ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (26-9)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

О брани ангелов и бесов и о низпадении сатанине, зачало 34.

И²⁸⁷¹ бысть брань на небеси²⁸⁷², Михаил и ангели Его брань сотвориша на змия. И²⁸⁷³ змий брася и аггели его и не возмогоша, ниже место их обретеся к тому на небеси.

(л. 602 об.)²⁸⁷⁴ И сия мощно приложити²⁸⁷⁵ и к первому диаволю²⁸⁷⁶ испадению от ангелскаго чина за гордыню и зависть и во²⁸⁷⁷ убиение Владычным крестом, егда якоже глаголет Господь²⁸⁷⁸: Князь мира сего осужден есть и от древняго мучителства извержен есть. Его же гордыню и кичение Божественым ангелом, купно с ними Архистратигу Михаилу, не терпящим. В лепоту того своего си спребывания извергоша первее, якоже глаголет Иезекииль, яко от херувимов извержен бысть той из среды огненых камений, из небесных, мню, чинов, занеже обретошася в нем беззакония и неправды. В пришествии ж Христове служащии Ему, после искушения (л. 603)²⁸⁷⁹ аки обезчещена раба паки возгнушашася. Вестно же се буди, якоже отцем взмнеся по содетелстве чювственнаго мира²⁸⁸⁰, сице гордостию и завистию низвержен бысть бездушному первее вверен быв началству, якоже глаголет апостол²⁸⁸¹.

пакий же такожде наречение некоим от них, сиречь от древних Божественых ангел²⁸⁸², и строением окрест земля даде владети и началствовати, и добре началствовати испоручись. И по сих глаголет, но ни во что ж случися скончатися их чину, и свержен бысть змий велий, уж²⁸⁸³ древний, нарицаемый²⁸⁸⁴ диавол и сатана, прелщаяй всю вселенную. И свержен бысть на землю и аггели его с ним (л. 603 об.)²⁸⁸⁵ свержени быша. И свержен бысть змий велий на землю в лепоту. Не стерпе бо небо земнаго мудрования, зане свету тма не обещителна²⁸⁸⁶. Аще же со Арфром²⁸⁸⁷ полагается <...>²⁸⁸⁸ сатана, не яко ин сый от диавола, аще и лежит по превозходному. Тожде диавол иже сатана, но яко двема нарицаемый²⁸⁸⁹, ово убо заеже оболгати и оклеветати добродетели и сих рачителя и самаго того Бога человеком, якоже Адаму²⁸⁹⁰ его завистника подписа, ово же, яко противник²⁸⁹¹ Владыце и рабом Его. Вестно же буди, яко не тако местное по кресте бысть диаволе низпадение, якоже прежднее немощию праотец, но вконец сокрушением²⁸⁹², якоже (л. 604)²⁸⁹³ и сам диавол²⁸⁹⁴ великому Антонию исповеда, яко псаломское слово на нем исполнися. Вражия²⁸⁹⁵ оружия оскудеша вконец. Испадение убо его есть и лукавых его начинаний и покушений отвержение и разорение со извержением с небес и своего си совершенне началства, якоже речеся. Глаголано же бысть блаженным Юстином²⁸⁹⁶, философом и мучеником, яко диавол по пришествии Христове и по ответе нань в геену наипаче хулником будет, аще и первее не тако безстуднее Бога похули. Тем же о нем праволучне речеся: Сердце²⁸⁹⁷ его отвердело яко камень, зане ослабленое и неутружденое лукавства, аще же чаяние муки лука(л. 604 об.)внейшаго²⁸⁹⁸ того содела, то како мучайся или сам или делателие его в геенне, искушением огненным скверн греховных отмыются.

Сего же не получивше, како имети будут конец муки, по суемудреным еретиком: И слышах глас велий на небеси, глаголющ: Ныне бысть спасение и сила и царьство Бога нашего и область Христа Его, яко низвержен бысть оскорбитель²⁸⁹⁹ братий наших, оглаголуяй их пред Богом нашим день и нощь, яко низвержен бысть оглаголник братий наших. Оглаголение и клевета яже на человеком диавола, еже есть, именова, якоже речеся: Веселят же ся ангели о извержении сего. Ни²⁹⁰⁰ едина бо часть верному с неверным.

(л. 605)²⁹⁰¹ И²⁹⁰² тии победиша того за кровь Агнчю и за слово свидетельства своего и не возлюбиша²⁹⁰³ душа свою до смерти. Сего²⁹⁰⁴ ради веселитеся небеса и живущии в них. Горе земли и морю, зане сниде диавол к вам, велию имеяй ярость, ведый, яко мало время имать. И тии победиша его за кровь Агнчю и оглаголуемии от него глаголетстии, но клеветуемии якоже Иов, со всеми человеки покаряющимися и верующими ему, обаче победиша и по Христе страданиями. А яко веселятся горния силы о падении его и печалуют о навете его на истаявшыя и присохшыя к земным, достоверно есть, ибо богоподражательно. Горе же живущим на земли (л. 605 об.)²⁹⁰⁵ и на море, сиречь имущим жителство на небеси, но на земли. Мнози бо от сущих на земли врага побеждают и победят, аще и множае ныне подвизающияся ярящася за близкость своего мучения²⁹⁰⁶. Отнюду же нуждно есть мудрствующим земная и плавающимся на море житейстем, зде бедником страстным быти и окаянным и умилным.

Како змий гоняй Церковь не престает.

И²⁹⁰⁷ егда виде змий, яко низложен²⁹⁰⁸ бысть на землю, гоняше Жену, яже роди²⁹⁰⁹ мужеский пол. И дане бысте Жене две крыле²⁹¹⁰ орла великаго да летит в пустыню на место Ея, яко да питается тамо время и времена и полвремене от лица ужева²⁹¹¹. (л. 606)²⁹¹² Егда глаголет диавол Христу²⁹¹³ приражся по крещении победися и к святым апостолом вооружився, посрамися, видев я смертию жизнь обретшыя, и яко уж на земли обращатися и витися и землю ясти осужден бысть, сиречь земная мудрования или помышления. Тогда паки начат Церкви гонити, мужский пол, Божий люд, сластми не ослабленый, родившую и раждающую. Но изначала Ей к Богу и ближнему любовь и заступающии и пособляющии нас ради Распятаго промысл дан бысть и два Завета²⁹¹⁴, ими же всяческии крыле орле занаменуются, яко да сима высоко летающи в пустыню. Всякоя (л. 606 об.)²⁹¹⁵ прохладныя сладости жителством питается присно убо, в пришествии же антихристове наипаче. Ему же державствовати реченое время, полтретья лета на мнозе писано бысть. В нем же сиречь времени и по чювственней пустыни в горах и пропастех и вертепех крыющися мощно, яко сего убежать. И²⁹¹⁶ изверже уж²⁹¹⁷ из уст своих за Женою воду яко реку, да сию сотворит рекою похищеную. И²⁹¹⁸ поможе земля Жене и отверзе земля уста своя и поглоти реку, юже изверже дракон²⁹¹⁹ из уст своих. И изверже уж из уст своих за Женою воду яко реку, бежащии, (л. 607)²⁹²⁰ глаголет, Церкви²⁹²¹ в места непроходимыя и безводныя от находа прелестнича из уст своих, яве от повеления своего, за Нею мещет воду аки реку, сиречь безбожных мужей или лукавых бесов, или различных искушений множество на Ню изыдет, яко да поработит Ю. Земля же²⁹²², глаголет, поможе Ей идти долготою путя и безводием и сухотою, стремление лукавых удержующи и реку, яже от искушений. Сего ради поглощающи или смиреномудрием святых, истино и право глаголющих «аз есмь земля и пепел»²⁹²³, вся сети диаволя упраздняющы, ничто же бо²⁹²⁴, якоже божественному Антонию от ангела явленно есть, (л. 607 об.)²⁹²⁵ диаволя силы тако сокрушает и ссецает, якоже смирение. И разгневася змий на Жену и²⁹²⁶ отъиде сотворити с прочими семене Ея, соблюдающими заповеди Божия и ищущыми свидетельство Христово²⁹²⁷. И отъиде змий сотворити брань с прочими, извычныя и избраныя церковныя учителие глаголет, и презревшия землю к беде преставльшияся в пустыню. Аще сия погрешит антихрист, но воинствующыя Христови в мире, изнесет, глаголет, брань. Яко да якоже земным прахом стропотно раздражающым елея слизкость²⁹²⁸, житейскими, глаголю, вещми и неудобствы. Сия удобь уловляемыя обрет, превратит (л. 608)²⁹²⁹ мнози же и от сих, за еже преискрене возлюбиша Христа, победят Его.

