ВОЗРАЖЕНИЕ, ИЛИ РАЗОРЕНИЕ СМИРЕНАГО НИКОНА ... (26-15)

Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы¹

акожде и вси, елицы ему приобщишася митрополити и архиепископи, и епископи, и прочии священнаго чина и мирстии людие, кто ни буди, по святым правилом извержены и отлучены. А еже митрополитом и епископом в чюжую епископию не преходити от своея области, многа правила покажу ти, возбраняюща, еже не приходити митрополиту (л. 756)³⁷⁶³ или епископу от своея области во иную, ни поставляти презвитеры и диаконы или иное что епископское и церковное правление творити и церковных вещей. Не твердым и разрушеным быти от него сотвореным и самаго изврещи и яко псу ни во исходе души Божественых таин причастну быти, по писаному: Не дадите бо, рече, святая псом, ни пометайте бисер ваших пред свиниями. И аще единаго поставив презвитера или диакона толик страх и мука судом³⁷⁶⁴ показана. А иже шесть лет многими епископиями владеет, коликих мук достоин будет?

(л. 756 об.)³⁷⁶⁵ От престола на престол не преходи, аще не тамо сущим лучший и учителнейший мним³⁷⁶⁶ будеши, но и тако многих епископов разсуждением и умилением.

Несть достойно епископу, свою епископию оставльшу, иную восхитити, аще прежде не испытано будет и явится прежде сущим во граде том на ползу и яко учитель сый премудр. Но и тако многих епископов разсуждением и избранием и умолением. Сие же правило сокровено есть, ибо шестое на десять правило собора, иже во Антиохии, празнаго убо епископа, не имуща церкве, и в праздную церковь, не имеющую епископа, вводити (л. 757)³⁷⁶⁷ не повелевает, но со искушением и судом совершенаго собора, сиречь всех сущих во области епископ ту сущу и митрополиту. Непраздному же епископу, имущему свою церковь, никако же не повелевает во ин град преходити. Такоже и пятоенадесять правило, иже в Никеи перваго собора, и 1-е и 2-е, иже в средце, собора, и 21-е, иже во Антиохии, собора такожде не повелевает.

От града во град ни епископ, ни презвитер, ни диакон да не преходит. Понеже паки хотят обращени быти в церкви, в них же поставлени быша.

(л. 757 об.)³⁷⁶⁸ Правило се не токмо епископом преступати от града во град отнюдь отрицает, но и презвитером и диаконом. И сотворшыя нечто таково, в свой град и в своя церкви, в них же поставлени быша, аки возвращати повелевает.

1-е же и 2-е правило собора, иже в средце, жесточае таковыя мучит, отставляя сих от святаго общения, и таковым епитимиами запрещает.

Аще никим же позван, ни умолен быв епископ, во иную область отшед, и поставит презвитера или диакона или правление (л. 758)³⁷⁶⁹ некое церковное творит, такова нетверда и разрушена да пребудут, а он да извержется.

Многа правила обрящеши о сем, возбраняюща, еже не преходити епископу от своея области во иную и поставляти в ней презвитеры и диаконы или иное что епископское творити, токмо аще где позван будет, умолен от страны тоя епископа таковое что творити. Аще же от своего дому во иную область пришед, поставит презвитера или диакона или строению церковных вещей некое правления сотворит, нетвердым и разрушеным быти от него сотвореным и самаго изврещи правила повелевают.

Иже кроме совершенаго собора, иже самаго митрополита, на праздный церкве престол наскочив, аще и сам есть празден, от епископии да будет извержен.

Празднаго убо епископа, не имущаго епископии, в праздную церковь, не имущую епископа, поставляти от совершенаго собора ту сущу митрополиту тоя области се правило повелевает, а не самому о себе престол восхищати, аще и от всех людей града того нудим есть, аще не хощет быти отвержен. Непраздному же епископу, имущему свою церковь, 21-е правило сего собора и другая различна, якоже (л. 759)³⁷⁷¹ в 14 апостолстем правиле писано есть, в другую церковь преити отнюдь не повелевает, но пребывати в церкви, в ней же исперва от Бога поставлен бысть.

Такоже, якоже и 13 правило сего собора, и се правило глаголет: Еже коемуждо епископу в своем пределе владати и поставляти презвитеры и диаконы, во ин же предел не ити, ни поставити презвитера, ни ино что епископское творити кроме³⁷⁷² воли епископа предела того. Аще же дерзнет и сотворит что таковое, да будет извержен и повинен и поставленый от него презвитер (л. 759 об.)³⁷⁷³ или диакон.

Предел ради никто же да смешает церковь, ни поставляет ни презвитера, ни епископа. Сущия ж во языцех Божия церкви, святых отец обычай да держат.

Во многих правилех речено есть, яко не подобает епископу на чюждую епископия находити, но койждо внутрь своих пределов да пребывает и в своих пределех да поставляет епископ убо презвитеры и диаконы. Такоже и митрополит епископы своя во области своей, да не прескачет чрез пределы своя и церкви да не смятут. Сущия же во иноязыцех Божия (л. 760)³⁷⁷⁴ церкви, яже во Египте и Ливи и в Пентаполии, древний обычай отеческий да держат, якоже 6-е правило 1-го Вселенскаго собора, иже в Никеи, повелевает.

Преходящии из града во град, иже от них правилом повинни суть.

Речено есть в 13 правиле, иже во Антиохии, собора, яко не дерзнути епископу преити от своея области во иную и поставити презвитера или диакона без воли сущаго во области той епископа или что иное епископское творити правление. Аще бо и сотворит что таково, праздно и нетвердо да пребудет и той месть да приимет (л. 760 об.)³⁷⁷⁵ своего безчиния, и извержен да будет от своего сана Святою Троицею. Тако бо и зде написаное правило повелевает.

Святаго Сардийскаго собора, еже есть в средце, 341, святых отец правило 1.

Не обрящется епископ, от мала града в велик пришед, иже убо от смиреннаго в высок прескочит, яко горд и лихоимец обрется, вся дни живота своего да будет без причащения.

