому что оныя подвышшили его, вспех привели, пресматривался в них Никон, как в зеркале. Не радуется Никон в царьских привилеях, ниже хвалится о них, любит Никон святое Христово Евангелие и не еже страдати хощет, но и умрети о нем готов. Слышал Никон святое Писание: Не надейтеся на князя, на сыны человеческия, в них же несть спасения. Всяка слава человеческа яко трава, изсше трава и цвет ея отпаде, глагол же Господень пребывает вовеки.

(л. 397)¹⁹⁴³ Паки глаголеши: Прилучилося ему то, что пишут вершописцы о Нарцису, которой в речной воде присталной просматривал свое лице, чаючи, что не ево. Преклонился, хотя целовати, и как преклонился сверх потребы, утонул. Нам Божественыя законы о сих лживых и суетных писаниих, еже ты глаголеши, не точию измещати повелевают, но и держащих или чтущих извержению подлагают. Господь явно творит слово о твоем безумствии: Не творит древо зло плода добра. И паки от плодов их познаете их, еже объемлют от терния гроздия и от репия смоквы. И паки: От словес своих оправдишися и от словес своих осудишися. И паки: (л. 397 об.)¹⁹⁴⁴ Им же судом судиши, осудишися. И паки: Коею же мерою мерите, возмерится. И паки: Зрывый яму, впадется в ню. Тако и ты подобну сложил притчю своему безумию, яко паче меры обезумився и не познався, кто еси ты. В таковую глубину зол снизшел в вечное потопление, еже к тому никто может тя изъяти. И аще бы кто и камень обложил о твоей выи, не погрешил бы истины на вечное твое неисхождение, занеже на вся святыя Божия заповеди и святых апостол и святых отец превознесся. Ново нечто и чюжде Православныя Церкве пишешь, глумотворныя кощуны и яко (л. 398) вторый сатана, не восхотев под Божественым повелением и заповедми быти, тем же подобных себе обрет, низводиши во ад, по писанному: Слепец слепца водяй, оба в яму впадета.

(Начало 24-го Возражения)

1 2 3 4 5 6 7 8 9 10 11 12 13 14 15 16 17 18 19 20 21 22 23 ... 25 26 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

¹⁷⁸³На верхнем поле листа киноварная помета: 24-е возражение.

¹⁷⁸⁴На верхнем поле листа киноварная помета: на 24-й вопрос и ответ.

¹⁷⁸⁵ На верхнем поле листа киноварная помета: 24-е возражение.

¹⁷⁸⁶ На верхнем поле листа киноварная помета: на 24-й вопрос и ответ.

¹⁷⁸⁷ На верхнем поле листа киноварная помета: 24-е возражение.

¹⁷⁸⁸ На верхнем поле листа киноварная помета: на 24-й вопрос и ответ.

¹⁷⁸⁹ На верхнем поле листа киноварная помета: 24-е возражение.

¹⁷⁹⁰ На верхнем поле листа киноварная помета: на 24-й вопрос и ответ.

¹⁷⁹¹ На верхнем поле листа киноварная помета: 24-е возражение.

¹⁷⁹² На верхнем поле листа киноварная помета: на 24-й вопрос и ответ.

¹⁷⁹³ На верхнем поле листа киноварная помета: 24-е возражение.

¹⁷⁹⁴ На верхнем поле листа киноварная помета: на 24-й вопрос и ответ.

¹⁷⁹⁵ На верхнем поле листа киноварная помета: 24-е возражение.

¹⁷⁹⁶ На верхнем поле листа киноварная помета: на 24-й вопрос и ответ.

¹⁷⁹⁷ На верхнем поле листа киноварная помета: 24-е возражение.

¹⁷⁹⁸ На верхнем поле листа киноварная помета: на 24-й вопрос и ответ.

¹⁷⁹⁹ На верхнем поле листа киноварная помета: 24-е возражение.

¹⁸⁰⁰ На верхнем поле листа киноварная помета: на 24-й вопрос и ответ.

¹⁸⁰¹ На верхнем поле листа киноварная помета: 24-е возражение.

¹⁸⁰² На верхнем поле листа киноварная помета: на 24-й вопрос и ответ.

¹⁸⁰³ На верхнем поле листа киноварная помета: 24-е возражение.

¹⁸⁰⁴ На верхнем поле листа киноварная помета: на 24-й вопрос и ответ.