О ангеле, проповедающем приближение будущаго суда.

И²⁹³⁰ видех²⁹³¹ другаго ангела, парящаго посреде небеси, имуща Евангелие вечное, идуща благовестити седящим на земли и на всяк народ и колено и²⁹³² язык и люд, глаголяй²⁹³³ гласом велиим: Бойтеся²⁹³⁴ Бога и дадите Ему славу, яко прииде час суда Его. И поклонитеся²⁹³⁵ сотворшему небо и землю и море и источники водныя. Средонебесие чюдне высокое являет и еже небесну быти явльшуся ангелу, свыше послану, к еже от земля человеки ввести чрез свое посредство (л. 608 об.)²⁹³⁶ на небеса своим си ходатайством богоподражателне, тако яко да соединится тело церковное Христу, главе нашей. Вечное же Евангелие, еже от века сие у Бога уставлено и назнаменано бе, глаголет же сие: Бога убо боятися, не бояти же ся антихриста²⁹³⁷, не могущаго убити душу с телом, но великодушно²⁹³⁸ противу его стати, на мало время державствующаго, за приближение суда и поживших воздаяния.

Доволно ли ти есть, богопротивниче, ругателю Евангельский, прореченое Господем нашим Иисусом Христом и святыми Его пророки и святыми апостолы, о хотящих збытися, от них же ово збышася, иное деется, иное ж (л. 609)²⁹³⁹ збытися хощет. И о боготворящихся, а не точию делы добрыми подобитися, и что есть гонение Церквей, и кто есть гонивый и гонимый.

Послушай с вышеписаных о втором ангеле, парящем посреде небеси, держаще Евангелие вечное, ищуща благовестити седящим на земли и на всяк народ и колено и язык и люд²⁹⁴⁰, глаголяй гласом велиим: Бойтеся Бога²⁹⁴¹ и дадите Ему славу, яко прииде час суда Его, и поклонитеся Сотворшему небо и землю и море и источники водныя, а не твои скверным и трепроклятым законом судом повиноватися. И Господу самому свидетельствующу (л. 609 об.)²⁹⁴² и утвержающу: Аще кто услышит слово Мое и не сохранит Его, Аз не сужду ему, не приидох бо, да сужду мирови, но да спасу мир. Отметаяйся Мене и не приемляй словес имать судящаго слово, еже заповедах, то ему судит в день Судный. И слово, еже заповедах, несть Мое, но пославшаго Мя.

И ко пришедшим к Нему июдеом глагола: Аминь, аминь, глаголю вам, яко слушаяй словесе Моего и веруяй пославшему Мя, имать живот вечный и на суд не приидет, но прейдет от смерти в живот. А не веруяй уже осужден есть. И паки инде рече: Имеяй заповеди Моя и соблюдаяй их, он есть (л. 610) любяй, а не любяй Мя словес Моих не послушает. И о сем разумеем, яко познахом Его, аще заповеди Его соблюдаем. Глаголяй, яко познах Его, и заповеди Его не соблюдает, ложь есть. Иже есть от Бога глаголы Божия послушает, сего ради вы не послушаесте, яко несте от Бога. Всяк не творяй правду несть от Бога. Всяк преступаяй и не пребываяй во учении Христове Бога не имать. Аще кто приходит к вам и сего учения не приносит, не приемлите его в дом и радоватися ему не глаголите. Глаголяй бо ему радоватися сообщается делом его злым. А ты, отметниче Христов, от которых заповедей Христовых или святых апостол заповедей написал (л. 610 об.)²⁹⁴³ в своем Уложении? Не о таковых ли лжепророках пророчествовал сам Христос и святии пророцы и апостоли, якоже выше показано, по действу вашему? Еже и ныне Богослов пророчествует, глаголя: Дети²⁹⁴⁴ последняя година есть, и якоже слышасте, яко антихрист грядет, и ныне антихристи мнози быша, и от сего разумеваем, яко последний час есть. И яко всяка лжа от истины несть. И кто есть лживый, точию отметаяйся, яко Иисус несть Христос, сей есть антихрист.

Послушай²⁹⁴⁵ же и инаго апостола, что есть вера во Христа. Ты веруеши, яко Бог един есть, добре твориши. И беси веруют и трепещут. (л. 611)²⁹⁴⁶ Хощеши ли разумети, о человече суетне, яко вера без дел мертва есть. Авраам, отец наш, не от дел ли оправдася, вознес Исаака сына своего на олтарь? Видиши ли, яко вера поспешествоваше делом его, и от дел вера совершися, и совершися писание, глаголющее²⁹⁴⁷: Верова же Авраам Богови, и вменися ему в правду, и друг Божий наречется. Зрите ли убо, яко от дел оправдается человек, а не от единыя веры. Такожде и Раав блудница не от дел ли оправдася, приемше сходники и инем путем изведше их. Яко же бо тело без духа мертво есть, тако и вера без дел мертва есть.

Бывайте же творцы слову, а не точию слышателие, (л. 611 об.)²⁹⁴⁸ прелщающе себе самех, зане аще кто слышатель слову, а не творец таковый уподобися мужу, смотряющю лице бытия своего в зерцале, усмотри бо себе и отъиде, и абие забы, каков бе. Приникий же в закон совершен свободе и пребыв, сей не слышатель забытлив быв, но творец делу, сей блажен в делании своем будет. Аще ли зависть горку имате и рвение в сердцах ваших, не хвалитеся, ни лжите на истину, несть сия премудрость нисходящи, но земна, душевна, бесовска.

