ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (26-2)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

Тогда²²²⁰ убо подвигшуся ипарху разгоретися вящшею яростию и от седалища востати и острейшима к нему воспрети словесы: Что же, не боиши ли ся власти, рече, да нечто будет, ничто же постражду, да нечто от многих едино, (л. 1001)²²²¹ яже моея силы суть. Василий рече: Кая? Да скажут бо ся и нам. Ипарх рече: Разграбление, изгнание, мучение, смерть. Василий отвеща: Аще что и ино прети, сих бо нас ничто же касается. Ипарх рече: Како и коим образом? Василий рече: Зане убо разграбления не ятен, иже ничто же имея, разве аще сих требуеши власяных моих рубищ и книг мало, в них же все мне житие. Изгнания же не знаю, иже николи же местом описан, и ниже сию вменяю мою, на ней же обитаю ныне, и всю мою, в ю же аще повергуся, паче ж Божия вся, Его же преселник аз и пришлец. Муки же, что убо возмут, (л. 1001 об.)²²²² не сущу телеси, разве первую глаголеши язву, тоя бо ты единыя господин. Смерть же благодетель ибо скоро мя послет к Богу, Ему же живу и гражданствую и вящшим умрох, к Нему же тщуся издалеча.

огда убо, рече, подвигшуся ипарху, еже есть паче возгоревшуся яростию, сим хотя устрашити святаго, начат к нему острейшима словесы со прещением глаголати. Паче недоумевся рече, ко власти притече и како ты не боиши ли ся власти. Но он: Что ради ми рече? Власти твоея боятись, да не будет, что ни постражду. Ипарх с тягостию рече: Прашаеши, да нечто постраждеши от многих, (л. 1002)²²²³ яже в моей области суть. И святый абие, и кая суть, ипарше, да сказана будет. Он же изочте: разграбление имении, отгнание, мучение, конечное смерть. Святый же противу сим отвеща: От сих убо мне ни едино касается. Ипарху о сем удивльшуся, нача вопрашати святаго: Како глаголеши, рече, сим тебе не касатися, человеку сущу единому от многих. И святый: Лучше убо грабящих сам своея надежда ради Царьствия Небеснаго разграбих и ничто же ныне имея, разграбления не боюся. Отгнания же страха изменихся, едино отечество горе рай ведый, всю же землю, яко преселение удаления зрю, по глаголу Давида пророка: Господня есть (л. 1002 об.)²²²⁴ земля и концы ея, аз же пришлец есмь и преселник, якоже и вси отцы мои. Мук же не боюся, что бо и возмут, не обретше тела, от воздержания и печали измождену, разве се глаголеши, яко первую и вторую ми язву нанесеши, могущую ми смерть сотворити. До сего бо во твоей власти есть, но аз апостолски рещи, по вся дни умирая умерщвением плоти, когда убоюся смерти, но яко благодетелницу вменяю, Богу мя препосылающу, Ему же живу и служу и тщуся издавна явитися лицу Его. Бедно же ми, еже не пострадати мученическа подвига за истину.

(л. 1003)²²²⁵ Сим²²²⁶ удивлшюся ипарху, ничто же, рещи, даже доныне сице мне беседова и с толицем дерзновением, свое приложив имя, ниже бо епископу, рече, убо случися еси или всяко убо²²²⁷ сим стязался бы нравом. О сицевых подвизаяся, иная убо кротцы мы, ипархе, и всякаго инаго смиреннейши и се заповеди повелевающи, и не яко толице державне, но ниже отключившихся единому брови возводящи. А идеже Бог беседствуемо и предлежащее есть, иная не брегущи, к тому единому зрим. Огнь же и меч, и зверие и иже плоти стружущии нокте, пища нам паче суть нежели ужас. Противу сим досаждай прети (л. 1003 об.)²²²⁸ твори все, еже что убо будет хотящу ти власти насладися, да слушает сия и царь, яко нас убо не поймеши, ниже преприши соприложитися нечестию и аще претиши лютейша.

Сими, глаголет Богослов, удивлшуся ипарху и рещи, приложившу имя свое, яко мне Димостенови ни един же и доныне с таковым дерзновением беседова. К нему же святый: Всяко, рече, яко николи же получил еси епископа. Аще ли бы получил, и он такоже быти без страха и со дерзновением беседовал, за истину благочестия подвизаяся. Мы убо, о ипарше, о инех смирени есмы ко всякому человеку. Се нам повелевает (л. 1004)²²²⁹ заповедь Божия, понеже и Он волею нас ради смирися, быв послушлив до смерти, якоже свидетельствует божественный апостол, пиша к Филиппиком. Тем же и мы подражающе, волное Его смирение елика сила, ни наихуждша не возносимся, но и к тем с милостию смирени есмы, не возводяще брови на высоту. А идеже вера страждет и отщетеваемся Бога, аще и сана лишают или и на лютейшая предлежат пострадати, не смиряемся, но вся уметы вменивше, о Сем единем подвизаемся. Предлежащая ж мучения, аще огнь или меч или зубы зверей и строгания плоти, сия суть ужасения недоблим и страх (л. 1004 об.)²²³⁰ малодушным. Нам же сия сладостна и тощно пищи приемлема. Тем же твори, еже хощеши и власти насладися, муча мя. Да слышит же, рече, сия и царь, яко мене убо не удержи, ниже можеши сотворити и ереси твоей сообщитись, аще и лютейша некая воспретиши.

