ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (26-7)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

ко же и Давид святый глаголет: Аще оправдания Моя осквернят и заповеди Моя не сохранят, посещу жезлом беззакония их и ранами неправды. И инде рече: Да исчезнут грешницы от земли и беззаконницы, яко не быти им. И паки: Беззаконницы же потребятся вкупе и семя нечестивых потребится. И приточник глаголет: Путие²⁶⁵⁷ нечестивых от земли погибнут, законопреступницы изринутся от нея. И паки: Оружие²⁶⁵⁸ свое очистит, лук свой напряже и уго(л. 557 об.)това²⁶⁵⁹ и, и в нем уготова сосуды смертныя, стрелы своя со горящими содела. Понеже²⁶⁶⁰ звах, и не послушасте Мене, простирах словеса и не внимасте, но отметасте Моя советы и Моих обличений не внимасте. Тем же и Аз вашей погибели посмеюся, порадую же ся всегда, аще приидет вам погибель или яко молва на вы внезапну разорение подобно бури приидет или егда вам приидет печаль и граду обстояние. Будет бо егда призовесте Мя, Аз же не послушаю вас, взыщут Мене злии и не обрящут, возненавидеша бо премудрость и страха Господня не изволиша. Не хотяху бо внимати Моих словес, подражняху бо Моя (л. 558)²⁶⁶¹ обличения, тем же, убо сведят своих путий плоды и своея нечести насытятся. Тако и Исаия глаголет: Яко²⁶⁶² звах я, и не послушаша мене и сотвориша злое предо мною, его же не восхотех изволисте.

Сего ради тако глаголет Господь: Се работающии Ми наядятся, вы же взалчете. Се работающии Ми напитаются, вы же вжаждете. Се работающии Ми возрадуются, вы же посрамистеся. Се работающии Ми возвеселятся в веселии сердца, вы же возописте в болезни сердца вашего и сокрушения духа восплачитеся. Останет бо имя ваше в насыщение избраным Моим, вас же избиет Господь. Сего ради тако рече Господь: Се ярость (л. 558 об.)²⁶⁶³ Моя и прогневание Мое собирается на место то, на мужи и на скоты и на древо страны и на плод земный и возжется и не угаснет. Сия рече Господь силе Израилеве. И паки Исаия²⁶⁶⁴ рече: О людие²⁶⁶⁵ странно грешна, людие полно грехов, племя злое, сынове беззаконнии, остависте Господа и разгневасте святаго Израилева, обратистеся вспять, что и еще уязвляется, прилагающе беззакония: всяка глава в болезнь и всяко сердце в печаль. От ногу и до главы несть в нем целости, ни сатрупу, ни язве, ниже ран гниющих, несть пластыря приложити, ни масла, ни обязания. Земля ваша пуста, гради ваши огнем пожжени, страну вашю пред вами (л. 559)²⁶⁶⁶ чюждии поядают и опустеет разсыпана, яко в разсыпании враг. Плачите²⁶⁶⁷, рече, и рыдайте, иже несть обращен гнев ярости Господня от вас. И будет в день той, рече Господь, погибнет сердце царево и сердца началником, и ужаснутся священницы, и пророцы мыслию вознесутся и рекох: Ох, ох, ох, Господи Боже, еда оболстил еси люди сия. Мир будет вам, и се прииде меч и смерть. И паки ин рече: Рыдайте²⁶⁶⁸, близко есть день Господень и сокрушение от Бога приидет. Сего ради рука разслабеет и всяка душа человеча убоится, и смятутся послы, и болезни приимут я, яко жене раждающи, и поскорбят друг ко другу и ужаснутся, лице их яко пламы пременят. Се бо день (л. 559 об.)²⁶⁶⁹ Господень без целбы грядет ярости и гнева. Положити всю вселенную пусту и грешники погибнут от нея. И рекох: доколе, Господи? Рече ж: Дондеже опустеют города невселением и домове небытием человечим и земля останет пуста. Не²⁶⁷⁰ восхотеша бо закона Господа Саваофа и слово святаго Израилева прогневаша. И возъярися Господь Саваоф гневом на люди Своя, и положи руку Свою на них, и порази их, и разгневася на горы, и быша мертвецы их яко гной посреде пути, и во всех сих не отвратися ярость Его, но и еще руку Его высока. И²⁶⁷¹ аще рекут к Тебе, Господи, изыдем. Речеши к ним: Сия рече Господь, иже к смерти, к смерти, иже к мечю, к мечю, (л. 560)²⁶⁷² иже к гладу, к гладу, иже к пленению, к пленению, и посещю на тех четырми образы. Рече Господь: Меч на заклание, пси на растерзание и птицы небесныя и зверие земли на пожрение и на расхищение. И дам их в погибель всем царьством земным, и не оплачются, ни погребутся, во смятении на лицы земли будут. Понеже взях мир Мой от людий Моих, рече Господь, милости и щедроты, и умрут велицы и мали и не изломят между их стенящих хлеба ко утешению над мертва, и не дадут им пития чаши, ко утешению отца своего и матере. Рать²⁶⁷³ извну с мечем, глад же и смерть изнутри, иже на поли, мечем скончается, сущих же во граде (л. 560 об.)²⁶⁷⁴ глад и смерть скончает. Поищеши мира, и не будет, люто долю та будет, и весть до вести будет. Царь возсетует, и князь облечется в пагубу, и руки людий разслабеют. По путем их сотворю им, суды их отмщу им, и разумеют, яко Аз Господь. И²⁶⁷⁵ будет бежай страха, впадется в пропасть, и излазя ис пропасти, имется в пругле, яко дверие с небесе отверзошася и потрясутся основания земная. Мятежем возмятется земля, преклонит и потрясется земля, аки куща ограды, и аки пивый пьян, сый падется и не возможет стати, соодоле бо им беззаконие.