Послушай, лжи списателю, како ни сын, развее отца не делает, яко же сам Господь свидетельствует: Отец²⁹⁴⁹ Мой доселе делает, и Аз делаю. (л. 612)²⁹⁵⁰ Сего же ради паче искаху Его июдее убити, яко не токмо разоряше субботу, но и Отца Своего глаголаше Бога, равен Ся творя Богу. Отвещав же Иисус рече им: Аминь, аминь, глаголю вам, не может Сын творити от себе ничесо же.

А ты, беззаконниче, почто смел о себе творити? Таже рече: Аще не еже видит Отца творяща, яже бо Он творит, сия и Сын такожде творит. Отец бо любит Сына и вся показует Ему, яже Сам творит, и болша сих покажет Ему дела, да вы чюдитеся. А ты, богоборче, от кого видев, навык делати беззаконие свое? Господу глаголющу: Яко бо Отец воскрешает мертвых и живит. А ты, беззаконнодавче, имаши ли власть (л. 612 об.)²⁹⁵¹ воскрешати и живити? Господу глаголющу: Отец бо не судит никому же, но суд даст весь Сынови, да вси чтут Сына, яко же чтут Отца. Иже не чтет Сына, не чтет Отца, пославшаго Его. А тебе, злохитре, кто даде суд писати и нарицати суд государя царя? Господу Богу глаголющу: Аминь, аминь, глаголю вам, яко слушай словесе Моего и веруя пославшаму Мя, имать живот вечный и на суд не приидет, но прейдет от смерти в живот. А ты почто не слушаеши словесе Божия и не веруеши пославшему Его, и живота вечнаго не хощеши имети, и на суд хощеши приити, от живота вечнаго в вечную смерть?

Господу глаголющу: Яко же бо Отец имать живот в Себе, тако даст (л. 613)²⁹⁵² и Сынови живот имети в Себе, и область даст Ему и суд творити, яко Сын человеч есть, не дивитися сему. Ты убо откуду имаши живот в себе и кто ти даст область сию и суд творити?

Господу глаголющу: Яко грядет час, в онь же вси сущии во гробех услышат глас Сына Божия и изыдут сотворшия благая в воскрешение животу, а сотворшия злая в воскрешение Суду. Ты имаши ли власть такову, дабы кто услышал глас твой, имел живот вечный и на Суд пришел? Аще ли же не имаши, почто сам не содрогаешися от суда Божия, беззаконно судя патриарха и митрополитов, и архиепископов, и прочих священнаго чина, яко же пишет в 10-й главе в 30-й статье. (л. 613 об.)²⁹⁵³

Господу глаголющу: Не могу Аз о себе творити ничесо же, яко же слышу сужду, и суд Мой праведен есть, яко не ищу волю Мою, но волю пославшаго Мя Отца. Ты же, непокориве, како смел о себе сотворити суд, и от кого ты слышал о суде, судишь, и кто знает, яко суд твой праведен есть, и не по своей воли написал, но по воли Божией, и где есть такова воля Божия, покажи нам.

Господу глаголющу: Аще Аз свидетельствую о Мне, свидетельство Мое несть истинно. Ин есть свидетельствуя о Мне, и вем, яко истинно свидетельство, еже свидетельствует о Мне. Твое же кто весть свидетельство, яко истино есть предание и суд? (л. 614)²⁹⁵⁴

Господу глаголющу: Вы посласте ко Иоанну, и свидетельствова о истине. Аз же не от человека свидетельство приемлю, но сия глаголю, да вы спасени будете. Он бо светилник горя и светя, вы же хотесте возрадоватися в час светения Его. Аз же имам свидетельство боле Иоаннова. Дела бо, яже даст Мне Отец, да совершу я, та дела, яже Аз творю, свидетельствуют о Мне, яко Отец Мя посла, и пославый Мя Отец той свидетельствова о Мне. Ни гласа Его нигде же слышасте, ни видения Его видесте, и словесе Его не имате, пребывающа в вас, зане Его же Той посла, Сему вы веру не емлете.

Ты же которое о себе свидетельство приводишь, яко приятна дела твоя (л. 614 об.)²⁹⁵⁵ и кая свидетельствуют дела твоя, вся скверна и всякия мерзости полна и отступления от Бога. О Сыне Божий Отец свидетельствова, а о тебе кто свидетельствова? И почто не возхотел еси спасти, яко же рече Господь: Но сия глаголю, да вы спасени будесте. И кто тя посла и почто не емлеши веры словеси Божию? Не о тебе ли речеся: Сынови²⁹⁵⁶ чюждии солгаша Ми.

Господу глаголющу: Но рех вам, яко видесте Мя, и не веруете. Все, еже даст Ми Отец, ко Мне приидет. А ты почто ко Господу нашему Иисусу Христу не приходиши, но своим путем ходиши? Не слышал еси Писания: Овца гласа Моего слушают и по Мне грядут. Ты же не си от овец Христовых. Горе грешнику, во два (л. 615)²⁹⁵⁷ пути ходящу. И инде: Удаляющиися от Мене погибнут.

Господу глаголющу: Яко снидох с небесе, да не творю волю Мою, но волю пославшаго Мя Отца. И паки²⁹⁵⁸ инде рече: Мое учение несть Мое, но пославшаго Мя. Аще кто хощет волю Его творити, разумеет учение, кое от Бога есть. Или аз о себе глаголю, глаголяй о себе славы своея ищет, а ищай славы пославшаго его, сей истинен есть, и несть неправды в нем.

Тебе, славолюбче, кто посла, и откуду пришел, и чью волю творишь, и заповеди и законы кто ти повеле писати, и по чему разумети? Яко от Бога есть твое предание и учение и заповеди, и несть неправды в нем, покажи нам.

Паки Господу глаголющу: Глаголы, яже Аз (л. 615 об.)²⁹⁵⁹ глаголах вам, дух суть и живот суть, но суть иже от вас не веруют. Ведяше бо искони Иисус, кто суть неверующие и кто есть предая Его. И глаголаше: Сего ради рех вам, яко никто же может приити ко Мне, аще не будет дано ему свыше от Отца Моего. От сего мнози от ученик Его идоша вспять и к тому не хождаху и глаголаша: Жестоко есть слово се, и кто может послушати его. Еда и ты, отступниче, един еси от таковых отступник, возвратившихся вспять.

О²⁹⁶⁰ них же есть писано, быша же им последняя горша первых, лучше бо бе им не познати пути правды, нежели познавшим возвратитися от преданыя им святыя заповеди.

(л. 616)²⁹⁶¹ Случит бо ся им истиная притча: Пес возвращся на свою блевотину и свиния омывшися в кале тине.