Елма сия рещи, и слышати ипарху и сопротивление уведати мужа, тако не ужасно и непобедимо, сего убо вон пустити и преставити не к тому ж с тем же прещением, но неким говением и уступлением. Тому же ко царю пришедшу, яко имяше скоро, учинихомся царю, рещи старейшину, сея церкве лучшия (л. 1005)²²³¹ прещения муж, словес твердейши, прения крепчайши, инаго убо некоего ослушати подобает о недоблих. Сего же или нудити яве, или не надеятися прещенми. О сих же себе зазревшу цареви и похвалами мужа побеждшуся, видит бо ся мужа добродетели и ратник, ниже нудити повелев и тожде железом пострадати, еже умягчавается убо огнем и пребывает обаче железо и преложивша в чюдо прещение, сообщение убо не прияти, преложения стыдящуся. Просити ж ответа, иже преблаголепнейши, скажет же и той слово, во святилище бо вшед, со всеми, иже о нем (л. 1005 об.)²²³² оружия носящими, бе же день просвещеный соборен и людем часть быв, тако нарицается совокупления.

Елма, рече, ипарху сия рещи ко святому с толиким прещением острейшая словеса, и слышати от него словеса ответна, со всякою премудростию и целомудрием, како противу егову²²³³ прещением с толицем дерзновением беседова без всякаго ужасения, поразуме, убо от сих непобедима быти прещенми, но со гонением неким и почитанием. Сам же вскоре шед ко царю, поведает противление мужа. Мы убо, рече, царю, умнихомся от старейшины церкви сея, выщши (л. 1006)²²³⁴ бо прещений муж сей, во словесех ответа твердейши, во прении непобедим, инаго бо кого от препростых повиновати прещенми. Сего же или нудити яве, еже есть мучити, или и тако не надеятися одолети, но оставити его пребывати, якоже хощет. О сих же, рече, зазревшу цареви, от похвал мужа принужену, толика бо есть сила добродетели, яко и сопротивным творит дивитися и почитати. Повеле же царь к тому не нудити святаго. Сам же пострада подобно железу, якоже бе оно умягчавается от огня, пребывает же обаче железо, сице убо Иуалий, (л. 1006 об.)²²³⁵ от добродетели великаго устыдеся и похвали и, прещение в чюдо преложи, обаче сам до конца пребысть во своем злочестии, приобщитися с верными святей Божии соборней апостольстей Церкви не прият, преложения, рече, стыдящуся. О безумства стыдетися подобает, купно же и боятися, еже от благочестия во злочестие преложитись. Сей же окаянный стыдяшеся от злочестия во благочестие преложитися, входи же во святую церковь со всеми оруженосцы, бе же день просвещенный соборен, еже есть святая Неделя воскресный день, и людем часть быв, рекше смесися с людми во святей церкви. И тако со святым (л. 1007)²²³⁶ получи совокупления.

Блюди же борбу другую труднику Василиеви и судящу ему ипарху. Сей убо, гордяся, сторгнути мандию святаго веляше. Он же готов бе. Аще, рече, хощеши и ризы совлеку ти ся. Бити претяше судия и строгати ногти, изнести же утробу его, сим мня в страх вложити его. Святый же суетное и ненаказанное его прещение укаряя, рече: Сладко ми паче есть слышати, еже таковому о нас рещися произволению. Стружеши ми десне, иже от мног лет внутрь ми неисцелно лежащ. Ты же таковым торганием изврачюеши. Аще ли же извлачиши утробу, якоже и претиши, печалнаго вскоре (л. 1007 об.)²²³⁷ свободиши телесе. Се бо ми желанно есть, еже изрешитися тела и со Христом быти. Сия же тогда ипарху убо претящу, святому же противу ему отвещевающу.

Изряднее же яви ми ся приложити и се ко всем, зане он готов бе за благочестие не токмо отечества изгнатися и от стола, но и умрети.

До зде убо глаголет Богослов, яже на святаго Василия мирская рать преста, рекше еже от Иуалия и от ипарха Димостена и последнее, еже от Евсевия ипарха Понтскаго стужение, и вся разсыпашася и престаша, и конец благ имяху святаго веры достоин Богу сице устроившу.