Еже преходити епископом от града во град, сиречь оставиша свою епископию и иную взимати, се правило отнюдь таковому делу не повелевает быти. Но аще и будет, жесточае преходящыя³⁷⁷⁶ мучит. (л. 761)³⁷⁷⁷ Познавше убо святии отцы от сея вещи, яко ни един же епископ от великаго града в менший град тщится преити, но от мала града в вышний и болший град желает прескочити гордыни ради и лихоимства. Повелеша таковому ни с мирскими человеки равно причащения имети, но по извержении сана и причащениа отлучену быти.

Аще кто от града во град прешед и молвы творит, от народа приимая себе поборники, да глаголют, желаем и молимся, да будеши нам епископ, той ни на самой кончине не причастен.

Аще который епископ в толико шатание и неистовство пришед и дерзнет (л. 761 об.)³⁷⁷⁸ просити и преити от града во град, глаголя: Яко хотят мене людие града того. И оттуду взем грамоту, показует написаное к нему от всех граждан моление, якоже дабы им епископ был. Еже яве есть, яко смышлением и хитростию таковое бысть, мало неких мздою и дары и честию возмогл привлещи к себе, да церкви ставше, молву сотворят, глаголюще велегласно, просяще имети того епископа. Таковаго убо яко зело смедша и таковое сотворша и познана бывша в том, велми святый сей собор осуди. Отрече бо тому ни во исходе от жития недостойну быти³⁷⁷⁹ причащения и назна(л. 762)менана³⁷⁸⁰. Странно бо се и страшно есть, еже ни во исходе от жития не сподобитеся причащения, его же не обрящеши во всех правилех написана, о инех ни о коих же гресех такова запрещения.

Никоторый же епископ, не позван во град, да не приидет. И епископ с епископом, аще имать прю, чюжаго епископа да не призовет. Аще ли же ни, да судит Римский, ту будут чюждии.

В различных правилех речено есть, еже никому же дерзнути от своего предела во иную область преходити, аще не будет позван от области тоя митрополита и от сущих с ним епископ. Тожде убо и сей святый собор (л. 762 об.)³⁷⁸¹ повелевает. Но аще который епископ с другим епископом о некоей вещи распрю имать, и с ним да судится пред собором тоя области, в ней же есть, и не подобает от иныя области разума ради неких епископ призывати, но от единех тоя области епископ судитися. И аще неугоден ему будет суд и мнит, яко не по праву осужден быв, судивый его митрополит и епископи да возвестят Римскому Папе писанием вину и суд, како осудиша и. И аще не восхощет того суда, и той, или сам разсмотрив суд, аще право осужлен бысть, возвестит им писанием. (л. 763)³⁷⁸² Аще ли ни, тамо близ их сущая области епископом да повелит, да сотворше собор, судят ему паки второе.

Епископ во инем граде в народе да не учит. Аще же обрящется, да престанет от епископства и презвитерская действует.

Епископ, во инем граде в народе уча, понеже гордости и буести ради преобидит ту сущаго епископа, яко тщася посрамити и уничижити и чюждий престол себе обручити, по достоянию да престанет таковый от епископства, иже бо чюждих желает, своих лишен будет, и на презвитерское место свести того, и презвитерская да действует. (л. 763 об.)³⁷⁸³ И назнаменай се, когда епископ на презвитерское место сводится, ибо 29-е правило Халкидонскаго собора святотатство отнюдь нарицает, еже епископа на презвитерский свести степень. И имей се правило преболше Вселенскаго онаго правила.

Такожде аще который епископ или митрополит на своего патриарха таковая же дерзнет, всего святителства да будет лишен³⁷⁸⁴. Аще же нецыи отступят от некоего епископа не греховнаго ради извета, но за ересь его, от собора или от святых отец неведомому сущу, таковии чисти³⁷⁸⁵ и приятия достойни суть (л. 764)³⁷⁸⁶ яко правовернии.

Ни по которому же образу да не взыдет кто на епископию, ея же епископ жив есть. Подобает бо вину изыскати, его же хотят изгнати, и по извержении его другаго поставити. Аще который епископ не радит о своем стаде, ни болезнию, ни церковным повелением, ни патриарховым одержим, вящше шести месяц время³⁷⁸⁷, от своея церкве отшед, сотворит, епископскаго сана и чести да будет чюжд.

Свята правила облобызающа, приемлем и держим, святых апостол и шестих Вселенских соборов. К сим же и поместных и еще же (л. 764 об.)³⁷⁸⁸ и святых отец наших, яко единаго Святаго Духа вдухновена. Их же прокляша, проклинаем, их же извергоша, изметаем и их же отлучиша, отлучаем, им же запретиша, запрещаем.

Зриши ли, колик собор святых апостол и святых отец того окаяннаго Крутицкаго митрополита измещет и проклятию предает. Им же и мы, воследовав, глаголем, есть и буди, якоже святых апостол правила и святых отец святый седмый Вселенский собор утвердиша. Их же прокляша, проклинаем, их же извергоша, изметаем и их же отлучиша, отлучаем, им же запретиша, запрещаем.

(л. 765)³⁷⁸⁹ Виждь, яко не нам и святей Церкви сотворив статье беззаконный той прелютой человек, но и самому Богу и всемножеству святых, да не чюдится никто ж долготерпению Божию, яко не мстит злодейства его. Хощет Бог, всесовершенно в день Судный отмстит, якоже и глаголет: Слово, еже заповедах, то судит ему в день Судный. По писаному: Уклоняющая же ся в развращение отведет Господь с творящими беззаконие. Ниже дивися, яко проклят, и не бысть ему ничто же, ибо и Господь, прокля Вивсаиду и Хоразин и Капернуам, до ада осуди, и не сниде, якоже Содома и Гомор, яко и не приемшыя грады и домы, апостол (л. 765 об.)³⁷⁹⁰ и прочих учитель, прокля и паче содомлян осуди, глаголя: Глаголю³⁷⁹¹ бо вам, яко содомляном в день той отраднее будет, неже граду тому. И ко учеником глаголя, рече: Аминь, глаголю вам, елика свяжете на земли, будут связана на небеси, и елика аще разрешите на земли, будут разрешена на небеси. Якоже и по воскресении явлься, рече учеником: Мир³⁷⁹² вам, якоже посла Мя Отец, и Аз посылаю вы. И се рек Духу и глагола им: Приимите Дух Свят, им же отпустите грехи, отпустятся им, и им же держите, держатся.