Паки Господу глаголющу: Аз приидох во имя Отца Моего и не приемлете Мене. Аще ин приидет во имя свое, того приемлете. И паки инде рече: Аз²⁹⁶² еже ведев у Отца моего, глаголю, и вы, убо еже ведесте у отца вашего, творите. Аще Бог Отец ваш бы был, любили убо бысте Мене, Аз бо от Бога изыдох и приидох, не о Себе бо приидох, но Той Мя посла. Почто беседы Моея не разумеете, яко не можете слышати словесе Моего? Вы отца вашего диавола есте и похоти отца вашего хощете творити. Он человекоубийца бе искони и во истине не стоит, яко (л. 616 об.)²⁹⁶³ несть истины в нем. Егда глаголет, лжу от своих глаголет, яко ложь есть и отец лжы. Аз же зане истину глаголю вам и не веруете Мне. Кто от вас обличает Мя о гресе? Аще²⁹⁶⁴ ли истину глаголю, почто вы не веруете Мне? Иже есть от Бога, глаголы Божия послушает, сего ради вы не послушаете, яко от Бога несте.

Видели свыше реченая Господем нашим Иисусом Христом, глаголюща, яко не о себе пришел, но во имя Отца Своего и кто не приемлет Его, и кто приемляй во имя свое приходящаго, то есть антихриста, якоже и ваше множицею написася. И кто есть Божий и кто есть диавол, и кто есть волю Божию творяй (л. 617)²⁹⁶⁵ и кто диаволю, и кто есть истина и кто есть ложь, и кто есть слышаяй глаголы Божия и кто есть не слушает.

Паки Господу глаголющу: Испытайте²⁹⁶⁶ писания, яко вы мните в них имети живот вечный и та суть свидетельствующа о Мне, и не хощете приити ко Мне да живот имате. Славы от человек не приемлю, но разумех вы, яко любве Божия не имате в себе, како вы можете веровати, славы друг от друга приемлюще и славу, юже от единаго Бога не ищете, не мните, яко аз на вы реку ко Отцу, есть иже на вы глаголет Моисей, нань же вы уповаете. Аще бо бысте веровали Моисеови, веровали убо бысте и Мне, (л. 617 об.)²⁹⁶⁷ о Мне бо той писа. Аще ли того Писанием не веруете, како Моим глаголом веру имате.

Зриши ли, неверче, яко и Господь наш Иисус Христос везде о Себе свидетельствует Писанием и неверующим повелевает испытати. Испытайте, рече, Писание. И тако везде свидетельствова о Себе от закона и пророк, якоже свидетельствует святое и священное Евангелие. О родстве и о рождестве Христове и прочем Его спасителном смотрении²⁹⁶⁸.

О родстве убо сице.

Книга²⁹⁶⁹ родства Иисус Христова сына Давыдова, сына Авраамля. И прочее.

(л. 618)²⁹⁷⁰ Такожде и о рождестве Христове. Во сне явися Иосифу, глаголя: Иосифе, сыну Давидов, не убойся прияти Мариам, жены твоея, Рождьшее бо ся от Духа Свята, родит же Сына и наречеши имя Ему Иисус. Той бо спасет люди Своя от грех их. Се же все бысть, да збудется реченое от Господа пророком, глаголющем: Се²⁹⁷¹ дева во чреве приимет и родит Сына и нарекут имя ему Еммануил, еже есть сказаемо «с нами Бог». Инде речеся: Тако²⁹⁷² бо писано есть пророком, и ты, Вифлиеме, земле Июдова, ничим же менши еси во владыках Июдовых, ис тебе бо изыдет Вождь, иже упасет люди Моя Израиля. И паки инде речеся: Да²⁹⁷³ збудется от Господа пророком, глаголющем: (л. 618 об.)²⁹⁷⁴ От Египта возвах Сына Моего. И паки. Тогда²⁹⁷⁵ збысться реченое Иеремием пророком, глаголющем: Глас в Раме слышан бысть. И прочее. Мнози же от народа слышавше слово, глаголаху: Сей²⁹⁷⁶ есть Христос. Овии же глаголаху: Еда от Галилея Христос приходит, не Писание ли рече, яко от семене Давидова и от Вифлиомския веси, идеже бе Давид, Христос приходит. И бысть²⁹⁷⁷ во онех днех, прииде Иисус от Назарета Галилейскаго и крестися от Иоанна во Иордани. И абие возходя от воды, виде разводящася небеса и Дух яко голубь сходящаго нань, и глас бысть с небесе: Ты еси Сын Мой возлюбленый, о Нем же благоволих.

(л. 619)²⁹⁷⁸ Тако²⁹⁷⁹ и Иоанн Предтеча не собою свидетельствова, глаголя: Покайтеся, приближи бо ся Царьствие Небесное.

Се бо есть реченый Исаием пророком, глаголющем: Глас вопиющаго в пустыни, уготовайте путь Господень, прав творите стезя Его.

Тако и сам Господь ко искусителю диаволу рече: Писано²⁹⁸⁰ есть, не о хлебе едином жив будет человек, но о всяком глаголе, изходящем из уст Божиих. И паки²⁹⁸¹ второе ко искусителю рече Господь: Писано есть, не искусиши Господа Бога своего. И третие: рече²⁹⁸² Господь ему: Иди за Мною. Писано бо есть, Господу Богу твоему поклонишися и Тому Единому послужиши.

Слышав²⁹⁸³ же Иисус, яко Иоанн предан (л. 619 об.)²⁹⁸⁴ бысть, отъиде в Галилею, оставль Назарет и пришед, вселися в Капернаум в Поморие в пределех Завулоних и Неффалимлих, да збудется реченое Исаием пророком, глаголющем²⁹⁸⁵: Земля Завулоня и земля Неффалимля, путь моря обои пол Иордана, Галилея язык. И прочее.

Тако²⁹⁸⁶ и о Иоанне Христос свидетельствова: Сей бо есть, о нем же есть писано: Се Аз посылаю ангела Моего пред лицем Твоим, иже уготовит путь Твой пред Тобою.

И паки: Отвещавше²⁹⁸⁷ нецый от книжник и фарисей, глаголюще: Учителю, хощем от Тебе знамение видети. Он же отвещав, рече им: Род лукав и прелюбодей (л. 620)²⁹⁸⁸ знамения ищет, и знамения не дастся ему, токмо знамение Ионы пророка²⁹⁸⁹, якоже бо бе Иона во чреве китове три дни и три нощи. Тако²⁹⁹⁰ будет и Сын человеческий в сердцы земли три дни и три нощи. Мужие ниневитстии востанут с родом и осудят и, яко покаяшася проповедию Иониною²⁹⁹¹ и се боле Ионы зде. Царица Южская востанет на суд с родом сим и осудит и, яко приидет от конец земля²⁹⁹², слышати премудрость Соломонову и се боле Соломона зде.

И паки²⁹⁹³ ко учеником рече: Сего ради в притчах глаголю им, яко видяще не видят и слышаще не слышат, ни разумеют. И збысться в них (л. 620 об.)²⁹⁹⁴ пророчество Исаино, глаголюще: Слухом услышасте и не имате разумети, и зряще узрите и не имате видети. Отолсте бо сердце людий сих, ушима тяжко слышаша и очи свои смежиша. Паки²⁹⁹⁵ вопросиша его книжницы и фарисее, глаголюще: Почто ученицы Твои преступают предание старец, не умывают бо рук своих, егда хлеб ядят. Он же, отвещав, рече им: Почто и вы преступаете заповедь Божию за предание ваше, Бог бо заповеда²⁹⁹⁶, чти отца и матерь, иже злословит отца или матерь, смертию да умрет. И по мале рече: Добре²⁹⁹⁷ пророчествова о вас Исаия, глаголя: Приближаются Мне людие, (л. 621)²⁹⁹⁸ сии усты своима и устнами Мя чтут, сердце же их далече отстоит от Мене, всуе чтут Мя, учаще учения заповеди человеческа.

