ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (25-2)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы^*

зыде Сусаким царь Египецкой на Иерусалим взяти сокровища святыя церкви, и порази его Господь. Взыде Сенахирим царь Асирийской взяти святая, и поругася святому Сиону, и порази ангел 185 тысящ. Взят Навуходоносор царь Вавилонской сосуды от святыя церкви, от царьства изгнася и со зверьми седмь лет пасяся. Взят Валтасар царь Вавилонской святыя сосуды в свою потребу, в ту нощь смертию умре, и царьство Вавилонское скончася. (л. 425 об.)⁶⁶ Взыде ⁶⁷ Антиох царь на Иерусалим взяти церковное богатство, лютою смертию скончася, сам о себе свидетельствова, яко того ради умре. Взят Ахаз царь казну церковную и отдаде Асирийскому царю, и не бысть во благо, но паче гнев Божий умножи на ся. Сказа Финикийской воевода Асирийскому царю о богатстве церковнем, лютою язвою поражен. Дерзну ⁶⁸ Менелай церковное богатство взяти, жив червми снеден, умре. Филопатор ⁶⁹ царь Антиохийской вниде в церковь, люто поражен, скончася. Господу ⁷⁰ глаголющу: аще убо принесеши дар свой ко олтарю (л. 426)⁷¹ и ту помянеши, яко брат твой имать нечто на тя, остави ту дар твой пред олтарем и шед, прежде смирися з братом своим. И прочее.

Зриши ли, яко аще и во гневе кто принесет дар свой ко олтарю, не повеле Господь возвращати, но оставити пред олтарем, дондеже смирится.

Иосиф ⁷² же, нареченный Варнава от апостол, еже есть сказуемо сын утешения Леввитин, кипрянин родом, имяй село, продав, принесе цену и положи при ногах апостол.

Хощет повесть творити, яже о Анании прочее и Сапфире, и хотяй указати мужа, в зело горших согрешивша (л. 426 об.)⁷³ прежде воспоминает исправлшаго, яко толику множеству сущу, иже сия творящу. Толицей благодати, толицем знамениям и ни от единаго от сих исправи себе, но единою от сребролюбия ослеплен быв, погибель ону привлече на свою ему главу. Имея село, сице рек, являя, яко сие токмо стяжав, продав, рече, принесе цену и положи при ногах апостол.

Муж ⁷⁴ же некий, именем Анания, с Сапфирою, женою своею, продав имение и утаив от цены, сведущей иже не его, и принесе часть некую, при ногах апостол положи. Тяжко сие, яко по сложению грех сей (л. 427)⁷⁵ бысть, и никто же другий, ведяше бывшее, откуду прииде злострастному сему и окаянному соделати. Глаголаше же, рече Петр: Анание ⁷⁶, почто исполни сатана сердце твое солгати ти Духови Святому и утаити от цены села. Зри и сие ныне велие знамение бывшее и много болшее онаго прежняго. Не сущее ли рече, твое бе и проданое в твоей власти бяше, сиречь, еда бо нужда некая бе и насилие, еда бо не волею вас привлекаем, что яко положи в сердцы твоем вещь сию, не солга человеком, но Богом. Слышав же Анания словеса сия, пав издше.

Видиши ли, откуду болшее есть знамение сие, от знамения (л. 427 об.)⁷⁷ хромаго, от еже убити, от еже яже в мысли, и яже в тай бывшая ведати. Бысть же, рече, страх велий на всех слышащих сия, вставше же юноши и спрятаху и изнесше, погребоша. Бысть же, яко часом трием минувшим, и жена его, не ведущи бывшаго, вниде. Отвещав же ей Петр: рцы ми, аще на толице село отдаста. Сию хотяше спасти, оный бе бо вождь ⁷⁸, и сего ради негли ей дает нарок время ответа и власть покаяния, глаголя: Рцы ми, аще на толице село отдаста. Она ⁷⁹ же рече: Ей, на толице. Петр же рече к ней, что яко согласистася искусити Дух Святый, се ноги погребших мужа твоего при дверех и изнесут тя. (л. 428)⁸⁰ Паде ⁸¹ же абие пред ногами его и издше. Вшедше же юноша, обретоша ю мертву и изнесше, погребоша близ мужа ея. И бысть страх велий на всей церкви и на всех слышащих сия, повнегда быти страху сему, множайшая знамения творяху. Но да видим слышше реченая: Продаяху ⁸², рече, и приношаху цены и полагаху пред ногама апостол. Зри ми, возлюбленне, како не апостолом попущаху продаяти, но сами продаваху и ценя онем отдаяху. Но не тако Анания, но участие некое отъемлет себе ⁸³, его же продаде села. Темже и томление подъемлет, яко вещь сию не добре положь в себе и изобличен, быв своя ему крадый.

Сие и нынешних иерей (л. 428 об.)84 касается ⁸⁵ слово и зело державне. Елма же ведяше о бывшем, иже на его, сего ради и сию истязует, но негли рекл бы кто, яко зело сию горце сию казняше. Что глаголеши, рцы ми, кая горесть? Аще ⁸⁶ дрова кто собрав, камением побиен бысть, много паче священнотатец. И сия бо уженныя уже пенязе бяху. Тем ⁸⁷ же изволивый убо своя продати и раздати, таже взем от сих, священнотатец был бы. И аже иже от своих вземый священнотатец есть много паче, иже от чюждих. Да не убо елма ныне не бывает сие, и не абие воследует мучение, вознепщуему без томления сим бывати.

Видиши ли, яко о сем порицаем бывает, (л. 429)⁸⁸ яко сотворивый та священныя быти, пенязе тогда взят. Еда бо не возмогл еси, рече, и повнегда продати сия аки своими потребу ⁸⁹ действовати. Еда бо возбранен был еси, почто повнегда обещати вземлеши? Зри, како абие изначала ловитву сотворил ⁹⁰ есть диавол между знаменми бывшими и чюдеся толикими, паче же како и сей от него ослеплен бысть. Таково нечто и в Ветсем бысть, егда Ахар ⁹¹ оный возложение украдят бысть, но обаче уведал еси и тамо, с еликим отмщением исправися вещь та. Священнотатство бо возлюбленне зело люто есть и со укоризною, многаго исполнено есть пренебрежения. Ниже продати (л. 429 об.)⁹² понудихом, рече, ниже продавша, отдавати пенязе. Ты изволил еси от своего произволения. Почто убо украл еси от священных пенязей? Почто исполни, рече, сатана сердце твое? И аще сатана сие сотворил есть, почто той порицаем бывает, повинен бысть приемый то действо и исполнивый е. Но подобаше исправити, рече, но не исправил бы ся. Иже бо таковая зря и некое же приобретение прием, много паче есте инако ⁹³ приобрел. Темже не подобаше просте преминути бывшее, но яко согнитию некоему отрезатись, да не и прочему на вред будет телу. Ныне бо и той ползовася не произшед, на далечайшую ⁹⁴ злобу и прочии тщаливейший (л. 430)⁹⁵ бывше, тогда же противное случилося бы.