Разумей, невременну быти связанию, ниже в сем веце мсти воздаяние по клятве скоро (л. 774)³⁷⁹³ нападати, но вечней и мучителнейшей. Якоже бо доброта онаго века несравнена есть нынешняго века по божественному апостолу, еже ни око виде, ни ухо слыша, ни на сердце человеку не взыде, яже уготова Бог любящим Его. Тако и муки зело прелютейши от сих временных и вечны, якоже сам Господь свидетельствует: Вверзите, рече, во тму кромешную, ту будет плач и скрежет зубом. А еже плач и скрежет лютость мучную являет, никто ж бо плачет или зубы скрежещет, аще не от прелютости болезненыя угрызаем будет. Притча богатаго да научит: Капли единыя желаше на устужение языка за все свое веселое житие века сего, еже (л. 774 об.)³⁷⁹⁴ остави. Тем же и Господь, егда непокоривым жидом, укоряющим Его и глаголющим³⁷⁹⁵: не добре ли мы глаголем, яко самарянин еси Ты и бес имаши? Отвеща им, глаголя: Аз беса не имам, но чту Отца Моего, и вы не чтете Мене. Аз не ищу славы Моея, есть бо ищу и судя.

Зри же ми зде, яко они убо тако хулят и, Той же беззлобне о Себе досады их терпит. Егда же убо сыны Божия себе глаголаху, напрасно их обличает, истину отмщая. Вы убо, рече, зане чту Отца Моего, укоряема от вас. Оклеветающаго отца вашего быти, сего ради Мя безчествуете. Но аще (л. 775)³⁷⁹⁶ и Аз себе не отмщу, но терплю досаждаем, не мните без отмщения оставитися таковой досаде. Есть бо Отец, иже Мене отомстит. Сего ради яко досаждаема того Аз отмщаю и терплю вам, творящим Себе сыны Онаго, не уподобившеся делы ни в мале. Моея же славы есть ищай, и не токмо ищай, но и судити могий, и осудит безсловесне досадивших Ми. Сего бо ради, рече, есть ищай и судяй.

Тако и иже мстителем Божественых догмат есть мстяй и судяй, рекий³⁷⁹⁷: Аще свяжете на земли, будет связано на небеси. Не рече бо, иже свяжите на земли, будет связано на земли, (л. 775 об.)³⁷⁹⁸ но будет связано на небеси. По сему разумей, не в нынешнем веце на таковых связаных, то есть проклятых, казни находити, но в будущем.

Сего ради июдеом рече Господь³⁷⁹⁹: Аминь, аминь, глаголю вам. Аще кто слово Мое соблюдет, смерти не имать видети вовеки. И инде паки рече: Слушаяй словесе Моего и веруяй пославшему Мя, имать живот вечный. И инде: И слово Мое несть Мое, но пославшаго Мя. И паки: Той Ми заповеда, что реку или что возглаголю, и слово Его что есть. Слушаяй бо, рече, вас, Мене слушает, и отметаяйся вас, Мене отметается, и отметаяйся Мене, отме(л. 776)тается³⁸⁰⁰ и пославшаго Мя. А отметаяйся Отца и Сына не будет без муки. Тако кто беззаконнику запрещает заповедию Божиею, той же послушает запрещения, без муки не будет. За единаго ставленика попа или диакона или некоторое строение сотворшему в чюжей епископии, от всего измещут и с поставленым от него.

Не поставляти от чюждаго предела, ни в пределе. Аже без воли того мест епископа се сотворит, с поставленым от него и сам не поставлен.

Такоже³⁸⁰³, якоже и третиенадесят правило сего собора, и се правило глаголет, еже коемуждо епископу в своем пределе владети и поставляти презвитеры и диаконы, во ин же предел не ити, ни поставити презвитера, ни ино что епископское творити све неволи епископа предела того. (л. 777)³⁸⁰⁴ Аще же дерзнет и сотворит что таковое, да будет извержен и повинен и поставленый от него презвитер или диакон.

Приемляй³⁸⁰⁵ чюждаго причетника и поставляяй с поставленым зде, и сам да извержется.

Никто же от причетник без воли своего епископа во иную церковь причтен быти мощен есть. Аще который епископ чюждаго причетника приимет без отпустныя грамоты своего епископа и в свою церковь причтет, аще в том сану, в нем же бе имать его. Аще в болший степень поставит его, рекше презвитера (л. 777 об.)³⁸⁰⁶ или диакона, да извергутся оба. А колми паче много сотворшему, о таковых убо и Господь рече: Аще рука твоя или нога твоя соблажняет, отсецы ю и верзи от себе, уне бо есть со единою рукою или ногою внити в живот вечный, неже две руце имуще, ввержену быти во тму кромешную, идеже червь их не умирает и огнь не угасает. Аще ли не отсечется таковый гнилой уд, нужда будет и всему телеси ввержену быти во тму кромешную, идеже огнь их не угасает и червь не умирает, то есть елицех попов и дияконов поставит и елицех тии крестят (л. 778)³⁸⁰⁷, понеже якоже той не святитель, тако и посвящени от него не посвящени, и крещени от них, не крещени, якоже выше о сем явлено есть.