И приступиша²⁹⁹⁹ фарисее, искушающе Его и глаголаша Ему: Аще достоит человеку пустити жену по всякой вине. Он же отвещав, рече им: Несте3000 ли человеки, яко сотворивый искони, мужеский пол и женский сотворил я есть. И рече: Сего³⁰⁰¹ ради оставит человек отца своего и матерь и прилепится к жене своей и будета оба плоть едину. И се един некий приступль, рече Ему: Учителю благий, что сотворю, да имам живот вечный. Он же рече ему: Что Мя глаголеши блага, никто же (л. 621 об.)³⁰⁰² благ, токмо един Бог. Аще хощеши внити в живот, соблюди заповеди³⁰⁰³. Глагола ему: Кия? Иисус же рече: Еже не убиеши, не прелюбы сотвориши, не украдеши. И прочее.

И³⁰⁰⁴ егда приближишася во Иерусалим и приидоша в Вифсагию к горе Елеонстей. Тогда Иисус посла два ученика, глаголя им: Идета в весь прямо вама и абие обрящете осля привязано и жеребя с ним, и отрешивше, приведита Мя. И аще вама кто речет что, речета, яко Господь ею требует, абие же послет я. Се же все бысть, да збудется реченое пророком, глаголющим: Рцыте³⁰⁰⁵ дщери Сионове, се Царь твой грядет тебе кроток, всед на осля и жребя, сына яремнича.

(л. 622)³⁰⁰⁶ И вниде³⁰⁰⁷ в церковь Божия и изгна вся продающая и купущая в церкви и трапезы торжником испроверже и седалища продающих голуби. И глагола им: Писано³⁰⁰⁸ есть, храм Мой храм молитвы. Вы же сотвористе его вертеп разбойником. Видевше же архиерее и книжницы чюдеса, яже сотвори и отроки зовуща во церкви и глаголюща: Осанна сыну Давидову. Негодоваша и реша Ему, слышиши ли, что сии глаголют. Иисус же рече им: Ей, несте ли чли николи же. Яко³⁰⁰⁹ изо уст младенец ис сущих совершил еси хвалу.

И³⁰¹⁰ по шести дни поят Иисус Петра и Иякова и Иоанна и возведе их на гору высоку особь едины, (л. 622 об.)³⁰¹¹ и преобразися пред ними, и ризы Его блещашася, и явися им Илия с Моисеом, и беста со Иисусом, глаголюща. И по мале. Бысть облак, осеняя их, и прииде глас из облака, глаголя: Сей есть Сын Мой возлюбленный, Того послушайте.

Глагола Иисус: Несте³⁰¹² ли видех николи же в Писаниих. Камень, его же невреду, сотвориша зиждущей. Сей бысть во главу углу, от Господа бысть си и есть дивна во очию вашею.

Отвещав же Иисус, рече им: Прелщаетеся, не ведяще Писания, ни силы Божия. И по мале. О воскреснии мертвых. Несте ли чли реченаго Богом, глаголющем: Аз³⁰¹³ есмь Бог Авраамлев и Бог Исааков (л. 623)³⁰¹⁴ и Бог Ияковль, несть Бог, Бог мертвых, но Бог живых.

Фарисеи слышавше, яко посрами саддукей, собрашася вкупе и вопроси един от них законоучитель, искушаяй Его и глаголя: Учителю, кая заповедь болши есть в законе? Иисус же рече ему: Возлюбиши³⁰¹⁵ Господа Бога твоего всем сердцем твоим и всею душею твоею и всею мыслию твоею, си есть первая и болшая заповедь. Вторая ж подобна есть ей, возлюбиши³⁰¹⁶ искренняго твоего яко сам себе. В сию обою заповедию весь закон и пророцы вси ят.

Собраном же фарисеом³⁰¹⁷ вопроси их Иисус, глаголя: Что ся вам мнит о Христе, чий есть Сын? Глаголаша ему Давид (л. 623 об.)³⁰¹⁸, глагола им. Како убо Давид духом Господа Его нарицает, глаголя: Рече³⁰¹⁹ Господь Господеви моему, седи одесную Мене, дондеже положу враги Твоя подножие ногама Моима. Аще убо Давид нарицает Его Господа и како Сын ему есть и никто же можаше отвещати Ему словесе, ниже смеяше кто от того дне вопросити Его к тому.

И бысть³⁰²⁰ мимо ходити Ему в субботу сквозе сеяния и начаша ученицы Его путь творити, востерзающе класы. И фарисее глаголаху Ему: Виждь, что творят в субботы, еже не достоит. И Той глаголаше им: Несте³⁰²¹ ли николи же чли, что сотвори Давид, егда требование име и взалка сам и иже с ним, (л. 624)³⁰²² како вниде в дом Божий при Авиафаре архиереи, и хлебы предложения снесть, их³⁰²³ же недостояше ясти, токмо иереом, и даст и сущим с ним. Но³⁰²⁴ в тыя дни воскорби Той, солнце померкнет, и луна не даст света своего, и звезды будут с небесе спадающа, и силы, яже на небесех, подвижутся. И тогда узрят Сына человеческаго, грядуща на облацех и с силою и славою многою. И³⁰²⁵ якоже бысть во дни Ноевы, тако будет и во дни Сына человеческаго, ядях, пияху. И прочее. Такожде и якоже бысть во дни Лотовы, ядяху, пиаху. И прочее. И по мале.

Поминайте³⁰²⁶ жену Лотову, иже аще взыщет душу свою спасти, погубит ю. (л. 624 об.)³⁰²⁷ Обрете Филипп Нафанаила и глагола ему³⁰²⁸: Его же писа Моисей в законе и пророцы обретохом Иисуса сына Иосифова иже от Назарета. И глагола ему Нафанаил: От Назарета может ли что добро быти? Глагола ему Филипп: Прииди и виждь.

Никто³⁰²⁹ же взыде на небо, токмо сошедый с небесе. И якоже Моисей вознесе змию в пустыни, тако подобает вознестися Сыну человеческому. Да всяк веруяй в Он, не погибнет, но имать живот вечный.

Грядый с небесе над всеми есть и еже виде и слыша, се свидетельствует и свидетельства Его никто же приемлет. Приемый Его свидетельство, верова, яко Бог истинен есть, (л. 625)³⁰³⁰ Его же бо послал Бог, глаголы Божия глаголет.

Рече же Господь: Аще³⁰³¹ бо бы веровали Моисеови, веровали убо бысте и Мне, о Мне той писа. Аще ли того писанием не веруете, како Моим глаголом веру имате?