(л. 1008)²²³⁸ Житие святаго Иоанна Златоустаго.

Тогда²²³⁹ блаженный Иоанн паки рече ко цареви: Молю же тя убо чисто в православии пребывати, клеветник отвращатися и часто ходити во святую Божию церковь, и не оскорбити Дух Святый гневанием вашим и души моея убогия да не ввержете в печаль. Но²²⁴⁰ и се, да весть твое благочестие, яко не имам устыдети, ему же будет требе наказание и обличение на ползу душам.

Отвеща же царь и вси, иже с ним, со благоговением реша к нему: Слышахом словеса твоя, честный отче, сотворим, якоже угодно есть при всем пред очима твоима и никто же ослушается тебе, но все (л. 1008 об.)²²⁴¹ повелеваемое нам тобою всем сердцем сотворим и не отвращаемся словес твоих, но яко от Христа глаголемая послушаем.

Того ж Иоанна Златоустаго житие.

Жена²²⁴² же некая именем Калистрофия, жена бывши старейшины Навклира Александрскаго, завистию же диаволею гражане оклеветаша ю к Павликию, иже тогда сан имеяше во граде том Августалский, якоже богат сущи ей изряд. И приведше ю, повеле взъяти от нея пятьсот златиц, и не имущи ей того дати, заложи все имение свое у чади в лихву, и даст Павликию. Взем же той пятьсот златиц (л. 1009)²²⁴³ и отпусти ю. По времени же должники беду ей творяху, просяще данное ими. Двема же летома минувшема, извергоша Павликия из сана и ведоша и в Константинград, истязающе, како есть строил область свою. Воставши же убогая та вдова и седши в корабль, иде вослед его, и пришедши, паде пред царем отмщения просящи на Павликия. Слышав же царь, повеле епарху градному извопрошати и иже неправедно взятое воздати паки вдвоей.

Епарх же, помогаше Павликию, и не тако поведаше царю, якоже глаголаше вдовая, им же в сан той ввел и беяше епарх. Жена ж (л. 1009 об.)²²⁴⁴ та, видевши себе обидиму, припаде Навклиру царицыну и сказа ему вся беду свою. И яко сказано бысть царице, в том часе посла два от отрок своих привести Павликия к себе. Пришедшу же ему, глагола ему царица: Ты ли еси иже пусту сотворивый митрополию Александрии Египецкия в снабдения место и составления и еже бы ю насадити полну, то ты всю погуби. Он же, отвещав, рече: Да веси, царице, яко не отпустих, ни погрузих, ни беды сотворих никому же, но и яже взях, свесть е твоя власть, яко отдах в ризницу прежде испадения моего из сана того. Она же рече: Не (л. 1010)²²⁴⁵ веде того, что ты глаголеши, обаче тако ми спасения царева не имам тебе пустити, дондеже даси сто литр злата. Сице ж ей рекши: Поведе отроком да и держат, дондеже отдаст то. Видев же Павликий повеление ея, яко не гонзнет ея, вдаст злато все и простыню прием и отъиде. Вземши же царица, даст вдовице тридесят и шесть златиц, таже испусти ю вон. Изыде ж вдова, плачющися и вопиюще, якоже не надеяшеся вторыя той беды прибывшия. Слышавши же о блаженнем Иоанне, яко заступает обидимыя, паче же иже не имут ни от кого ж (л. 1010 об.)²²⁴⁶ помощи. Препаде пред ним, исповедающи все, еже сотвори царица Павликиеви ея ради и яко надеющися милость прияти от нея, паче пакость и беду прият.

Слышав же то великий Иоанн, сжалися, паче же яко рече с лихвою просят, им же есть должна во Александрии. И тако блаженный Иоанн призва Павликия во святую церковь и глагола ему яко: Вижду о тебе изволившу ти к Богу творити неправды, иже есть отец сиротам и судия вдовицам, не ведый, яко жестоко есть противу остану²²⁴⁷ прати. Ныне убо вдаждь убозей сей пятьсот златиц, еже еси взял (л. 1011)²²⁴⁸ без правды, да ся искупит, от них же взяла есть и гонзнет и з детьми своими беды, яже ю обдержат и юзы тоя неправедныя. Отвещав же, Павликий рече ему: Сия припаде к царице и взят у мене сто литр злата и тщету ми многу сотворила ея ради. Но да идет к ней и возмет от нея, при нем же мя тяжет и вопиет на мя. Иоанн же рече: Аще и царица взяла есть толико от тебе злата, но за грехи твоя, яже еси сотворил тогда, егда беяше в сану том. Аз же воистину не имам неправду сотворити убогия сея жены, дондеже воздаси все, еже еси от нея взял, а извета (л. 1011 об.)²²⁴⁹ не твори, глаголя на царицу. Глаголю бо ти, яко не имаши изыти отсюду, дондеже возмет и последнюю медницу. А то ей будет даное царицею тридесят и шесть златиц на пищу.