¹⁸⁰⁵ На верхнем поле листа киноварная помета: 24-е возражение.

¹⁸⁰⁶ На верхнем поле листа киноварная помета: на 24-й вопрос и ответ.

¹⁸⁰⁷ На верхнем поле листа киноварная помета: 24-е возражение.

¹⁸⁰⁸ На верхнем поле листа киноварная помета: на 24-й вопрос и ответ.

¹⁸⁰⁹ На верхнем поле листа киноварная помета: 24-е возражение.

¹⁸¹⁰ На верхнем поле листа киноварная помета: на 24-й вопрос и ответ.

¹⁸¹¹ На правом поле листа помета: церковная утварь.

¹⁸¹² На верхнем поле листа киноварная помета: 24-е возражение.

¹⁸¹³ На верхнем поле листа киноварная помета: на 24-й вопрос и ответ.

¹⁸¹⁴ На верхнем поле листа киноварная помета: 24-е возражение.

¹⁸¹⁵ На верхнем поле листа киноварная помета: на 24-й вопрос и ответ.

¹⁸¹⁶ На правом поле листа помета: 1 Царств.

¹⁸¹⁷ На верхнем поле листа киноварная помета: 24-е возражение.

¹⁸¹⁸ На верхнем поле листа киноварная помета: на 24-й вопрос и ответ.

¹⁸¹⁹ На верхнем поле листа киноварная помета: 24-е возражение.

¹⁸²⁰ На верхнем поле листа киноварная помета: на 24-й вопрос и ответ.

¹⁸²¹ На правом поле листа помета: Иоан. 31.

¹⁸²² На правом поле листа помета: 11.

¹⁸²³ На верхнем поле листа киноварная помета: 24-е возражение.

¹⁸²⁴ На верхнем поле листа киноварная помета: на 24-й вопрос и ответ.

¹⁸²⁵ На верхнем поле листа киноварная помета: 24-е возражение.

¹⁸²⁶ На верхнем поле листа киноварная помета: на 24-й вопрос и ответ.

¹⁸²⁷ На правом поле листа помета: 1 Иоан. 72.

¹⁸²⁸ На правом поле листа помета: Иоан. 73.

¹⁸²⁹ На правом поле листа помета: 1 Иоан. 76.

¹⁸³⁰ На верхнем поле листа киноварная помета: 24-е возражение.

¹⁸³¹ На верхнем поле листа киноварная помета: на 24-й вопрос и ответ.

¹⁸³² На правом поле листа помета: 2 Моис. 28.

¹⁸³³ На верхнем поле листа киноварная помета: 24-е возражение.

¹⁸³⁴ На верхнем поле листа киноварная помета: на 24-й вопрос и ответ.

¹⁸³⁵ На правом поле листа помета: Деян. 26.

¹⁸³⁶ На верхнем поле листа киноварная помета: 24-е возражение.

¹⁸³⁷ На верхнем поле листа киноварная помета: на 24-й вопрос и ответ.

¹⁸³⁸ На верхнем поле листа киноварная помета: 24-е возражение.

¹⁸³⁹ На верхнем поле листа киноварная помета: на 24-й вопрос и ответ.

¹⁸⁴⁰ На верхнем поле листа киноварная помета: 24-е возражение.

¹⁸⁴¹ На верхнем поле листа киноварная помета: на 24-й вопрос и ответ.

¹⁸⁴² На верхнем поле листа киноварная помета: 24-е возражение.

¹⁸⁴³ На верхнем поле листа киноварная помета: на 24-й вопрос и ответ.

¹⁸⁴⁴ На верхнем поле листа киноварная помета: 24-е возражение.

¹⁸⁴⁵ На верхнем поле листа киноварная помета: на 24-й вопрос и ответ.

¹⁸⁴⁶ На верхнем поле листа киноварная помета: 24-е возражение.

¹⁸⁴⁷ На верхнем поле листа киноварная помета: на 24-й вопрос и ответ.

¹⁸⁴⁸ На верхнем поле листа киноварная помета: 24-е возражение.

¹⁸⁴⁹ На верхнем поле листа киноварная помета: на 24-й вопрос и ответ.

¹⁸⁵⁰ На верхнем поле листа киноварная помета: 24-е возражение.

¹⁸⁵¹ На верхнем поле листа киноварная помета: на 24-й вопрос и ответ.