Таковых зол плачется божественый (л. 561)²⁶⁷⁶, глаголя: О люте мне душе, яко погибе боязливый со земли и исправляющаго в человецех несть. Вси в кровех прятся, койждо их по другу своему зазлят, на злобу руце их уготовляют. Князь просит, а судии мирная словеса глагола, а помысл души его лесть. И отъиму благости их, яко моль ядяй, и ходяй во вреде в день присещения. О люте, о люте, отмщения Твоя приспеша. Ныне будут плачи их, не уповайте во друзех, ни надейтеся в старейшинах. Вскую²⁶⁷⁷ мне указа труды и болезни, усмотрити страсти и безчестия, противу мне бысть суд и судии вземлет. Сего ради разсыплется закон и не изводится до горшения суд, (л. 561 об.)²⁶⁷⁸ яко нечестивый преобидит правдиваго, сего ради изыдет суд укривлен.

Видите²⁶⁷⁹, обидливии, смотрите и чюдитеся, и узрите, и исчезнете, яко дело Аз соделаю во дни ваша, ему же не имати веровати, аще кто исповесть вам. Тако²⁶⁸⁰ и во священном Евангелии пишется о нехранящих заповеди Господни. Он же раб, ведый волю Господина своего, и не сотворь, ниже уготовлся к хотению Его, биен будет много. И паки инде речеся: Не покаряяй же ся Сыну, не узрит жизни, но гнев Божий пребывает на нем. И паки инде рече: Аще речет раб он в сердцы своем, коснит Господин мой приити, и начнет бити рабы и рабыня, ясте же и пити (л. 562)²⁶⁸¹ и упиватися. Приидет Господин раба того в день, в онь же не чает, и в час, в онь же не весть, и разсечет его пол и часть его с неверными положит.

Такожде Господь и о лукавых приставниках, то есть царех, и о судиах неправедных, иже приемше талант, то есть власть, и не по святым законом суд судят, но по своему изволению, якоже написавый суд их показует беззаконие их, по писаному рече: Рабе лукавый, от уст твоих сужду тя. И прочее, иже зде притча Христова явнее покажет. Человек²⁶⁸² некий добра рода иде на страну далече прияти себе царьство и возвратитися. И граждане Его, ненавидяху Его (л. 562 об.)²⁶⁸³ и послаша молитву во след Его, глаголюще: Не хощем Сего да царьствует над нами. И бысть, егда возвратися, приим царьство, рече: Пригласити рабы, обаче враги Моя оны, не хотевшая Мне, да Царь бых был над ними. Приведете семо и изсецете предо Мною. Тако и тем всем сотворит Господь, иже ныне отметаются Божественых Его заповедей и суда в день Судный, по заповеди, глаголющей: Отметаяйся Мене и не приемляй глагол Моих имать судящаго слово, еже заповедах, то судит ему в последний день. Тако и иже отметающиися святых пророк и святых апостол и святых отец и благочестивых царей заповедей и канонов.

Ину²⁶⁸⁴ притчю слышасте. Человек некий (л. 563)²⁶⁸⁵ бе домовит, иже²⁶⁸⁶ насади виноград и оплотом огради его, и ископа в нем точило, и созда столп, и вдаст делателем и отъиде. Егда же приближися время плодом, посла рабы Своя к делателем прияти плоды Его. И емше делатели рабы Его, ового убо биша, ового же убиша, ового же камением побиша. Паки посла ины рабы множайша первых, и сотвориша им такожде. Последи же посла к ним Сына Своего, глаголя: Усрамятся Сына Моего. Делателие же, видевше Сына, реша в себе: Сей есть Наследник, приидите, убием Его и удержим достояние Его. И изведоша вон из винограда и убиша. Егда убо приидет Господин винограда, (л. 563 об.)²⁶⁸⁷ что сотворит делателем тем? Глаголаша Ему: Злых зле погубит, и виноград предаст инем делателем, иже воздадят Ему плоды во времена своя.