Сего ради прежде обличает и показаует, яко не утаися его бывшее и тогда осуждает. Почто бо, рече, и от котораго произволения сие сотворил еси? Хотел ли еси имети? Подобаше ти имети изначала и не обещевати. Ныне же взем повне освятити сия, болшее священнотатство соделал еси. Похищаяй бо чюждая негли нужных вожделев, похищает. Тебе же леть бяше держати твоя. Почто убо сотворил еси сия быти священная и тогда взял есть? От многаго пренебрежения сие сотворил еси, не имать бывшее прощения. Безответно ⁹⁶ бо есть, но никто же да соблажняется, аще (л. 430 об.)⁹⁷ нецыи и ныне суть священнотатие.

Аще бо тогда беша, много паче ныне, егда многая злая. Но ⁹⁸ да обличаем их пред всеми, да и прочии страх имут. Июда священнотатец бе, но не соблазни сие прочих ученик.

Видиши ли, колика злая вожделение пенязей творит. И бысть, рече, страх велий на всех слышащих ся. Оный томление подъят, а инии приобретение имяху. Тем же не просте сия устроевашеся, и убо и знамениям инем первие бывшим, обаче не бе страх толико. Тако истинно есть оное, яко знаем ⁹⁹ есть Господь судьбы творяй: в делех руку своею увязе грешник. Сице и при кивоте бысть томление подъят. И бысть (л. 431)¹⁰⁰ страх и другим, но тамо убо убоявся царь, отрину кивот, зде же сии паче внимателнейши бывают.

Видел ли еси, како не возда ю Петр, но ожидаше дондеже вниде, ниже от инех кто смеяще изрещи бывшее. Сие страх учителев, сие честь ученическа, сие послушание. Трием часом минувшим, и не уведе жена, ниже изрече кто от ту бывших, аще и доволно бе от растояния времене промчену сему бывшу. Но бояхуся сему убо и чюдяся евангелист списатель, яко не ведущи бывшаго, вниде. Аще и мощно бе от сего навыкнути ей, яко ведяше утаевающаяся ей, почто бо ни единаго же вопросив, вас вопрошает, разве (л. 431 об.)¹⁰¹ являя, яко аки ведый. Но многое ослепление не попущаше ей порока сего извлещися. Со многим же безстудием самоугодием отвещавает, не пщеваше бо к человеку беседовати. Люто сие, зане яко от единыя души совета на грех приидоша или якоже от сложения некоего. Что яко согласитися вама, рече, искусити Дух Господень? Се ноги погребших мужа твоего при дверех и изнесут тя. Первее учит ю, еже согрешила есть, и тогда показует, яко праведне таяжде постраждет с мужем, има и в тех же согрешила есть. И како рече, абие паде пред ногама его и издше, яко близ стояше. Сице они на ся томление (л. 432)¹⁰² привлекоша. Кто прочее не удивил бы ся? Кто не убоял бы ся апостола? Кто не почюдил бы ся? Кто не устрашил бы ся? Сия глаголет, показуя, аще не к тому прочее бяху удобь пренебрегаеми якоже и прежде, и яко в кратцем времени и во едином мгновении, толика бяху от рыбаря и простца. Небо убо прочее бе земля и гражданства ради и дерзновения и чюдес их ради и якоже ангели тако чюдими бяху, ни к чесому же обращающеся ни к смеху, ни к запрещениям, ни к беседам. Не токмо же за сие, но и яко зело человеколюбни и щадителни бывающе, овем убо пенязми помогаху, овем же исцелением телес. Почто исполни сатана сердце твое? (л. 432 об.)¹⁰³ Токмо не отвещавает онем Петр, хотя муце предати и, и инех наказует, понеже бо зело тяготно хотяше являтися бывшее. Сего убо ради и на самаго его и на жену его страшный творит суд. Аще же в непростителных согрешивших, не таковыя казни истязал бы на обоих, колико отсюду пренебрежение Божие не бы было. А яко сего¹⁰⁴ ради, яве от еже не абие на томление приити, но указати прежде грех, отнюду же ни един постенав, ни един возрыдав, но вси убояшася. В лепоту же вере их простираемей и знамения множайшая бываху и многии и у своих страх бе, елма не тако (л. 433)¹⁰⁵ внешняя нас смущают, яко домашняя. Аще убо будем друг со другом собирающеся, никтоже будет¹⁰⁶ нас воюяй, якоже¹⁰⁷ аще друг со другом растоящеся будем, противу нас вси востанут. От сего и они прочее дерзаху и со дерзновением и на торжищи хождаху и посреде враг удержаваху и исполневашся оное реченое: Господьствуй¹⁰⁸ посреде враг твоих, еже и болшия бе указание силы, яко яти бывающе и связуеми, сицевая творяху.

Видел ли еси, неправедный ответотворче, о раскаявающихся страх и трепет и смерть. Послушай и еще к сим о клятвопреступницех, еже выше назнаменано. С коликою клятвою (л. 433 об.)¹⁰⁹ государь царь дал Господеви и клятвами утвердил за своим подписанием и печатми укрепил, еже святый Златоуст глаголет о клятвопреступницех: Аще и не абие казни бывают от Бога, того ради паче боятися подобает. Зело бо лютейшии муки тех ожидают.