¹⁸⁵² На верхнем поле листа киноварная помета: 24-е возражение.

¹⁸⁵³ На верхнем поле листа киноварная помета: на 24-й вопрос и ответ.

¹⁸⁵⁴ На верхнем поле листа киноварная помета: 24-е возражение.

¹⁸⁵⁵ На верхнем поле листа киноварная помета: на 24-й вопрос и ответ.

¹⁸⁵⁶ Написано между строк.

¹⁸⁵⁷ На верхнем поле листа киноварная помета: 24-е возражение.

¹⁸⁵⁸ На верхнем поле листа киноварная помета: на 24-й вопрос и ответ.

¹⁸⁵⁹ На верхнем поле листа киноварная помета: 24-е возражение.

¹⁸⁶⁰ На верхнем поле листа киноварная помета: на 24-й вопрос и ответ.

¹⁸⁶¹ На верхнем поле листа киноварная помета: 24-е возражение.

¹⁸⁶² На верхнем поле листа киноварная помета: на 24-й вопрос и ответ.

¹⁸⁶³ На верхнем поле листа киноварная помета: 24-е возражение.

¹⁸⁶⁴ На верхнем поле листа киноварная помета: на 24-й вопрос и ответ.

¹⁸⁶⁵ На верхнем поле листа киноварная помета: 24-е возражение.

¹⁸⁶⁶ На верхнем поле листа киноварная помета: на 24-й вопрос и ответ.

¹⁸⁶⁷ На верхнем поле листа киноварная помета: 24-е возражение.

¹⁸⁶⁸ На верхнем поле листа киноварная помета: на 24-й вопрос и ответ.

¹⁸⁶⁹ На верхнем поле листа киноварная помета: 24-е возражение.

¹⁸⁷⁰ На верхнем поле листа киноварная помета: на 24-й вопрос и ответ.

¹⁸⁷¹ На правом поле листа помета: Даниил 3.

¹⁸⁷² На верхнем поле листа киноварная помета: 24-е возражение.

¹⁸⁷³ На верхнем поле листа киноварная помета: на 24-й вопрос и ответ.

¹⁸⁷⁴ На верхнем поле листа киноварная помета: 24-е возражение.

¹⁸⁷⁵ На верхнем поле листа киноварная помета: на 24-й вопрос и ответ.

¹⁸⁷⁶ На верхнем поле листа киноварная помета: 24-е возражение.

¹⁸⁷⁷ На верхнем поле листа киноварная помета: на 24-й вопрос и ответ.

¹⁸⁷⁸ На правом поле листа помета: Есфирь.

¹⁸⁷⁹ На верхнем поле листа киноварная помета: 24-е возражение.

¹⁸⁸⁰ На верхнем поле листа киноварная помета: на 24-й вопрос и ответ.

¹⁸⁸¹ На верхнем поле листа киноварная помета: 24-е возражение.

¹⁸⁸² Исправлено из: ужами.

¹⁸⁸³ На верхнем поле листа киноварная помета: на 24-й вопрос и ответ.

¹⁸⁸⁴ На правом поле листа помета: Исаия 14; Богослов 2, стих 11.

¹⁸⁸⁵ На верхнем поле листа киноварная помета: 24-е возражение.

¹⁸⁸⁶ На верхнем поле листа киноварная помета: на 24-й вопрос и ответ.

¹⁸⁸⁷ На верхнем поле листа киноварная помета: 24-е возражение.

¹⁸⁸⁸ На верхнем поле листа киноварная помета: на 24-й вопрос и ответ.

¹⁸⁸⁹ На верхнем поле листа киноварная помета: 24-е возражение.

¹⁸⁹⁰ На верхнем поле листа киноварная помета: на 24-й вопрос и ответ.

¹⁸⁹¹ На верхнем поле листа киноварная помета: 24-е возражение.

¹⁸⁹² На верхнем поле листа киноварная помета: на 24-й вопрос и ответ.

¹⁸⁹³ На верхнем поле листа киноварная помета: 24-е возражение.

¹⁸⁹⁴ На верхнем поле листа киноварная помета: на 24-й вопрос и ответ.

¹⁸⁹⁵ На верхнем поле листа киноварная помета: 24-е возражение.

¹⁸⁹⁶ На верхнем поле листа киноварная помета: на 24-й вопрос и ответ.