Реша же Ему: Кое³⁰³² убо Ты твориши знамение, да видим и веру имем Тебе. Что делаеши? Отцы наши ядоша манну в пустыни, якоже есть писано, хлеб с небесе даст им ясти. Рече убо им Иисус: Аминь, аминь, глаголю вам, не Моисей даст вам хлеб с небесе, но Отец Мой даст вам хлеба истинаго с небесе. И прочее.

Есть³⁰³³ писано во пророцех: И будут вси ученицы Богу, всяк слышавый Отца и навык, приидет ко Мне.

(л. 625 об.)³⁰³⁴ Абие же в преполовение праздника взыде Иисус в церковь и учаше, и дивляхуся июдее, глаголюще: Како Сей книги весть не учився? Отвеща убо им Иисус и рече: Мое учение несть Мое, но пославшаго Мя. Аще кто хощет волю Его творити, разумеет о учении, кое от Бога есть или Аз о себе глаголю. Не Моисей³⁰³⁵ ли даст вам закон, и никто же от вас творит закона. Что Мене ищете убити?

Веруяй³⁰³⁶ в Мя, рече Писание, реки от чрева Его истекут воды живы. Се же рече о Дусе, Его же хотяху приимати верующии во имя Его. Не убо бе Дух Святый, яко Иисус не бе прославлен³⁰³⁷. Глагола Никодим к ним, иже пришедый к Нему нощию един (л. 626)³⁰³⁸ сый от них: Еда закон судит человеку, аще не слышит от Него прежде и разумеет, что творит, отвещаша. И рекоша ему: Еда и ты от Галилея еси, испытай и виждь, яко пророк от Галилея не приходит.

Приведоша³⁰³⁹ же книжницы и фарисее к Нему жену, в прелюбодеянии яту, и поставиша ю посреде, и глаголаша к Нему: Учителю, сия жена ята есть ныне в прелюбодеянии. В законе³⁰⁴⁰ же нам Моисей повеле таковыя камением побивати. Ты же что глаголеши? Се же реша, искушающе Его, да быша имели что глаголати нань. Иисус же долу преклонься, перстом писаше на земли, не слагая им, якоже прилежаху вопрошающе Его³⁰⁴¹, воскло(л. 626 об.)нься³⁰⁴², рече им: Иже есть без греха в вас, верзи камень на ню.

Паки³⁰⁴³ же Иисус рече, глаголя: Аз есмь свет миру, ходяй по Мне не имать ходити во тме, но имать свет животный. Реша же Ему фарисее: Ты о Себе Сам свидетельствуеши, свидетельство Твое несть истинно. Отвеща Иисус, рече им: Аще³⁰⁴⁴ Аз свидетельствую о Себе, истинно есть свидетельство Мое, яко вем, откуду приидох и камо иду. Вы ж не весте, откуду прихожду и камо гряду. Вы по плоти судите, Аз не сужду никому же. И аще сужду Аз, суд истинен есть, яко един несмь, но Аз и пославый Мя Отец. И в законе³⁰⁴⁵ же вашем писано (л. 627)³⁰⁴⁶ есть, яко человеку³⁰⁴⁷ свидетельство истинно есть. Аз есмь свидетельствуяй о Мне самем и свидетельствует о Мне пославый Мя Отец. Глаголах же Ему: Где есть Отец Твой? Отвеща Иисус: Ни Мне весте, ни Отца Моего. Аще Мя бысте ведали и Отца Моего ведали бысте. Сия глаголы глагола Иисус в газофилакии, уча в церкви, и никто же не ят Его, яко не бе пришел час Его. Рече же им паки Иисус: Аз иду, и взыщете Мене, и во гресе вашем умрете. Аможе Аз иду, вы не можете приити. Глаголаху убо июдее: Еда ся Сам убиет, яко глаголет «аможе Аз иду, вы не можете приити». И рече им: Вы от нижних есте, Аз от вышних (л. 627 об.)³⁰⁴⁸ есмь. Вы от мира сего есте, Аз несть от мира сего, рех убо вам, яко умрете во гресех ваших, аще бо не имате веры, яко Аз есмь, умрете во гресех ваших. Глаголаху же Ему: Ты кто еси? И рече им Иисус: Начаток яко и глаголю вам, многа имам о вас глаголати и судити, но пославый Мя истинен есть. И Аз, яже слышах от Него, сия глаголю в мире. Не разумеша, убо яко Отца им глаголаше. Рече же им Иисус: Егда вознесете Сына человеческаго, тогда разумеете, яко Аз есмь и о Себе ничесо же не творю, но якоже научи Мя Отец Мой сия глаголю и пославый со Мною есть. Не остави Мене единаго Отец, яко Аз угодная Ему (л. 628)³⁰⁴⁹ всегда творю. Си Ему глаголющу, мнози вероваша в Него.

1 2 3 4 5 6 7 8 ... 10 11 12 13 14 15 16 17 18 19 20

<<< Предыдущая страница ... Следующая страница >>>

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 ... 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

²⁸⁷¹ На левом поле листа помета: 7.

²⁸⁷² На правом поле листа помета: ангели бесов воюют.

²⁸⁷³ На левом поле листа помета: 8.

²⁸⁷⁴ На верхнем поле листа киноварная помета: 26-е возражение.

²⁸⁷⁵ Исправлено из: примерити.

²⁸⁷⁶ На левом поле листа помета: диавол почто с небесе низринулся.

²⁸⁷⁷ Исправлено из: за.

²⁸⁷⁸ На левом поле листа помета: Иоан. 12.

²⁸⁷⁹ На верхнем поле листа киноварная помета: на 26-й вопрос и ответ.

²⁸⁸⁰ На правом поле листа помета: воздуха началство диаволу дано.

²⁸⁸¹ На правом поле листа помета: Ефес. 6.

²⁸⁸² На правом поле листа помета: ангелом земля, правление от Бога дадеся.

²⁸⁸³ На правом поле листа помета: дракон, 70 Фез.

²⁸⁸⁴ На левом поле листа помета: 9.

²⁸⁸⁵ На верхнем поле листа киноварная помета: 26-е возражение.

²⁸⁸⁶ Исправлено из: обещна.

²⁸⁸⁷ На левом поле листа помета: Арфрон, часть 1 Естимологии.

²⁸⁸⁸ Иностранное слово написано неразборчиво.

²⁸⁸⁹ На левом поле листа помета: яко диавол глаголется.

²⁸⁹⁰ На левом поле листа помета: Быт. 3.

²⁸⁹¹ На левом поле листа помета: зане сатана нарицается.

²⁸⁹² Написано со знаком вставки на левом поле листа.

²⁸⁹³ На верхнем поле листа киноварная помета: на 26-й вопрос и ответ.

²⁸⁹⁴ Написано со знаком вставки на правом поле листа.

²⁸⁹⁵ На правом поле листа помета: Псалом 9.

²⁸⁹⁶ На правом поле листа помета: Юстин в толковании Апокалипсии Евсевия книг. 14 глава 11.

²⁸⁹⁷ На правом поле листа помета: Ириней книг. 5 глава 3 против ересей; Иов 41.

²⁸⁹⁸ На верхнем поле листа киноварная помета: 26-е возражение.