Но паки к тебе, списателю лжи возвратимся. Написано в 13 главе в 4 статье³⁸⁰⁸: А на которых служилых людех учнут искать исков своих духовнаго чину люди и монастыри, а в челобитных их будут написаны имена архимандритов и игуменов и келарей и казначеев и старцов и попов и дьяконов, и били будет и безчестили и грабили их самих или им самим какие обиды чинили, и в тех искех, (л. 778 об.)³⁸⁰⁹ где челобитье, и иноческаго и священническаго чину по преданию святых апостол и по правилом святых отец быти жеребью, а крестному целованью не быть для того, толко архимандриту и игумену и попу и дьякону или в их место кому крест целовать, и тому не священствовать.

Рцы ми, лжесписателю, в которых апостолских преданиох и святых отец правилех о сем писано, еже священнаго чину быти жеребью, а крестному целованью не быть, аще и обо чюжде всякоя правды, якоже крест целовать, такожде и жребий.

Мы же православных святых апостол (л. 779)³⁸¹⁰ предания и святых отец правилах таких отчюжденых всякоя правды законов не знаем, еже бы пред мирскими судиями священнаго чину митрополитом и архиепископом и епископом, архимандритом и игуменом и попом и дьяконом и прочим причетником и монахом судится, и по суду жеребью быти или крест в роте христаином целовать. Но паче имамы противны твоим несведомым, о еже в суд к мирским судьям священнаго чину ходити и креста в роте на праве или на криве не целовати, ниже жребию быти. Но от твоих ложных признаваем по писаному Господем (л. 779 об.)³⁸¹¹ нашим Иисус Христом. Иже, рече, аще ин приидет во имя свое, того приимете. И паки: Вы отца вашего диавола и похоти отца вашего творите. И паки: Блюдитеся, рече, да не прелщени будете, мнози бо приидут во имя Мое. И инде рече: Востанут бо лжехристи и лжепророцы, и не послушайте их. Якоже и Деяние книга повествует, еже о Павле: Тем же свидетельствую вам во днешний день, яко чист аз от крове всех. Не обинух бо ся, еже не сказати вам волю Божию. Таже особно рече: Внимайте убо себе и всему стаду, в нем же (л. 780)³⁸¹² вас Дух Святый постави епископы пасти Церковь Господа Бога, Ея же снабде кровию Своею.

Зри зде, кому рече: Пасти стадо Христово, в нем же вас Дух Святый постави епископы пасти Церковь Божию, Ея же снабде кровию Своею. Тебя же кто постави пасти стадо Христово или Церковь Божию, якоже и инде той же божественный апостол: Вы³⁸¹³ же есте тело Христово и уди от части. И овех убо положи Бог во Церкви первее апостолы, второе пророки, третие учителие и прочее.

И инде рече: И³⁸¹⁴ Той дал есть овы убо апостолы, овы же пророки, овы благовестники, овы же пастыря и учителя к совершению святым (л. 780 об.)³⁸¹⁵ в дело служения, в создание тела Христова, еда вси апостоли, еда вси пророцы, еда вси учителие и прочее.

О тебе же и о подобных тебе той же божественный апостол прорече: Аз³⁸¹⁶ бо вем се, яко по отшествии Моем внидут волцы тяжцы в вас, не щадяще стада, и от вас самех востанут мужие, глаголюще развращеная.

Како же се не развращена, еже пишешь в 13 главе в 6-й статье: А³⁸¹⁷ будет которые истцы или ответчики мирские люди учнут бити челом, чтобы духовнаго чину людей в ыскех вместо веры и жеребья допрашивать патриарху и митрополитом, (л. 781)³⁸¹⁸ архиепископом и епископом священническаго чину по священству, а иноков по иноческому обещанию, и тем бы судные дела вершить, и тем мирским людем, и истцом и ответчиком, с священническим и иноческим чином дать на волю, чего они похотят, по жеребью ли или по апостолскому допрашиванью, и к тем скаскам мирским людям велеть руки прикладывать да по тому и дела вершить.

Где ты, суемудре, таковое безчиние беззаконное изобрел, еже судити мирскому человеку священнаго чину, патриарха и митрополитов и архиепископов и епископов и архимандритов и игуменов и попов (л. 781 об.)³⁸¹⁹ и дьяконов и прочих причетников, и вместо веры и жеребья допрашивать патриаху или митрополиту или архиепископу и епископу священнаго чину по священству, а иноков по иноческому обещанию? Не подобно овце пастырю указывать, но паче слушать по Божественей заповеди: Слушаяй вас, Мене слушает. И повиноватися по апостолу, а не повиновати. Братие, рече, повинуйтеся наставником вашим. И прочее.

Послушай, суемудре, и безумных безумнее, аз ти покажу о суде на митрополитов и архиепископов и епископов и попов и дьяконов (л. 782)³⁸²⁰ и на прочих причетников, яко не точию простым людем достойно есть судити митрополитов или архиепископов и епископов, но един митрополит архиепископу или епископу не может судити. Такожде и един архиепископ или епископ не может судити попу и диакону.

Оклеветаем³⁸²¹ епископ и позываем на суд, и не послушая дващи и трищи, двема епископома да позван будет. Аще же не приидет, якоже хощет, собор да осудит таковаго.

Оклеветаема епископа о некоем прегрешении от достоверных мужей и позываема на судище и (л. 782 об.)³⁸²² не послушающу, не тако вскоре подобает собору осудити таковаго, но и дващи и трищи позвати того, и да посылается по нь на коемждо позвании по два епископа. Аще же пребудет небрегий и не приидет на судище, да испытает вину по единей части собор и по подобию вины достойно да осудят его. Да не мнится избыти³⁸²³ суда беганием.

Епископа³⁸²⁴, в некоей вине суща, аще не весь собор области тоя, обаче дванадесять епископ да судят. Презвитера же шесть и диакона трие.

Аще ли на епископа будет клевета о коем (л. 783)³⁸²⁵ любо гресе, подобает всея области епископом судити того собором. Аще ли несть мощно всем снитися, обаче дванадесять епископ да судят, меньше же сего да не будет. Презвитера же о гресе оклеветаема, им же есть конечное извержение, шесть епископ да судят, седмый же свой ему епископ. Диакона же три епископи и свой ему четвертый. И тако истязаются вины их и судими бывают.