¹⁸⁹⁷ На верхнем поле листа киноварная помета: 24-е возражение.

¹⁸⁹⁸ На верхнем поле листа киноварная помета: на 24-й вопрос и ответ.

¹⁸⁹⁹ На верхнем поле листа киноварная помета: 24-е возражение.

¹⁹⁰⁰ На верхнем поле листа киноварная помета: на 24-й вопрос и ответ.

¹⁹⁰¹ На верхнем поле листа киноварная помета: 24-е возражение.

¹⁹⁰² На верхнем поле листа киноварная помета: на 24-й вопрос и ответ.

¹⁹⁰³ На верхнем поле листа киноварная помета: 24-е возражение.

¹⁹⁰⁴ На верхнем поле листа киноварная помета: на 24-й вопрос и ответ.

¹⁹⁰⁵ На верхнем поле листа киноварная помета: 24-е возражение.

¹⁹⁰⁶ На верхнем поле листа киноварная помета: на 24-й вопрос и ответ.

¹⁹⁰⁷ На верхнем поле листа киноварная помета: 24-е возражение.

¹⁹⁰⁸ На верхнем поле листа киноварная помета: на 24-й вопрос и ответ.

¹⁹⁰⁹ На верхнем поле листа киноварная помета: 24-е возражение.

¹⁹¹⁰ На верхнем поле листа киноварная помета: на 24-й вопрос и ответ.

¹⁹¹¹ На верхнем поле листа киноварная помета: 24-е возражение.

¹⁹¹² На верхнем поле листа киноварная помета: на 24-й вопрос и ответ.

¹⁹¹³ На верхнем поле листа киноварная помета: 24-е возражение.

¹⁹¹⁴ На верхнем поле листа киноварная помета: на 24-й вопрос и ответ.

¹⁹¹⁵ На верхнем поле листа киноварная помета: 24-е возражение.

¹⁹¹⁶ На верхнем поле листа киноварная помета: на 24-й вопрос и ответ.

¹⁹¹⁷ Исправлено из: свободен.

¹⁹¹⁸ На верхнем поле листа киноварная помета: 24-е возражение.

¹⁹¹⁹ Слова «над сими всеми» написаны вместо слов «по сем вся той».

¹⁹²⁰ Написано вместо зачеркнутого: покорения.

¹⁹²¹ На верхнем поле листа киноварная помета: на 24-й вопрос и ответ.

¹⁹²² Исправлено из: утверждают.

¹⁹²³ На верхнем поле листа киноварная помета: 24-е возражение.

¹⁹²⁴ На верхнем поле листа киноварная помета: на 24-й вопрос и ответ.

¹⁹²⁵ Исправлено из: вызнание.

¹⁹²⁶ На верхнем поле листа киноварная помета: 24-е возражение.

¹⁹²⁷ На верхнем поле листа киноварная помета: на 24-й вопрос и ответ.

¹⁹²⁸ На верхнем поле листа киноварная помета: 24-е возражение.

¹⁹²⁹ На левом поле листа помета: зри.

¹⁹³⁰ На верхнем поле листа киноварная помета: на 24-й вопрос и ответ.

¹⁹³¹ Исправлено из: архиереови.

¹⁹³² На верхнем поле листа киноварная помета: 24-е возражение.

¹⁹³³ Так в ркп.

¹⁹³⁴ На верхнем поле листа киноварная помета: на 24-й вопрос и ответ.

¹⁹³⁵ На верхнем поле листа киноварная помета: 24-е возражение.

¹⁹³⁶ На верхнем поле листа киноварная помета: на 24-й вопрос и ответ.

¹⁹³⁷ Слова «или цветы» написаны на правом поле листа другим почерком.

¹⁹³⁸ На верхнем поле листа киноварная помета: 24-е возражение.

¹⁹³⁹ На верхнем поле листа киноварная помета: на 24-й вопрос и ответ.

¹⁹⁴⁰ Вписана над строкой другим почерком: «ю».

¹⁹⁴¹ Написано тем же почерком над строкой.

¹⁹⁴² На верхнем поле листа киноварная помета: 24-е возражение.

¹⁹⁴³ На верхнем поле листа киноварная помета: на 24-й вопрос и ответ.

¹⁹⁴⁴На верхнем поле листа киноварная помета: 24-е возражение.

Домашняя страница
священника Владимира Кобец