Слышавши же то царица наречие, воздаст ко Иоанну сице: Пусти Павликия, уже бо взяла есмь аз досыть злата за той долг. Иоанн же отвеща ей теми же послаными рек: Веру ими ми, глаголющу, яко не имать пущен быти отсюду, дондеже воздаст, еже взя убогия сея жены. Паки же посла к нему царица, глаголющи: Отпусти убо мужа того. Иоанн же противу тому отвеща: Аще хощеши, да отпущу (л. 1012)²²⁵⁰ и, то посли вдовице сей пятьсот златиц. Аще ли же и тако сотвориши, то ничто же будеши велико сотворила, им же сея ради вины много взят злата от Павликия сто литр. Сия слышавши царица, гнева исполнися и рече: Якоже вижду, прииде Иоанн от Антиохии да упразднит повеления царьския. Таже абие в той час повеле двема сотникома со двемастома воин ити в церковь и нуждею извести Павликия от патриарха и пустити и в дом свой. Пришедшим же им пред двери церковныя и хотящим внити, видеша ангела Господня, стояща при дверех, и в руце его копие наго (л. 1012 об.)²²⁵¹ имуща и не дадуща им внити. Видевши же сие, убояшася зело и возвратишася к царице трепещуще, и поведаша ей видение ангелское и како со оружием стояше.

Слышавши же то царица, убояся и возмутися зело со ужасти, обаче егда мину то, паки таяжде бысть вражда во уме ея, юже име и прежде на Иоанна, года ждуще, како бы ему отдати. И помале паки посла к нему царица Фроментия именем, мужа сановита, молящи, дабы пустил Павликия. Великий же Иоанн ни того ласки послушав, но единаче глаголаше: Не прети мне хотящу, хощу бо избавити убогую сию вдову из беды (л. 450)²²⁵² сея неправедныя, аз есть сотворил сей, к сему же и царице, строя души ея спасение. Павликий же, видев, яко не может гонзнути из церкви, посла в дом свой, и принесоша пятьсот златиц, и даде той вдове пред патриархом, и тако их отпусти, и иде в дом свой, возвратишася же и жена во град свой и в дом свой, славящи Бога, иже ю помилова молитвою Иоанновою. Иоанн же паки учаше народы, да останутся неправедных имений. По неколицех же днех паки посла царица ко блаженному Иоанну, овогда претящи, овогда же ласкающи и велящи, да ся ей не противит, ни вопреки (л. 450 об.)²²⁵³ творит, глаголющи сице: Останися уже еже тебе не лепо есть царьская правити, яко же и мы церковных дел не строим, но уступаем, да сам, яко же хощеши, твориши я: останись по церквам мятежа, и притчю мя всем творити: аз бо всегда яко отца имам тя и чту зело, поне отныне от обою избери, или церковь строити, или царьских дел останися, не бо стерплю тебе, пакости творящю.

Блаженный же Иоанн, слышав то, зело опечалися и помышляше, сам в себе глаголя: что будет, сей тако без студа сотворшися, и гневающи Христа делы своими, и воздохнув (л. 451)²²⁵⁴ велми, отвещав, рече посланым: Аще человеком угождал бых, Христов раб не бых был. И паки той же апостол глаголет, обличи, запрети, умоли, и паки: мне убо глаголати не леностно, вам же безблазнено послушати. Бо паче тако подвизаюся и непрестану поучая, да не остану в тяжести или в скверне всякой чюжих грехов, но да буду сохранен Господним промыслом без скверны и до последняго моего издыхания. Аще ли мя мнит, яко обличающа ю во учении, то неполезно ей есть зазрети мне, ни жалити си. Вижду ю в неподобных сущю и заповеди Христовы не хранящу, обаче (л. 451 об.)²²⁵⁵ в лице ни тоя, ни инаго кого обличих, ни безчестия сотворих, не даждь ми Боже, но злату хотящая обличая не почих, поущая²²⁵⁶ остатися того, ни имам почити. Да аще есть вне того вреда, то паче ей лепо есть радоватися, им же есть вне того всего. Аще ли не свободь есть глаголемым тем, той да весть, яко аз ея не обличаю, ни безчестия ей творю, но тоя самая дела суть, иже бо творит грех. Раб есть греху, якоже глаголет апостол, что бо есть, иже возбраняет ей добро творити или кая ей будет полза, аще и весь мир приобрящет, а душю свою от(л. 452)щетит²²⁵⁷, или что даст измену на души своей. Сими словесы уча и множайшими, удивив человеки, и отпусти я с миром, поведати ей, иже слышаша. Они же написаша скорыми писмены словеса та, исповедаша ей, рекуще: Слышахом словеса днесь от человека не боящася никоея же смерти, ни мечныя, ни морския, но вся ни во что же вменяюща, единем ся точию пекуща, еже обличати и запрещати, иже неправым путем ходящая. Да тако неутомим пребывает николи же. Се же глаголавше к ней, подавше ей хартию, в ней же бяху словеса си написана.