Разуместе ли божественную притчю Христову, кто есть Человек нецый? Сам святый Господь Бог. Кто ли делателие? Израилтяне. Кто ли рабы? Пророки, посланыя к ним, их же оваго убо биша, якоже Иеремию, оваго же убиша, якоже Исаию, оваго же камением побиша, якоже Навуфея и прочия. Что же ли сотвори тем дому Владыка, то есть Господь Бог? Злых зле погуби, то есть живот. И где есть тех царьство, но все тако исполнися, якоже пророки прорекоша (л. 564)²⁶⁸⁸ роду тому лукавому, о нем же Исаия прорече: Виноград²⁶⁸⁹ бысть возлюбленному на холме, на месте блазе, и ограждением оградих, и уколих, и насадих лозу избрану, и создах столп среди его, и предточилие ископах в нем, и ждах, да сотворит гроздие, сотвори же терние. Ныне убо возвещу уже вам, что сотворю винограду Моему, отъиму ограждение, и будет на разграбление, и разорю стену его, и будет в попрание. Тако бысть. Тако ж и ины многи рабы посла, святыя апостолы и учителие множайша первых, их же делателие не послушаша и сотвориша такожде, якоже Предтечю Иоанна усекну Ирод, и Петра и Павла Нерон (л. 564 об.)²⁶⁹⁰ и инех инии. Что же сотворивому Владыка? Не се ли? Злых зле погуби и виноград предаст инем делателем, тако и по сих Гречестии царие и инех царьств мнози, елицы пожиша по Божественым заповедем и святыя преданыя правила святых апостол и святых отец сохраняли, в мире скончалися и Царьствию Небесному наследницы быша. А елицы беззаконно согрешиша, беззаконно и погибоша, и царьства их запустеша.

Не сия ли вся збышася на нас по писаному: Соберу на них злая, и стрелы Моя скончаю в них. И по мале.

Не сия ли вся собрашася у Мене и запечатлешася в сокровищих Моих? В день отмщения воздам, (л. 565)²⁶⁹¹ во время, внегда соблазнится нога их, яко близ день погибели их. И предстоят готовая вам, яко поострю яко молнию меч Мой и приимет суд рука Моя, и воздам месть врагом и ненавидящим Мя воздам. Упою стрелы Моя от крове, и меч Мой снесть мяса. Тогда увидите, яко Аз есмь Бог и несть разве Мене.

Не тако ли все, елико вышеписаная на нас збышася? Не быша ли морове велицы во царьствующем граде Москве и во всех градех лютою язвою и неисцелною? Не возбоя ли ся сердце царево, егда мору бывшу, царице же на Москве со царевичем Алексием и со царевнами, и не веде, что сотворити и камо бежати? Не бысть ли (л. 565 об.)²⁶⁹² князи в пагубу, якоже князь Михаил Пронской с товарыщи, в мор на Москве умре? И от всенароднаго множества не ослабели всяка рука, якоже князь Алексием Трубецким товарыщи два князь Семен Пожарской и Львов и прочие. И елико со инеми воеводы, с Васильем Шереметевым и князь Иваном Хованским коликия тмы скончашася мором по градом и по селом и по деревням и на войне, не убояша ли ся всяка душа человечья? Не смятоша ли ся послы, от царя посылаеми до Москвы в мор и от Москвы до царя? Не прияша ли болезни, яко жена рождающая? Не поболеша ли друг о друзе? Не ужаснуша ли ся ужасом великим? (л. 566)²⁶⁹³ Не быша ли лице их яко пламы? Не быша ли день Господень без целбы полн ярости и гнева? Не положи ли Господь Москву и окрестныя грады пусты? Не погуби ли грешники от них? Не разшири ли ад души своея и не разверзе ли уст своих? Не снидоша ли славнии и велицый, богатии и нищии, о них же множестве несть время зде и списати? Их же число един Господь Бог весть. Не все ли се быша по писаному: Псом и свиниям на разтерзание, птицам небесным и зверем земным на пожрение и разхищение? Кто тех оплака? Кто же ли погребе? Никто же. Не се ли всех отдаде Господь в погибель всем царьством земным, якоже от всех (л. 566 об.)²⁶⁹⁴ слышится, от тамо приходящих, яко несть дому во странах поганских, в нем же не бе христиана неволника, то есть полоненника. И сбышася все на глаголющих, иже реша: Да наследим себе святилище Божие. Боже мой, положи я яко коло, яко трость пред лицем ветра, яко огнь, попаляя и дубравы, яко пламень, пожигая и горы. Тако поженеши я бурею Твоею и гневом Твоим смятеши я. Исполни лица их безчестия и взыщут имени Твоего, Господи. Да постыдятся и смятутся в век века, и посрамятся и погибнут, и да познают, яко имя Тебе Господь. Ты един Вышний по всей земли.