Того же святаго собора правило 20.

Презвитеру³⁸²⁶ оклеветаему ближних епископ 6 и сего седмый да разсмотрят о нем, диакона же три и 4-й свой ему да судят, (л. 783 об.)³⁸²⁷ прочая же причетники и сам един да истяжет.

Се речено есть и во 12-м правиле сего собора, аще некая клевета будет на презвитера, шесть епископ да судят ему, и свой ему с ними епископ да будет сразсмотритель. Диакона же трие да судят, и четвертый свой ему епископ. Прочии же вси причетницы, ниже сущии от диакон, и от единаго своего епископа да судятся, оних же гресех оклеветаеми бывают.

Един³⁸²⁸ епископ своим судом да не отмстит.

Не токмо единаго епископа суд не довлеет, но и двою не довлеет (л. 784)³⁸²⁹ на извержение презвитера или диакона. Но аще убо есть епископ оклеветаемый, аще несть мощно всем снитися епископом, не менше от двунадесяти епископов да судится. Аще же презвитер, от шести епископ и седмый свой ему, аще ли диакон, от триех епископ и четвертый свой ему. И тако о извержении судими да бывают.

Якоже 12 правило и 20 сего собора повелевает: Да не поставит убо себе судию един епископ на извержение презвитера или диакона, и своего суда разумом в дело се да не изведет, рекше, сам един да не извержет. Аще же есть ины причетники судими, (л. 784 об.)³⁸³⁰ мнии честию суще от диакона, на таковых власть имать судити един места того епископ, якоже на конце 20-го правила сего собора повелевает.

Не³⁸³¹ подобает по сем ни от двою, ни от триех и о греховней вине судиму епископу извержену быти, но множайшаго собора разсудом, ту сущу и митрополиту, якоже и апостолская правила повелеша.

Понеже отци сего собора обретоша епископа Вострьскаго Гевадиа, от двою епископу извержена бывша от сана, и в его место Агапиа по(л. 785)ставлена³⁸³² бывша епископом, убоявшеся, да не будет потом напоследок таковое дело, хотящее быти, утвердиша и повелеша, оклеветаему сущу епископу о гресех и дошедшу ко извержению, не от двою или от триех епископ судиму быти, но аще есть мощно от всех сущих во области епископ. Аще ли ни, поне от многих, якоже да не будет число менше двунадесять епископ, якоже и второенадесять правило в средце собора сказует.

Причетницы между собою распрю имуще, аще оставльше своего епископа, к мирским (л. 785 об.)³⁸³³ судиям приступят, по правилом вину да приимут, причетницы же, аще имеют что на епископа, да ожидают собора. Аще же епископи на митрополита Константиняграда патриарху да возвестят.

Аще причетник имать нечто на причетника, не подобает ему судитися пред мирскими судиами, но от своего епископа. Аще же оставльше своего епископа к мирскому судищу приступят, по правилом запрещение да приимут. Такоже и причетник, аще имать нечто на своего епископа, да приходит к митрополиту страны тоя, егда в реченое время (л. 786)³⁸³⁴ соберутся к митрополиту всея области его епископи, тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится. Под ним же суть епископи и митрополити всех областей страны тоя или от патриарха Константиняграда судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть.

(л. 786 об.)³⁸³⁵ От свитка новых заповедей Иустиниана царя глава 57.

Аще³⁸³⁶ нецыи преподобнии епископи того же собора, рекше от единыя области, распрю некую имеют друг к другу или о церковных местех, или о иных неких вещех, первое митрополит их с другими епископы от своего собора таковую вещь да судит. И аще не пребудета оба суперника в сужденых, тогда преблаженный патриарх того правления между ими да разслушает и тако да повелит, якоже церковным правилом и законом подобно, ни единому же супернику противу суду его глаголати могущу.

(л. 787)³⁸³⁷ Того же Иустиниана царя глава 58.

Аще³⁸³⁸ же причетник или ин некто вину имать на епископа, первее преподобный митрополит области тоя по священным правилом и по нашим законом таковую вещь да разсудит, и аще кто проречет сужденая, к преблаженному епископу и патриарху вещь возвестити, и той подобный тому вдаст конец. Аще же на митрополита имать что епископ или причетник или ин кто, патриарх того правления подобным образом вещь да судит. По всяких же винах или от своих митрополит или от патриарх или от инех киих любо судей епископи судятся. (л. 787 об.)³⁸³⁹ И того ради по правилом святых апостол и святых отец на коеждо лето бывати собором.

Дващи³⁸⁴⁰ в лете епископи да собираются церковных ради вещей и Божественых повелений, первое убо в четвертую неделю по Пасце, второе же перворетия³⁸⁴¹ октября³⁸⁴² во вторый на десять день.

Сие убо правило преславных апостол повелевает дващи в лете собору быти. Но обаче се оставлено бысть, ибо осмое правило Шестаго собора, иже в Трулле полатнем, и шестое, иже в Никеи, Втораго собора единою в лете повелевают в коейждо области от всех епископ собору быти, о (л. 788)³⁸⁴³ церковных вещех и о Божественых повелений стязаний и о разрешении недоуменных и неразумных вин. И аще который епископ некия или епитемиями тяжкими, сиречь запрещении, или отлучением связал, да и о таковых вещех разсудят вси епископи. Время же едино собору уставиша между Пасхою и между месяцем октябрем, перворетии бо, по еллински и римски октябрь сказается.

Дважды³⁸⁴⁴ в лете, июня месяца и сентября, бывати собору, собиратися митрополитом к патриархом (л. 788 об.)³⁸⁴⁵ и епископом к митрополитом и истязовати вины, еже епископи и причетници и мниси друг к другу имеют, о вере же и о правилех и о церковных вещех и о инех, и яже чрез правила согрешаемая, исправляти. Властели же и чинове, не нападающии на митрополиты и на епископы, прелагающыя время творити соборы или не возвещающе церкви, конечнее мучими будут.