(л. 452 об.)²²⁵⁸ Бяше²²⁵⁹ же тогда во граде у царя боярин Феогност именем. Сей убо добр муж сый, имеяше страх Божий в сердцы своем присно, да того ради и царь любляше и зело. Беяше же и другий боярин именем Гай, арианския веры. Сей, взавиде и оклевета Феогноста ко царю, глаголя, яко поносит царю и царице, рече, яко не сыти суть беруще злато и губители своея власти суть. Ту абие разгневався царь, повеле заточити и в Селунь, а имение его все восхитити, разве единех хлевинец вне града на прекормление жене его и детем. Идущю же Феогносту в Селунь, от печали впаде в болезнь (л. 453)²²⁶⁰ и умре. Жена ж его, видевши тую напрасную напасть и смерть бывшую мужу своему, еще же и имению отъяту многу сущу, убоявшеся велми, прибеже в церковь к блаженному Иоанну и сказа ему всю беду свою. Слышав же милостивый той муж, сжалися зело и начат увещевати ю, глаголя: Не жалиси, но паче добре славящи Бога, терпи напасть твою и мужа твоего. Имаши бо ты Бога судию, иже ся тобою печет и твоим сиротам Отец есть, вся бо Той весть, и еже ны есть на ползу, то же и строит, яко своим рабом. Но обаче, аще неправедно умре, Феогност (л. 453 об.)²²⁶¹ отпущен, то смерть тая на вечную жизнь ему будет, а тем на вечную муку, иже и суть оклеветали. Теми словесы и инеми множайшими увещав ю и отпусти в дом свой, и повеле ей от Ксенодоксии взимати на пищу доволно себе же и детем своим по вся дни. И мысль имеяше молити царя, да возвратит ей имение мужа ея. Потом же и другое зло неприязнь умысли на бедную ту жену и дети ея, паче же на блаженнаго Иоанна. Времени бо пришедшу, егда вина берут, в не же исходят вси на села имати вин своих. Евдоксия же царица, царева села проходящи, мимо гря(л. 454)дущи²²⁶² же, вниде в Феогностов виноград и уреза гроздь от того винограда своима рукама и яст от него. Реша же ей предстоящий: Госпоже, чюждь есть сей виноград. (Устав же бяше положен царем, аще царь или царица, походящи, внидет в виноград кий и яст от овоща его, то да не будет к тому лет господину села того владети им, но царь да возмет и, а господин того места таков же да изберет виноград царев, в он же несть входил царь, или цену да возмет от ризницы царевы)²²⁶³.

Повеле же царица приписати Феогнастов виноград к царевым виноградом, надвое мыслящи, ово хотящи пакость (л. 454 об.)²²⁶⁴ вдове и детем ея, понеже гневашеся на ню, имже поведала бяше Иоаннови, ово же взыскаше речи и извета, имже бы могла впречитися и изгнати из церкве Иоанна, ведяше бо его милостив ум сущи, и о таковей неправде, аще услышит бывшее, то не имать претерпети вдовицы тоя беды и чад ея, да негли нечто взыдет от того помогающи ей. Якоже помышляше, тако и бысть. Уведев бо то блаженный Иоанн, абие наречие пусти к ней Евтихием, архидиаконом своим, мужем хитрым и смысленым в словесех и житие имущем добро, сице глаголя: Христо(л. 455)любивая²²⁶⁵ вера и житие твоею родителю знаемо есть всеми, зане и молитв ради и добрых дел ею Бог дал ти есть царьство сея земли, ожидая тебе, да и ты подвигнешися добрыми делы и Царьство Небесное приимеши от Него. Богатство же и слава и хвала сея жизни ничто же имать успети в страшный он Судный день, но точию дела жития нашего добраго. Темже не забывай страха Божия, добре ведущи, яко дыхание всех нас в Того руку есть, ему же, аще хощет, приложит, и от него ж, аще хощет, умалит. Персть же и пепел суще есмы, скоро в землю сходим, в темная и несветлая (л. 455 об.)²²⁶⁶ места, якоже и древнии прежде вас вси царие и князи и повинницы. Воззри на цари, иже прежде вас быша, кацы тии бяху тогда, кацы ли суть ныне. Разумей же, иже суть добро творили, како тии блажими суть, а иже зло творили, то тии поминаются клятвами немалыми, иногда же и имен их не хотяя слышати, толма ся суть им пригнусили. Да и ты, убо христолюбице доброчестивая подражай добрых, иже веру без вреда сохраниша и се житие правдами препроводиша и благими делы. Повели, да ся возвратит убозей жене Феогнастове и детем (л. 456)²²⁶⁷ ея виноград, иже имеяху на утеху себе. Довлеет бо им болшая беда и печаль, еже оному изгнану и умершу и имению его всему отъяту. Ей, молю тя, отверги, еже имаши гнев на ню, помнящи Христово слово, иже во Евангелии глаголемое: Да не зайдет солнце во гневе вашем. Паче же, еже к богатому оному реченое: Безумне, в сию нощь душю твою истяжут от тебе, а яже собра, кому та будут, еда снидет во ад с нами сладость плода виннаго или сквара древянаго масла, или ризное украшение, или богатство, или слава и власть. Не все ли оставивше зде, отходим отсюду (л. 456 об.)²²⁶⁸ нази неимуще, ниоткуду же помощи, разве дел своих. Да тем вся та поминающи, повели возвратити виноград убозей вдове, да стяжаше мзду от Бога в день Судный.