Тем же аще иже солгавшии токмо таковая пострадаху, а иже клятвопреступающии, что ли не постраждут. Паче же аще просте рекшия жена ей на толице, толику подъят казнь и не отбеже, помыслите, кленущиися вы и клятвопреступлющии, коего будете достойни мучения. Благовременно есть и от Ветхаго указати лютость клятвопреступления. (л. 434)¹¹⁰ Серп¹¹¹ , рече, летящ бе, в долготу лактий двадесять, а в широту лактей десять, еже летящь зело скорейшее нашествия томления наводит клятвам последующее, еже бо лактий многих быти широте же и долготе зелность знаменует и величество злых. А еже с небесе летети, еже Вышняго судилища суду низноситися, серповидное же неизбежимое томления являет серп на выю напад, не сам о себе извлечется, пребывает же некако еще и главе отсекаеме¹¹² наводит, якоже бо серп, идеже аще впадет, не сам о себе извлечется токмо, но и главе отсекаемей, сице на казнь на кленущихся находящая люта страшна некая есть и не убо оступити имать, не прежде исправивши дела своего, аще же убегаем кленущихся, да не дерзаем, (л. 434 об.)¹¹³ на наше бо зло сие бывает, елма что непщуете, колицы по Анании и Сапфире, таяжде онем дерзнуша, а не таяжде пострадаша. Не понеже простися им, но понеже на болшее соблюдаеми суть зло. Тем же иже многая совершающии, не мучимы, паче нежели мучимы, боятися и трепетати должни, возрастают бо им томления не томления ради и долготерпения Божия. Согрешаем и не абие казним от Бога, паче наказуемаго должен есть боятися¹¹⁴ . Тем же убо да не сие видим, яко не мучими есмы, но аще не согрешихом. Аще же согрешающе, не мучими бываем, паче трепетати должни есмы. Рцы бо ми, аще коего раба имел бы еси и запрещал бы ему токмо, и не бил бы еси, когда паче боится, (л. 435)¹¹⁵ когда ли бегает, когда ли в беглеца бывает, не егда ли запрещаеши токмо. Отнюду же и друг наказуем не претити часто, яко да не страхом паче позыбати душю, яко да не терзати ю, паче нежели возложением ран. Инако же¹¹⁶ и тамо убо привременно бе томление, зде же всегдашнее, да не убо аще никто же серповная страх ждет ныне. Сие да видиши, но оно помысли, аще таковая творит, елма многая бывают ныне, якоже при потопе¹¹⁷ , но потоп не бывает. Гееною воспретися и томлением мнози согрешают, якова же содомляне, но огненый не сниде дождь, огненая бо уготована есть река. Мнози фараонитская дерзнуша, но (л. 435 об.)¹¹⁸ не пострадаху, яже фараон, ниже потоплени быша в Чермном мори, пучина бо их ожидает бездны, идеже не с нечювствием томление ниже потопитися мощно есть, но не множае мучимым, жгомым, душимым не изнурятися.

Мнози¹¹⁹ в яже израильтяны согрешеная дерзнуша, но не угрызаху их змия, ожидает бо их червь нескончаемый. Мнози дерзаху, но прокажени не быша, ожидает бо их вместо проказы, еже полма растесаном быти и положитися с лицемеры. Мнози¹²⁰ и кляхуся и клятвопреступиша, аще же и убегоша, да не дерзаем, ожидает бо их скрежет зубовный, (л. 436)¹²¹ но и зде негли постраждут и не имут убегнути. Аще и не абие ту, но во иных гресех даже и лютейшее томление будет, елма и мы многажды вины приемше от малых и от великих весь гнев истощаем. Тем же, егда увидиши, что тебе случшееся, воспомяни грех твой оный. Сие¹²² бо и в сынех Иовлих¹²³ бысть, помнете братий Иосифовых, продаша брата, убити начинаху, паче же и убиша усердием, елико бе еже от них, прелстиша, оскорбиша старца¹²⁴ и ничто же пострадаша. По множайших убо летех о последних беду подъяша и грех сей воспоминают. А яко недосмысление¹²⁵ есть реченое, (л. 436 об.)¹²⁶ послушай их, что глаголют: Ей¹²⁷ , в гресе бо есмы о брате нашем. Тако убо и ты, егда что случит ти ся, рцы, ей, в гресе есмы, яко не послушахом Христа, яко кляхомся, многоклятия и клятвопреступлении на главу мою приидоша. Тем¹²⁸ же исповеждся, ибо и овии исповедашися и спасошася, что бо аще не абие находит томление, понеже и Ахав за правду Навуфея, не абие по греху пострада, яже пострада, и чесо ради сие бывает. Дает ти нарок Бог, да тако отмыешися. Егда же единаче пребываеши, наводит прочее томление. Видесте ли, что пострадаша лжущии, тем же помыслите, что постраждут (л. 437)¹²⁹ и клятвопреступающии. Помыслите и отступите. Несть кленущемуся не клятвопреступати и волею и неволею, несть клятвопреступающему спастися, довлеет едино клятвопреступление все содеяти и всецелу нам муку навести. Сего убо ради да вниманием, молюся, себе, да яже отсюду муки избегше, яже от Бога человеколюбия сподобимся.

Паки, ответотворче, глаголеши, яко Бог против апостола, одних учинил апостолы, других пророки, не дал одному всех даров, чтоб не имел притчи к спесивости и¹³⁰ отлучения от своей милости. Смотри, лицемере, апостолское уставление како разочте, яко же и инде глаголет: (л. 437 об.) В нем же кто призван, в том же да пребывает. Како же царь, оставя свое подобие царьское, на высоту святительства воскочи, чрез подобие, яко ты ж поминаешь. Езекиилево вознеслося сердце в твоей красоте и испортилася хитрость красотою твоею, для множества грехов твоих на землю бросил тя есть, погибель ты стал еси и не будешь паки во веки. Что же ты се помышляеши о нас, отступающих от зла по Христове заповеди и святых Его? Разсмотри, человекоугодниче, чие сердце вознеслося и не онаго ли восхитившаго чюждо достояние и власть, якоже Иозия вторый. Аще ли о нашем отшествии глаголешь, готов пострадати (л. 438)¹³¹ Христа ради вся злая, якоже и терплю, но доброзаконно пострадати, якоже и апостол пишет, или якоже великий Григорий Богословец о святем Василии: Закон же мучения есть заповедь Спасова, бегати убо гонения и не вметати себе в беды и ищемым крытися, разумом щадети гонителя. Да и не до крове пришедше, повинни будут греху мучителеву, времени же позвавшу и ятом бывшем подвизатися, еже да явитися самому на убийство, гордо и мерзко есть. А еже приспевшу времени обленитися и не подвизатися Христовы ради заповеди, не мужества есть знамение и безумия¹³² . Се убо дондеже, рече, бе Великий (л. 438 об.)¹³³ Афанасий, сей нам бяше столп и содержание и утвержение, реку же и всей Церкви. А понеже еретик ради стужения виновно бе ему отлучитися на время, тем же отъиде, якоже бо нецыи хотящии град преяти и видяще его тверд и неудобь приступен, отчаяваются, еже силою одолети ему. Словесы же лестныма устремляются к хитрости лукавства и градныя стражи лестию и имением подшедше, и тако град приемлют без всякаго труда. И под властию себе сотворяют и, или яко добраго судию Самсона, совещавшии они иноплеменницы, прежде имением жену его прелстиша, и та испытавши лестию (л. 439)¹³⁴ святыни его тайну и поведа им. Они же прежде власы ему остригоша, в них же имяше крепость, и тако емше и, ругахуся ему, елико же и хотеша. Такожде и на нас воюющии нынешнии иноплеменницы предаде великаго Афанасия нашего старейшину стражем, в нем же вся нам крепость бяше, сего же неимением умздиша, ниже лестию окрадоша, но насилием отгнаша и державу нашу безвестием покрыша и славу церковную остригше. И тако прочей напитовахуся своего нечестия повеленми без страха сия со дерзновением творяще.