(л. 567)²⁶⁹⁵ И паки во инем псалме: Бог²⁶⁹⁶ отмщений Господь. Бог отмщений не обинулся есть. Вознесися судяй земли, воздаждь воздаяние гордым. Доколе, Господи, грешницы, доколе грещницы восхвалятся? Провещают и возглаголют неправду, возглаголют вси, делающии беззаконие. Люди Твоя, Господи, смириша и достояние Твое озлобиша. Вдовицу и сира умориша и пришелца убиша и реша: Не узрит Господь, ниже разумеет Бог Ияковль. Разумейте же, безумнии в людех и буии, некогда умудритеся, яко не отринет Господь людей своих и достояния своего не оставит. Господь судит людем Своим и о рабех Своих умолится. И²⁶⁹⁷ воста, яко спя Господь, (л. 567 об.)²⁶⁹⁸ яко силен и шумен от вина, и порази враги Своя вспять, поношение вечное даде им. И смирися человек и обезчестися муж, и очи высокоглядающии обнизитася. Обаче²⁶⁹⁹ за лщения их положил еси им злая, низложил я еси, внегда разгордешася. Како быша в запустение внезапу, изчезоша и погибоша за беззаконие свое. И²⁷⁰⁰ во всех сих не отвратися ярость Его, но и еще рука Его высока.

Тако и оставшим злотворящим Божественое Писание претит, глаголя: Зане²⁷⁰¹ его же ты поразил еси, тии погнаша и к болезни язв моих приложиша. Приложи беззаконие к беззаконию их, да не внидут в правду Твою, (л. 568)²⁷⁰² да потребятся от книг живущих и с праведными да не пишутся.

Ныне же к тебе обращаемся, лжи предтеча, списателю неправде и беззаконию. Ты же ми отвещай. Пишешь в своем сложении на листе 63-м: И по государеву цареву и великаго князя Алексия Михайловича всеа Русии указу бояре князь Никита Иванович Одоевской с товарыщи выписал ис правил святых апостол и святых отец и из градских законов Греческих царей, и из старых судебников прежних великих государей и прочее. И что ис правил выписал, ис которых правил? Се ли, еже пишешь в десятей главе, в первой статие о суде? Суд государя царя и великаго (л. 568 об.)²⁷⁰³ князя Алексия Михайловичя всеа Русии судит бояром и околничим и думным людем и диаком и всяким приказным людем и судьям и всякая росправа делает всем людем Московскаго царьства от болшаго и до меншаго чину в правду.

Отвещай, в которых то правилех написано, что суд великаго государя царя, а не Божий? Мы же ти рехом выше и ныне глаголем, яко суд Божий есть, и о сем доволно предь написахом. И царие слуги суть Божие, яко же приточник глаголет: Слышисте²⁷⁰⁴ убо царие и разумейте, и научитеся судии концем земли. Внушите содержащии множества и гордящиися о на(л. 569)родех²⁷⁰⁵ язык, яко дана есть от Господа держава вам и сила от Вышняго, иже истяжет дела ваша и помышления испытает, яко слузи суще Царьства Его, и не судисте право, ни сохранисте закона, ниже по воли Божии ходисте. Тако и Давид галголет: И²⁷⁰⁶ ныне царие работайте Господеви со страхом. И прочее. А еже работати Господеви рабство знаменует, и сам о себе глаголет, яко: Аз раб Твой есмь. И инде глаголет: Твой есмь аз, спаси мя.

Ты же како смел еси в своем ложном и проклятом писании в десятей главе в 25-й статье: Да²⁷⁰⁷ суда же не судить и никаких дел в приказех не делать, опричь великих царьственных дел (л. 569 об.)²⁷⁰⁸ в день Рожества Христова, в день святаго Богоявления и в ыныя Господьския праздники, Сырная неделя, Первая неделя Великаго Поста, Страстная неделя, седмь дней по Пасце, да в которой день приспеет праздник, день рождения государя царя и великаго князя Алексия Михайловича всеа Русии и его благоверныя царицы и великия княгини Марии Ильиничны, и их благородных чад. О пребеззаконниче и злобесный человече, како не устыдеся, ни устрашися? Беси того исповедаху Сына Божия и Бога, глаголаху: Почто еси Сыне Божий пришел еси прежде времени мучить нас? А ты, злострастный человече, не исповеда того Бога быти и Господа (л. 570 )²⁷⁰⁹ нашего Иисуса Христа, аки проста человека, пишешь: В воскресной день, в день Рожества Христова. Ибо Христи мнози, и царие и священницы Христи, то есть помазанники и лжехристи, якоже Иисус Христос глаголет и апостоли: Мнози бо лжехристи изыдоша в мир и антихристи мнози, а Христос Бог наш един есть. Не усохл бы скверный твой язык изглаголати или написати: Рожество Господа Бога и Спаса нашего Иисуса Христа или святое Богоявление Господа Бога и Спаса нашего Иисуса Христа²⁷¹⁰, и ниже праздник нарече, но день. А яже о царе, да в который день приспеет праздник, день рождения государя царя и прочее. Такожде и о царице и о них чадех. Которыя праздники, которое таинство? Развее что любострастно и человеческо, и во всем при(л. 570 об.)подобил²⁷¹¹ еси человеков Богу, но и предпочтеннее Бога. А яже о таинствах Божиих, то есть о Рожестве Господа Бога и Спаса нашего Иисуса Христа и о Святем Его Богоявлении и Воскресении, послушай богословнейшаго Григория, яже на Пасху в первем слове и стихе.

О Воскресении Господа Бога и Спаса нашего Иисуса Христа.