Сия словеса и ина подобная тем глагола к царице Еутихий от блаженнаго Иоанна. Она же, слышавши словеса сия, написа к нему, сице имущи: Ожесточив, просиши, осудив мя словесы твоими, яко неправедну и беззаконие творящу. Не ведый царьский устав и закон, ни дая ми чести ведомыя царем, но обидну мя имаши. К тому не стерплю тебе до конца, презрима тобою. А о винограде Феогнастове то веси (л. 457)²²⁶⁹ римския законы, яже велят о таковем. Аще ли не веси, то разумей, како тии суть уставили исперва бывшии царие: Да иже годе ей есть, от обоих изберет себе от сих или в того место, идеже хощет, виноград также себе да возмет или цену его. Аз бо не хощу потваряти уставы древних царей, ни смышляю тако ничто же сотворити.

Таже яко прият от нея писание блаженный Иоанн и почет, востав, иде к ней в полату и седе у нея, начат паки тихыми словесы увещавати ю, множае перваго глагола к ней, таже потом рече ей: Возврати вспять (л. 457 об.)²²⁷⁰ виноград вдовей. И не хощи слышати, яко неправду сотворши. Она же рече: Уже ти вписала есмь, что есть уставлено древними прежде нас бывшими цари о тацех местех. Дала же есмь ей избирати, якоже хощет, любо в того место виноград ин, а любо цену его. Иоанн же рече к ней: Глаголах ти и паки реку ти, воздаждь убозей вдове свое, ничто же бо чюждаго не просит. Царица же рече ему: Не тако сопротивися царем, не бо убо тебе будет на успех некий же сие. Отвещав же Иоанн, паки рече ей: Воздаждь виноград, а извета не твори ветхими уставы и (л. 458)²²⁷¹ законы, им же неверными цари то есть установлено. Да тем и лепо то есть было, вси бо царие законы суть уставили, да ничто же ти возбраняет крив устав и неправеден разорити и право творити царице суще и жене цареве. Да не мози тако сотворити и вещати, да тя не прозову новую Езавель и приобрящеши си клятву равну той клятве.

Сице же ему глаголющу разгневавшись царица, повеле нуждею Иоанна изринути ис полаты, отрыгнувши яд, иже крыяше в сердцы своем на праведнаго, глаголющи: Аз имам сама себе отмстити, но и винограда не дам, ни ино что в него (л. 458 об.)²²⁷² место, ни ты можеши преодолети мене и принудити творити, еже аз не хощу, но и тебе накажу, да мене не преобидиши. Иоанн же изшед ис полаты и призва Евтихия архидиакона и заповеда ему, глаголя: Рцы дверником церковным, да егда приидет к церкви царица, то да затворят двери пред нею и не дадят ей внити и всем, иже с нею суть. Но да ей поведят, яко Иоанн есть, повелев сице сотворити, блюдите и не ослушайтеся.

Празднику же приспевшу Воздвижения Честнаго Креста, собрася весь народ града в церковь. Царь же и вси бояри с ним и живущии (л. 459)²²⁷³ окрест града и приходящии странницы не токмо праздника ради, но да и слышав сладкое учение Иоанново. Той же Иоанн, силою Святаго Духа просветився, начат беседовати к народу повестми многими и вси слышащии чюждахуся, яже от Бога данней ему премудрости. И тако им разрешаше, яже в Божественем Писании неудобь беяше разумное и закрытое. Тем же от сего паче чюждим беяше и похваляем от всех²²⁷⁴, и радость немалая беяше во всем народе, яко всем глаголати: Поистине достоин есть престола сего третий на десяте апостоле, Христос бо посла тебе (л. 459 об.)²²⁷⁵ царьствующему граду, да спасеши душы наша и напоиши от источник спасеных, яже ти есть дал Бог. Беяше же ту схоластик множество скоропишущих и любящих труды, их же он глаголаше, они писаху и дивляхуся, како ни едино сомнение имяше в словесех, ни дващи едино слово речаше, но яко изученую речь издавна глаголаше. И всем радующимся учения его ради, яко скончатися пророческому словеси о том, глаголющю, яко всем веселящимся жилище у тебе.