Се¹³⁵ уже третие за Троицу Великому борение. Первое, бегав при Великом (л. 439 об.)¹³⁶ Константине, от ариан оклеветан быв. Второе, при сыне его Константии. Третие, при Иулиане. Тако бо подобно Великому нашему страдалцу, по законе Христове страждущему, треми боренми бравшуся и победившу, совершенныя получити победныя похвалы наречением.

Паки¹³⁷ глаголеши, ответотворче: Рахили дал красоту, толко не позволил ис плоду чрева ея. Глаголи, кто не изволил и где есть Рахиль неплодна? Иосифа и Вениамина кто породи?

Паки пишешь¹³⁸ : Складал псалмы Давид и отписал, однако ж их сам не пел, толко сыны Кореовы складно спевали. Кто есть (л. 440)¹³⁹ свидетель, яко Давид сам не пел псалмов? Сам Давид о себе глаголет: Милость и суд воспою Тебе, Господи. И паки: Пою Богу моему, дондеже есмь. И паки: Пою и воспою во славе моей.

Паки, лжесловче и баснословче, пишешь: Мило Кротонский коли быв силен, в чювстве своем чаял, что быти ему крепку и в руках слово в слово, что и Палидамос, который един из них хотя рукама держати вертеп каменный, а другий хотел раздрати дерево наполы. Раздрал же, толко обезсилелся от болшой мочи, и опять дерево как спустилося, захватило руки его и задержало в себе, и пришли после волки и жива съели (л. 440 об.)¹⁴⁰ его. Не удоволился еси в Божественых правых догматох, еже Божественыма законы ограждены и утвержены, о таковых убо Господу свидетельствующу: Повелевая¹⁴¹ стрещися глаголя. Внемлите же от лживых пророк иже приходят к вам во одеждах овчих, внутрь же суть волцы хищницы, от плод их познайте, еда объемлют от терниа грозды или от репия смоквы.

Не есть ли истинно Божие слово, разсмотри, лицемере, праведно сам и истинно, кто еси ты и что суть дела. Не суть ли ты лжехристос, приходяй к нам? Не во овчюю ли кожу обшился еси, внутрь же хищник волк, похищая простейших души? Не (л. 441)¹⁴² суть ли плоды твоя от терния и волчец? Не древо ли зло плоды злы творя, о нем же Христос глаголет: Темже от плод их познаите их. Такоже и божественный апостол Петр прорече о таковых, глаголя: Быша¹⁴³ ж и лживы пророцы в людех, якоже и в вас будут лживии учителие, иже внесут ереси погибели, и мнози последствуют нечистотам их. Ими же путь истинный похулится, в преумножении лстивых словес вас уловят, ихже суд не коснит и погибель их не воздремлет. Но таковым божественный апостол Павел запрещает, глаголя: Ложь отложше, глаголите истину. А яже басни твоей ложной, которой хотел, (л. 441 об.)¹⁴⁴ глаголешь, розодрать дерево наполы, розодрал, толко обезсилелся от болшой мочи, и опять дерево как спустилося, захватило руки его и задержало в себе, и пришли после волки и жива съели. Тако и ты, новый расколниче, Божественных правых велений покушаеши розодрати, но обезсилевся, увязнеши, и помале душетленными волки имаши снеден быти.

Паки глаголеши, Люцифер, понеже имел много доброты, и чево ему не достало и какова добра не было, такова не было, одно под одным чтет Езекииль главу, вознеслося сердце твое в твоей красоте и испортилася хитрость красотою твоею, для множества грехов твоих, на землю (л. 442)¹⁴⁵ бросил тебя есть, погибель ты стал еси и не будеши паки во веки.

Разсмотри, лицемере, кто возвысился сердцем. Аз ли, последуя Божественей заповеди, глаголющей, аще гонят вы во граде сем, бегайте во ин¹⁴⁶ . И паки: Идеже не приемлют вы, ниже послушают словес ваших, исходите из града того. Еда Христос и апостоли и святии вси бегали от злоб, высоко сердце имели, то уже и Христа, и святых апостол, и всех святых оглаголуеши, а не мене единаго. Оглаголуй того, которой не в сущих своих уставох пребывает и не на мене единаго превознесся, но и на самаго Бога и закон.

Паки к басням своим отходиши и глаголеши, увидя его (л. 442 об.)¹⁴⁷ в таких многих благодетельствах неблагодарнаго, что вам кажется не з болшаго лиха, что неблагодарения неблагодарение есть, некоторой ветр¹⁴⁸ , которой все сушит, цветы, травы, овощь и реки. Кто есть, совопросниче, неблагодарен? О мне ли пишеши, яко неблагодарен? Ей, благодарен, ничто туне от царя нашего приях от движимых и недвижимых вещей, но за мног труд, яко Бог весть. И не погубих с любодейцами, но все возложих Господеви, яко свидетельствуют вещи. И есть царю нашему не сугубо или трегубо воздаяние, но присно плодоносимо в сем веце и по многолетном его житии (л. 443)¹⁴⁹ и в будущем до пришествия Христова не престанет приклад благодати. Откуду убо ведомо есть се, аз ти покажу.

Господу свидетельствующу, притчею глаголя: Уподобися¹⁵⁰ Царьство Небесное человеку, сеявшу доброе семя на селе своем. И паки: Уподобись Царьство Небесное зерну горучишну, еже взем человек, всея на селе своем, еже малейший убо есть от всех семян. Егда еже возрастет, более всех зелий есть и бывает древо, яко приити и птицам небесным и витати на вервех его. И паки ину притчю глагола им: Подобишесь Царьство Небесное квасу, иже вземши жена, сокры в мучных сатех три, дондеже воскисоша вся. И прочая. (л. 443 об.)¹⁵¹ Кто же есть сеявый доброе семя, Сын человеческий, а село есть мир, доброе же семя, сии суть сынове Царьствия, а плевели суть сынове неприязнении, еже есть ты и подобнии тебе, а враг всеядый есть диавол, отец ваш. Якоже Господь свидетельствует: Вы отца вашего диавола и похоти отца вашего творите. А жателие ангели суть, якоже убо собирают плевелы и огнем сожигают, тако будет и в скончание века сего. Послет Сын человеческий ангелы Своя и соберут от Царьствия Его вся соблазны и творящыя беззаконие и ввергнут в пещь огнену, ту будет плач и скрежет зубом. Тогда (л. 444)¹⁵² праведницы просветятся яко солнце во царьствии Отца их; имеяй уши слышати, да слышит.