Воскресения²⁷¹² день и начало дейсно. Просветимся торжеством и друг друга обымем, и рцем, братие, ненавидящим нас, не яко любве ради что сотворшим или пострадавшим, простим вся с покорением, дадим милость друг другу.

Приидите прочее о светлем Празднице сем и торжестве, духовне просветимся, еже одеянии добродетели, (л. 571)²⁷¹³ и друг друга приимем, показующе всем любовно и братолюбовно и союзно ко единству, рцем братие ненавидящим нас. Сие пророчества Исаина прият Богослов, глаголющее: Рцыте ненавидящим вас и мерзящим: братия наша есте. Ум же слову сицев есть, яко и тии, иже ненавидят нас. Рцем же, о братие, еже есть, призовем их именем братие. Се убо указ благости произволения, к сим подобает бо и врагом глаголати: о братие.

Таинство²⁷¹⁴ праздник многащи Богослов именует, заеже в сих таинства смотрения спасения нашего чюдеса быша. Таинствия ж суть, заеже суть неверным, ни бо подобает к неверным таинственнейша праздник глаголати и по Владычнем слове: Не лепо (л. 571 об.)²⁷¹⁵ есть просыпати бисер пред свиниами.

Пасха²⁷¹⁶, Господня Пасха, и паки реку Пасха, честь Святей Троицы, Ты нам праздником праздник и торжеством торжество, толико превозходящим вся, не человеческия точию, но и низу грядущыя, но уже и тыя Христовы и о Нем сотворяемыя елико звезды солнце.

Праздник же праздником Пасху нарицает и Торжество торжеств, яко и Святейший праздник. Тако обычай убо имяху и древнии, яже честнейшая вещей сице именовати, юножска и брачна и населна, по ветхих творяще та глаголаху. Праздноваху тий день той, егда дитя раждашеся или брак творяху или храм созидаху, летному кругу день (л. 572)²⁷¹⁷ носящу, якоже святая святых, и песни песней. Аще не убы было воскресние, не бы и рождество, ниже крещение, ниже и на Христова таинства хотяхуся известити и уверити. Кои же человечестии праздницы, по некоих убо праздницы святых? Поистине же, яже юношска и брачна и населна и елика сим подобна. Таковыи праздницы низу грядут доле и на землю возвращаеми. Святых же праздницы к Богу возносятся и восходят. Не точию человеческия праздники праздник Пасха побеждает и превосходит, но и самыя Христовыя толико покрывает, елико и звезды солнце. Сице пресветляется дне благодать. Прочее ж о Воскресении Христа Бога нашего торжестве и таинстве насладитися, прочти первое (л. 572 об.)²⁷¹⁸ и второе слово на Святую Пасху.

А яже о Рожестве Господа Бога и Спаса нашего Иисуса Христа, никоторые чести творя, пишешь. Послушай того ж богословнейшаго во осмом слове, яже на Рожество Христово.

Христос²⁷¹⁹ раждается, славите, Христос с небесе, срящите, Христос на земли, возноситесь. Пойте Господеви вся земля и да обоя совокуплше, реку: Да веселятся небеса и радуется земля за небеснаго таж земленаго, Христос во плоти, трепетом и радостию радуйтеся, трепетом греха ради, радостию же аз упование. Христос от Девы, жены девствуйте, да Христу будете матери. Кто не поклоняется Исконному, кто не славит Безконечнаго и прочее. Сего²⁷²⁰ ради убо празднуем не торжественне, но божественне, не мирски, (л. 573)²⁷²¹ но премирне, не нашая. Не яже немощи, но яже врачевания, не яже зданию, но яже обновлению, будет же се како не преддверия венчаим, не лики составим, не украсим стогны, не око упитеим, не слух огласим, не ухание возвеселим, не вкус любодействуим, не осяжением порадуемся предручными в злобу путевы и входы греха, не одеянием умягчимся, мягким же и растлевающим и ему же добрейшее непотребство, не каменей прозрачием, не злата светенми, не румянством пред бренми лстящих естественную доброту и на образ умышленных, не игры и пиянствы, им же лжа и нечестна вем сопряжена, понеже злых учителей зла учения, паче ж злых семян злы плодове.