Прииде же царица к дверем церковным и с рабичищи и со всеми чинми хотящими внити. Вратницы же (л. 460)²²⁷⁶ церковнии затвориша двери перед нею и не даша ей внити. Она же исполнишися гнева, вкупе же и срамом объята бывши, вопияше, глаголющи: Разумейте вси, како гнев держит человек сей на мя, яко вси входят во святую церковь, мне же точию единой возбраняет входа, еже аз не могу согнати его с престола своего ему. А иже с нею беяху пришли, толкаху во врата, глаголющи: Отверзите госпожи, а не безчинуйте. Они же отвещаша им, рекуще: Не о себе се сотворихом, но якоже нам повеле патриарх, и не смеем без позволения его ввести ея семо. Тогда ту един от сущих с царицею простер руку, (л. 460 об.)²²⁷⁷ хотя ударити в церковныя двери, и ту абие усше рука ему и бысть яко мертва. Видевши же сие царица и вси иже с нею, убояшася зело и возвратишася в полату. А ему же усше рука, той вниде в церковь и ста посреде народа всем зрящим его. И возопи, глаголя: Помилуй мя, Господи, отче святый, исцели ми руку изсохшую, безумно дерзнувшу на святый храм, согреших, прости мя. Разумев же Духом Святым Иоанн вину, ея же ради сия прилучишася ему, рече ему: Иди и умый си руку в церковней опанице, в ней же воду свящают, и верую Господу Иисусу Христу, яко будет ти по вере твоей. Шед же человек, (л. 461)²²⁷⁸ умыся и бысть цел. И пришед на среду, славя и благодаря Бога, и вси, иже и видевши внезапу исцелевша, хвалу воздаша Христу Богу, даровавшу угоднику Своему Иоанну исцеления дары. Сия же и царя не утаися, но обаче не ведыйся творяше о царицы, ведый ея нрава лютость и жестосердие. Любляше же зело царь преподобнаго Иоанна и в сладость его послушаше.

Не²²⁷⁹ печалуй, брате Кириаке, ибо аз егда изгоним бех от царьствующаго града, ничто же о сих вменях, но глаголах в себе, аще хощет царица изгнати мя, да изженет, Господня бо есть земля и концы ея. (л. 461 об.)²²⁸⁰ Аще хощет претерти мя, да претрет, имам Исаию подобие. Аще хощет в пучину воврещи мя, воспоминаю Иону. Аще ли в ров ввержет, имам Даниила ко лвом ввержена в ров. Аще ли и камением побиет мя, имам Стефана первомученика тако пострадаша. Аще ли главу мою отсечет, имам Иоанна Крестителя. Аще хощет имения взяти, да возмет, наг изыдох от чрева матере моея, и наг паки отъиду. Мене утешает апостол, глаголя: Бог лица человечя не стыдится. Тем же аще человеком угождал бых, Христов раб не бых убо был. И Давид вооружает мя: Глаголах о свидениих твоих пред цареви и не (л. 462)²²⁸¹ стыдяхся. Многая на мя уготоваша, но вся зависти ради сотвориша.

Видел ли еси, совопросниче, мужество святых и приснопамятных великих отец наших, како не точию сами под суд царей не приходили, но и царей беззаконныя суды исправляли и обличали. Аще и множицею муками и смертию претими, но не возмогоша тем устрашити, изволиша правды ради умрети, нежели беззаконен суд прияти. И аще будет недоволно Божественых заповедей и святых апостол и святых отец правил и уставов к возбранению беззаконнаго вашего судища, то и от царьских уставов (л. 462 об.)²²⁸² к сим еще приложим.

1 ... 3 4 5 6 7 8 9 10 11 12 13 14 15 16 17 18 19 20

<<< Предыдущая страница ... Следующая страница >>>

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 ... 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

²²²⁰ На левом поле листа помета: над гроб. Василия Велик.

²²²¹ На верхнем поле листа киноварная помета: на 26-й вопрос и ответ.

²²²² На верхнем поле листа киноварная помета: 26-е возражение.

²²²³ На верхнем поле листа киноварная помета: на 26-й вопрос и ответ.

²²²⁴ На верхнем поле листа киноварная помета: 26-е возражение.

²²²⁵ На верхнем поле листа киноварная помета: на 26-й вопрос и ответ.