Веруеши ли сим, яко есть истина? Вем. Яко возглаголеши, верую, и аще веруеши, почто всуе враждуеши на святую Церковь? Аще ли же не веруеши сим, не погрешит той истины, аще (л. 789)³⁸⁴⁶ кто изречет, яко несть христианин и клятве повинен по правилом и списанием твоим, якоже и вси еретицы и развратницы Божественых правых повелениих, якоже приточник глаголет: Сердце безумных сопротивится клятвам.

Да ты же пишешь в 14 главе в 1-й статье о крестном целовании.

Которым Московскаго государства всяких чинов руским людем доведетца по судным делам изо всех приказов крест целовати, и им или за них людем их крест целовати в розных исках трожды. А возрастом бы те люди были, (л. 789 об.)³⁸⁴⁷ кому крест целовать, в дватцеть лет, а менши дватцети лет не целовать и ко кресту таких не припускать. А у кого таких людей не будет, и им за себя целовать крест целовать самим.

А будет кто сам или за кого люди его поцелуют крест в розных искех трожды, а после того будет кто учнет на нем чего искать, или он сам на ком учнет чего искать на нем или он сам на ком учнет чего искать, а по тем делам дойдет до веры, и похочет он в ыстцове или в своем иску крест целовати в четвертые, и то дело вершить сыском, а крестнаго целованья в том деле ему не давать. (л. 790)³⁸⁴⁸ А будет про то дело сыскать нечем, и то дело розымать пыткою.

А которым людем истцом или ответчиком доведется крест целовать и ко кресту приводить самим, а людей у них нет, и те истцы и ответчики сами будут менши дватцети, лет в пятнатцеть, а переменится им будет неким, и тем исцом и ответчиком поневоле крест целовать и ко кресту приводить самим, хотя кто и менши дватцети лет. А менше пятинатцети лет никому креста не целовать, а целовати за них крест тем, кто за них в суде будет. (л. 790 об.)³⁸⁴⁹ А наемным людем и подставою креста не целовать и ко кресту не приводить никоторыми делы.

А быть у крестнаго целованья дворянину да подьячему из сотен целовалником и прочее безумное списание по писаному: Яже сердце его собра беззаконие его.

Множицею уже о суде рекохом и ныне не обленимся противо твоего нечестия благочестия показати. И глагола³⁸⁵⁰ Господь вся словеса си к Мосиею, глаголя: Аз есмь Господь Бог твой, Бог ревнив, отдая грехи на чада до третияго и до четвертаго рода ненавидящих Мене, творя ж (л. 791)³⁸⁵¹ милость в тысящих любящим Мя³⁸⁵² и снабдящим заповеди Моя. Не приемли имени Господа Бога твоего всуе, не очистит бо Господь прилагающих имя Его туне. И рече Господь к Моисею: Се рцы дому Яковлю и возвести сыном Израилевым. Вы весте, яко с небесе глаголах к вам, лицем к лицу, на горе из среды огня. И глагола³⁸⁵³ Моисей всему Израилю и рече к ним: Послушай, Израилю, оправдания и суды. Елика Аз глаголю во уши ваши во днешний день, да ся научите их и снабдите творити я. Господь Бог ваш завеща вам завет в Хориве не одным отцем вашим, но и вам. И заповедах³⁸⁵⁴ судиям вашим, (л. 791 об.)³⁸⁵⁵ в то время глаголя: Разсуждайте между братиею своею³⁸⁵⁶ и судите по правде между мужем и братом его и между пришелцом. Не зрите лица³⁸⁵⁷ в суде, по малу и по велику судиши, не сумняся лица человеча, суд бо Божий есть. Иже аще жестока³⁸⁵⁸ будет у вас, принесите до Мене и да слышу я. И да не сотворите неправды³⁸⁵⁹ в суде, не презри лица нищаго, ни возри на лица могущаго, по правде да судиши ближнему твоему, да не ходиши лестию по своем языце и не востани на кровь ближняго твоего. Судия³⁸⁶⁰ и книгочия поставиши себе во всех градех твоих, да судят людем твоим (л. 792)³⁸⁶¹ суд праведный³⁸⁶², да не уклонят суда, ниже да зрят на лица, ниже да возмут мзду. Мзда бо ослепляет очи мудрых и отмещет словеса праведных, праведне праведнаго взыщите.

Слышал еси Божественую заповедь и закон даный? Откуду же ты взял такое блядение, еже с суда крест целовати кому самому (л. 792 об.)³⁸⁶³ или вместо господина человеку его?

Послушай, да и еще ти покажу от Древняго и Новаго законов и от прочих Божественых уставов и закон, яко не точию раб за господина крест целовати достоин, но ни в мале или велице во свидетельство приятен есть. Ибо суд судится правым разсмотрением и достоверными свидетели двема или треми, якоже и сам Господь заповеда древле Моисею, а не клятвою решити.

И да не пребудет, рече³⁸⁶⁴, послух един в послушество на человека по всякой обиде и по всякому греху, иже аще согрешит, но при устех двою свидетель³⁸⁶⁵ (л. 793)³⁸⁶⁶ или триех да станет всяко слово³⁸⁶⁷. Аще ли станет послух неправдив на человека, глаголя до него безчестие, да станета оба человека, има же есть пря, пред Господем и пред жерцы и пред судиами, иже будут в тый день, и да испытают их судии прилежно. Се же послух неправеден, послушество ваше неправду и супротивляяся на брата своего. И да сотворите ему, якоже он умысли на брата своего³⁸⁶⁸. Да отвержете злое на вас самех, да и прочии, услышавше, убоятся и не приложат к сему творити словеси сего злаго при вас. Да не пощадит и око твое, но душа³⁸⁶⁹ (л. 793 об.)³⁸⁷⁰ в души место, око во ока место³⁸⁷¹, зуб в зуба место, рука в руки место, нога в ноги место. По всему, иже даст порок на подруга своего, сице воздастся ему³⁸⁷². И человек, иже аще убиет всяку душу человечю, смертию да умрет.