Слышал ли еси Спасово учение в притчах: елицы доброе семя обрящутся, имут расти, плодствовати до жатвы, то есть до скончания мира, такоже и прочая последующая притчи Христовы свидетельствуют. Ово подобно есть Царьствие Небесное сокровищу сокровенну на селе, еже обрет человек скры и от радости его идет и вся, елика имать, продает и купует село то. И паки: Подобно есть Царьствие Небесное человеку купцу, ищущу добрыя бисеры, иже обрете един многоценен бисер, шед, продаст вся, елика имяше, и купи его.

(л. 444 об.)¹⁵³ Да которое наше неблагодарение есть, аще есть царь доброе семя, его же хощет Господь собрати в житницу Свою. Почто его плевелом творишь раскаянием в пожжение огню, якоже и ты хощеши сожжен быти, соблазна ради твоего аки плевел. И аще царь есть сын Царьствия, почто сына неприязни творишь? Их же ради хощет Сын послати ангелы Своя собрати от Царьствия Его вся соблазны и творящыя беззаконие, и ввергнути их в пещь огнену, идеже будет плач и скрежет зубом. Обрел ли царь сокровище сокровенно на селе и купи его? Почто раскаевается? Бисер ли драгий обрел, купил царь? Не (л. 445)¹⁵⁴ раскаивайся, да не како раскаянием богатства лишився и мзду не получит.

Тако и божественный апостол пишет, глаголя: Койждо¹⁵⁵ свою мзду приимет по своему труду. И по мале. Аще кто назидает на основании сем, злато, сребро, камений честных, дрова, сено, тростие, коегождо дело явлено будет, день бо явит, зане огнем открывается. И коегождо дело, якоже есть огнь, искусит, и его же дело, аще пребудет, его же назда, мзду приимет, а его же дело аще згорит, отщетится. Тако Анания и Сафира мзду погубиста малаго ради удержания и сами умроста, якоже выше есть (л. 445 об.)¹⁵⁶ писано.

Паки пишешь, яко знак неблагодарнаго человека есть¹⁵⁷ море, которое многия сладкия воды принимает, однако же их пременяет в горкия и солоныя воды. Подобну еси и нарочиту достойну притчю царьскаго величества рекл ныне о неблагодарении его к Богу, яко толико того почте Бог на земли царьством всея Русии, но он ничто же принесе Господеви и святей велицей Церкви, в Ней же помазася на царьство елеом радости, что любо достойно. Но яко сиру Тую обезчести и обнажи всех добрых яко вдову всею Божественою честию, ею же Бог почте, якоже зрится от всех, лишена всех (л. 446)¹⁵⁸ благих движимых и недвижимых. А яже аще на нас приносишь притчю сию, нимало не примесна. Аще ли о том глаголешь, яже нам царьское величество за многия наши труды малое некоторое подаяние даде, недостойно его подаяние наших трудов и болезней. Но и се мы у себе ничто же удержахом к своим похотем, но вси Господеви возложихом, якоже свидетельствуют вещи.

Паки пишешь: Четыре статьи в неблагодарных обретаются пред Богом и пред человеки. Обретаются некоторыя, которыя не узнают добродетельства и николи гласа не вознесут на небо, моля о своих (л. 446 об.)¹⁵⁹ о своих наставникох, и благодарит Создателя своего за добро, которое им богато дал.

Аще сам еси не достоин видети наши молитвы, о царьском величестве бываемы во святей церкви по вся дни и нощи, вопроси от ведущих. Посмотри о себе, лицемере, кто когда твои молитвы видит или слышит, развее свара и смущение. Подобну велми притчю и достойну своего жития ты сам себе изобразил, глаголя: И они такие суть, что боровы, которые желуди ядят, а николи не посмотрят на дуба, которой жолуди родит, иныя неблагодарныя погружают свои добродетели. Тако ты, окаянный человече (л. 447)¹⁶⁰ неправедный, аки свиния роешь на Божия законы для ради своих скверных прибытков, несмотря на законоположника Христа, глаголющаго: Поминайте слово, еже Аз рех вам. И апостол Июда засвидетельствует, глаголя¹⁶¹ : Поминайте глаголы прежде реченыя от святых апостол Господа нашего Иисуса Христа, зане глаголаху вам, яко в последнее время будут ругателие, по своих похотех ходяще и нечестиих, сии суть отделяюще себе от единости веры и суть телесни, Духа не имуще.

Такожде и Петр верховный пишет: Сие¹⁶² уже, возлюблении, второе вам пишу послание, в них же возбуждаю вас воспоминанием чистаго смысла, помянути преждереченыя глаголы (л. 447 об.)¹⁶³ от святых пророк и апостол ваших и заповедей Господа и Спаса. Сие прежде ведяще, яко приидут в последняя дни ругателие, по своих похотех ходяще.

И божественный апостол Павел глаголет: Поминайте наставники ваша, иже глаголаша вам слово Божие. И прочее. И паки пророчествует, глаголя: Дух¹⁶⁴ же явственне глаголет, яко в последняя времена отступят нецыи от веры, внемлюще духовом лестчим и учением бесовским, в лицемерии лжесловесники, сожженых своею совестию. И по мале. Скверных¹⁶⁵ и изгнивших басней отрицайся, тако вси бо Господу нашему Иисусу Христу работати не хощут. Будет бо (л. 448)¹⁶⁶ время, егда здраваго учения не послушают, но по своих похотех изберут себе учителя, чуждим слухом, от истинных отвратятся и к басням уклонятся. Како прелщенне умом и не полный разумом, не престанешь баснословя. Господь наш Иисус Христос заповедует ти, и вси святии пророчи и апостоли повелевают поминати заповеди Божия и святых пророк и апостол предания. А ты без всякаго стыда хулиши и хвалишеся внешними суесловии и баснословии, паче же бесовскими учении.

Паки глаголеши: Такие были июдее, что хулили Моисея и самаго Господа Бога, который им дал манну и мясо заутра и вечере. Аще мнишь, (л. 448 об.)¹⁶⁷ ответотворче, на царя что хуля, ни, не буди то, но злобу и неправду оглаголую. А еже на Моисея, раба Божия иерея, и на Бога хулили жидове, и за то их великое прегрешение земля пожре, якоже во псалмех пишет: И¹⁶⁸ прогневаша Моисея в стану и Аарона, святаго Господня, и отверзеся земля и пожрет Дафана и пожрет на сонмищи Авирона.