²⁸⁹⁹ Исправлено из: оглаголник.

²⁹⁰⁰ На левом поле листа помета: 2 Кор. 6; Сирах 13.

²⁹⁰¹ На верхнем поле листа киноварная помета: на 26-й вопрос и ответ.

²⁹⁰² На левом поле листа помета: 11.

²⁹⁰³ На левом поле листа помета: 12.

²⁹⁰⁴ На правом поле листа помета: Агнчею кровию или именем побежден диавол, зри зач. 54.

²⁹⁰⁵ На верхнем поле листа киноварная помета: 26-е возражение.

²⁹⁰⁶ На левом поле листа помета: беси не мучатся в геенне.

²⁹⁰⁷ На левом поле помета: зачал. 35.

²⁹⁰⁸ На правом поле листа помета: 13.

²⁹⁰⁹ На правом поле листа помета: 14.

²⁹¹⁰ На левом поле листа помета: крыле орле таинственно.

²⁹¹¹ На левом поле листа помета: 70 Фезеол.

²⁹¹² На верхнем поле листа киноварная помета: на 26-й вопрос и ответ.

²⁹¹³ На правом поле листа помета: со Христом брань.

²⁹¹⁴ На правом поле листа помета: Завета два двема крылома знаменуются.

²⁹¹⁵ На верхнем поле листа киноварная помета: 26-е возражение.

²⁹¹⁶ На правом поле листа помета: 14.

²⁹¹⁷ На левом поле листа помета: змий.

²⁹¹⁸ На правом поле листа помета: 16.

²⁹¹⁹ Исправлено из: змий.

²⁹²⁰ На верхнем поле листа киноварная помета: на 26-й вопрос и ответ.

²⁹²¹ На правом поле листа помета: Церковь бежащая.

²⁹²² На правом поле листа помета: земля ж непрогнанно си есть Церкви помогает.

²⁹²³ На правом поле листа помета: Быт. 18, 27.

²⁹²⁴ На правом поле листа помета: земля и пепел есмь.

²⁹²⁵ На верхнем поле листа киноварная помета: 26-е возражение.

²⁹²⁶ На правом поле листа помета: 17.

²⁹²⁷ Исправлено из: Иисусово.

²⁹²⁸ Исправлено из: гладкость.

²⁹²⁹ На верхнем поле листа киноварная помета: на 26-й вопрос и ответ.

²⁹³⁰ На левом поле листа помета: 6.

²⁹³¹ На правом поле листа помета: зачал. 40.

²⁹³² На левом поле листа помета: 7.

²⁹³³ На правом поле листа помета: 8.

²⁹³⁴ На правом поле листа помета: поклонятись подобает Бога; 4 Ездра 16, 68.

²⁹³⁵ На правом поле листа помета: Быт. 1 стих 1; Псалом 145, 6; Сирах 18, 1; Деян. 14 стих 14.

²⁹³⁶ На верхнем поле листа киноварная помета: 26-е возражение.

²⁹³⁷ На левом поле листа помета: Матф. 10, 37; Лука 12, 63.

²⁹³⁸ Исправлено из: благосердно.

²⁹³⁹ На верхнем поле листа киноварная помета: на 26-й вопрос и ответ.

²⁹⁴⁰ На правом поле листа помета: 8.

²⁹⁴¹ На правом поле листа помета: поклонятися подобает Богу.

²⁹⁴² На верхнем поле листа киноварная помета: на 26-й вопрос и ответ.

²⁹⁴³ На верхнем поле листа киноварная помета: 26-е возражение.

²⁹⁴⁴ На левом поле листа помета: 1 Иоан. 2.

²⁹⁴⁵ На левом поле листа помета: Ияков 2.

²⁹⁴⁶ На верхнем поле листа киноварная помета: на 26-й вопрос и ответ.

²⁹⁴⁷ На правом поле листа помета: 1 Моис. 15; к Рим. 14; Галат. 3.

²⁹⁴⁸ На верхнем поле листа киноварная помета: 26-е возражение.

²⁹⁴⁹ На левом поле листа помета: Евангелие Иоан. 5.

²⁹⁵⁰ На верхнем поле листа киноварная помета: на 26-й вопрос и ответ.

²⁹⁵¹ На верхнем поле листа киноварная помета: 26-е возражение.

²⁹⁵² На верхнем поле листа киноварная помета: на 26-й вопрос и ответ.

²⁹⁵³ На верхнем поле листа киноварная помета: 26-е возражение.

²⁹⁵⁴ На верхнем поле листа киноварная помета: на 26-й вопрос и ответ.

²⁹⁵⁵ На верхнем поле листа киноварная помета: 26-е возражение.

²⁹⁵⁶ На левом поле листа помета: Псал. 17; Иоан. 6.

²⁹⁵⁷ На верхнем поле листа киноварная помета: на 26-й вопрос и ответ.

²⁹⁵⁸ На правом поле листа помета: Иоан. 7.

²⁹⁵⁹ На верхнем поле листа киноварная помета: 26-е возражение.

²⁹⁶⁰ На левом поле листа помета: Лука 1; 1 Петр 2.

²⁹⁶¹ На верхнем поле листа киноварная помета: на 26-й вопрос и ответ.

²⁹⁶² На правом поле листа помета: Иоан. 8.

²⁹⁶³ На верхнем поле листа киноварная помета: 26-е возражение.

²⁹⁶⁴ На левом поле листа помета: Иоан. 4.

²⁹⁶⁵ На верхнем поле листа киноварная помета: на 26-й вопрос и ответ.

²⁹⁶⁶ На правом поле листа помета: Иоан. 5.

²⁹⁶⁷ На верхнем поле листа киноварная помета: 26-е возражение.

²⁹⁶⁸ Далее в строке изображен четырехконечный крест с надписями «Иисус Христос», «НИКА».

²⁹⁶⁹ На левом поле листа помета: Матф. 1; 1 Моис. 21; 1 Моис. 25; 1 Моис. 29; 1 Моис. 38. На нижнем поле листа помета: Аще хощеши прочитати написаныя свидетелства от святаго Евангелия и от святых апостол о Христе Иисусе Господе Бозе и Спасе нашем и о всеспасителнем Его смотрении, прочитай от зде, да разумееши, яко нигде есть что любо содеяно кроме закона и пророк. Аще ли трудно ти есть, преиди напредь, идеже обрящеши крест, сим же образом воображен, и прочитай тамо.

²⁹⁷⁰ На верхнем поле листа киноварная помета: на 26-й вопрос и ответ.

²⁹⁷¹ На правом поле листа помета: Исаия 7.

²⁹⁷² На правом поле листа помета: Матф. 2; Малах. 5.

²⁹⁷³ На правом поле листа помета: Матф. 4; Иосия 11.

²⁹⁷⁴ На верхнем поле листа киноварная помета: 26-е возражение.

²⁹⁷⁵ На левом поле листа помета: Иерем. 31.

²⁹⁷⁶ На левом поле листа помета: Иоан. 7; Малах. 5; Матф. 2; Лука 6.

²⁹⁷⁷ На левом поле листа помета: Марк 1; Матф. 3; Лука 3.