И аще кто сотворит порок ближнему, якоже сотвори ему, такожде и ему сотворят. Изломление во изломления³⁸⁷³, око во ока место³⁸⁷⁴, зуб в зуба место, якоже сотворил еси порок человеку, такожде сотворят и ему.

Иже аще кто ударит человека и умрет, и той смертию да умрет, опра(л. 794)вление³⁸⁷⁵ едино суть пришелцу и населнику. Аще изнеможет³⁸⁷⁶ слово у тебе в суде, между кровию и кровию и между судом и судом, и между внятием и между прением прения, егда словеса судныя во градех твоих будет, то, востав, взыдеши на место. Еже изберет Господь Бог твой призвати имя Его ту, и да вшедши ко жерцом и левитом и к судии, иже будет в тый дни, и взыскавше, возвестят тебе суд. И сотвориши по словеси, еже тя возвестят. И от места, еже ти изберет Господь Бог твой призывати имя Его ту, и да снабдиши зело творити во всем, (л. 794 об.)³⁸⁷⁷ елико закон положится тебе по закону и по суду. Иже, реку, тебе сотворити, да ся не уклониши от словеси, еже известят тебе, ни на десно, ни налево. И человек, иже сотворит презрение не послушати жерца, предстоящаго служити во имя Господа Бога твоего, или судиа, иже в тый дни будет, да умрет человек той. И да извержеши злое от Израиля, и вси людие, услышавше, убоятся и не безчествуют по сем.

1 2 3 4 5 6 7 8 9 10 11 12 13 14 ... 16 17 18 19 20

<<< Предыдущая страница ... Следующая страница >>>

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 ... 27 28 29 30 <<< Предыдущий вопрос ... Следующий вопрос >>>

¹ РГАДА. Ф. 27. Д. 140. Л. 2–1039. назад

³⁷⁶³ На верхнем поле листа киноварная помета: на 26-й вопрос и ответ.

³⁷⁶⁴ Написано со знаком вставки тем же почерком на правом поле листа.

³⁷⁶⁵ На верхнем поле листа киноварная помета: 26-е возражение.

³⁷⁶⁶ Написано со знаком вставки тем же почерком на левом поле листа.

³⁷⁶⁷ На верхнем поле листа киноварная помета: на 26-й вопрос и ответ.

³⁷⁶⁸ На верхнем поле листа киноварная помета: 26-е возражение.

³⁷⁶⁹ На верхнем поле листа киноварная помета: на 26-й вопрос и ответ.

³⁷⁷⁰ На верхнем поле листа киноварная помета: 26-е возражение.

³⁷⁷¹ На верхнем поле листа киноварная помета: на 26-й вопрос и ответ.

³⁷⁷² Исправлено из: с вене.

³⁷⁷³ На верхнем поле листа киноварная помета: 26-е возражение.

³⁷⁷⁴ На верхнем поле листа киноварная помета: на 26-й вопрос и ответ.

³⁷⁷⁵ На верхнем поле листа киноварная помета: 26-е возражение.

³⁷⁷⁶ Исправлено из: приходящыя.

³⁷⁷⁷ На верхнем поле листа киноварная помета: на 26-й вопрос и ответ.

³⁷⁷⁸ На верхнем поле листа киноварная помета: 26-е возражение.

³⁷⁷⁹ Слова «достойну быти» написаны вместо зачеркнутого «сподобитися».

³⁷⁸⁰ На верхнем поле листа киноварная помета: на 26-й вопрос и ответ.

³⁷⁸¹ На верхнем поле листа киноварная помета: 26-е возражение.

³⁷⁸² На верхнем поле листа киноварная помета: на 26-й вопрос и ответ.

³⁷⁸³ На верхнем поле листа киноварная помета: 26-е возражение.

³⁷⁸⁴ На левом поле листа помета: зри.

³⁷⁸⁵ Так в ркп.

³⁷⁸⁶ На верхнем поле листа киноварная помета: на 26-й вопрос и ответ.

³⁷⁸⁷ Написано со знаком вставки тем же почерком на правом поле листа.

³⁷⁸⁸ На верхнем поле листа киноварная помета: 26-е возражение.

³⁷⁸⁹ На верхнем поле листа киноварная помета: на 26-й вопрос и ответ.

³⁷⁹⁰ На верхнем поле листа киноварная помета: 26-е возражение.

³⁷⁹¹ На левом поле листа помета: Лук. 10. Матф. 16, 18.

³⁷⁹² На левом поле листа помета: Иоан. 20.

³⁷⁹³ В ркп. перепутаны листы. На верхнем поле листа киноварная помета: на 26-й вопрос и ответ.

³⁷⁹⁴ На верхнем поле листа киноварная помета: 26-е возражение.

³⁷⁹⁵ На левом поле листа помета: Иоан. 8.

³⁷⁹⁶ На верхнем поле листа киноварная помета: на 26-й вопрос и ответ.

³⁷⁹⁷ На паравом поле листа помета: Матф. 16, 18; Иоан. 20.

³⁷⁹⁸ На верхнем поле листа киноварная помета: 26-е возражение.

³⁷⁹⁹ На левом поле листа помета: Иоан. 8.

³⁸⁰⁰ На верхнем поле листа киноварная помета: на 26-й вопрос и ответ.

³⁸⁰¹ На правом поле листа помета: лист 9.

³⁸⁰² На верхнем поле листа киноварная помета: 26-е возражение.

³⁸⁰³ На левом поле листа помета: лист 70.

³⁸⁰⁴ На верхнем поле листа киноварная помета: на 26-й вопрос и ответ.

³⁸⁰⁵ На правом поле листа помета: лист 182.

³⁸⁰⁶ На верхнем поле листа киноварная помета: 26-е возражение.

³⁸⁰⁷ На верхнем поле листа киноварная помета: на 26-й вопрос и ответ.

³⁸⁰⁸ На правом поле листа помета: лист 182.