²²²⁶ На правом поле листа помета: ипарх Васил.

²²²⁷ Написано над строкой тем почерком, но более светлыми чернилами.

²²²⁸ На верхнем поле листа киноварная помета: 26-е возражение.

²²²⁹ На верхнем поле листа киноварная помета: на 26-й вопрос и ответ.

²²³⁰ На верхнем поле листа киноварная помета: 26-е возражение.

²²³¹ На верхнем поле листа киноварная помета: на 26-й вопрос и ответ.

²²³² На верхнем поле листа киноварная помета: 26-е возражение.

²²³³ Так в ркп.

²²³⁴ На верхнем поле листа киноварная помета: на 26-й вопрос и ответ.

²²³⁵ На верхнем поле листа киноварная помета: 26-е возражение.

²²³⁶ На верхнем поле листа киноварная помета: на 26-й вопрос и ответ.

²²³⁷ На верхнем поле листа киноварная помета: 26-е возражение.

²²³⁸ На верхнем поле листа киноварная помета: на 26-й вопрос и ответ.

²²³⁹ На правом поле листа помета: лист 48.

²²⁴⁰ На правом поле листа помета: лист 49.

²²⁴¹ На верхнем поле листа киноварная помета: 26-е возражение.

²²⁴² На левом поле листа помета: лист 80.

²²⁴³ На верхнем поле листа киноварная помета: на 26-й вопрос и ответ.

²²⁴⁴ На верхнем поле листа киноварная помета: 26-е возражение.

²²⁴⁵ На верхнем поле листа киноварная помета: на 26-й вопрос и ответ.

²²⁴⁶ На верхнем поле листа киноварная помета: 26-е возражение.

²²⁴⁷ Исправлено из: остну.

²²⁴⁸ На верхнем поле листа киноварная помета: на 26-й вопрос и ответ.

²²⁴⁹ На верхнем поле листа киноварная помета: 26-е возражение.

²²⁵⁰ На верхнем поле листа киноварная помета: на 26-й вопрос и ответ.

²²⁵¹ На верхнем поле листа киноварная помета: 26-е возражение.

²²⁵² На верхнем поле листа киноварная помета: на 26-й вопрос и ответ.

²²⁵³ На верхнем поле листа киноварная помета: 26-е возражение.

²²⁵⁴ На верхнем поле листа киноварная помета: на 26-й вопрос и ответ.

²²⁵⁵ На верхнем поле листа киноварная помета: 26-е возражение.

²²⁵⁶ Исправлено из: поучая.

²²⁵⁷ На верхнем поле листа киноварная помета: на 26-й вопрос и ответ.

²²⁵⁸ На верхнем поле листа киноварная помета: 26-е возражение.

²²⁵⁹ На левом поле листа помета: лист 98.

²²⁶⁰ На верхнем поле листа киноварная помета: на 26-й вопрос и ответ.

²²⁶¹ На верхнем поле листа киноварная помета: 26-е возражение.

²²⁶² На верхнем поле листа киноварная помета: на 26-й вопрос и ответ.

²²⁶³ Скобки поставлены в ркп.

²²⁶⁴ На верхнем поле листа киноварная помета: 26-е возражение.

²²⁶⁵ На верхнем поле листа киноварная помета: на 26-й вопрос и ответ.

²²⁶⁶ На верхнем поле листа киноварная помета: 26-е возражение.

²²⁶⁷ На верхнем поле листа киноварная помета: на 26-й вопрос и ответ.

²²⁶⁸ На верхнем поле листа киноварная помета: 26-е возражение.

²²⁶⁹ На верхнем поле листа киноварная помета: на 26-й вопрос и ответ.

²²⁷⁰ На верхнем поле листа киноварная помета: 26-е возражение.

²²⁷¹ На верхнем поле листа киноварная помета: на 26-й вопрос и ответ.

²²⁷² На верхнем поле листа киноварная помета: 26-е возражение.

²²⁷³ На верхнем поле листа киноварная помета: на 26-й вопрос и ответ.

²²⁷⁴ Исправлено из: всем.

²²⁷⁵ На верхнем поле листа киноварная помета: 26-е возражение.

²²⁷⁶ На верхнем поле листа киноварная помета: на 26-й вопрос и ответ.

²²⁷⁷ На верхнем поле листа киноварная помета: 26-е возражение.

²²⁷⁸ На верхнем поле листа киноварная помета: на 26-й вопрос и ответ.

²²⁷⁹ На правом поле листа помета: лист 197.

²²⁸⁰ На верхнем поле листа киноварная помета: 26-е возражение.

²²⁸¹ На верхнем поле листа киноварная помета: на 26-й вопрос и ответ.

²²⁸² На верхнем поле листа киноварная помета: 26-е возражение.

Домашняя страница
священника Владимира Кобец