²⁹⁷⁸ На верхнем поле листа киноварная помета: на 26-й вопрос и ответ.

²⁹⁷⁹ На правом поле листа помета: Матф. 5; Марк 1; Лука 3; Иоан. 1; Деян. 13; Иезек. 18; Исаия 40.

²⁹⁸⁰ На правом поле листа помета: Матф. 7; 5 Моис. 8.

²⁹⁸¹ На правом поле листа помета: 5 Моис. 6 и 10.

²⁹⁸² На правом поле листа помета: 5 Моис. 6.

²⁹⁸³ На правом поле листа помета: Матф. 7.

²⁹⁸⁴ На верхнем поле листа киноварная помета: 26-е возражение.

²⁹⁸⁵ На левом поле листа помета: Исаия 8.

²⁹⁸⁶ На левом поле листа помета: Матф. 11; Малах. 3.

²⁹⁸⁷ На левом поле листа помета: Матф. 12, ниже 16; 1 Кор. 1; Лука 12.

²⁹⁸⁸ На верхнем поле листа киноварная помета: на 26-й вопрос и ответ.

²⁹⁸⁹ На правом поле листа помета: Иона 2.

²⁹⁹⁰ На правом поле листа помета: Лука 11.

²⁹⁹¹ На правом поле листа помета: Иона 3.

²⁹⁹² На правом поле листа помета: 3 Царств 10; 2 Парал. 9.

²⁹⁹³ На правом поле листа помета: Матф. 13; Марк 4; Лука 8; Иоан. 16; Деян. 28; к Рим. 11.

²⁹⁹⁴ На верхнем поле листа киноварная помета: 26-е возражение.

²⁹⁹⁵ На левом поле листа помета: Матф. 15.

²⁹⁹⁶ На левом поле листа помета: 2 Моис. 20; 5 Моис. 5.

²⁹⁹⁷ На левом поле листа помета: Исаия 29.

²⁹⁹⁸ На верхнем поле листа киноварная помета: на 26-й вопрос и ответ.

²⁹⁹⁹ На правом поле листа помета: Матф. 19.

³⁰⁰⁰ На правом поле листа помета: 1 Моис. 1.

³⁰⁰¹ На правом поле листа помета: 1 Моис. 2.

³⁰⁰² На верхнем поле листа киноварная помета: 26-е возражение.

³⁰⁰³ На левом поле листа помета: 1 Моис. 20; 5 Моис. 5; Лука 18; Ияков 2.

³⁰⁰⁴ На левом поле листа помета: Матф. 21; Марк 11; Лука 19.

³⁰⁰⁵ На левом поле листа помета: Исаия 62; Захар. 2; Иоан. 12.

³⁰⁰⁶ На верхнем поле листа киноварная помета: на 26-й вопрос и ответ.

³⁰⁰⁷ На правом поле листа помета: Матф. 21; Марк 11; Лука 19; Иоан. 2.

³⁰⁰⁸ На правом поле листа помета: Исаия 56; Матф. 11; Лука 19; Иерем. 7.

³⁰⁰⁹ На правом поле листа помета: Псалом 8.

³⁰¹⁰ На правом поле листа помета: Матф. 9; Матф. 17; Лука 9.

³⁰¹¹ На верхнем поле листа киноварная помета: 26-е возражение.

³⁰¹² На левом поле листа помета: Псалом 117; Деян. 4; Марк 12; Лука 20; Исаия 28.

³⁰¹³ На левом поле листа помета: 2 Моис. 3; Матф. 22; Марк 12; Лука 20.

³⁰¹⁴ На верхнем поле листа киноварная помета: на 26-й вопрос и ответ.

³⁰¹⁵ На правом поле листа помета: Матф. 22; 5 Моис. 12; Марк 12; Лука 10.

³⁰¹⁶ На правом поле листа помета: 3 Моис. 9.

³⁰¹⁷ На правом поле листа помета: Марк 12; Лука 20.

³⁰¹⁸ На верхнем поле листа киноварная помета: 26-е возражение.

³⁰¹⁹ На левом поле листа помета: Псалом 109; Лука 20.

³⁰²⁰ На левом поле листа помета: Марк 2; Лука 6; 5 Моис. 23.

³⁰²¹ На левом поле листа помета: 1 Царств 21; Матф. 12; Лука 6.

³⁰²² На верхнем поле листа киноварная помета: на 26-й вопрос и ответ.

³⁰²³ На правом поле листа помета: 2 Моис. 29; 3 Моис. 24.

³⁰²⁴ На правом поле листа помета: Езекииль 32; Исаия 13; Иоиль 2; Матф. 22; Марк 13; Апокал. 1.

³⁰²⁵ На правом поле листа помета: 1 Моис. 7; Лука 17; Матф. 24.

³⁰²⁶ На правом поле листа помета: 1 Моис. 19, выше 9.

³⁰²⁷ На верхнем поле листа киноварная помета: 26-е возражение.

³⁰²⁸ На левом поле листа помета: 1 Моис. 19; 5 Моис. 18, ниже 5; Исаия 4; Езекииль 34; Иоан. 1.

³⁰²⁹ На левом поле листа помета: Иоан. 2; 4 Моис. 21, ниже 12.

³⁰³⁰ На верхнем поле листа киноварная помета: на 26-й вопрос и ответ.

³⁰³¹ На правом поле листа помета: Иоан. 5; 1 Моис. 13; 5 Моис. 18, выше 1.

³⁰³² На правом поле листа помета: Иоан. 6; 1 Иоан. 3, ниже 17.

³⁰³³ На правом поле листа помета: Иоан. 6; Исаия 54. Иерем. 31.

³⁰³⁴ На верхнем поле листа киноварная помета: 26-е возражение.

³⁰³⁵ На левом поле листа помета: 2 Моис. 246, выше 5.

³⁰³⁶ На левом поле листа помета: Иоан. 7.

³⁰³⁷ На левом поле листа помета: 5 Моис. 17; Иоан. 7.

³⁰³⁸ На верхнем поле листа киноварная помета: на 26-й вопрос и ответ.

³⁰³⁹ На правом поле листа помета: Иоан. 8.

³⁰⁴⁰ На правом поле листа помета: 3 Моис. 20; 6 Моис. 22.

³⁰⁴¹ На правом поле листа помета: 5 Моис. 17.

³⁰⁴² На верхнем поле листа киноварная помета: 26-е возражение.

³⁰⁴³ На левом поле листа помета: Иоан. 8, выше 1, ниже 9.

³⁰⁴⁴ На левом поле листа помета: выше 5.

³⁰⁴⁵ На левом поле листа помета: Моис. 17 и 19.

³⁰⁴⁶ На верхнем поле листа киноварная помета: на 26-й вопрос и ответ.

³⁰⁴⁷ На правом поле листа помета: Матф. 18; 1 к Рим. 13; Евреом 10, глава 8.

³⁰⁴⁸ На верхнем поле листа киноварная помета: 26-е возражение.

³⁰⁴⁹ На верхнем поле листа киноварная помета: на 26-й вопрос и ответ.

Домашняя страница
священника Владимира Кобец