И аще Божие человеколюбие не стерпев и ныне восхитивших сами на ся священство, якоже Дафан и Авирон, повелит земли пожрети, не жалея, или якоже и кадило грешно принесших, огнь разжегшися во сонме их и попалит грешники, не печалую.

Паки глаголеши: Иныя неблагодарныя (л. 449)¹⁶⁹ забывают добродетельств приняты, с чево тот вирш, неблагодарной человек приняв, благодетельство забывает. Глаголал некоторый мудрец: Зло надобно забывать, а добро всегда поминать.

О суетный человече, паки к человеческим баснем отходиши, несть ли о чем писано во Евангелии: Добро творите ненавидящим вас. И паки: Злобу койждо искренему своему да не вспоминает, и оставите, и оставится вам.

И паки глаголешь: Худодетельство на песку писати, а добродетельство на камени вырезати. А мы сопротивно делаем, худодетельство на камени вырезываем, а добродетельство на песку пишем. Мнози древле идолопоклонницы (л. 449 об.)¹⁷⁰ столпы поставляху каменны и на них написоваху свое беснование, и все исчезоша и погибоша без вести. Доброе, аще и на песку напишется, вовеки не замыется, якоже свидетельствует Евангелие: Написа Христос на песку оставление грехов жене, в прелюбодеянии ятой. Мню, яко и ты не невеси о сем, и есть и доныне твердо. Написа ж Пилат тотло на кресте: Иисус Назарянин, царь Июдейский, и не отречеся, еже писах, писах. Написаша евангелисти Евангелие и пребывает вовеки.

Написа государь царь завет свой ко Господу Богу и Пречистей Богородицы в Ыверской монастырь, его же есть образ выше писан в книзе сей, и своею рукою (л. 973 а)¹⁷¹ того утверди и златою печатию запечатле. На ней же есть образ Спаса Христа истиннаго ради свидетельства и образ царьскаго величества и знак Московскаго царьствия и всеа Русии. И сия вся ни во что быша, сам великий государь царь не хранит своего завета, и на него зря, и вси людие. Господу свидетельствующу: несть ученик над учителем, ни раб над господином своим довлеет же. Да будет ученик яко учитель его и раб яко господин его.

По возвращении июдейстем от Вавилона, иже отпусти Кир, царь Перский, по Божественому повелению, повеле же и церковь Божию создати в Иерусалиме, ея же разори Навуходоносор, царь Вавилонский, и сосуды, их же Навуходосор царь взя (л. 973 а об.)¹⁷² из храма Господня, вся отдати и убо созидашеся храм Божий от июдей. Оклеветани же бысть к Дарию, царю Перскому от враг. Тогда царь повеле разсмотрети в книгохранительницы, иже бысть поставлена в Вавилоне, и обретено есть. Обрете же ся во Амафу граде тяжком Мидийском тетрать едина, и сие писано бысть в ней на память.

В лето 1-е Кира царя, Кир царь повеле, да дом Божий созидается, иже есть во Иерусалиме и место, где пожрут приношение. И положи меру, возносящи высоту лакоть 60 и ширину лакоть 60 и стены от камения толстаго триего и кров от древ един. Оброк же от дому (л. 974)¹⁷³ царева да дастся и сосуди церкви Божии златии и сребрянии, их же Навуходоносор взя от церкви, иже во Иерусалиме и принесе их в Вавилон, воздаются и внесутся во церковь во Иерусалим в место, иже и поставлены суть в церкви Божии. Ныне убо дайте князем, иже суть за рекою и сущим далече за Фарвузаною, и советником их Афарсахеи, иже есть за рекою далече отъидет от тех, и отпустите сотворити церковь Божию князи иудейския и старцы, да дом Божий той созидается в месте своем. Но и от мене повелено есть, да ничто не сотворите никогда презвитером жидовским, иже созидают (л. 974 об.)¹⁷⁴ дом Бога онаго. И от тех царей, иже об ону страну реки дают дань прилежно на росход, да дается мужем тем, еже бы не умедлило дело то, и еже аще оскудевает, все давает. Такожде и телцы, и агнецы, и овны во всесожжение Богу небесному, пшеница, соль, вино и елей по обычаю священному, иже суть во Иерусалиме, дается им по вся дни, да будут приносяще возношение Богу небесному и да молятся за живот царев и сынов его. И от мене бо поставлено есть повеление, да всяк человек, иже то преступив повеление, возмется древо от дому его и воздвигся и обесится на нем, и дом его мне (л. 975)¹⁷⁵ да будет взят. И Бог, идеже обитает имя Его, ту да обратит вся царьства и люди, иже прострут руку свою и возбранят и разорят дом Божий, он же есть во Иерусалиме, аз, Дарий, поставих повеление, да дело сие с прилежанием да будет.

Зриши ли, ответотворче неправедный, а паче же, враждотворче, како и еще и невернии царие, паче же идолопоклонницы¹⁷⁶ , заветы не свои точию сохраняху со опаством, но и прежде бывших их, на единей тетрати обретше написанное повеление о церковном здании, ниже рукою царьскою утвержено, ниже печатми запечатлено и клятвами страшными и царьскими казньми (л. 975 об.)¹⁷⁷ устрашено, но едина тетрать проста, и не сме приложити, якоже ты ныне, враже Божий, царя нашего развращаеши и в таков велик грех вводиши. Не погрешил бы истины¹⁷⁸ царь наш, аще бы Дария, царя Перскаго, закон исполнил о тебе, враже всякоя правды, якоже выше есть писано. Да всяк человек, преступит повеление, возмется древо от дому его и воздвигся, обесится на нем. Ты же, аще не имееши, яко ворона, дому, от него же взятися древу, на разбойническом древе достойно тя есть повесити. Христу свидетельствующу: Не входяй дверьми во двор овчий, но прелазя инуде, тать есть и разбойник.

(л. 976)¹⁷⁹ Паки глаголеши: Обретаются паки иныя неблагодарныя, которыя добродетельства возвращают на злобы и на убытки. Добродетельство их се есть то, об чем плакал царь и пророк и сего ради возгласил: Суди¹⁸⁰ , Господи, обидищыя мя, побори борющыя мя, воздаша ми лукаваго вместо благаго и безчадие души моей.