(л. 573 об.)²⁷²² Сего ради убо празднуем, рече, не яко обычай в людских торжествах, пищею и гощением и того красованием, но яко любезно есть Богови и духовно. Не мирски, рекше сластолюбиве, и якоже миродержец хощет, но премирне и ангелски, не нашая, рекше ко угождению нашему, но яже ко угождению Христову, нашему сроднику по человечеству, Владыце же по Божестве, не яже немощи, но яже врачевания. Подобает убо подобне празднику праздновати и аще убо празднуем, от них же изнемогохом, подобаше праздновати пиянством, немощь бо пиянство и блудство. Елма же сопротивно творим и празднуем, ими же уврачевани быхом, праздновати достоит воздержанием, якоже врачевание (л. 574)²⁷²³ воздержание к душевному врачевству сосвязуя, не яже здания, но яже наздания и обновления, при телеснем убо рождестве телесна вся, и здание и еже того ради торжество. Назданию же духовну сущу и божественну духовне и божественне достоит торжествовати. Здание убо зде не первее глаголет, в ня же Христос перст взем от земли, рукама Своима человека вначале созда, но рождеством друг друга приятием, им же создаемся человецы естественне в материих ложеснах. Будет же се како и коим образом исправити имамы, убеждаеми, еже торжествовати духовне, рекше не ветвьми садовными, еже обыкоша нецыи творити в праздники, венчанми и преддверия, ниже еже (л. 574 об.)²⁷²⁴ разливателное и радователное, лики составим вне церкви, ниже еже людско вяще есть, украсим стогны, повешающе всякия виды сокровищ ко украшению грядущих на торжество, ниже еже есть страстнейше очи упитем безместны чюдодейств указанми или телесне воззренми, сласти жало влагающих, питение бо и наслаждение очима, еже пытливе зрети ни в чесом прикладная по всем. Начен же Богослов и считати, чювствия пять глаголет. И первие убо царьственнейше зрение, по нем же слух повелевает не ушима растлевателно пение душ удержавати, не свободна бо страсть и охуждение от таковаго, (л. 575)²⁷²⁵ нецый бо убо от свирепения неистовствуются и скачют, яко беснуеми являются. Возвеселяет и разслабляет обоняние, воня добрых благоуханий, блудим же вкусом, егда сластем пищ едамы той. Радость же осязания, рекше красования, еже страстне телес прикасатися и что убо рещи имать кто о еже не подобати, яже во осяжении и вкусе сладости гонити или яко понуждают, иже всия упразднившихся жити якоже скоти безсловесни к чреву и коя же под ним преклоншихся. И просто чювствия не пестуема добре, убодне суть путие в злобу и входы греха, теми бо приидохом в злобу и теми в душю грех. Не одеянием мягким умягчимся, еже (л. 575 об.)²⁷²⁶ растлевает и в поползновение тело влечет обоима сима, и избыточеством и мягкостию. Сему ж одеяние изрядное, еже деяти тому праздну щажения ради и не в потребу иметись, добрейшая бо одеяния в ковчежце имамы положена непотребна, ниже шар у премудренми да приемлем, подписующе лица псимитом и кмсаром и иными блудническими сотренми, яже лстят естественную доброту, лицемерующе ту уподоблением и на образ умышлена быша. Потребляют бо зраки и скрывают вид, его ж написа естественный живописец Бог, и еще благообразне да ходим, якоже заповелевает апостол, не игранми и пиянствы и не ложи скверными, добре ж совокупи (л. 576)²⁷²⁷ и пиянствам, ложа и блуды от тех бо раждаются. Играяй бо упивается, упив же ся, к ложу зрит. Сей же блудит вином к беззаконному смешению и сластем, яко бо злии учителие игра и пиянство, научают злым учением, ложу и блуду, паче ж понеже еже учити одушевленых истейше есть. Свойственнейше убо есть глаголати, яко семя убо есть их пиянство, возделание же того и плод блуд.

Паки²⁷²⁸ Иисус мой и паки Таинство, таинство непрелестно, ниже не украшено, ниже еллинская лсти и пиянства. Тако бо аз нарицаю онех честная, мню же и благосмысленых (л. 576 об.)²⁷²⁹ койждо, но Таинство высоко же и Божествено и вышния светлости Ходатай, святый бо просвещения день, в онь же собрахомся и еже праздновати сподобихомся днесь. И прочее.

Таинство²⁷³⁰ же Богослов праздник именует не единою же, но многажды, любве ради, якоже и о ненавидимем случается, его же ни помянути хощем отнюдь. Есть бо, рече, Таинство се не лестно, ни ложно, ни пагубно, якоже убо еллинская празднования лестна и ложна, паче же рещи срамна и скверна. Наше же Таинство высоко и безстрастно и ходатайствено вышния светлости. И прочее.

Время²⁷³¹ по рождению, родимся свыше, время обновлению, в перваго Адама (л. 577)²⁷³² облецемся, не пребудем, в них же есмы, но еже бехом будем.

Рождение бывает человеком от человек, порождение же от Бога. Тем же убо отложше плотское рождение, припряженое тлению, породимся свыше от Небесе. Небесно бо есть, еже во крещении Духом Святым бываемо, сим бо и первое рождение поновляем.

Еллинско²⁷³³ таинство, их же блядь мне, всяка треба и таинство бесовско изобретение темно, и мысли и деяния зломудрена, летом помогаемо и баснею крадомо. И прочее.

Вчера²⁷³⁴ светлый просвещения день праздновавше, ибо подобаше радостна положити спасению нашему и вящше паче брачных и рождественых имени прозвания любо (л. 577 об.) телесным²⁷³⁵, юностна же и населна и вселетна, и елика ж ина торжествуют человецы днесь о Крещении, в мале да речем, и от того нам сущей благодати, аще и вчера нас слово прейде, времени прешедшу, к сему ж и слова обилие бегающе. И прочее.

Толкование.