³⁸⁰⁹ На верхнем поле листа киноварная помета: 26-е возражение.

³⁸¹⁰ На верхнем поле листа киноварная помета: на 26-й вопрос и ответ.

³⁸¹¹ На верхнем поле листа киноварная помета: 26-е возражение.

³⁸¹² На верхнем поле листа киноварная помета: на 26-й вопрос и ответ.

³⁸¹³ На правом поле листа помета: 1 Кор. 13.

³⁸¹⁴ На правом поле листа помета: Ефес. 4.

³⁸¹⁵ На верхнем поле листа киноварная помета: 26-е возражение.

³⁸¹⁶ На левом поле листа помета: Деян. 43.

³⁸¹⁷ На левом поле листа помета: лист 183.

³⁸¹⁸ На верхнем поле листа киноварная помета: на 26-й вопрос и ответ.

³⁸¹⁹ На верхнем поле листа киноварная помета: 26-е возражение.

³⁸²⁰ На верхнем поле листа киноварная помета: на 26-й вопрос и ответ.

³⁸²¹ На правом поле листа помета: лист 20.

³⁸²² На верхнем поле листа киноварная помета: 26-е возражение.

³⁸²³ Исправлено из: избыв.

³⁸²⁴ На левом поле листа помета: лист 122.

³⁸²⁵ На верхнем поле листа киноварная помета: на 26-й вопрос и ответ.

³⁸²⁶ На правом поле листа помета: лист 127.

³⁸²⁷ На верхнем поле листа киноварная помета: 26-е возражение.

³⁸²⁸ На левом поле листа помета: лист 160.

³⁸²⁹ На верхнем поле листа киноварная помета: на 26-й вопрос и ответ.

³⁸³⁰ На верхнем поле листа киноварная помета: 26-е возражение.

³⁸³¹ На левом поле листа помета: лист 172.

³⁸³² На верхнем поле листа киноварная помета: на 26-й вопрос и ответ.

³⁸³³ На верхнем поле листа киноварная помета: 26-е возражение.

³⁸³⁴ На верхнем поле листа киноварная помета: на 26-й вопрос и ответ.

³⁸³⁵ На верхнем поле листа киноварная помета: 26-е возражение.

³⁸³⁶ На левом поле листа помета: лист 325.

³⁸³⁷ На верхнем поле листа киноварная помета: на 26-й вопрос и ответ.

³⁸³⁸ На правом поле листа помета: лист 326.

³⁸³⁹ На верхнем поле листа киноварная помета: 26-е возражение.

³⁸⁴⁰ На левом поле листа помета: лист 10.

³⁸⁴¹ Так в ркп.

³⁸⁴² Вписано тем же почерком на левом поле листа.

³⁸⁴³ На верхнем поле листа киноварная помета: на 26-й вопрос и ответ.

³⁸⁴⁴ На правом поле листа помета: лист 355.

³⁸⁴⁵ На верхнем поле листа киноварная помета: 26-е возражение.

³⁸⁴⁶ На верхнем поле листа киноварная помета: на 26-й вопрос и ответ.

³⁸⁴⁷ На верхнем поле листа киноварная помета: 26-е возражение.

³⁸⁴⁸ На верхнем поле листа киноварная помета: на 26-й вопрос и ответ.

³⁸⁴⁹ На верхнем поле листа киноварная помета: 26-е возражение.

³⁸⁵⁰ На левом поле листа помета: 2 Моис. 20.

³⁸⁵¹ На верхнем поле листа киноварная помета: на 26-й вопрос и ответ.

³⁸⁵² На правом поле листа помета: ниже 34.

³⁸⁵³ На правом поле листа помета: 5 Моис. 5.

³⁸⁵⁴ На правом поле листа помета: 5 Моис. 1.

³⁸⁵⁵ На верхнем поле листа киноварная помета: 26-е возражение.

³⁸⁵⁶ На левом поле листа помета: Иоан. 7.

³⁸⁵⁷ На левом поле листа помета: 1 Петр 1.

³⁸⁵⁸ Так в ркп.

³⁸⁵⁹ На левом поле листа помета: 3 Моис. 19; 5 Моис. 1 и 16; Сирах 42; Ияков 5.

³⁸⁶⁰ На левом поле листа помета: 5 Моис. 16.

³⁸⁶¹ На верхнем поле листа киноварная помета: на 26-й вопрос и ответ.

³⁸⁶² На правом поле листа помета: 2 Моис. 23; 5 Моис. 19, выше 1; Притч. 24; Сирах 42; Иоан. 7; Ияков 2.

³⁸⁶³ На верхнем поле листа киноварная помета: 26-е возражение.

³⁸⁶⁴ На левом поле листа помета: 5 Моис. 19; 4 Моис. 35, выше 17.

³⁸⁶⁵ На левом поле листа помета: выше 17.

³⁸⁶⁶ На верхнем поле листа киноварная помета: на 26-й вопрос и ответ.

³⁸⁶⁷ На правом поле листа помета: Матф. 18; Иоан. 50; 2 Кор. 13; Евреом 5.

³⁸⁶⁸ На правом поле листа помета: Притч. 9.

³⁸⁶⁹ На правом поле листа помета: 2 Моис. 21.

³⁸⁷⁰ На верхнем поле листа киноварная помета: 26-е возражение.

³⁸⁷¹ На левом поле листа помета: 3 Моис. 24; Матф. 70.

³⁸⁷² На левом поле листа помета: 3 Моис. 24; 2 Моис. 21.

³⁸⁷³ На левом поле листа помета: 2 Моис. 21; Матф. 5.

³⁸⁷⁴ На левом поле листа помета: 3 Моис. 24; Матф. 70.

³⁸⁷⁵ На верхнем поле листа киноварная помета: на 26-й вопрос и ответ.

³⁸⁷⁶ На правом поле листа помета: Моис. 7; Парал. 19.

³⁸⁷⁷ На верхнем поле листа киноварная помета: 26-е возражение.

Домашняя страница
священника Владимира Кобец