Зри, лжесловче, еже о нас глаголеши, яко неблагодарни, которое неблагодарение наше? Что же добродетель царева? Се ли неблагодарение наше, еже отступати от зла? Которые ли убытки от нас царь пострада? Все, елико собраное прежде нас архиерей, движимыя и недвижимыя, веща в патриархии, без всякаго страха Божия в потребы свои и сущим (л. 976 об.)¹⁸¹ с собою царь усвоил, все чрез Божественыя законы и заповеди онасилова и поработи. Тем же несть подобно ему, государю, глаголати, еже глагола царь и пророк Давид: Гоним от враг своих, но нам, паче гонимым, жаляся Господу Богу на гонителей, да избавит нас от враг наших и не се едино, еже суди Господи обидящих нас, даже до конца, но и приложити к сим. Вознесися, судяй земли, воздаждь воздаяние гордым, доколе грешницы Господни, доколе грешницы восхвалятся, провещают и возглаголют неправду, возглаголю вси делающии беззаконие. Люди Твоя, Господи, смириша и достояние Твое озлобиша и реша: Не (л. 977)¹⁸² узрит Господь. И паки: Иже реша да наследим себе святилище Божие. Боже мой, положи их яко коло, яко трость пред лицем ветру, яко огнь попаляяй дубравы, яко пламень пожигаяй горы, тако поженеши я бурею Твоею и гневом Твоим смутиши я. Исполни лица их безчестия, и да взыщут имени Твоего, Господи. Да постыдятся и смятутся в век века, и посрамятся, и погибнут, и уведят, яко имя Тебе Господь. Ты един вышнии по всей земли. И паки: Боже¹⁸³ , хвалу мою не премолчи, яко уста¹⁸⁴ грешнича и уста лстива на мя отверзошася. Глаголаша на мя языком лстивым и словесы ненавистными обыдоша (л. 977 об.)¹⁸⁵ мя и брашася со мною втуне, вместо любве оболгаху мя. Аз же молитву деях и положиша на мя злая возблагая и ненависть за возлюбление мое. И прочее. И паки: Друзи¹⁸⁶ мои и искрении мои, прямо ми приближашася и сташа, и ближнии мои отдалече мене сташа, и нуждахуся ищущии душу мою и ищущии злая мене, глаголаху суетная и лстивая, весь день поучахуся. Аз же, яко глух, не слышах и, яко нем, не отверзая уст своих. И по мале. Врази же мои живут, укрепишася паче мене и умножишася ненавидящии мя без правды, воздающии ми злая возблагая, зане гонях благостыню. И прочая, по(л. 978)добная¹⁸⁷ сим, яже несть места и времени зде написатися. А яже великому государю несть достойно глаголати, еже Давид глагола в молитве своей на гонящих его. Суди¹⁸⁸ , Господи, обидящая мя, занеже никим гоним, развее от Бога. Но паче сие ему, великому государю, пристойно глаголати: Пожените¹⁸⁹ и имите его, яко несть избавляяй. Нам же, бедным, противу сим: Боже мой, не удалися от мене. Боже мой, в помощь мою вонми, да постыдятся и исчезнут оклеветающии душу мою, да облекутся в студ и срам ищущии злая мене.

(Начало 25-го Возражения)

1 2 3 4 5 6 7 8 9 10 11 12 13 14 15 16 17 18 19 20 21 22 23 24 ... 26 27 28 29 30 <<< Предыдущий вопрос ... Следующий вопрос >>>

^* РГАДА. Ф. 27. Д. 140. Л. 2–1039. назад

⁶⁶ На верхнем поле листа киноварная помета: 25-е возражение.

⁶⁷ На левом поле листа помета: 1 Мак. 1.

⁶⁸ На левом поле листа помета: 1 Мак. 5.

⁶⁹ На левом поле листа помета: 3 Мак. 1.

⁷⁰ На левом поле листа помета: Марк 12.

⁷¹ На верхнем поле листа киноварная помета: на 25-й вопрос и ответ.

⁷² Деян. зач. 12.

⁷³ На верхнем поле листа киноварная помета: 25-е возражение.

⁷⁴ На левом поле листа помета: глав. 5 зач. 13.

⁷⁵ На верхнем поле листа киноварная помета: на 25-й вопрос и ответ.

⁷⁶ На правом поле листа помета: Рим. 9, в 3; 1 Кор. в 50; Гал. 3, в 1.

⁷⁷ На верхнем поле листа киноварная помета: 25-е возражение.

⁷⁸ Исправлено из: началник.

⁷⁹ На левом поле листа помета: 1 Кор. 4, в 21; 2 Кор. 13, в 9 и 14, в 25.

⁸⁰ На верхнем поле листа киноварная помета: на 25-й вопрос и ответ.

⁸¹ На правом поле листа помета: ниж. нрав. 14.

⁸² На правом поле листа помета: зач. 14.

⁸³ Написано со знаком вставки тем же почерком на правом поле листа.

⁸⁴ На верхнем поле листа киноварная помета: 25-е возражение.

⁸⁵ На левом поле листа помета: на священники священнотатцы.

⁸⁶ На левом поле листа помета: Числ. 15; Деян. 32; нрав. 11, лист 111.

⁸⁷ На левом поле листа помета: на присвояющих себе церковная имения и иныя вещи.

⁸⁸ На верхнем поле листа киноварная помета: на 25-й вопрос и ответ.

⁸⁹ Исправлено из: втребу.

⁹⁰ На правом поле листа помета: Харми.

⁹¹ Исправлено из: Харм.

⁹² На верхнем поле листа киноварная помета: 25-е возражение.

⁹³ Исправдено из: рако.

⁹⁴ Исправлено из: далече.

⁹⁵ На верхнем поле листа киноварная помета: на 25-й вопрос и ответ.

⁹⁶ На правом поле листа помета: о священнотатцех.

⁹⁷ На верхнем поле листа киноварная помета: 25-е возражение.

⁹⁸ На левом поле листа помета: 1 Тим. 5, 20; Иов 12; Матф. 6.

⁹⁹ На левом поле листа помета: Псалом 9, 17; 2 Царств 6, 7, 9.

¹⁰⁰ На верхнем поле листа киноварная помета: на 25-й вопрос и ответ.

¹⁰¹ На верхнем поле листа киноварная помета: 25-е возражение.

¹⁰² На верхнем поле листа киноварная помета: на 25-й вопрос и ответ.

¹⁰³ На верхнем поле листа киноварная помета: 25-е возражение.

¹⁰⁴ В ркп. дважды.

¹⁰⁵ На верхнем поле листа киноварная помета: на 25-й вопрос и ответ.

¹⁰⁶ Написано тем же почерком со знаком вставки на правом поле листа.

¹⁰⁷ На правом поле листа помета: верным, како добро есть в единомыслии быти.

¹⁰⁸ На правом поле листа помета: Псалом 109.

¹⁰⁹ На верхнем поле листа киноварная помета: 25-е возражение.

¹¹⁰ На верхнем поле листа киноварная помета: на 25-й вопрос и ответ.

¹¹¹ На правом поле листа помета: Захар. 5, 2.

¹¹² Слова «являет серп на выю напад, не сам о себе извлечется пребывает же некако еще и главе отсекаеме».