Вчера, рече, светлый просвещения день праздновахом, ибо и радоватися подобно бяше о спасении нашем и то праздновати паче, от еже плотолюбцы празднуют день рождения своего, рекше, в онь же родися, и браки, яко оженися, и имянины, егда имя наречено, и постриги, и прочая плотския торжества. Три²⁷³⁶ убо рождения нам весть Слово, еже от плоти, еже от крещения, еже от воскресения, (л. 578)²⁷³⁷ сих же ово есть нощно и страстно, ово же духовно и свободно и решително страстем.

Три убо сия рождения, яже глаголет Богослов, праве о сих и Екклесиаст сповествует. Едино от телес, еже друг от друга раждаяхуся²⁷³⁸, второе от крещения по рождение, третие от воскресения. И еже убо от телес нощно и темно есть, гресно ту бо и сочетание брака паче нощию бывает, яко рабско суще и яко²⁷³⁹ страстми владомо, от сластолюбия бо брак и сочетание, се бо в беззаконии зачат есмь, и во гресех роди мя мати моя.

Разсмотри, богоборче, яже о праздниках таинства Воскресения Господа Бога и Спаса нашего Иисуса Христа и святаго Его Рождества и святаго просвещения таинства и рождество царьско, (л. 578 об.)²⁷⁴⁰ о нем же Давид свидетельствова выше сего, и которое сочетание свету ко тме, по божественному апостолу и правде к беззаконию, еже ты, зломудре, предпочте день рождения царя и царицы и чад их, паче дней таинственных Христовых, глаголю святаго Его Воскресения и Рождества и Богоявления. Ини же праздники тех нарече таинства ради, якоже выше изообрази богословнейший Григорий, но день Рождества Христова и прочая. А яко о царьском рождества праздник и которой праздник или таинство? Разсмотри усердно, и еще ти к сим приложим.

Вси²⁷⁴¹ убо Владычнии²⁷⁴² праздницы и божественная торжества таинства показуют и являют перваго (л. 579)²⁷⁴³ пришествия плотскаго Господа Бога и Спаса нашего Иисуса Христа, сиречь, яко родился есть и яко крестился есть, яко преобразися, яко распялся есть, яко погребеся, яко воскресе в третий день и яко вознесеся.

1 2 3 4 5 6 ... 8 9 10 11 12 13 14 15 16 17 18 19 20

<<< Предыдущая страница ... Следующая страница >>>

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 ... 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

²⁶⁵⁷ На правом поле листа помета: Притч. 2.

²⁶⁵⁸ На правом поле листа помета: Псалом 9.

²⁶⁵⁹ На верхнем поле листа киноварная помета: 26-е возражение.

²⁶⁶⁰ На левом поле листа помета: Притч. 1; Исаия 65 и 66; Иерем. 7.

²⁶⁶¹ На верхнем поле листа киноварная помета: на 26-й вопрос и ответ.

²⁶⁶² На правом поле листа помета: Исаия 65 и 66; Иерем. 7.

²⁶⁶³ На верхнем поле листа киноварная помета: 26-е возражение.

²⁶⁶⁴ Написано между строк.

²⁶⁶⁵ На левом поле листа помета: Исаия 1.

²⁶⁶⁶ На верхнем поле листа киноварная помета: на 26-й вопрос и ответ.

²⁶⁶⁷ На правом поле листа помета: Иерем. 4.

²⁶⁶⁸ На правом поле листа помета: Исаия 13.

²⁶⁶⁹ На верхнем поле листа киноварная помета: 26-е возражение.

²⁶⁷⁰ На левом поле листа помета: Исаия 5.

²⁶⁷¹ На правом поле листа помета: Захар. 11.

²⁶⁷² На верхнем поле листа киноварная помета: на 26-й вопрос и ответ.

²⁶⁷³ На правом поле листа помета: Иезек. 7.

²⁶⁷⁴ На верхнем поле листа киноварная помета: 26-е возражение.

²⁶⁷⁵ На левом поле листа помета: Иерем. 48.

²⁶⁷⁶ На верхнем поле листа киноварная помета: на 26-й вопрос и ответ.

²⁶⁷⁷ На правом поле листа помета: Аввакум 1.

²⁶⁷⁸ На верхнем поле листа киноварная помета: 26-е возражение.

²⁶⁷⁹ На левом поле листа помета: Деян. 13.

²⁶⁸⁰ На левом поле листа помета: Лука 65.

²⁶⁸¹ На верхнем поле листа киноварная помета: на 26-й вопрос и ответ.

²⁶⁸² На правом поле листа помета: Матф. 23; Лука 19.

²⁶⁸³ На верхнем поле листа киноварная помета: 26-е возражение.

²⁶⁸⁴ На левом поле листа помета: Матф. 21.

²⁶⁸⁵ На верхнем поле листа киноварная помета: на 26-й вопрос и ответ.

²⁶⁸⁶ На правом поле листа помета: Марк 12. Исаия 5; Иерем. 2; Лука 20.

²⁶⁸⁷ На верхнем поле листа киноварная помета: 26-е возражение.

²⁶⁸⁸ На верхнем поле листа киноварная помета: на 26-й вопрос и ответ.