¹¹³ На верхнем поле листа киноварная помета: 25-е возражение.

¹¹⁴ Слова «Согрешаем и не абие казним от Бога, паче наказуемаго должен есть боятися» написаны тем же почерком на левом поле листа.

¹¹⁵ На верхнем поле листа киноварная помета: на 25-й вопрос и ответ.

¹¹⁶ Слова «инако же» написаны со знаком вставки тем же почерком на правом поле листа.

¹¹⁷ На правом поле листа помета: Быт. 7, 13; 2 Тим. и Фил.; нрав. уч. 3; нрав 29; Быт. 19, 24; Рим. 1, 2, 27.

¹¹⁸ На верхнем поле листа киноварная помета: 25 возражение.

¹¹⁹ На левом поле листа помета: Чист. 21, 6; 4 Царств 18, 4; Мдр. 16, 5; Иов 3, 9, 14; 1 Кор. 10, 149; 4 Царств 5 и 6.

¹²⁰ На левом поле листа помета: Матф. 24, 103, 51.

¹²¹ На верхнем поле листа киноварная помета: на 25-й вопрос и ответ.

¹²² На правом поле листа помета: Иов 1, 19.

¹²³ Исправлено из: Ияковлих.

¹²⁴ На правом поле листа помета: Быт. 30, 28 и 32, 45, 4 и 44, 28.

¹²⁵ Исправлено из: недомышление.

¹²⁶ На верхнем поле листа киноварная помета: 25-е возражение.

¹²⁷ На левом поле листа помета: Быт. 42, 21.

¹²⁸ На левом поле листа помета: 1 Моис. 50, 17; 3 Царств 21, 29.

¹²⁹ На верхнем поле листа киноварная помета: на 25-й вопрос и ответ.

¹³⁰ В ркп. дважды.

¹³¹ На верхнем поле листа киноварная помета: на 25-й вопрос и ответ.

¹³² На правом поле листа помета: Григ. Богослов 13, стих. 24. Толкован.

¹³³ На верхнем поле листа киноварная помета: 25-е возражение.

¹³⁴ На верхнем поле листа киноварная помета: на 25-й вопрос и ответ.

¹³⁵ На правом поле листа помета: стих. 31.

¹³⁶ На верхнем поле листа киноварная помета: 25-е возражение.

¹³⁷ На левом поле листа помета: 1 Моис. 29.

¹³⁸ Исправлено из: глаголеши.

¹³⁹ На верхнем поле листа киноварная помета: на 25-й вопрос и ответ.

¹⁴⁰ На верхнем поле листа киноварная помета: 25-е возражение.

¹⁴¹ На левом поле листа помета: Матф. 22.

¹⁴² На верхнем поле листа киноварная помета: на 25-й вопрос и ответ.

¹⁴³ На правом поле листа помета: 2 Петр 66.

¹⁴⁴ На верхнем поле листа киноварная помета: 25-е возражение.

¹⁴⁵ На верхнем поле листа киноварная помета: на 25-й вопрос и ответ.

¹⁴⁶ Слова «во ин» написано вместо зачеркнутых: в другии.

¹⁴⁷ На верхнем поле листа киноварная помета: 25-е возражение.

¹⁴⁸ В ркп.: втер.

¹⁴⁹ На верхнем поле листа киноварная помета: на 25-й вопрос и ответ.

¹⁵⁰ На правом поле листа помета: Матф. 24.

¹⁵¹ На верхнем поле листа киноварная помета: 25-е возражение.

¹⁵² На верхнем поле листа киноварная помета: на 25-й вопрос и ответ.

¹⁵³ На верхнем поле листа киноварная помета: 25-е возражение.

¹⁵⁴ На верхнем поле листа киноварная помета: на 25-й вопрос и ответ.

¹⁵⁵ На правом поле листа помета: 1 Кор. 149, 128.

¹⁵⁶ На верхнем поле листа киноварная помета: 25-е возражение.

¹⁵⁷ Написано со знаком вставки на левом поле листа.

¹⁵⁸ На верхнем поле листа киноварная помета: на 25-й вопрос и ответ.

¹⁵⁹ На верхнем поле листа киноварная помета: 25-е возражение.

¹⁶⁰ На верхнем поле листа киноварная помета: на 25-й вопрос и ответ.

¹⁶¹ На правом поле листа помета: Июда 78.

¹⁶² На правом поле листа помета: 1 Петр 3.

¹⁶³ На верхнем поле листа киноварная помета: 25-е возражение.

¹⁶⁴ На левом поле листа помета: 2 Тим. 284.

¹⁶⁵ На левом поле листа помета: 2 Тим. 297.

¹⁶⁶ На верхнем поле листа киноварная помета: на 25-й вопрос и ответ.

¹⁶⁷ На верхнем поле листа киноварная помета: 25-е возражение.

¹⁶⁸ На левом поле листа помета: 4 Моис. 16; Моис. 5, 11; Псалом 104.

¹⁶⁹ На верхнем поле листа киноварная помета: на 25-й вопрос и ответ.

¹⁷⁰ На верхнем поле листа киноварная помета: 25-е возражение.

¹⁷¹ Л. 973 чистый. Порядок листов перепутан при переплете.

¹⁷² На верхнем поле листа киноварная помета: 25-е возражение.

¹⁷³ На верхнем поле листа киноварная помета: на 25-й вопрос и ответ.

¹⁷⁴ На верхнем поле листа киноварная помета: 25-е возражение.

¹⁷⁵ На верхнем поле листа киноварная помета: на 25-й вопрос и ответ.

¹⁷⁶ Исправлено из: идолопоклонники.

¹⁷⁷ На верхнем поле листа киноварная помета: 25-е возражение.

¹⁷⁸ На левом поле листа помета: 3 Мак. 1.

¹⁷⁹ На верхнем поле листа киноварная помета: на 25-й вопрос и ответ.

¹⁸⁰ На правом поле листа помета: Псалом 34.

¹⁸¹ На верхнем поле листа киноварная помета: 25-е возражение.

¹⁸² На верхнем поле листа киноварная помета: на 25-й вопрос и ответ.

¹⁸³ На правом поле листа помета: Псалом 108.

¹⁸⁴ Вписано тем же почерком между строк.

¹⁸⁵ На верхнем поле листа киноварная помета: 25-е возражение.

¹⁸⁶ На левом поле листа помета: Псалом 37.

¹⁸⁷ На верхнем поле листа киноварная помета: на 25-й вопрос и ответ.

¹⁸⁸ На правом поле листа помета: Псалом 34.

¹⁸⁹ На правом поле листа помета: Псалом 70.

Домашняя страница
священника Владимира Кобец