²⁶⁸⁹ На правом поле листа помета: Исаия 10.

²⁶⁹⁰ На верхнем поле листа киноварная помета: 26-е возражение.

²⁶⁹¹ На верхнем поле листа киноварная помета: на 26-й вопрос и ответ.

²⁶⁹² На верхнем поле листа киноварная помета: 26-е возражение.

²⁶⁹³ На верхнем поле листа киноварная помета: на 26-й вопрос и ответ.

²⁶⁹⁴ На верхнем поле листа киноварная помета: 26-е возражение.

²⁶⁹⁵ На верхнем поле листа киноварная помета: на 26-й вопрос и ответ.

²⁶⁹⁶ На правом поле листа помета: Псалом 93.

²⁶⁹⁷ На правом поле листа помета: Псалом 77.

²⁶⁹⁸ На верхнем поле листа киноварная помета: 26-е возражение.

²⁶⁹⁹ На левом поле листа помета: Псалом 73.

²⁷⁰⁰ На левом поле листа помета: Исаия.

²⁷⁰¹ На левом поле листа помета: Псалом 68.

²⁷⁰² На верхнем поле листа киноварная помета: на 26-й вопрос и ответ.

²⁷⁰³ На верхнем поле листа киноварная помета: 26-е возражение.

²⁷⁰⁴ На левом поле листа помета: Мудр. 6; к Рим. 13; 1 Петр 10; Тит 3; Сирах 17.

²⁷⁰⁵ На верхнем поле листа киноварная помета: на 26-й вопрос и ответ.

²⁷⁰⁶ На правом поле листа помета: Псалом 2.

²⁷⁰⁷ На правом поле листа помета: лист 100.

²⁷⁰⁸ На верхнем поле листа киноварная помета: 26-е возражение.

²⁷⁰⁹ На верхнем поле листа киноварная помета: на 26-й вопрос и ответ.

²⁷¹⁰ Слова «святое Богоявление Господа Бога и Спаса нашего Иисуса Христа» написаны тем же почерком на правом поле листа.

²⁷¹¹ На верхнем поле листа киноварная помета: 26-е возражение.

²⁷¹² На левом поле листа помета: Григ. Богос. 1 на Пасху, стих 1.

²⁷¹³ На верхнем поле листа киноварная помета: на 26-й вопрос и ответ.

²⁷¹⁴ На правом поле листа помета: Григ. Богос. на Пасху, 1 слово, стих 3, толков.

²⁷¹⁵ На верхнем поле листа киноварная помета: 26-е возражение.

²⁷¹⁶ На левом поле листа помета: 2 слово на Пасху, стих 2, толкован.

²⁷¹⁷ На верхнем поле листа киноварная помета: на 26-й вопрос и ответ.

²⁷¹⁸ На верхнем поле листа киноварная помета: 26-е возражение.

²⁷¹⁹ На левом поле листа помета: Григ. Богосл. слово 8, стих 1.

²⁷²⁰ На левом поле листа помета: Богосл. того ж слова стих 7.

²⁷²¹ На верхнем поле листа киноварная помета: на 26-й вопрос и ответ.

²⁷²² На верхнем поле листа киноварная помета: 26-е возражение.

²⁷²³ На верхнем поле листа киноварная помета: на 26-й вопрос и ответ.

²⁷²⁴ На верхнем поле листа киноварная помета: 26-е возражение.

²⁷²⁵ На верхнем поле листа киноварная помета: на 26-й вопрос и ответ.

²⁷²⁶ На верхнем поле листа киноварная помета: 26-е возражение.

²⁷²⁷ На верхнем поле листа киноварная помета: на 26-й вопрос и ответ.

²⁷²⁸ На правом поле листа помета: Григор. Богосл. 10, слово на Крещение, стих 1.

²⁷²⁹ На верхнем поле листа киноварная помета: 26-е возражение.

²⁷³⁰ На левом поле листа помета: перваго стиха толкован.

²⁷³¹ На левом поле листа помета: стих 2.

²⁷³² На верхнем поле листа киноварная помета: на 26-й вопрос и ответ.

²⁷³³ На правом поле листа помета: того слова стих 3.

²⁷³⁴ На правом поле листа помета: втораго слова на Крещении стих 1.

²⁷³⁵ На верхнем поле листа киноварная помета: 26-е возражение.

²⁷³⁶ На левом поле листа помета: Богосл. 11 слово, стих 2.

²⁷³⁷ На верхнем поле листа киноварная помета: на 26-й вопрос и ответ.

²⁷³⁸ Исправлено из: раждахуся.

²⁷³⁹ Вписано тем же почерком между строк.

²⁷⁴⁰ На верхнем поле листа киноварная помета: 26-е возражение.

²⁷⁴¹ На левом поле листа помета: Еванг. неделное на Преображ. Христово слово 75, лист 515.

²⁷⁴² Вписано тем же почерком между строк.

²⁷⁴³ На верхнем поле листа киноварная помета: на 26-й вопрос и ответ.

Домашняя страница
священника Владимира Кобец